1-2 Vei 23:5; Sal 9:1-5; 28:16; VeL 16:1,2Tutuyanina me Isileli bola Itifita i miamia, 'Auvea Mosese wata Eloni i veifufudi i vo, De'e weta'inina 'omi yami weta'i kumekumetana malamala de'e faifaina. 3 Me Isileli matatabudi 'wa na vonedi 'wa na vo, 'Aiata 'ana ve-10 de'e weta'inina nageneye, tomogo vanuga 'aitamogana 'aitamogana 'wainega 'aisaya sifi siaina 'alo goti siaina i na venua'ivineni yana 'aila'avo taiadi faifaidi. 4 'Ai'edi vanuganina 'ana 'aila'a siaina bega kebu 'adi fata 'aisaya mwadodouna i na 'aniaga, i lubwaineni iana lilivaneye i na nuani, 'aisayanina i na veuseni 'adi 'aila'a 'wainega wata 'aitamogana 'aitamogana yana 'ani 'ana 'etowava 'wainega, nika matatabudi i na vesala bega i na 'ani'a'avai. 5 'Aisayanina sifi 'alo goti 'wa na venua'ivineniga iavetana, 'ana malamala 'aitamogana wata kebu bonubonunaga. 'Wa na 'ewai 'wa na yato'idieni enavo 'waidiega. 6 'Wa na 'i'isave'avini 'ana tugusa 'aiata 'ana ve-14 de'e weta'inina 'waineye. Lavilavie, tutuyanina wakalai bola kebu i da si'u'umiga, me Isileli matatabuna yadi 'aisaya i na nikedi. 7 Bega 'aisayanina dayagina i na 'ewai, yadi vanuga 'ana 'awa lilivana wata tabwana i na lusamasamalidi, bei vanuganina nageneye 'aisaya i na 'ania. 8 Lovananina 'waineye 'aisaya i na kabunidi, mosomoso goladi wata beledi kebu 'ana 'eba 'ivebwaikaga taiadi i na 'anidi. *Me Isileli beledi i kabukabuni 'ana 'eba 'ivebwaika 'ana wagava isita. Falawa taiadi i na vilai bega isita i na susula beledi i na 'ivebwaiki. Tutuya de'e, beledinidi i kabunidiga isita taiadi i tawedi, ma'itufa i kabunidiga falawa'ava 'wainega nika beledi yalayalana. 11 Side bani'odi 'wa na 'aniedi. Nagami 'ami talauma 'wa na ve'wesenedi, 'ami wa'ila 'wa na si'i'idi, 'ami 'ageyafayafa 'wa na veagedi wata yami wautogana 'wa na kiave'avinidi. 'Wa na 'ani-matayo'o fai Yau 'Auvea yaku Uvi'agalatagona 'ana tutuya.

12 Lovananina 'waineye a na luku Itifita matatabuna 'waineye, yadi tubu'edakumeta iavetadi tomotoga wata 'aisaya a na leodi. Tutuyanina 'waineye me Itifita yadi yaubadavo a na venani-'avo'avovoyedi bega i na 'asetaku Yau 'Auvea. 13 Dayaga yami vanuga 'waidie i na 'eno'eno, yami tugusa bega tutuyanina dayaganina a na 'iseni nika a na uvi'agalatagoni, bega kebu tamu sai'afo vematavuloga toketokena i na souyeni 'waimie tutuyanina me Itifita a na nikedi. 14 Sou 23:15; 34:18; Vei 23:6-8; Sal 28:17-25; VeL 16:3-8De'e 'aiatanina kebu nuami i na fani 'wa na nuanuani. Tutuya i mimai 'waidie lakata 'aitamogana 'aitamogana 'aiatanina i na sosoaneni wata i na sakasakali yau 'Auvea faifaiku. Tutuya matatabuna 'wa na 'i'idewai i na nagoga kebu i na 'a'avaga.”

15 Wata 'Auvea i vo, 'Aiata 7 nagedie beledi kebu 'ana 'eba 'ivebwaika 'wa na 'ani'ani we'e 'aiata kumekumetana 'waineye isita yami vanugayega matatabuna 'wa na 'ewadi 'wa na tawedi fai 'ai'edi tamu aitoi isita tamu ava'ai taiadi i na 'ania 'aiata 7 nagedie, kumanina 'asa'aiana me Isileli 'waidiega i na 'a'avaotoga. 16 'Aiata kumekumetana wata 'aiata 'ana ve-7 'waidie, matatabumi 'wa na mai 'wa na 'odu'odu 'waikuye. Kebu tamu folova 'aiatanidi 'waidie 'wa na 'i'idewadi, we'e 'ani'ani 'wavugidi 'adi 'idewadewa i lubwaineni. 17 Beledi kebu 'ana 'eba 'ivebwaikaga Sakalina 'wa na nuanuani fai 'aiatanina 'waineye me Itifita 'waidiega yami 'aila'avo taiadi a vagavaimi 'wa souyemi. Lakata 'aitamogana 'aitamogana tutuya i mimai 'waineye 'aiatanina 'wa na nuanuani.”

21 Mulieta Mosese me Isileli to'edakumetavo 'au'auveadi i goleva'augidi bega i vonedi i vo, 'Wa na nagoi 'aisaya sifi siaidi 'wa na 'ewadi 'aila'a 'aitamogana 'aitamogana faifaidi. Uvi'agalatogana 'ana 'aisaya 'wa na nikedi 'wa na 'idewadewa bega yami 'aila'avo taiadi 'wa na 'ani. 22 Welavi Isofa didina 'wa na kiabaidi 'wa na fafai, i na 'a'ava dayaga ma 'aivoena nageneye 'wa na lu'utuvi, bega yami vanuga 'adi 'awa lilivadie wata tabwadie 'wa na lusamasamalidi. We'e kebu tamu aitoi yana vanuga 'awanega i na souyeni i na nagoga 'ana tugusa i na 'atananagai. 23 Ibu 11:28Tutuyanina 'Auvea Itifita i na lukuya bega i na leodi, i na 'iseni dayaga yami 'awa lilivadie wata tabwadie bega yami vanuga i na uvi'agalatagonidi. Nika yana Anelose Toluvewafa kebu i na tauyeni i na lukuwa 'ami 'ainike faifaina. 24 De'e veimeanidi a velemiga tutuya matatabuna 'wa na veve'ililibuyedi, natumiavo wata lakata i mimai 'waidie, i na 'eno-vagata. 25 Tutuyanina 'wa na luku 'awalawanina 'Auvea faifaina i vona'awaufeufeniga, 'aiatanina 'wa na nuanuani. 26 We'e tutuyanina natumiavo i na velutoli i na vo, Sakalinina de'e ta 'i'idewaiga, ava'ai faifaina?” 27 Bega 'wa na vonedi 'wa na vo, Sakalinina de'e 'wainega yada vekaiwa wata yada sosoana ta sisivemageseni 'Auvea 'waineye Uvi'agalatagona faifaina, fai tutuyanina 'waineye me Isileli yada vanuga i uvi'agalatagonidi bega i 'ita'ita'ieda we'e ma'itufa me Itifita i nikedi.” Nika me Isileli matatabudi i 'odu 'Auvea i awa'ai'aia.

28 Naninidi 'Auvea i lu'ivoneyedi Mosese wata Eloni 'waidie, me Isileli matatabuna i 'idewadi.

29 Sou 4:22,23Lovana 'ana utukamwana 'waineye, 'Auvea me Itifita yadi tubu'edakumetavo i luvewafadi. Felo, kumanina yana 'eba veimea 'waineye i miamiaga, natuna 'wainega i velamu i obu i nagoga tamu tomogo vanuga 'eba yogona 'waineye i miamia, yana tubu'edakumeta. Wata yadi 'aisayavo natudiavo i tubu'edakumetaga matatabudi i luvewafadi. 30 Felo ma yana to'edakumetavo wata me Itifita matatabudi i tovoi lovane i nogai 'we'wela wata taivonavona 'awalawa matatabuna nageneye. 'Auvea kebu tamu vanuga i da luvegalalaiga. 31 Lovananina 'waineye Felo Mosese wata Eloni i goledi i mai 'waineye bega i vonedi i vo, 'Wa tovoi, 'wa tauya, yami tomotogavo taiadi bega yaku tomotogavo 'wa na 'iawedi. 'Wa na nagoi yami 'Auvea 'waineye 'wa na 'odu'odu bani'odi yami nuanua. 32 Yami sifi, goti wata bulumakau taiadi 'wa na yavula siwe 'wa na velu'ui yami 'Auvea 'waineye bega i na vevesauluva 'atumaina 'waikuye.”

33 Tutuyanina 'waineye me Itifita me Isileli i lukakadedi i veugeugedi i vo, 'Wa tauya, 'wa nago, i na nunago 'a na wafa'a'ava.”

37 Lovananina 'waineye me Isileli i tauya 'atamana Lamesisi 'wainega i nunago Sukoti. 'Adi 'aila'a bani'odi 600,000 iaveta, kumanidiavo i lu'agena we'e vevine wata yavayavava kebu taiadi 'adi lu'iawawaga. 38 Wata tamu 'aila'a bwaikina, kumanidiavo kebu me Isileli, taiadi i nagoi. 'Aisaya fueotogidi siaidi wata bwaikidi bani'odi sifi, goti wata bulumakau i nawedi. 39 Itifitayega falawanidi vilaviladi 'anikabu faifaina i nawedi bega 'waidiega beledi yalayaladi i kabunidi. Falawanidi vilaviladi siwe kebu isita taiadi fai yadi tauya 'waineye me Itifita i sogiedi begaidi kebu taunidi faifaidi 'adi'adi i da 'idewadewa-'atumai.

40 Nag 15:13; Gal 3:17 Me Isileli i miamia malamala 430 'awalawa Itifita nageneye, mulieta i souyedi.

43 I 'a'ava 'Auvea i vona Mosese wata Eloni 'waidie i vo, Uvi'agalatagona 'ana veimea side bani'odi. Uvi'agalatagona 'ana 'ani 'waineye kebu wakawaka taiadi 'wa na 'ani. 44 Aitoi yamu tofolova-maimaiga 'u kimwanei wata bunu 'aibobo i 'ewaiga, 'ana fata taiadi 'wa na 'ani. 45 We'e 'ami ulatau wata yami tofolova kumanina 'wa tututuliga kebu i na 'ani. 46 Sal 9:12; Ion 19:36Taunimi yami vanuga 'waidie 'wa na 'ani, kebu tamu 'aisayana 'wa na 'ewai vanugayega 'wa na souyemi 'atamane. Wata 'aisayanina 'wa na 'aniga kebu tamu luluna 'wa na tubaia. 47 Me Isileli matatabumi ma yami sosoana Uvi'agalatagona Sakalina 'wa na 'i'idewai.”