Souyagi
'Eba kiavemageta
Basenadiotoga Iakobo ma yana 'aila'a i nago 'awalawa Itifita, bei i miamia. Siwe 'adi 'aila'a i vefue-'afo'afo bega me Itifita i kololoyedi i na nunago me Isileli i na vetoketoke-'iawedi i na leodi. Begaidi i veimeyedi i na vetofolova-maimaiga faifaidi.
Malamala fuedi i 'a'ava Yaubada Mosese i goleni i na nago i na yavudi mia vitana 'wainega. Buki de'e nageneye i veveifufu me Isileli yadi souyagi Itifita 'wainega faifaina, bega bukinina 'ana wagava i goleni Souyagi.
Buki de'e nageneye nani 'adi 4 bwaikidi faifaidi i veveifufu.
1) Daba 1-14 Yaubada yana tomotoga i 'ita'ita'iedi i souyedi Itifita 'wainega.
2) Daba 15-19 Yaubada yana tomotoga i nago 'Oya Sainai 'waineye sali'avu'avuyeamo.
3) Daba 20-24 Yaubada yana veakutagona i 'idewai yana tomotoga taiadi, veimea wata awave'eda'eda i veledi.
4) Daba 25-40 Me Isileli Vadavada Tabutabuna i yogoni Yaubada 'ana 'odu'odu wata 'ana subia faifaina.
1
Iakobo tubunavo i vefue Itifita 'waineye
1 Nag 46:8-27Iakobo tamu 'ana wagava Isileli, natunavo side 'adi wagava, kumanidiavo ma yadi 'aila'avo taiadi i nagoi Itifita;
2 Lubeni, Simioni, Livai, Iuda,
3 Isaka, Sebuloni, Beniamina,
4 Dani, Nafitalai, Gada wata Asa.
5 Iakobo yana 'aila'avo 70 'adi luvetubama we'e Iosefa 'akonadi Itifita bei i miamia.
6 Bega Iosefa, tatanavo wata taina, lakatanina matatabuna yawaidi i 'a'ava. 7 Fol 7:17We'e me Isileli i venatuvea'wa bega 'adi 'aila'a i vefue-'afo'afo wata i vetoketoke nika fwayafwaya i luvaia.
Felo me Isileli vita i veledi
8 Fol 7:18Malamala fueotogidi i 'a'ava, mulieta Itifita 'waineye tamu Felo*Felo me Itifita yadi wagava Kini faifaina. 'ivauna i laka i vetoveimea, we'e Iosefa wata yana folova yadi 'awalaweye kebu i da 'asetaiga. 9 Begaidi yana tomotogavo 'waidie i vo, 'Wa 'iseni, me Isileli 'adi 'aila'a i vebwaika-'afo'afo wata toketokedi mulieta 'ida. 10 Fol 7:19'Ai'edi tamu tutuya 'waineye 'ada gaviavo taiadi ta na vevetalaga, me Isileli 'ada gaviavo i na 'ivaisedi nika yada 'awalawayega i na yavula. Tamu 'eda'eda ta na 'idewai nika 'wainega ta na ve'ilovedi kebu 'adi 'aila'a i na vevebwaikaga.”
11 Begaidi me Isileli i vetofolova-maimaiga me Itifita faifaidi, tove'isakololo i vonedi i na veveimeyedi folova bwaikidi i na 'i'idewadi nika 'waidiega yadi nuanua wata yadi toketokena i na 'ivemweadi. Tutuyanina 'waineye Felo me Isileli i veimeyedi 'atamana 'ailuga Fitomu wata Lamesisi i yogonidi, yana kukua tulina tulina wata 'ani'ani 'adi 'eba yato. 12 Avinodi vita wata veviga bwaikina i veleveledi siwe me Isileli 'adi 'aila'a i vebwaika-matamatayo'o wata fwayafwaya i luluvaia, begaidi me Itifita i venuafouviga me Isileli 'waidie. 13-14 Begaidi me Isileli yadi mia i vita-'afo'afo, folova vitaotogidi wata sakoiotogidi 'waidie i vetofolova-maimaiga. I lulukakadedi beliki†Beliki tamu vanuga 'ana 'eba 'aiyogona fwayafwaya dekudekuna 'wainega i na tutuya, labia 'etobai 'aitamogana bani'odi. Mulieta i na yatoi i na lalana i na kabuni bega i na fa'alaotogi. Belikinidi 'adi 'eba dekufwatagi fwayafwaya dekudekuna bega yadi vanuga i yogoyogonidi. i 'abi'abidi 'waidiega i 'a'aiyogona wata folova tulina tulina i 'i'idewadi yadi bakula 'waidie.
22 Fol 7:19Mulieta Felo veimea i 'idewai me Itifita 'waidie i vo, Me Ibeliu kwakwama iavetadi i na tubutubuga matatabudi 'wa na tawetawedi Ufa Naeli 'waineye, we'e vevinedi 'wa na bailedi i na miamia.
1:1: Nag 46:8-27
*1:8: Felo me Itifita yadi wagava Kini faifaina.
†1:13-14: Beliki tamu vanuga 'ana 'eba 'aiyogona fwayafwaya dekudekuna 'wainega i na tutuya, labia 'etobai 'aitamogana bani'odi. Mulieta i na yatoi i na lalana i na kabuni bega i na fa'alaotogi. Belikinidi 'adi 'eba dekufwatagi fwayafwaya dekudekuna bega yadi vanuga i yogoyogonidi.