1 Tutuyanina vematavuloganidi vitadi 'Auvea me Itifita i veledi i 'a'ava, Mosese i voneni i vo, 'Asiau yaku vematavuloga 'ana 'eba ve'a'ava a na 'idewai Felo wata yana tomotogavo me Itifita 'waidie nika i na tauyemi bega 'wa na souyemi, we'e mogitana i na lukakademi 'wa na tauya. 2 Tomotoga matatabudi 'u na vonedi iaveta wata vevine ediavo me Itifita i na velu'uiedi 'adi vaigavu 'ai'aiwabudi, vaigavunidi golida wata siliba 'waidiega i 'idewadi.” 3 We'e 'Auvea me Itifita nuadi i taufadi bega me Isileli i nogayedi. We'e yadi to'edakumetavo wata tomotoga matatabudi Mosese i ve'ililibuyeni fai i nuani tamu tomogo bwaikina yadi 'awalaweye.

4 'Auvea i vona'a'avana Mosese i nago Felo 'waineye i voneni i vo, 'Auvea side bani'odi i voneyedi i vo, Lovana 'ana utukamwana 'waineye Itifita a na lukuya. 5 Bega tubu'edakumeta iaveta 'aitamogana 'aitamogana Itifita nageneye matatabudi i na wafa. Felo kumanina yana 'eba veimea 'waineye i miamiaga, natuna 'wainega i na velamu. Mulieta i obu vavine tofolova-maimaiga natudi 'waineye, kumanidiavo witi 'ana to'aitutu. Wata yadi 'aisayavo natudiavo kumekumetadi matatabudi taiadi i na ve'alawafawafa. 6 Tutuyanina 'waineye mogai bwaikaotogina i na souyeni Itifita nageneye. Kebu tamu tutuya basenadi bani'odi i da toke i da vemogai wata 'awaie kebu bani'odi i na sousouyeni. 7 We'e me Isileli 'awasasadie kulukulu i na lovogi, kebu tamu sai'afo 'ou'ou i na la'wau tomotoga 'alo 'aisaya 'waineye, nika 'wainega 'u na 'asetai yau 'Auvea kumaniku me Isileli a yato'idiedi me Itifita 'waimiega.” 8 Wata Mosese i vo, 'Awaie yamu tofolovavo ma yadi ve'ililibu i na maia i na 'odu matakuye i na lukakadeku i na vo, 'Omu wata yamu tomotogavo taiadi 'wa na 'iawema 'wa na nagoi.’ Naninina i na souyeniga nika bei 'a na tauya.” Mosese i nuasako-'afo'afo, Felo 'wainega i souyeni.

9 Siwe 'Auvea Mosese i voneni i vo, Felo i na baila, yamu velu'ui kebu i na nogayeni, nika bei 'eba nuavogana wata 'eba nua'ewa fuedi a na 'idewadi me Itifita 'waidie.” 10 Mosese wata Eloni 'eba nuavogana wata 'eba nua'ewa i 'idewadi Felo mataneye siwe 'Auvea Felo nuafouna i toke i vefa'ali bega me Isileli kebu i da tauyedi yana 'awalawa 'wainega i na souyedi.