42
Iobi 'Auvea yana veifufu i tutuli
1 Iobi i tutula 'Auvea 'waineye i vo,
2 Yau a 'asetamu, nani matatabuna 'amu fata,
kebu tamu aitoi i na ve'etobodemuga.
3 Iob 38:2'Omu 'u velutolieku 'u vo, Awale ma yamu bavu yaku nuamageta faifaina 'u vevelutoli?’
A vona mogitana, naninidi faifaidi a veifufuga, kebu a da 'asetadiga,
naninidi 'eba nuavogana kebu 'aku fata a na nuamagetadi.
a na velutoliemu nani 'ifwaidi faifaidi,
we'e 'omu 'u na tutula.’
5 Basenadi 'omu vala'avamu a nogai,
we'e 'asiau tauniku matakuyega a 'isemu.
6 Yaku vona-'avo'avovo 'waidiega a bunumayaga,
begaidi a nuavilaku ma yaku nuaobu a miabui 'aufafeye.”
'Auvea Iobi i awave'atumaieni
7 'Auvea i veifufu Iobi 'waineye i 'a'avana, i damana Elifasi tomogo Temani 'waineye i vo, 'Omu kebu mogitana 'u da veifufu tonovina faifaiku bani'odi yaku tofolova Iobi i veifufuyediga, begaidi yau a nuasako 'omu wata emwavo 'adi 'ailuga taiadi 'waimie. 8 Begaidi bulumakau 7 wata sifi iavetadi 7 'u na 'ewadi 'u na nago yaku tofolova Iobi 'waineye i na velomuyedi i na kabunidi 'waikuye 'omi faifaimi. Iobi faifaimi i na velu'ui we'e yau yana velu'ui a na awave'atumaieni nika kebu a na vematavulogimi sauluvanina faifaina 'ami laubwaina bani'odi. Yami veifufu faifaiku kebu tonovinaga we'e Iobi i awavemogitana faifaiku.”
9 I 'a'avana Elifasi tomogo Temani, Bilidadi tomogo Sua wata Sofa 'atamana Namata 'wainega, ava'ai 'Auvea i voneyediga i 'idewadi nika 'Auvea Iobi yana velu'ui i nogai i awave'atumaieni.
10 Iob 1:1-3Tutuyanina Iobi enavo faifaidi i velu'ui i 'a'avana, 'Auvea yana 'ai'aiwabu i vele-vaituganeni. Yana kukuanidi ma 'adi 'imoso'i i veleni mulieta basenadi bani'odiga. 11 Iobi tainavo, novunavo wata egavo basenadi i veianediga, i maia taiadi i lusakali yana vanuge bega i ve'ala'ani. Matatabudi Iobi nuana i 'i'iveolooloi wata i kiavesosoani vitanidi 'Auvea i miediga 'waineye faifaina. Tomotoganidi mani wata golida didikumakuma 'aitamogana 'aitamogana i veleni.
12 'Auvea Iobi yana 'atumaina i vele-vaituganeni i vesauluva-'atumaiotogina 'waineye we'e basenadi sai'afo. Bega yana 'aisayavo fueotogidi sifi 'adi 14,000, kameli 'adi 6,000, bulumakau 'adi 2,000 wata doniki vevinedi 'adi 1,000. 13 Iobi natunavo 'adi 'aila'a 10, iavetadi 'adi 7 we'e vevinedi 'adi aitonu. 14 Natuna vevinena kumekumetana i goleni 'ana wagava Timaima, 'ana veluga Kesaia we'e natuna vevinena 'eba ve'a'ava 'ana wagava Keleni-Afuka. 15 Iobi natunavo vevinedi 'adi 'isa 'atumaiotogidi, kebu 'ifwaidi vevine bani'odiga yadi 'awalawa 'ana matatabuna 'waineye. Iobi natunavo matatabudi i veifufudi yawaina i na 'a'avaga faifaina, yana 'ai'aiwabu wata yana kukua natunavo vevinedi 'adi veuveuta i na 'ewadi novudiavo taiadi.
16 Naninidi matatabuna i souyedi Iobi 'waineye, mulieta i miamia malamala 140 nagedie, lakata 'adi 4 i 'isedi bani'odi natunavo, tubunavo, aisenavo wata mata'olo'olonavo. 17 I ve'auvea-'afo'afo mulieta yawaina i a'ava.