3 Mulieta 'Auvea Iakobo i voneni i vo, 'U na vilamu 'u na nago tamamu wata tubumu yadi 'awalaweye wata yamu 'aila'avo bei miamiaga 'waidie, we'e yau 'amu 'weabu.”

4 Bega Iakobo Litieli wata Lea i vonedi i nagoi tamu 'awasasa 'waineye bei 'aisaya sifi i 'i'isave'avinidi. 5 I vonedi i vo, A 'iseni tamami yana sauluva i vetuli 'waikuye, siwe tamaku yana Yaubada 'aku 'weabu i 'ivaiseku. 6 'Akonadi 'wa 'asetai ma yaku tokemaiga a folofolova tamami faifaina. 7 Siwe tutuya fuedi vekaliega 'aku tutula i sisivedamanedi, siwe Yaubada kebu i da tauyeni bega veviga i na veleku. 8 We'e 'ai'edi i na vo, 'Aisayanidi lu'abwa'abwaudi 'amu tutula,’ nika matatabudi i venatuna lu'abwa'abwaudi. Wata tutuyanina yana nuanua i vo, 'Aisayanidi luwanawanadi 'amu tutula,’ nika matatabudi i venatuna luwanawanadi. 9 Begaidi tamami yana 'aisaya matatabuna Yaubada i 'anivelenedi 'waikuye.

10 Tamu 'aiata 'waineye 'aisaya yadi 'aibai 'ana tutuye a 'enoneganega, a 'iseni 'aisaya goti iavetadi i 'a'aibai vevinedi luwanawanadi taiadi. 11 'Aku 'enoneganega 'waineye Yaubada yana anelose i souyeni i voneku i vo, Iakobo,’ yau a vo, Yau side.’

12 Wata anelose i vo, 'U na 'isanago, goti iavetadi lu'abwa'abwaudi 'adi loi 'u na 'isedi, sifi vevinedi taiadi i 'a'aibai. Naninina i sousouyeni fai Lebani yana sauluva sakoina 'waimuye a 'iseni. 13 Yau Yaubada basenadi a souyeku 'waimuye 'atamana Bedeli 'waineye, bei kileu 'u vetovoia bunamayega 'u iwagi wata bei 'u vona'awaufaufa 'waikuye. Bega 'u na i 'idewadewa 'u na tauya 'awalawa de'e 'wainega, 'u na vilamu 'amu tuvadeye.’ ”

14 Litieli wata Lea Iakobo yana vona i tutuli i vo, 'Asa'aiana 'atumaina, tamama yana 'ai'aiwabu matatabuna 'wainega 'ima kebu tamu 'ama veuveuta i da velemaga. 15 Yana sauluva 'waimeye 'wa da vo 'ima wakawaka. Wata tutuyanina i vekimwaneyemaga, maninina 'ana tutula 'u veleni natunavo faifaima i ve'amubwadodoyeni. 16 Tamama yana 'ai'aiwabu matatabuna Yaubada i velemuga, 'asa'aiana 'ima wata natumavo faifaima. Begaidi ava'ai Yaubada i vonemuga, 'u na 'idewai.”

17 Bega Iakobo yana vevinevo wata natunavo i dodoga kameli kwavudie. 18 Iakobo ma yana 'aila'avo i tauya i nunagoi 'awalawa Kenani, bei tamana Aisake i miamia. Yana 'aisaya matatabuna manawaneye i kumeta, wata nani 'ifwaidi i 'ewadi 'atamana Fadani-Lami 'wainega. Mulieta Iakobo i 'idewadewa i tauya mulidie i nago 'awalawa Kenani, bei tamana Aisake i miamia. 19 Bola kebu i da tauyaga, Lebani i nago yana sifi vutuvutudi i bobodi, nika Litieli i luku Lebani yana vanuge, tamadi yana kumaea yaubadavo i vinagodi. 20 We'e Iakobo Lebani tomogo Alami i vekalieni, bega yadi tauya faifaina kebu i da veifufu 'waineye, givagivayega i degalovei. 21 Bega Iakobo yana kukua matatabuna i 'ewadi i tauya, Ufa Iufiletisi i damani i nagoi 'Oya Giliadi weyaginega.

25 'Oya Giliadi 'waineye Lebani Iakobo i veluagai, kebu 'ani'iega Iakobo yana vadavada 'wainega, bei Lebani yana vadavada i vetovoia. 26 Bega Lebani i voneni i vo, Awale 'u vekalieku? Natukwavo vevinedi 'adi 'ailuga givagivayega 'u degedi 'u nunawedi, 'wa da vo tolugaviavo i da 'ive'avinidi vetalaga 'wainega. 27 Awale givagivayega 'u dega? Awale 'u vekalieku wata kebu 'u da voneku yamu tauya faifaina? 'Ai'edi a da 'asetai yamu tauya faifaina 'ana sakali a da 'idewai, lei aliali*'Ana mogitana vona Ibeliu 'waineye, tamubalini, me Ibeliu vevine yadi 'eba lauinava. lei aliali wata 'eba lauinava gita 'wainega ta da sosoana wata 'eba lauinava gita 'wainega ta da sosoana. 28 Awale natukwavo wata tubukwavo, kebu 'u da tauyeku 'a da 'avalamaigidi 'alo a da yaogidi? Yamu sauluva 'wa da vo 'wava'wavadi yadi sauluva bani'odi. 29 'Aku fata a da luvela'ovimi, siwe lovane tamamu yana Yaubada i souyeni 'waikuye i voneku i vo, kebu tamu nani 'u na 'idewai Iakobo 'waineye.’ 30 'Akonadi a 'asetai nuanuamu bwaikina 'u na vilamu tamamu yana vanuge, siwe awale yaku kumaea yaubadavo 'u vinagodi?”

31 Iakobo i vo, A kololo fai a vo 'ako, ma yamu nuasako natumwavo 'adi 'ailuga 'u na 'eloku.’ 32 We'e Iakobo kebu i da 'asetaiga, Litieli Lebani yana kumaea yaubadavo i vinagodi. Wata aitoi 'wainega yamu kumaea yaubadavo 'u na veluagadiga, i lubwaineni tomogonina i 'ewadiga i na wafa. 'Ima 'aila'a matameye 'omu 'u na lauala 'ai'edi yamu kukua 'ifwaidi 'u na veluagadi, wata 'u na 'isa'inanadi 'u 'ewadi 'waimega.” We'e Iakobo kebu i da 'asetaiga, Litieli Lebani yana vanuga a na kumaea yaubadavo i vinagodi.

33 Bega Lebani i luku Iakobo yana vadavada 'waineye i lauala, mulieta i nago Lea yadi vadavada 'waineye wata tofolovavo 'adi 'ailuga yadi vadavada 'waidie i luku i lauala, siwe kebu tamu ava'ai i da veluagai. 'Eba ve'a'ava i nago Litieli yadi vadavada i lualai. 34 Litieli kumanidi Lebani yana vanuga a na kumaea i 'ewadi, i givedi 'eba miabui kameli kwavuneye i miafwasedi. Lebani i lauala-vuvua vadavada nageneye siwe kebu i da veluagadi. 35 Bega Litieli i vona tamadi 'waineye i vo, O 'auvea, kebu 'u na nuasako 'waimeye,'ai'edi kebu a na tovoiga fai 'akonadi 'u 'asetai yau weta'i i 'ewama.” Begaidi Lebani i lauala-wayoga yana kumaea yaubadavo kebu i da veluagadi.

36 Nika Iakobo i nuasako Lebani i velutolieni i vo, Ava'ai yaku sakonaga ? Ava'ai sauluva sakoina a 'idewai 'waimuye, bega 'u tatalawavina 'u da vo yau tamu tosakona? 37 Bega yaku kukua matatabuna 'akonadi 'u lauala 'waidiamo 'u nago, 'ai'edi yamu kukua 'ifwaidi 'u veluagadiga 'u na sivemagesedi. 'U na yatodi yada 'aila'avo matadie taunidi i venua'ivina aitoi i vekali, 'omu 'alo 'ima.

38 Malamala 20 nagedie taiadi ta miamia yamu 'aisayavo a 'i'isave'avinidi. Malamalanidi ta miamiaga, yamu sifi wata goti a 'i'isave'avinidi siwe kebu tamu sai'afo i da venatubaibai. Wata malamalanidi 'waidie kebu tamu sai'afo yamu 'aisaya sifi a da nikei a da 'ania. 39 'Ai'edi 'ifwaidi yamu 'aisayavo 'aisaya kasikasisidi i da ovadi, 'aisayanidi wafadi kebu a da givedi we'e tutulidi yau a 'idewadi. 'Omu yamu 'aisayavo tovainago i vinagodiga 'aiaseye 'alo lovana 'waineye, 'asa'aiana yau 'aisayanidi 'aitamogana 'aitamogana tutulidi a 'idewadi.

40 Tutuya fuedi ma yaku tokemaiga a folofolova 'waimuye, 'aiaseye inala yana yauyauta bwaikina 'waineye kebu 'ada degadega, wata lovana 'aitamogana 'aitamogana kaukau 'wainega kebu a da 'e'enodewa. 41 Side bani'odi, malamala 20 nagedie a folofolova yamu vanuga 'ana 'ayaneye. We'e malamala 14 nagedie a folofolova natumwavo vevinedi 'adi 'ailuga faifaidi, wata malamala 6 nagedie yamu 'aisayavo a 'i'isave'avinidi. Siwe tutuya fuedi yaku folova 'ana tutula 'u sisivilavilai tutuya 10 bani'odi. 42 We'e 'ai'edi tubuku Ebelamo yana Yaubada, kumanina Aisake ma yana kololo i 'odu'odu 'waineye, kebu i da 'ivaiseku 'ako yau nima'ava'avaku a da tauya. Siwe Yaubada yaku 'abiawa 'ana veviga wata yaku folova toketokena i 'iseni, begaidi lovane i souyeni 'waimuye nika i tolimatanimu.”

45 Bega Iakobo tamu kileu i 'ewai nika i vetovoia, yadi 'eba 'isa. 46 Bega Iakobo yana 'aila'a i vonedi i vo, Kileu 'wa na miedi.” Bega kileu i miedi i 'ivedidigi, i 'a'ava Iakobo wata Lebani taiadi i miabui kileu didiga lilivaneye veakutagona 'ana 'ani i 'idewai. 47 Begaidi Lebani i goleni Iega-Saaduda [me Alamaiki bonadiega], we'e Iakobo me Ibeliu bonadiega 'ana wagava i goleni Galedi.†Iega-Saaduda me Alami bonadiega wata Galedi me Diu bonadiega 'adi saivila i vesala, 'Eba awavemogitana 'ana Didiga.

48 Bega Lebani i vo, Didiga de'e 'omu wata yau yada veakutagona 'ana tugusa, 'wainega ta na 'asetai 'akonadi ta vona'awaufaufa.” Begaidi i goleni Galedi, 'ana 'aseta 'Eba awavemogitana 'ana Didiga 49 Wata tamu 'ana wagava Misifa, me Ibeliu bonadiega 'ana saivila 'ana 'Eba Lu'atu'ai, fai Lebani i vo, Nuanuaku 'Auvea bei i na 'ise'iseda bega yada veakutagona ta 'idewaiga ta na ve'ililibuyeni. 50 Avinodi kebu tamu aitoi 'ana fata i na 'isemu. Yaubada 'aisena 'ada to'aseta, 'omu wata yau yada veakutagona ta na 'isave'avina.

51 Wata Lebani i vo, Didiga de'e 'u na 'iseni wata tamu a vetovoia 'omu wata yau yada 'eba 'isa 'awasasadeye. 52 Didiga de'e wata kileu manamanawena i vetovoiaga yada ikata 'ana tugusa. Bega yau kebu didiga a na 'iaweni yamu vi'ai 'waineye bega veviga a na velemu 'alo didiga 'u na 'iaweni 'u na mai yaku vi'ai 'waineye veviga 'u na veleku. 53 Tubudavo yadi Yaubada, kumanina tubumu yana Yaubada wata tubuku Naoli yana Yaubada, i da veimea vematavuloga faifaina 'ai'edi 'omu 'alo yau yada veakutagona tonovina ta na geuya.”

Bega Iakobo yana vona'awaufaufa toketokena 'idewai Yaubada mataneye, kumanina tamana Aisake ma yana kololo i 'odu'odu 'waineye. 54 Bei 'oyeye Iakobo tamu 'aisaya i velomuyeni Yaubada 'waineye i kabuni. Yana 'aila'avo matatabudi i tayegidi veakutagona 'ana sakali i 'ani. Tutuyanina 'ani i 'a'avana matatabudi 'oyeye i 'eno.

55 I 'atai 'awa'awaiogose Lebani i tovoi natunavo vevinedi, wata tubunavo i 'avalamaigidi i yaogidi wata i vona-nuakalikali 'waidie nika i tauya i nago yana 'eba mia 'waineye.