3 Siwe Iuda tamana i voneni i vo, Tamaku, Itifita 'ana toveimea yana veimea toketokena i velemaga i vo, 'Ai'edi taimi kebu taiadi 'wa na maiga, kebu wata maigiku 'wa na 'ise'iseni.’ 4 'Ai'edi Beniamina 'u na tauyeni taiadi 'a na nagoga, matatabuma 'a na nagoi 'ada'ada moso'ina 'a na kimwane. 5 We'e 'ai'edi Beniamina kebu 'u na tauyeniga, 'ima wata kebu 'a na nagoga, fai tomogonina yana veimea toketokena i velemaga, i vo, 'Ai'edi taimi kebu taiadi 'wa na maiga, kebu wata maigiku 'wa na 'ise'iseni.’ ”

6 Iakobo natunavo i vonedi i vo, Ava'ai faifaina vita bwaikina 'wa mieni 'waikuye? Wata awale tomogonina 'wa voneni 'wa vo, Taima tamu i miamia?’ ”

7 I voneni i vo, Tomogonina i toke i velutolitoliema 'omu wata 'ima faifaima i vo, Tamami bola ma yawaina i miamia?’ Wata i velutoliema i vo, Taimi tamu i miamia?” Mogitana yana velutoli 'a nogayeni. 'Ai'edi nagami i da vonemaga, 'ako kebu yana velutolinina 'a da nogayeni’ ”

8 Bega Iuda tamana i voneni i vo, Kwamana 'u na tauyeni ma 'aila'ama 'a na nagoi, nika kebu 'ana fata laseyega wafa i na souyeni 'waideye, 'omu wata natumavo 'waidie. 9 Yau 'aiseotogiku kwamananina a na ve'isabodebodeni. 'Ai'edi kebu taiadi 'a na vilamaga 'waimuye, yau 'ana vita matatabuna a na tovoieni, we'e 'u na veimeyekumo. 10 'Ai'edi nagami 'a da vonemu bega taima 'u da tauyeni taiadi 'ada nagoga, de'e 'ana veluga wata 'ada vilama.”

11 Bega Iakobo natunavo i vonedi i vo, 'Ai'edi yana vona'awaufaufanina bola toketokena i na 'eno'enoga, tamu 'eda'eda 'wainega ta na nua'ania. Side bani'odi 'wa na 'idewai. Nani 'ifwaidi 'atumaidi yada fwayafwaya vuagina 'wainega, yada 'anivelena tomogonina faifaina 'wa na 'idewadi yami venuane 'wa na dodogidi, 'wa na nawedi 'wa na veleni. Naninidi bani'odi mai'awa, welavi alimonidi wata fisitakio biladi, 'ifwaidi bunama magaidi 'atumaidi taiadi. 12 Wata kileunidi i veviladi yami venuane i dodogidi, 'wa na 'imoso'iedi 'wa na veleni. Voke tamu aitoi i dodofaniedi. 13 We'e taimi 'wa na vagavaia 'wa na vilami 'wa na nagoi tomogonina 'waineye. 14 'A vevelu'ui faifaimi, nuanuaku Yaubada Toketokeotogina*'Ana mogitana vona Ibeliu 'waineye, wagavanina El Shaddai. i na 'isanuakalikaliemi, bega tomogonina 'waineye 'wa na le'waga, Simioni i na 'etoyavuya we'e Beniamina i na vevilai taiadi 'wa na mai. We'e 'ai'edi natukwavo i na wafaga, yau 'asa'aiana 'aiseku.”

15 Iakobo i veifufu'a'ava, natunavo yana nuakalikali i 'idewai kileunidi i viledi i taiadi i luvetubami, mulieta Beniamina taiadi i tauya. Tutuyanina i le'wai Itifita, ma yadi ve'ililibu i nago Iosefa 'waineye. 16 Tutuyanina Iosefa Beniamina i 'iseni taiadi i maia, yana vanuga 'ana to'isave'avina i voneni i vo, Tomotoganidi 'wa na vagavaidi 'wa na lukuvedi yaku vanuga nageneye, mulieta 'aisaya 'u na nikei 'ani'ani bwaikina 'u na 'idewai bega 'aiata 'ana utukamwana 'waineye taiadi 'a na 'ani.” 17 Tomogonina Iosefa yana veifufu matatabuna i vematayakeyakeni, i nawedi Iosefa yana vanuge.

18 Tutuyanina i le'wa yana vanuge, matatabudi i kololo'afo'afo, fai i nuani i vo, 'Ida ta maiga yana vanuge, fai yada mai kumekumetana 'waineye, yada venuana 'waidie kileu i veviladi. Nuanuana i na 'ive'avinida bega yada 'aisaya i na 'ewadi we'e 'ida ta na vetofolova-maimaiga 'waineye.

23 Vanuga 'ana to'isave'avina i vonedi i vo, Kebu 'wa na kolologa. Yami Yaubada, kumanina tamami yana Yaubada, 'ai'aiwabu i dodogidi yami venuana 'waidie. A 'asetai, yami kileu 'ani'ani 'adi tutula faifaina 'akonadi a veluagadi.” I vona'a'ava, Simioni i yavuya i souyeni i nago enavo 'waidie.

24 Mulieta vanuga 'ana to'isave'avina tomotoganidi i nawedi Iosefa yana vanuge, ufa i veledi 'agedi i lekoadi wata doniki 'adi'adi i veledi. 25 Yadi 'ani faifaina 'akonadi i vonedi, 'ako Iosefa yana vanuge i na 'ani. Fai i 'asetai Iosefa 'aiata 'ana utukamwana 'waineye i na le'wa, begaidi yadi nuakalikali i 'idewa-vagasedi i 'eno'enovi.

26 Tutuyanina Iosefa i le'wa vanuge, nuakalikalinidi i 'ewadi i 'anivelenedi Iosefa 'waineye, mulieta tugatugadi i vetufano'uyedi fwayefwayeye, ma yadi ve'ililibu i lumata'afufu fwayefwayeye. 27 Mulieta Iosefa i vona-vekaiwa 'waidie i 'a'ava, wata i velutoliedi i vo, Tamami 'au'auveana 'wa da 'asetai, kumanina faifaina 'wa veifufuga, bola ma yawaina i miamia?”

28 I vo, E'e, tamama yamu tofolova i miamia ma yawaina.” Nika ma yadi ve'ililibu i 'odu-vaitugana 'waineye.

29 Iosefa enavo i 'isa-'atumaidi nika taina Beniamina i 'iseni, taunina inana natudi, i velutoliedi i vo, We'e taimi 'ami 'walaboda, kumanina faifaina nagami 'wa veifufuyeni 'waikuye?” Wata Iosefa i vo, Natuku, nuanuaku Yaubada i na vevesauluva 'atumaina 'waimuye.” 30 Iosefa nuana i vekalikalia taina faifaina, begaidi i luku yana tutudaba 'waineye i 'we'wela. 31 Mulieta maigina i lekoai i 'a'avana i vilai i mai, fai kebu nuanuana enavo i na 'asetai de'e iadi. Yana tofolovavo i vonedi i vo, 'Ani'ani 'wa 'wa maiedi.”

32 Tofolovavo Iosefa 'ana'ana i 'idewaiga yana talalia 'aisena, enavo yadi talalia wata 'aisedi, me Itifita i na 'aniga yadi talalia 'aisedi, fai 'asa'aiana bani'odi yadi sauluva, me Ibeliu wata me Itifita kebu taiadi i da luluvetubama. 33 Iosefa enavo 'aitamogana 'aitamogana i vemiabuidi yadi tubuga 'ana malamala 'waidiamo, yadi miabui tubu'edakumeta 'wainega i nago 'adi 'walaboda 'waineye. Yadi miabuinina 'wainega, matatabudi i veyawai-lovogidi, ma ediavo i vetunuvilavila. 34 Iosefa enavo 'adi'adi i tala'ewadi taunina 'ana talalia 'wainega, we'e Beniamina 'ana ta'ula 'adi 5 wata ma 'ana 'imoso'i i veleni enavo kebu taiadi i da vesala. Matatabudi yavuyavudi, i 'aniluvetubama wata i yemu ma yadi sosoana.