1 Me Isileli 'ifwaidi i vila-vaituganidi yadi 'atamana 'waidie, i nagoga 'ana tugusa weta'i 'ana ve-7 'waineye, matatabudi i luvetubama Ielusalema 'atamana bwaikina nageneye, yadi nuanua 'aitamogana 'wainega. 2 Sou 27:1Nika Dosadaka natuna iavetana Iesua 'ifwaidi tovelomu taiadi, wata Salatiela natuna iavetana Selubabela ma yana 'aila'avo me Isileli yadi Yaubada 'ana 'eba velomu i yogona-vaitugani, nika bei i na velomu bani'odiga yadi veimea i mai Yaubada yana tofolova Mosese 'wainega. 3 Sal 28:1-8Avinodi i ve'alakolokololo 'awalawanina 'ana tomotogavo 'waidie, 'eba velomu i yogoni 'ana kabutu'uye, yadi 'anivelena-maimaiga i velomuyedi i 'a'anikabu 'Auvea 'waineye 'awa'awai wata lavilavi 'aitamogana 'aitamogana 'waidie.

7 Me Isileli, kumanidiavo i vila-vaituganidi yadi 'atamana 'waidie, me Fesia yadi Kini Sailusi yana veimea i vematayakeyakeni bega matatabudi mani i luvetubamidi kileu 'adi toyadala wata vanuga 'adi to'aiyogona i tutulidi. Welavi sida*Sida tamu welavi fa'alina wata manamanawena. Folovanina magaina 'atumaina maliwaka 'ana 'isa'isa bani'odi, 'waidiega vanuga 'adi 'isa 'atumaidi i yogoyogonidi. i tovotovoi me Lebanoni yadi 'awalaweye bega me Isileli 'ani'ani, ufa 'iwanina wata bunama i luvetubamidi i tutula me Saidoni wata me Taia 'waidie, welavinidi i talagidi i miedi eyaga 'waineamo 'atamana Iofa 'waineye.

8 Tomotoganidi i viladi i le'wai Ielusalema i nagoga malamala 'ana veluga i veluagai we'e weta'i 'ana veluga 'waineye, i velamu Yaubada yana Vanuga 'Eba Velu'ui i na yogona-vaitugani 'atamana Ielusalema 'waineye. To'aiyogonanidi side 'adi wagava. Salatiela natuna Selubabela, Dosadaka natuna Iesua ma yana 'aila'avo tovelomu 'ifwaidi taiadi wata tomotoganidi Livai 'ana wauma 'wainega, tomotoga matatabudi taiadi. We'e tomotoganidi Livai 'ana wauma 'wainega 'adi malamala 20 bega i lakaga i venua'ivinedi tofolovavo i na 'isave'avinidi.