44
Iosefa 'ana vedi siliba
1 Tutuyanina Iosefa enavo i 'idewadewa i na tauya, yana vanuga 'ana to'isave'avina i voneni i vo, Yadi venuana 'aitamogana 'aitamogana 'waidie fekafeka 'u na veadagidi, 'adi vita matatabuna i na vesala bega taunidi i na 'ewa. Wata yadi kileu fekafeka 'ana kimwane faifaina 'u na dodogidi yadi venuana nagedie. 2 'Adi 'walaboda yana venuana 'awaneye, 'aku vedi siliba wata yana kileu fekafeka 'ana kimwane faifaina 'u na dodogi.” Bega yana vanuga 'ana to'isave'avina i na nago Iosefa yana awave'eda'eda matatabuna i vetutuyameni.
3 Enavo i 'enoviladi 'awa'awaiogose, yadi kukua i vedodogidi yadi 'aiyasavo kwavudie nika i vetauyidi. 4 I nunagoi 'atamana bwaikina bola kebu i da 'iaweniga, Iosefa yana vanuga 'ana to'isave'avina i voneni i vo, 'U na lilide mulidie 'u na talabodedi. Tutuyanina 'u na 'ubwasadiga, 'u na velutoliedi 'u na vo, Yau a vesauluva 'atumina 'waimie, we'e 'omi Awale sauluva sakoina 'wainega 'wa tutula? 5 Ava'ai faifaina 'aku toveimea 'ana vedi siliba 'wa vinagoi? Fai vedinina 'wainega i vovona-samula tutuya i mimaiga faifaina. Naninina 'wa 'idewaiga, de'e sauluva sakoiotogina.”
6 Tutuyanina yana vanuga 'ana to'edakumeta i 'ubwasadi, 'ana toveimea yana veifufu i luvaitugani 'waidie. 7 Siwe enavo i vo, Ava'ai mogitana faifaina 'u veveifufu?”'Ima yamu tofolovavo, kebu i da lubwainema bani'odi 'a na vesauluva 'waimuye. 8 Voke kileunidi yama venuana nagedie 'a veluagadiga, faifaidi 'u veveifufu? Kebu i da lubwainema 'amu toveimea yana kileu wata golida 'a da vinagodi yana vanuga 'wainega? 9 'Ai'edi 'ana vedi 'u na veluagai tamu iama 'waineye, tomogonina i na wafa, we'e 'ifwaima yamu tofolova-maimaiga.”
10 Vanuga 'ana to'isave'avina i vo, 'Atumaina, siwe a na vonemi. Tomogonina vedi i vinagoiga, kumanina yaku tofolova-maimaiga. 'Ifwaimi yavuyavumi 'wa na nagoi.”
11 Bega matatabudi i ve'abiwalowaloga yadi venuana 'aisaya kwavidiega i 'ewadi yavudi. 12 Vanuganina 'ana to'isave'avina yadi venuana 'waidie i lauala, i velamu tubu'edakumeta 'wainega i ve'a'ava 'adi 'walaboda 'waineye. Nika vedinina i veluagai Beniamina yana venuana nageneye. 13 Tutuyanina enavo matatabudi i 'iseni, ma yadi nuavita 'adi talauma i silabu'idi. Mulieta yadi venuananidi i dodogidi doniki kwavudie nika i viladi i nagoi 'atamana bwaikina 'waineye.
14 Iosefa bola i miamia yana vanuge, nika enavo i le'wai, matatabudi ma yadi ve'ililibu i lumata'afufu fwayefwayeye. 15 Iosefa i vonedi i vo, Ava'ai faifaina 'aku vedi 'wa vinagoi? Kebu 'wa da 'asetaiga, yau 'aku fata a na vona-samula, nani 'ifwaidi i na souyeniga faifaina.”
16 Iuda i tutula i vo, Ie 'aku toveimea, kebu 'ama fata 'a na ve'awafatafata matamuye. Wata bani'odi 'a na munega 'a na kiavemagetai 'waimuye? Yama sakona faifaina kebu 'ama fata 'a na ve'ewa, yama yogosako faifaidi Yaubada 'ama vematavuloga bwaikaotogina 'wainega 'a veveluagai. De'e yama vevelu'ui-nuakalikali 'ama toveimea 'waimuye, kebu taima 'aisena kumanina vedi i veluagai yana venuane i na vetofolova-maimaiga, nuanuama matatabuma 'a na vetofolova-maimaiga 'waimuye.”
17 Iosefa i vo, Kebu 'ana fata naninina a na 'idewai! Tomogonina vedi i vinagoiga, kumanina 'aisena yaku tofolova-maimaiga. We'e matatabumi 'wa na vilami tamami 'waineye ma yami sosoana.”
Iuda enavo faifaidi i veifufu
18 Mulieta Iuda i vaganago lilivaneye, i voneni i vo, Ie 'aku toveimea, ma yaku ve'ililibu a vevelu'ui-nuakalikali 'waimuye, 'ana fata yamu tofolova-maimaiga vona 'aitamogana i da 'inanai 'waimuye. Wata a vevelu'ui-nuakalikali, avinodi Felo taiadi yami veimea i vesala, siwe kebu 'u na nuasakoyeku.
19 'Ama toveimea, basenadi 'ima yamu tofolova-maimaiga 'u velutoliema 'u vo, 'Omi ma tamamu wata ma taimu?’ 20 Yamu velutoli 'a nogayeni 'a vo, E'e 'ama toveimea, 'ima ma tamama siwe 'akonadi i ve'auvea, we'e natuna yana 'walaboda i tubuga. Tatana mogitana yawaina i 'a'ava, we'e inana natudiavo 'waidiega, 'aiseotogina i luvegalalai, siwe tamana i nuakalikalieni mogitana.’
21 Siwe wata 'u vonema 'u vo, Kwamananina 'wa na mieni 'waikuye, bega tauniotogina a na 'iseni.’ 22 Siwe wata 'a vonemu 'a vo, 'Ama toveimea 'a na vonemu, kwamana kebu 'ana fata tamana i na 'iaweni, 'ai'edi i na 'iaweniga tamana i na wafa.’ 23 Siwe 'u vonema 'u vo, 'Ai'edi taimi 'ami 'walaboda kebu taiadi 'wa na maiga, kebu wata maigiku 'wa na 'ise'iseni.’
24 Tutuyanina 'a vilama 'a nagoi tamama 'waineye, kumanina yamu tofolova, yamu veifufu 'a lu'ivoneyeni 'waineye. 25 Mulieta tamama i vonema i vo, Wata 'wa na vilami 'ada'ada 'wa na kimwane.’ 26 We'e yana vona 'a tutuli 'a vo, Kebu 'ana fata 'a na nago, nagami 'ama 'walaboda 'u na tauyeni mulieta 'a na nago. Fai i vonemaga kebu wata maigina 'a na 'ise'iseni, 'ai'edi 'ama 'walaboda kebu taiadi 'a na nagoga.’
27 Mulieta tamama i vonema i vo, 'Akonadi 'wa 'asetai yaku vavine natudiavo iavetadi 'adi 'ailuga. 28 Tamu iana i 'iaweda, i yogo-vagata. We'e tamu aigodi voke 'aisaya walawala'ai i silabulabu'i. Tutuyanina 'wainega i maiga 'asiau, kebu wata maigina a da 'ise'iseni. 29 'Asiau nuanuami wata taina 'waikuyega 'wa na 'ewai, 'ai'edi tamu vita i na souyeni 'waineye, de'e 'aku taumata 'wa mimaieni nuavita 'wainega ma 'aku budula 'wa na ve'ufaku.’
30 Ie 'aku toveimea, 'Ai'edi kwamana kebu taiadiga, kebu 'ana fata a na vilaku tamaku 'waineye. Fai tamama wata 'ama 'walaboda taiadi i vevenuakalikali mogitana. 31 'Ai'edi natuna i na 'isa'a'avaiga, tamama i na wafa. 'Ana vita matatabuna 'ima yamu tofolova-maimaiga 'ana evai, we'e ma 'ana budula 'a na vetunei 'ana taumata 'waineye. 32 Ie 'aku toveimea, tamaku mataneye a vona'awaufaufa, kwamana a na 'i'isave'avini. Wata a voneni a vo, 'Ai'edi kebu taiadi 'a na vilamaga, 'ana vita matatabuna yau a na tovoieni.’
33 Wata 'aku toveimea, a vevelu'ui-nuakalikali 'waimuye, kwamana kebu i na vetofolova-maimaiga, yau 'ana vita a na tovoieni, we'e kwamana enavo taidi i na viladi. 34 'Ai'edi kwamana kebu taiadiga, bani'odi a na munega bega a na vilaku tamaku 'waineye? Kebu nuanuaku vita i na souyeni tamaku 'waineye a na 'iseni.”