3
Yaubada yana 'isanuakalikali miamia-vagaina
19 Yaku veviga wata kebu yaku 'eba mia, faifaidi a vevenua'ivina,
nika nuaku i vita-'afo'afo 'wa da vo bani'odi igana 'aluna i da golaku.
20 Vitanidi faifaidi a toke a vevenua'ivina nika yaku nuavita i vebwaika-'afo'afo.
21 Siwe nuaku i 'anita'ia 'Auvea a nuani,
bei yaku vetumagana i velamu.
22 'Auvea yana nuakalikali 'waideye 'eno'eno-vagaidi,
yana 'isanuakalikali kebu yana 'a'avaga.
23 'Awa'awai 'aitamogana 'aitamogana yana nuakalikalinina i luluve'ivaudi 'waideye.
Ie 'Auvea, tutuya matatabuna 'omu 'u vevesauluva 'atumaina 'waimeye,
yamu vona'awaufaufa bani'odi.
24 Nuakuye a vona a vo, 'Auvea yau taiadi tutuya matatabuna,
begaidi ma yaku vetumagana tauniku a na tauyeku 'waineye.”
25 Tutuyanina tomotoga 'Auvea i vevetumaganeni wata i lulualeni,
nika 'wainega nani 'atumaidi i na veveluagadi.
26 I lubwaineda ma yada tokemaiga ta na mia-lukamata 'Auvea yana 'ita'ita'i faifaina.
27 Yada tutuya tubuvauvaudeye i lubwaineda taunida ta na tauyeda 'Auvea 'waineye, 'ai'edi vita i na veledaga i lubwaineda ta na tokemaigedamo.
28 'Ai'edi tamu aitoi vita i na veluagai 'Auvea 'wainega kiavetonova faifaina,
i lubwaineni 'aiseneye i na miamia i na ve'wadamo.
29 Ma yada ve'ililibu mataneye ta na lumata'afufu,
voke 'eba ve'a'ava 'waineye i na 'ivaiseda.
30 'Ai'edi aitoi i na nikeda wata i na awavesakoyeda,
kebu ta na tutulaga, ta na tokemaigedamo.
31 'Auvea to'isanuakalikali,
kebu tamu aitoi i na baila-vagaseni.
32 'Ifwaidi tutuya nuavita i na veleda, siwe ma yana 'isanuakalikali i na nuanuanida
fai yana nuakalikali 'eno'eno-vagaina.
33 Mogitana 'ifwaidi tutuya i na kiavetonoveda veviga wata nuavita 'waidiega,
siwe kebu i da sosoana faifaina.