Ifuifufu 'ana Veluga
Bukinidi 'adi 'ailuga 'adi kiavemageta
Bukinidi 'adi 'ailuga 'adi wagava Ifuifufu 'Aitamogana wata Ifuifufu 'ana Veluga, 'adi 'aseta i vesala Samuela yana bukivo 'adi 'ailuga wata 1 Kini, 2 Kini.
Ifuifufu 'Aitamogana i kikiavemageta Kini Devida faifaina. I veveifufu Devida yana nuanua 'Auvea yana Vanuga 'Eba Velu'ui 'ana 'aiyogona faifaina 'atamana Ielusalema 'waineye. Devida yana veifufu wata yana awave'eda'eda tovelomu i veledi, nuanuana bwaikina tomotoga fuedi Yaubada yana veimea i na vematayakeyakeni.
Buki de'e, Ifuifufu 'ana Veluga, i kikiavemageta me Isileli yadi kinivo faifaidi, wata i veveifufu Solomoni yana tofolovavo 'Auvea yana Vanuga 'Eba Velu'ui i yogoni 'atamana Ielusalema nageneye.
Tutuyanina Solomoni yawaina i 'a'ava, 'eba veimea 'adi 'ailuga i souyedi 'awalawanina 'aitamogana 'wainega. Ifuifufu 'ana Veluga i lulu'ivona 'awalawanidi 'adi 'ailuga faifaidi, yadi kinivo wata yadi folova faifaidi. 'Ifwaidi kinivo yadi ve'eto'edakumeta 'atumaidi 'Auvea yana veimea i ve'ililibuyeni, we'e kinivo 'ifwaidi yadi sauluva sakoidi 'Auvea yana veimea kebu i da vematayakeyakeni, yaubada-vekavekali 'waidie i 'odu'odu. Kininidi yadi tomotoga i 'edakumesedi sauluvanidi sakoidi 'waidie bega 'Auvea i 'anivelenedi 'adi gaviavo yadi toketokena 'waineye, nika yadi 'awalawa 'adi 'ailuga, Isileli wata Iuda, i lukudi wata i luvela'ovidi.
36
Me Iuda yadi vona-awa'ufa'ufa 'Auvea 'waineye kebu i da ve'ilibuyeni
14 Tovelomu 'adi to'edakumetavo wata tomotoga matatabudi yadi vona-awa'ufa'ufa 'Auvea 'waineye i baileni nika mali tomotoga yadi sauluva sakoidi 'eba bunumayaga i 'isa'ewa 'waidiega bega i vetutuyamedi. Yana Vanuga 'Eba Velu'ui Ielusalema 'waineye 'Auvea i vetabuyaga, siwe yadi vesauluva-sako 'wainega i kiaveyokeyokei wata i 'ivesakoi.
15 'Auvea Yaubada, kumanina basenadi me Iuda tubunavo 'waineye i 'odu'odu, nuana i vekalikalia yana tomotogavo wata yana Vanuga 'Eba Velu'ui faifaidi begaidi tutuya fuedi yana tolu'ivonavo i vevetunedi bega i na velu'ase'asedi. 16 Siwe tomotoganidi Yaubada yana tolau'agevo i sidibidibiedi wata kebu yana veimeanidi i da awavemogitanediga, we'e yana tolu'ivonavo i namanamagedi. Sino kumanina faifaina 'Auvea yana nuasako i vebwaika-'afo'afo kebu aitoi 'ana fata i na tolibodeniga.
Me Babiloni Ielusalema i luvela'ovi
17 Iel 21:1-10; 34:1-5Begaidi 'Auvea me Babiloni yadi kini i vetunei Ielusalema 'atamana bwaikina i lukuya. Babiloni tolugaviavo me Iuda fuedi i luvewafadi. We'e tubuvauvau 'ifwaidi i 'wavinedi i luku Vanuga 'eba Velu'ui nageneye bei luvewafadi. Tolugaviavonidi kebu tamu aitoi i da 'isanuakalikaliedi, me Iuda matatabudi, tubuvauvaudi wata nigolalaga, 'au'auveadi wata toviga taiadi. 'Auvea me Iuda matatabudi i 'anivelenedi me Babiloni yadi kini*Me Babiloni yadi kini 'ana wagava Nebukadinesa nimaneye. 18 Babiloni 'ana kini nani matatabuna bwaikidi wata siaidi me Isileli i vevefolovediga 'Auvea yana Vanuga 'eba Velu'ui nageneye i 'ewadi kukua 'ai'aiwabudi 'adi 'isa 'atumaiotogidi taiadi. Me Iuda yadi kini yana vanuga wata yana tofolovavo bwaikidi yadi vanuga 'waidiega, kukua 'ai'aiwabudi i 'ewadi i nawedi Babiloni, we'e kebu tamu i da luvegalalaiga. 19 1 Kin 9:8Tolugaviavonidi Yaubada yana Vanuga 'Eba Velu'ui i tunuya i 'alai, we'e Ielusalema 'atamana 'ana kali kileu 'wainega i didigiga, i tutuweawealidi wata vanuga bwaikidi i tunudi i 'alaidi we'e kukuanidi matatabudi i luvela'ovidi.
20 Iuda 'ana tomotogavo, kumanidiavo ma yawaidi i miamianiga, tolugaviavonidi nimadi i 'iyogoyogonidi i 'a'avana i nawedi Babiloni. Tutuyanina i miamia 'awalawa Babiloni 'waineye me Iuda i vetofolova-maimaiga kini ma natunavo faifaidi, i nagoga mulieta me Fesia Babiloni i vetoketoke-'iawedi ma'itufa 'eba veimeanina i 'ewai. 21 Iel 25:11; 29:10Nika ava'ai 'Auvea yana vona 'ana tolu'ivona Ielemaia i vona-samuleniga 'ana mogitana i souyeni. Me Iuda yadi fwayafwaya i 'iawelovei i vedigaba 'wa da vo i da veawai me Iisileli yadi Sabati†Wata 'wa na 'iseni Veimea 25:1-22 bani'odi, i nagoga malamala 70 i veluagai bani'odi 'Auvea i voneyedi.
22 'Awalawa Fesia 'waineye Kini Sailusi yana vetoveimea 'ana malamala kumekumetana 'waineye, 'Auvea yana vona Ielemaia i vona-samuleniga, 'ana mogitana i souyeni. Side bani'odi. 'Auvea yana nuanua Sailusi i veleni bega yana veimea i kilumi, i 'a'avana veimeanina yana tofolovavo i veledi i vetunedi yana 'eba veimea matatabuna 'waineye, nika matatabudi i 'asetai. Yana veimea side bani'odi i vo,
23 Ais 44:28Yau Kini Sailusi me Fesia yadi kini, yaku veimea side:
'Auvea tomia abama yadi Yaubada, 'eba veimea matatabuna fwayafwaya tabwaneye i veleku. I venua'ivineku veimea i veleku yana Vanuga 'Eba Velu'ui a na yogoni Ielusalema 'atamana bwaikina 'waineye Iuda yana 'eba veimea nageneye. 'Auvea yana tomotogavo kumanimiavo nuanuami 'wa na vilami a tauyemi 'wa na nagoi folovanina faifaina. 'Auvea yami Yaubada kumanina 'asa'aiana i na kumesemi taiadi 'wa na nagoi.”