1 Tutuyanina me Isileli i miamia Sitimi, iaveta i velamu i ve'avula-'avo'avovo me Moabe vevine taiadi. 2 Vevinenidi iaveta i vagavaidi i nawedi yadi yaubadavo 'adi velomu 'waidie i luku, taiadi i 'ani'ani wata i 'odu'odu me Moabe yadi yaubadavo 'waidie. 3 Bega me Isileli sauluvanina 'wainega i luvetubama, kumaea Beli-feola 'waineye i 'odu'odu, begaidi 'Auvea i nuasako-'afo'afo 'waidie.

4 'Auvea Mosese i voneni i vo, Tomotoga yadi to'edakumetavo 'u na 'ive'avinidi 'u na luvewafadi 'Auvea mataneye we'e tomotoga 'awasasadie nika 'wainega yaku kamogala me Isileli 'waidie i na ve'ilovei.”

5 Nika Mosese i veifufu me Isileli yadi toveimeavo 'waidie i vo, Egavo yami 'aila'avo 'waidiega i 'odu'odu Beli-feola 'waineye 'wa na nikedi i na wafa.”

6 Mosese wata me Isileli tomotoga matatabudi i va'auta Vadavada Tabutabuna 'awaneye i vevemogai, nika matadie tamu iadi vavine Midiani i 'ewai i nunaweni yana vadevadeye. 7-8 Tutuyanina Feniasi, Eleasa natuna we'e tovelomu Eloni tubuna, tomogonina i 'iseni, i tovoi 'aila'a i 'iawedi i nago yana 'ibadi i 'ewai, i yogo'waili i nago yana vadevadeye bega i 'ailovena tomogo wata vavine i 'etolugedi. Bega viga bwaikina, me Isileli 'adi vematavuloga, bei i ve'ilovei. 9 Siwe viganina 'wainega tomotoga 'adi 'aila'a 24,000 'akonadi i wafa.*Wata 'wa na 'iseni 1 Kolinita 10:8

10 'Auvea Mosese 'waineye i veifufu i vo, 11 Feniasi, Eleasa natuna we'e tovelomu Eloni tubuna, yaku nuasako i sivivieni me Isileli 'waidiega fai yaku nuanua mogitana i 'idewai 'aku ve'ililibu faifaina, begaidi kebu ma yaku nuasako a da luvela'ovidi. 12 Begaidi Feniasi 'u na voneni, yau 'Auvea a vona'awaufeufeni mia 'atumaina wata mia niwalova a na veleveleni. 13 Fai yaku nuanua mogitana i 'idewai 'aku ve'ililibu faifaina wata me Isileli yadi sakona i 'u'umidi begaidi a vona'awaufaufa tubunavo taiadi i na vetovelomu-vagata.