5 Tutuyanina Felo me Isileli valadi i nogai, 'akonadi i yavula i nunagoi nika yana to'edakumetavo taiadi yadi nuanua i siviladi. Bega i vo, Ava'ai ta 'idewai? Me Isileli ta veyavula'a'avadi i ve'aladegadega, 'awaie kebu wata i na vevetofolova-maimaiga faifaida.” 6 Begaidi Felo yana salioti*Salioti tamu fwayafwaya 'ana waka, 'aisaya osi i luluyo'ei. i 'idewadewadi i 'a'ava nika yana tolugaviavo taiadi i tauya. 7 Yana salioti 600 'eba vetalaga 'atumaiotogidi i venua'ivinedi wata 'ifwaidi me Itifita yadi salioti taiadi i nagoi. Saliotinidi 'aitamogana 'aitamogana ma yadi tovemata'ai'ai. 8 'Auvea Felo i nua'ania bega me Isileli i lu'wavinedi we'e me Isileli 'akonadi ma yadi sosoana wata ma yadi fwausa i nunagoi. 9 Me Isileli i vebae'wa eyaga lilivaneye, 'atamana Fi-Ailoti vi'ainega, we'e Beli-Sefoni debanagodiega. Me Itifita yadi tolugaviavo matatabuna i yogo'wailidi, tolugavianidi salioti tabwadie ma yadi 'aisaya osi, tolugavianidi i laka osi kwavudie, wata tolugavianidi i lulu'agena, matatabudi me Isileli lilivadie i le'wa.

10 Felo ma yana tolugaviavo sai'afoga i na 'ubwasadi nika me Isileli i 'isalaka i 'isedi mulidie i mimaia, matatabudi i kololo-'afo'afo bega 'Auvea 'waineye i taidaida 'ita'ita'i faifaina.

11 Me Isileli Mosese i voneni i vo, 'U da vo Itifita 'waineye kebu taumata i da 'eno'enovi begaidi 'u vagavaima ta mai sali'avu'avuye 'a na wafa. Awale 'u lukakadema 'a souyema Itifita 'wainega? 12 Itifita 'waineye 'u da vo kebu 'a da vonemuga, 'a vo, 'U bailema, bei 'a na miamia 'a na vevetofolova-maimaiga.’ 'Ai'edi 'a da folofolova me Itifita faifaidi de'e 'atumaina, siwe 'omu 'u vagavaima ta mai sali'avu'avuye bei 'a na ve'alawafawafa.”

13 Mosese me Isileli i vonedi i vo, Kebu 'wa na kolologa, ma yami venuafoufa'ala 'wa na tovotovoi fa'alina bega 'Auvea 'wa na 'iseni 'ami 'ita'ita'i i na 'idewai 'asiau. 'Asiau me Itifita 'wa 'ise'isediga, 'awaie kebu wata 'wa veveluagadi. 14 'Auvea tauniotogina faifaimi i na vetalaga, we'e 'omi 'wa na vemata'i'i'ienimo.”

15 Nika 'Auvea Mosese i voneni i vo, Awale 'wa tataidaida nuanuami a na 'ita'ita'iemi? Me Isileli 'u na vonedi i na nunago. 16 Yamu wautogana 'u na silakai wata nimamu 'u na 'otoi eyaga tabwaneye 'u na sinaweni bega eyaga i na 'awa'idia, i na lala nika me Isileli eyaga kamwaneamo i na damana. 17-18 Me Itifita a na nua'anidi bega i na 'wavinemi mulimie i na wai. Felo ma yana tolugaviavo, salioti wata osi 'adi tomotogavo yadi ilagi 'wainega yadi tomotogavo i na awa'ai'aiku. Tutuyanina Felo ma yana tolugaviavo a na vetoketoke-'iawedi nika me Itifita yaku toketokena i na 'iseni i na awavemogitana yau 'Auvea.”

19-20 Mulieta Yaubada yana anelose, kumanina me Isileli i kumekumesedi, i vilai i nago mulidie, we'e Yaubada yana waowa debanagodiega wata mulidie i nago, me Isileli wata me Itifita kamwadie i tovotovoi. Lovana 'waineye waowanina dudubala me Itifita i veledi, we'e me Isileli i magemagesedi begaidi lovananina 'waineye 'adi gaviavo i tovibodedi.

21 Mulieta Mosese nimana i 'otoi eyaga tabwaneye bega lovananina matatabuna 'waineye, 'Auvea kaukau toketokena i butuya inala yana 'eba lakayega i nunuga. Eyaga i yuvei i nagoga nika eyaga i yuve'idia wata fwayafwaya i lala. 22 1 Kol 10:1,2; Ibu 11:29Bega me Isileli eyaga kamwaneamo i damana fwayafwaya lalaneamo, we'e eyaga i ula i lakaga 'adi 'atagiega wata 'adi wamayega, 'wa da vo bani'odi vatu'ai ta da vevedadageni. 23 Me Itifita i lausogi, Felo yana osi, yana salioti wata 'adi tosivetovetonova taiadi mulidiamo i luku eyaga kamwaneye. 24 Sai'afoga i na 'awasa'usa'uya 'Auvea yana waowa i 'ala'alataga 'wainega i 'isaobu me Itifita yadi tovetalagavo 'waidie bega nuadi i luvegaugaudi. 25 Yadi salioti 'agedi i 'aniwenowenodi nika i fafawa kebu 'adi fata i na lilide. Bega me Itifita i vo, 'Wa mai ta na dega me Isileli 'waidiega fai 'Auvea faifaidi i lulugavia 'waideye.”

26 'Auvea Mosese i voneni i vo, Nimamu 'u na 'otoi eyaga tabwaneye bega eyaga i na 'anibaia, me Itifita, yadi salioti wata osi 'adi tosivetovetonova i na tavufwasedi.” 27 Bega Mosese nimana i 'otoi eyaga tabwaneye, sai'afo inala i na vulaoga, eyaga i 'anibaia i obu 'ana 'ivie. Me Itifita nuanuadi i na dega eyaga 'wainega siwe 'Auvea eyaga 'wainega i tavunidi. 28 Bega eyaga i 'anibaia me Itifita yadi salioti, osi 'adi tomotogavo wata tolugaviavo, kumanidiavo me Isileli i 'wavi'wavinediga, matatabudi eyaga nageneye kebu tamu aitoi i da luvegalalaiga.

31 Tutuyanina me Isileli 'Auvea yana toketokena bwaikina 'wainega me Itifita i leodiga i 'iseni, nika ma yadi kololo taunidi i tauyedi i vetumagana 'Auvea 'waineye wata yana tofolova Mosese 'waineye.