Taivonavona
'Eba kiavemageta
Buki de'e nageneye i veveifufu me Iuda yadi nuavita bwaikina faifaina. 'Adi gaviavo i maia yadi 'atamana bwaikina Ielusalema wata Vanuga 'Eba Velu'ui i luvela'ovidi. Yana tomotoga wata yana 'ai'aiwabu matatabuna i 'ewadi i nawedi yadi 'eba veimea 'waineye. Naninidi i souyedi mulieta malamala 586 i 'a'avana Iesu i tubuga.
Buki de'e 'ana tokiluma kebu ta da 'aseta-'atumaia aitoi mogitana i kiluma, 'ifwaidi tomotoga yadi nuanua i vo, Ielemaia i kiluma.”
1
Mogai Ielusalema nageneye
1 Tutuya basenadi 'waineye, me Ielusalema 'adi 'aila'a bwaikaotogina,
we'e 'asiau 'atamananina bwaikina i velovi.
Basenadi 'atamananina 'ana wagava bwaikina, 'atamana 'ifwaidi 'waidiega,
'asiau 'asa'aiana 'aiseotogina, 'wa da vo bani'odi 'wabula.
Basenadi bani'odi kwini 'awalawa fuedi i veveimeyedi,
tutuya de'e, tofolova-maimaiga.
2 'Atamananina 'wa da vo bani'odi vavine, lovana 'waidie ma yadi nuavita i 'we'we'wela,
wata i lulumatageu,
fai tomotoganidi basenadi taiadi i veluaga, matatabudi i 'iawelovedi,
kebu 'adi fata nuadi i na 'iveolooloi.
Enavo matatabudi i 'etogiluvedi,
'asiau kumanidiavo 'ana gaviavo.
3 Me Iuda 'adi gaviavo i maia i 'ive'avinidi i nawedi i vetofolova-maimaiga 'waidie,
mia vitana i veluagai mali 'awalaweye,
kebu tamu 'eba veawai faifaidi i da 'eno'eno.
'Adi gaviavo i 'wavinedi i 'ubwasadi i 'ive'avinidi, kebu 'adi fata i na dega.
4 Ielusalema*'Ana mogitana vona Ibeliu 'waineye Saioni, Ielusalema tamu 'ana wagava, we'e mogitana 'awasasanina Yaubada yana Vanuga 'Eba Velu'ui bei i tovotovoi. 'ana 'eda matatabuna i velovi 'wa da vo bani'odi i da vevemogai,
kebu tamu aitoi 'edanidi 'waidiamo i da nunagoi bega i na lulusakali Yaubada 'waineye.
'Atamananina 'ana 'awa matatabuna i 'wa'wasia,
tovelomuvo ma yadi nuavita i 'a'alanuai,
we'e vevine tubuvauvau i veve'ala'we'wela.
Tomia Ielusalema matatabudi vita bwaikina i veveluagai.
5 'Auvea Ielusalema i vematavulogi yana sakona fuedi faifaidi.
'Ana gaviavo i vetoketoke-'iaweni i veveimeyeni, nani matatabuna yavuyavuna 'waidie,
natunavo i 'ive'avinidi i nawedi mali 'awalawa 'waidie.
6 Ielusalema basenadi 'ana 'isa 'atumaiotogina wata nua'ewa'ewana,
we'e tutuya de'e 'akonadi i kibwa.
Yana to'edakumetavo 'wa da vo bani'odi 'aisaya ma 'adi lase 'ani'ani i lalauala-wayoga,
yadi toketokena i 'a'ava,
kebu 'adi fata i na dega 'adi gaviavo 'waidiega.
7 Me Ielusalema i yaba-vuvua mali 'awalawa 'waidie, ma yadi nuavita nuadi i vilai basenadi yadi mia 'atumaina i nuani.
Tutuyanina Ielusalema 'ana gaviavo i mai i tala'avui kebu tamu aitoi i da 'ivaiseni.
'Ana gaviavo i namageni fai i vetoketoke-'iaweni.
*1:4: 'Ana mogitana vona Ibeliu 'waineye Saioni, Ielusalema tamu 'ana wagava, we'e mogitana 'awasasanina Yaubada yana Vanuga 'Eba Velu'ui bei i tovotovoi.