Isikeli
'Eba kiavemageta
Buki de'e 'waineye i veveifufu, me Isileli Yaubada i vedumwe'ai'aieni, we'e ma'itufa i 'odu'odu yaubada-vekavekali 'waidie. Yadi vesauluva Yaubada mataneye sakoiotogidi, begaidi 'adi gaviavo i vetunedi i vetoketoke-'iawedi bega i 'ewadi i nawedi yadi 'awalawa 'waineye.
'Aila'anina nageneye Isikeli wata taiadi, kumanina tamu tovelomu Livai 'ana wauma 'wainega, Yaubada i vetumaganeni wata i vematayakeyakeni. Tutuyanina i miamia 'awalawa Iuda nageneye, Babiloni 'ana tolugaviavo i maia i tala'avuidi bega Isikeli wata 'ifwaidi me Iuda taiadi i nawedi Babiloni 'atamana bwaikina nageneye i vetofolova-maimaiga.
Tutuyanina 'waineye Yaubada Isikeli i venua'ivineni i silakai i na vetolu'ivona faifaina. Vala i veleni i na lu'ivona yana tomotogavo 'waidie, kumanidiavo i miamiani Babiloni wata Ielusalema nagedie. Valanina side bani'odi. I lubwainedi i na nuaviladi, we'e 'ai'edi i na kwayega i na vedumwe'ai'aieniga, 'adi gaviavo i na mai Ielusalema i na luvela'ovi.
Begaidi Isikeli i mamatakiadi kebu wata i na kwayega sauluva sakoidi i na 'i'idewadi, we'e mogitana taunidi i na tauyedi Yaubada i na ve'ililibuyeni wata i na vematayakeyakeni nika yadi 'awalawa i na luve'ivauya.
Siwe tomotoganidi i baila begaidi Babiloni 'ana tolugaviavo i mai Ielusalema i geuya, bani'odi Isikeli yana vona-samula 'ana mogitana i souyeni.
2
Yaubada Isikeli i venua'ivineni
Tutuyanina Isikeli i miamia me Iuda taiadi Babiloni 'atamana bwaikina nageneye, i 'iseni abama i 'anikililia Yaubada yana mageta mataududulina i mageseni. Naninidi i 'isediga side bani'odi i lu'ivoneyedi.
1 Tutuyanina Yaubada yana mageta mataududulina a 'iseni, a be'u fwayefwayeye a lumata'afufu. A nogai bona i vo, 'Omu tomia fwayafwaya, 'u tovoi a na vonemu.” 2 Bola i veveifufu nika Yaubada 'Anu'anununa i ageku i silakaiku a tovoi a vavainenega aitoi i veveifufu. 3 I vona i vo, 'Omu tomia fwayafwaya, a vevetunemu me Isileli 'waidie, kumanidiavo kebu i da vematayakeyakeku, tubudiavo yadi sauluva basenadi bani'odi i vevedumwe'ai'aieku. 4 Fai kebu bonaku i da nogai wata i da ve'ililibuyekuga, 'omu a vevetunemu 'u na nago 'u na vonedi, naninidi matatabuna yau 'Auvea Yaubada a veveifufu 'waidie. 5 'Ai'edi 'aku tovedumwe'ai'aivo bonamu i na nogai 'alo i na bailemuga, nika bei i na 'asetai tamu yaku tolu'ivona 'awasasamie taiadi 'wa miamia.