1 Wata 'Auvea Mosese i voneni i vo, 2 Sal 3:13; Luk 2:23Yami tubu'edakumetavo iavetadi wata yami 'aisayavo natudiavo kumekumetadi, matatabudi 'wa na 'anivelenedi 'waikuye, fai me Isileli natumiavo wata yami 'aisayavo kumekumetadi 'asa'aiana yau faifaiku.”

11 Mosese me Isileli i vonedi i vo, 'Awaie 'Auvea i na vagavaimi 'wa na nago me Kenani yadi 'awalaweye mulieta i na 'aniveleneni 'waimie, bani'odi basenadi i vona'awaufaufa taunina 'ana wagava 'wainega, 'omi wata tubumiavo taiadi 'waimie. 12 Sou 34:19,20; Luk 2:23Bei 'wa na miamiaga, yami tubu'edakumetavo wata yami 'aisayavo kumekumetadi 'wa na 'anivelenedi 'Auvea 'waineye, fai iaveta kumekumetadi 'asa'aiana 'Auvea faifaina. 13 'Ai'edi nuanuami yami 'aisaya doniki natuna kumekumetana ma yawaina i na miamia, tamu 'aisaya sifi siaina 'wainega 'wa na sivedamaneni, we'e 'ai'edi kebu, doniki 'odona 'wa na tutukuali. We'e natumiavo iavetadi yami tubu'edakumeta i lubwainemi 'wa na tuveobudi.

14 Tutuya i mimai 'waidie natumiavo i na velutoliemi i na vo, Ava'ai 'ana 'aseta?” Bega 'wa na vonedi 'wa na vo, 'Auvea yana toketokenayega i vagavaima 'a souyema Itifitayega a vetofolova-maimaiga 'wainega. 15 Tutuyanina 'waineye Felo nuafouna i fa'ala-'afo'afoi bega kebu nuanuana i na tauyema 'a na souyema, begaidi 'Auvea me Itifita yadi tubu'edakumetavo 'aitamogana 'aitamogana wata yadi 'aisaya natudiavo kumekumetadi i luvewafadi. Side kumanina lamunanina begaidi yada 'aisayavo natudiavo iavetadi kumekumetadi 'aitamogana 'aitamogana ta vevelomuyedi 'Auvea 'waineye, we'e tomotoga yada tubu'edakumetavo iavetadi ta tutuveobudi.’ 16 De'e sakalinina 'eba nuave'avina, 'wa da vo tugusa nimamie 'alo debamie nika 'wainega i na tolinuata'iemi 'Auvea yana toketokenayega i vagavaida ta souyeda Itifita 'wainega.”

20 Me Isileli Sukoti i 'iaweni nika i le'wa Etamu sali'avu'avu lilivaneye, bei i vebae'wa. 21 Yadi nagonina 'waineye, 'Auvea i kumekumesedi. 'Aiaseye yana waowa i sivetovoia debanagodiega i sisivetonovedi 'waineamo i nunagoi. We'e lovane ma'itufa yana 'ai-'ala'alata i tovotovoi me Isileli i magemagesedi. Bega waowa wata 'ai-'ala'alata 'waidiega 'adi fata 'aiaseye wata lovane i na 'e'edakumesedi.