32
1 Mulieta Iakobo i tauya i nunago 'edeye, nika Yaubada yana anelosevo i veluagadi. 2 Tutuyanina Iakobo tomotoganidi i 'isedi i vo, De'e Yaubada yana 'eba vebae'wa.” Bega 'ana wagava i goleni Manaimi.*Manaimi 'ana 'aseta, 'Eba vebae'wa 'adi 'ailuga
Iakobo nuakalikali i vetunedi Iso 'waineye
3 Mulieta Iakobo tomotoga 'ifwaidi i vetunedi i kumeta tatana Iso 'waineye, 'atamananina 'ana wagava Seli 'waineye bei miamia, 'awalawa Idomu nageneye. 4 I veifufudi i vo, Side yaku vala yaku 'auvea Iso 'wa na voneni 'wa na vo, Yamu tofolova Iakobo, i vekaiwa 'waimuye. Basenadi a nago avuku Lebani 'waineye a miamia i maiga 'asiau. 5 Tutuya de'e 'waineye yaku 'aisayavo fueotogidi bani'odi bulumakau, doniki, sifi wata goti, tofolovavo iavetadi wata vevinedi. Bega side tomotoganidi a vetunedi i viwai yaku 'auvea i vonemu yaku wai faifaina, a nuani ma yamu sosoana 'edeye ta na veluaga.’ ”
6 Tutuyanina tomotoganidi i viladi Iakobo 'waineye i voneni i vo, Tatamu Iso 'a veluagai, 'akonadi i mimai 'edeye, yana tomotoga 400 taiadi i na yogo'ede'edemu.” 7 Iakobo valanina i nogai i kololo-'afo'afo, begaidi yana vevinevo, natunavo wata yana 'aisayavo i 'ididi, sifi bulumakau wata kameli 'aila'a 'ailuga i 'idewadi. 8 Yana nuanua i vo, 'Ai'edi Iso tamu 'aila'a taiadi i na vevetalaga, nika tamu 'aila'a i na dega.”
9 Mulieta Iakobo i velu'ui i vo, 'Omu tubuku Ebelamo yana Yaubada wata tamaku Aisake yana Yaubada. Ie 'Auvea, basenadi 'u voneku 'u vo, 'U na vilamu yamu 'awalaweye wata yamu tomotoga 'waidie.’ Wata 'u vona'awaufaufa 'waikuye 'u vo, Ma yaku nuakalikali a na vesauluva 'atumaina 'waimuye.’ 10 Yamu 'atumaina, yamu 'isanuakalikali 'eno'eno-vagaina wata yamu vona'awaufaufa 'atumaidi 'u 'idewadi yamu tofolova 'waikuye, kebu i da lubwaineni, fai yau yamu tofolova. Tutuyanina a tovoi a damana Ufa Iolidani vi'ainega, kebu tamu ava'ai 'waikuye i da 'eno'eno, yaku wautogana 'aitamogana. We'e tutuya de'e yaku 'aila'a i vebwaika-'afo'afo 'aila'a 'adi 'ailuga. 11 'Auvea, a vevelu'ui 'waimuye nuanuaku 'u na 'ita'ita'ieku tataku Iso 'wainega, yau a kololo fai i mimai i na nikeku, yau, yaku vevinevo wata natukwavo taiadi. 12 Siwe 'u vona'awaufaufa 'waikuye 'u vo, Vona mogitana a na vesauluva 'atumaina 'waimuye wata bola 'amu wauma i na vefue wala'ai 'ana 'ilukulukuta bani'odi.’ ”
13 Iakobo lovani 'aitamogana bei i 'eno, mulieta yana kukua 'waidiega i 'idewadewai i na 'anivelenedi tatana Iso 'waineye. 14 'Aisayanidi bani'odi goti vevinedi 200, goti iavetadi 20, sifi vevinedi 200, wata sifi natudiavo 20, 15 kameli vevinedi 30 ma natudiavo, bulumakau vevinedi 40, bulumakau iavetadi 10, doniki vevinedi 20 wata doniki iavetadi 10. 16 'Aisayanidi i 'idia 'aila'a 'aitamogana 'aitamogana mulieta i 'anivelenedi yana tofolovavo 'aitamogana 'aitamogana 'waidie. Mulieta yana tofolovavo i vonedi i vo, 'Wa na kumeta 'aisaya 'wa na nunawedi, siwe kebu 'wa na luvetubama 'aila'a 'aitamogana 'aitamogana 'waidiega.”
17 We'e tomotoganidi 'aila'a kumekumetana Iakobo i velu'ase'asedi i vo, 'Ai'edi tataku Iso i na veluagami i na velutoliemi i na vo, 'Omi aitoi yana tofolovavo? Aitoi yana 'aisayavo? Ava'aibe bei 'wa nunagoi?’ 18 Bega 'wa na vo, Yamu tofolova Iakobo yana kukua, siwe nuakalikalinidi 'ana toveimea Iso faifaina. We'e taunina siva'e mulimeye i mimai.’ ”
19 Wata bani'odi Iakobo 'aila'a 'ana veluga, 'ana vetonu wata tomotoganidi mulidie i mimaiga i vonedi i vo, Tutuyanina Iso taiadi 'wa na veluaga, veifufunina 'aitamogana wainega 'wa na veifufu. 20 Nika bei 'wa na voneni 'wa na vo, Yamu tofolova Iakobo siva'e mulimeye i mimai.’ ”
Iakobo yana nuanua i vo, 'Ai'edi yaku 'anivelena a na vetunei i na kumeta. Tutuyanina taunina a na 'iseni a nuani i na sosoaneku.” 21 Tutuyanina i veifufu'a'avana, yana nuakalikalinidi i vetunedi i kumeta, we'e Iakobo taunina lovananina i 'eno yana vadavada 'waineye.
Iakobo Yaubada yana anelose taiadi i ve'ivunuvunuga
22 Lovananina 'waineye Iakobo i tovoi yana vevinevo 'adi 'ailuga, yana tofolovavo siwe yana vevinevo 'adi 'ailuga wata natunavo 'adi 11 taiadi Ufa Iaboki i damani. 23 Tutuyanina tomotoga matatabudi i vagavaidi i damana ufa vi'ainega, yana kukua matatabuna i 'anivelenedi yana tofolovavo 'waidie.
24 Iakobo 'aisena i miamia tamu aitoi i mai, ma yana toketokena taiadi i ve'ivunuvunaga i nagoga tutuya i kililia. 25 Tutuyanina tomogonina i 'asetai 'akonadi yana toketokena i mweamwea, bega Iakobo agalina 'ana tubwa i 'wenoi. 26 Tomogo i vo, 'U baileku a na nago 'akonadi i 'ata'atai.”
Siwe Iakobo i vo, Kebu a na 'avalainanimuga, nagami 'u na vona-nuakalikalieku mulieta a na tauyemu 'u na nago.”
27 Nika tomogonina i velutolieni i vo, Aitoi 'amu wagava?” I vo, Yau Iakobo.”
28 Bega tomogonina i vo, 'Amu wagava kebu wata Iakobo i na golegolemu, 'Asiau 'amu wagava 'ivauna Isileli†Isileli 'ana 'aseta, Yaubada taiadi i vetafewa. i na 'inanai, fai Yaubada wata tomotoga taiadi 'u vetafewa nika 'u vetoketoke.”
29 Iakobo i vo, 'Amu wagava 'u da voneku.”
Siwe tomogonina i voneni i vo, Awale nuanuamu 'aku wagava 'u na 'asetai?” Mulieta i vesauluva 'atumaina Iakobo 'waineye.
30 Iakobo i vo, Fenieli,‡Fenieli 'ana 'aseta, Yaubada taiadi i ve'a'isa. fai 'Auvea taiadi i ve'a'isa. Yau Yaubada matakuyega a 'iseni siwe i 'isanuakalikalieku bega yawaiku kebu 'ida 'ewai.” 31 Inala 'akonadi i vulaoga we'e Iakobo i tauya Fenieli 'wainega, we'e agalina 'ana tubwa i 'anita'ia fai ma 'ana kini'ona bega i tatalafai'a. 32 (Begaidi tutuya de'e 'waineye me Isileli kebu 'aisaya agalidi 'adi tubwa 'waidie i da 'ani'anidi, fai lovananina 'waineye tomogo Iakobo agalina 'ana tubwa i tutuwenoi nika yana toketokena i mwea.)