3
'Awalawanina 'waineye Moses tamu tovelomu taiadi i miamia, mulieta natuna Sifola i nagia.
Yaubada i veifufu Mosese taiadi
1 Mosese lawana 'ana wagava Ietolo me Midiani yadi tovelomu, we'e yana 'aisayavo Mosese i 'i'isave'avinidi. Tamu 'aiata 'waineye lawana yana 'aisayavo taiadi i nago sali'avu'avu 'waineamo nika i le'wa Sainai,* Sainai tamu 'ana wagava Olebi. Yaubada yana 'Oya 'waineye. 2 Fol 7:30-34Bei welavi siaina yauyauvina i 'iseni i 'ala'alata siwe welavinina kebu i da 'ala'alaiga. I 'ise'iseni nika 'Auvea yana anelose i souyeni 'waineye 'ai-'ala'alata 'wainega. 3 Mosese i vo, No'o welavinina 'eba nuavogana 'waikuye. A na nago lilivaneye a na 'isa-'atumaia ava'ai faifaina kebu i da 'ala'alaiga.”
4 Tutuyanina 'Auvea Mosese i 'iseni i le'wa-'afo'afo, nika Yaubada i vegole welavi nagenega i vo, Mosese! Mosese!” I tutula i vo, Yau side.”
5 I vo, Kebu 'u na mai lilivakuye. 'Amu 'ageyafayafa 'u na ta'idi fai bei 'u tovotovoiga fwayafwaya tabutabuna. 6 Yau kumaniku tamamu yana Yaubada wata tubumwavo Ebelamo, Aisake wata Iakobo yadi Yaubada.” Mosese i kololo-'afo'afo begaidi maigina i bwasai fai kebu 'ana fata i na 'isanago Yaubada 'waineye.
7 'Auvea i vo, 'Akonadi yaku tomotoga Itifita nageneye 'adi vita a 'iseni. Yadi taivonavona a nogai nuanuadi 'ita'ita'i tove'isakololo 'waidiega. E'e mogitana, yadi mia vitana matatabuna a 'asetai. 8 Begaidi yau a obuma a na yavudi me Itifita yadi veimea vitadi 'waidiega wata a na vagavaidi 'awalawanina 'wainega i na souyedi i na nago taunidi yadi fwayefwayeye, yadi 'awasasa bwaikidi wata 'eba bakula 'atumaidi 'waineye. We'e 'asiau 'awalawanina 'waineye mali 'aila'a i vili, 'aila'anidi me Kenani, me Aiti, me Amolaiti, me Felesi, me Aiviti wata me Iebusaiti. 9 Tutuya de'e 'waineye me Isileli yadi taivonavona vita i veveluagadi faifaina a nogai wata me Itifita yadi vesauluva-sako 'waidie a 'iseni. 10 Begaidi 'asiau a vevetunemu, 'u na nago Felo 'waineye yaku tomotogavo 'u na vagavaidi 'wa na souyemi Itifita 'wainega.
11 Siwe Mosese Yaubada i voneni i vo, Yau tomogo-'avo'avovo. Kebu 'aku fata Felo 'waineye a na nago me Isileli a na yavudi me Itifita yadi veimea toketokena 'wainega?”
12 Yaubada i vo, Yau 'omu taiadi. Tutuyanina me Isileli taiadi 'wa na souyemi Itifitayega side 'oyanina 'waineye 'wa na 'odu'odu 'waikuye. Naninina i na souyeniga 'u na 'aseta-'atumaia yau kumaniku a vetunemu.”
13 Sou 6:2,3Mosese Yaubada i voneni i vo, 'Ai'edi a na nago me Isileli 'waidie a na vonedi a na vo, Tubudavo yadi Yaubada i vetuneku a mai 'waimie,’ bega i na velutolieku i na vo, Yaubadanina, aitoi 'ana wagava?’ Bani'odi a na voneyedi?” 14 Ve 1:4,8Yaubada Mosese i voneni i vo, YAU MIAMIA-VAGAIKU, we'e side bani'odi 'u na voneyedi me Isileli 'waidie 'u na vo, MIAMIA-VAGAIKU kumanina i vetuneku a mai 'waimie.’ 15 Wata me Isileli 'u na vonedi 'u na vo, YAHWEH†'Ana wagava mogitana vona Ibeliu 'waineye YHWH, i kiluma-vetonovi nika YAHWEH i souyeni. Malamala fuedi i 'a'avana yadi 'eba 'ainana Jehovah, 'ana saivila the LORD vona Dimudimu 'waineye we'e 'ida'e 'Auvea. tubumiavo Ebelamo, Aisake wata Iakobo yadi Yaubada i vetuneku 'waimie.’ 'Aku wagavanina i na 'eno-vagata. Tutuya i mimai 'waidie 'aila'anidi lakata 'aitamogana 'aitamogana wagavanina 'wainega i na nunuave'aviniku.”
Yaubada i souyeni Mosese 'waineye i veifufu i 'a'ava, Mosese i vilai i nago Midiani. Naninidi matatabuna i lu'ivoneyedi tatana Eloni 'waineye, mulieta taiadi i nagoi Itifita. Tutuyanina i le'wa, i nago me Isileli yadi to'edakumeta 'waidie, Yaubada yana nuanua i lu'ivoneyeni. I veifufu i 'a'ava i luku Felo 'waineye i voneni i vo, Yama 'Auvea nuanuana yana tomotoga me Isileli 'u na tauyedi i na nagoi sali'avu'avuye bega ma yadi subia 'aisaya i na velomuyedi i na kabunidi 'waineye.”
Siwe Felo i talabodedi i vo, Kebu 'ana fata a na tauyedi we'e 'asa'aiana bani'odi i na miamia wata i na folofolova.” Begaidi vematavuloga toketokedi Yaubada i 'i'idewadi me Itifita 'waidie, we'e Felo nuafouna i fa'ali kebu me Isileli i da tauyediga. Naninidi toketokedi bani'odi Ufa Naeli i vedayaga, me Itifita yadi 'aisayavo i ve'alawafawafa wata tomogodi i vebonu'ai. Siwe Felo bola kebu me Isileli i da tauyedi bega i na souyedi.