Same
'Eba kiavemageta
Tutuya basenadi tomotoga fuedi lei wata velu'ui i kilumidi buki de'e nageneye. Me Isileli i luvetubamidi bega 'waidiega i subisubia. We'e lei wata velu'ui tulina tulina nageneye, 'ifwaidi subia awa'ai'ai Yaubada faifaina wata 'ifwaidi i vevekaiwa 'waineye yana sauluva 'atumaidi 'waideye faifaidi. 'Ifwaidi i vevelu'ui 'aivaita wata 'ita'ita'i faifaina, we'e 'ifwaidi nuatavuna faifaina i vevelu'ui.
Lei 'ifwaidi 'waidiega tomotoga i vevelu'ui Yaubada 'waineye yadi kini faifaina wata i vevelu'ui 'adi gaviavo i na vematavulogidi. Tutuya 'ifwaidi tokiluma i vona-vaitugana, yana nuavita i sivemageseni Yaubada 'waineye.
Tutuyanina Iesu i vevega tomotoga 'waidie vona 'ifwaidi Same 'wainega i lu'ivoneyedi. Tafalolo yana 'eba velamu 'wainega i maiga 'asiau, tomotoga Yaubada i subisubiai Samenidi 'waidiega.
1
1 'Eba sosoana bwaikina tomotoganidi 'waidie,
'ai'edi tosakona yadi ve kebu i da vetutuyamediga,
sauluva tonovidi 'adi tobaila kebu i da veianediga,
wata Yaubada 'ana tosidibidibivo kebu taiadi i da luvetubama.
2 We'e 'Auvea yana awave'eda'eda i nuakalikalieni,
yana vona tutuya matatabuna i nuanuani 'aiata wata lovana 'waidie,
'eba sosoana bwaikina 'waidie.
3 Iel 17:8Taunidi welavi bani'odi i bakulidiga ufa lilivaneamo,
'adi tutuya 'waidie i na vuavuaga,
lukudi kebu i na 'a'awagi'adi.
Nani matatabuna tomotoganidi i na 'idewadiga, ma vuagidi.
4 Tomotoga sakoidi kebu bani'odi,
kumanidiavo bani'odi welavi lukudi bwavudi, tutuyanina kaukau i na nunuga i na bewedi.
5 Vonayavuga 'ana tutuye, Yaubada i na veimeyedi vematavuloga i na veluagai.
Tosakonanidi kebu tomotoga yadi sauluva tonovidi taiadi i na luvetubamidi.
6 Tomotoganidi yadi sauluva tonovidi, 'Auvea i 'i'isave'avinidi,
we'e egavo sauluva sakoidi i 'i'idewadiga wafa 'ana 'edeamo i nunagoi.