1 Tutuyanina 'waineye tamu tomogo wata tamu vavine Livai*Livai tamu Iakobo natuna. 'ana wauma 'wainega taiadi i nagi. 2 Fol 7:20; Ibu 11:23Bega vavinenina i miana nika kwamana iavetana i tubuga. Vavinenidi natudi i 'iseni kwamana 'ana 'isa 'atumaina, begaidi vanuga nageneye i giveni weta'i 'aitonu i 'i'isave'avini. 3 We'e tutuyanina kebu 'adi fata vanuge i na giveniga, tamu yawana 'imo'imoa 'wainega i yogoni, i 'a'ava i fitai koluta†I fitai koluta 'wainega bega ufa kebu i na susula yawana nageneye. 'wainega. Kwamana nageneye i dodogi mulieta Ufa Naeli lilivaneye i yatoi 'imo'imoa nagediamo i lulubeweni. 4 Kwamana novuna 'ana wagava Miliama 'ani'ieyega i tovoi i vevemata'i'i'ieni ava'ai tamu nani i na souyeni kwamana 'waineye.

5 Felo natuna vevinena i obu Ufa Naeli 'waineye i na toa, we'e yana tofolova vevinedi ufa doleneamo i yabayaba nika i 'isanago yawana i 'iseni 'imo'imoa nagediamo i bewebeweni. Tamu yana tofolova-maimaiga i voneni i nago yawananina i 'ewai i mieni 'waineye. 6 Tutuyanina Felo natuna yawana i yavuya i 'iseni kwamana i 'we'we'wela bega nuana i vekalikalia i vo, De'e tamu kwamana Ibeliu.‡Ibeliu tamu me Isileli 'adi wagava.”

7 Nika Miliama, kumanina kwamananina novuna i souyeni, Felo natuna 'waineye i vo, 'Ana fata a da nago tamu vavine Ibeliu a da vagavaia a da mieni, kwamana i da 'ewai i da vesusuya faifaimu?”

8 Felo natuna i vo, E'e a sosoana, 'u na nago.” Bega kwamana novuna i nago inaotogina i vonedi taiadi i mai 'waineye. 9 Felo natuna i veifufu kwamana inana 'waidie i vo, Kwamana 'wa na 'ewai 'wa na vesusuya faifaiku we'e bola a na tutulimi.” Bega vavine kwamana i 'ewai i vesusuya. 10 Fol 7:21Tutuyanina kwamana i vebwaika, i naweni Felo natuna vevinena i veleni, i fayayeni natuna. Felo natuna i vo, Fai ufayega a silakai begaidi a goleni 'ana wagava Mosese.”

11 Fol 7:23-28Ibu 11:24Malamala fuedi i 'a'ava, Mosese 'akonadi i taulai bega tamu 'aiata i souyeni i nago enavo me Ibeliu i na fogedi, nika i 'isedi me Itifita folova vitadi i veleveledi. Tutuyanina 'waineye i 'iseni tomogo Itifita tamu tomogo Ibeliu i nikenikei. 12 Mosese mulina i 'isadabai bega tomogo Itifita i luvewafai nidula i alai i tavuni.

13 I 'atai Mosese i vilai i nago i 'isedi me Ibeliu 'adi 'ailuga i vevetalaga. Kumanina vetalaga i velamuyaga i voneni i vo, Awale iamu 'u nikenikei?” 14 Tomogonina i tutula i vo, 'Omu aitoi i silakaimu bega 'u na vetoveimea wata 'u na vetovenua'ivina-'atumai 'waimeye? Voke 'u mimai 'u na luvewafaku, bani'odi bogi tomogo Itifita 'u luvewafai.” Mosese i nuani mogitana nika i kololo i vo, Ava'ai a 'idewaiga tomotoga 'akonadi i 'asetai.” 15 Fol 7:29; Ibu 11:27Tutuyanina Felo Mosese valana i nogai nuanuana i na luvewafai, siwe Mosese i dega i nago 'awalawa Midiani, ufa alaalana lilivaneye i miabui bei i miamia.