31
Vadavada Tabutabuna 'ana to'aiyogona
1 'Auvea Mosese i voneni i vo, 2 'U na vivinenega a na veveifufu 'waimuye. Bisalele 'akonadi a venua'ivineni, Uli natuna we'e Ewa tubuna, Iuda 'ana wauma 'wainega. 3 Yau Yaubada 'anu'anunuku Bisalele i agei, 'aseta wata nuamageta a veleni bega yana folova tulina tulina tonovidi wata 'adi 'isa 'atumaidi. 4 'Ana fata nani tulina tulina 'adi 'isa 'eba nua'ewa i na kilumidi, bega golida, siliba wata kainumu balonisi 'waidiega i na 'idewadi. 5 Wata 'ana fata kileu 'aninamanamalidi 'eba 'aibobo 'wainega i na bobodi i na yadalidi 'wainega i na 'ivivigavudi. We'e welavi i na dabidi wata i na kilumidi. Naninidi matatabuna 'waidiega ma yana 'aseta wata ma yana nuamageta. 6 Wata tamu tomogo a venua'ivineni 'ana wagava O'oliabi, Aisamaki natuna, Dani 'ana wauma 'wainega, kumanina 'ana to'aivaita taiadi i na folofolova. Wata 'ifwaidi tomotoga 'adi veuveuta a veledi bega naninidi matatabuna a voneyediga 'waimuye i na 'idewadewadi. 7 Side naninidi:
Vadavada Tabutabuna;
Veakutagona 'ana Didiwaka;
Didiwakanina 'ana kudu bei tomotoga yadi sakona a na 'u'u'umidi;
Vadavada Tabutabuna nagena 'ana kukua;
8 talalia wata naninidi i na vefolovedi velomu faifaina;
mageta 'ana 'eba yato, golida 'ana loi wata 'ana 'eba vefolova 'ifwaidi taiadi;
'eba velomu vane 'anikabu faifaina;
9 'eba velomu bei 'aisaya i na 'a'anikabu wata 'ana kukua taiadi;
'aivoe 'eba 'ilekoa wata 'ana 'ailakana;
10 talauma agiagilidi 'adi 'isa 'atumaiotogidi, Eloni 'ana talauma tabutabuna bega i na vevetovelomu, wata natunavo 'adi talauma yadi 'eba vaigavu velomu faifaina;
11 bunama 'eba iwaga;
vane magaina 'atumaina Tutudaba Tabutabuna faifaina.
Naninidi matatabuna 'akonadi a voneyediga 'waimuye i na 'idewadewadi.”