5
Lei 'Auvea yana bakula faifaina
1 Mad 21:33; Mak 12:1; Luk 20:9'U na vainenega bega lei tamu a na leieni iaku mogitana yana bakula faifaina.
Iaku yana bakula i 'idewai fwayafwaya 'atumaina 'waineye 'oya siaina deba'aineye.
2 Yana tanoga i kabunagia,
mulieta kalefa waifeidi 'atumaidi i tufedi.
I 'a'avana 'eba lu'atu'ai i yogoni
wata kileu 'waidiega kalefa 'eba vatanitani i 'idewai.
Folova matatabuna i 'a'avana, i lukamata 'aile'wa 'atumaina faifaina,
siwe 'aile'wa 'ana tutuye kalefa vuagidi sakoidi wata yuyudi i veluagadi.
3 Tutuya de'e iaku i vo, 'Omi me Ielusalema wata me Iuda 'wa na venua'ivina
yau wata yaku bakula faifaina.
4 Ava'ai wata a da 'idewai bega vuaga dibidibidi a da veluagadi?
Awale vuaga yuyuna wata sakoina i veleku,
we'e vuaga 'atumaina bani'odi yaku nuanua, kebu i da velekuga?
5 A na vonemi ava'ai a na 'idewai yaku bakulanina 'waineye.
Babala a bakula-viviviliga a na talagidi,
'ana kali a didigiga a na tuweaweali
bega 'aisaya walawala'ai i na luku i na 'ania wata i na 'ivesakoi.
6 A na vesivilai bega i na vedigaba,
kebu wata tamu aitoi bei i na folofolova,
gawa i na luludi wata mosomoso lovelovenidi i na ve'alatabotabo.
Waowa a na talabodeni
bega 'wei kebu i na 'weiga.”
7 Tutuya de'e vona-awatabainina a na kiavemagetai.
Me Isileli 'asa'aiana 'Auvea yana bakula, kumanina tomia abama yadi Tovemata'ai'ai.
Me Iuda bani'odi yana bakula 'atumaina, yana 'eba sosoana.
Nuanuana yadi sauluva 'atumai'avana,
siwe luvewafa i 'iseni.
Nuanuana sauluva tonovidi,
siwe taidaida 'aivaita faifaina i nogai.