9
Evulega 'ana ve-5 i yuvei
1 Manubutu i tauya i nago, mulieta anelose 'ana ve-5 yana evulega i yuvei, tamu tomogo matauduudulina i obu fwayefwayeye 'ana 'isa'isa 'wa da vo 'ubwana i da 'anita'ia abamayega. I obu nika tamu aitoi Ovu Dududubalina 'ana 'eba yavu i veleni bega i na yavuya. 2 Nag 19:28I yavuya nika lufwa bwaikina i souyeni 'wa da vo libi domwa-tuaina lufwana bega inala matana i umai yana mageta i 'awaduguli, abama 'ana 'isa'isa bani'odi igovala. 3 Sou 10:12-15Lufwanina 'wainega limwana fuedi i obu tanotanoge i vetuli yadi 'aiova i vekasikasisi dinigala*'Ana mogitana vona Ibeliu 'waineye, bwa'o'o'o, siwe yadi 'awalaweye bwa'o'o'o tomotoga yadi 'eba wafa, we'e 'ida 'waideye bwa'o'o'o sai'afo mweadi. weweda bani'odi. 4 Isi 9:4Limwananidi i talabodedi kebu 'adi fata 'ani'ani i na 'ivesakoidi wata bani'odi mosomoso 'alo welavi. Tomotoga fuedi i na ovadi, we'e tomotoganidi Yaubada yana tugusa debadie i yatodiga, kebu i na ovadiga. 5 I vonedi i na ovadimo we'e 'ivewafa faifaina kebu i da tauyedi. Weta'i 5 nagedie i na ovaovadi bega i na veveviga bwaikina bani'odi dinigala weweda yadi 'aiova. 6 Iob 3:21; Iel 8:3Veviganina faifaina tomotoga i na vo, 'A da wafa, veviga 'a baila,” siwe Yaubada kebu i na tauyedi i na wafaga.
7 Ioe 2:4Limwananidi 'adi 'isa'isa 'wa da vo osi lugavia 'ana talauma 'wainega i da 'ivivigavudi vetalaga faifaina. Ma 'adi veimea bega debadie 'adi vaigavu golida i yatodi, maigidi 'wa da vo tomotoga maigidi. 8 Ioe 1:6Nava'audi manamanawedi, nigodi manamanawedi wata nigonigodi bani'odi laioni. 9 Ioe 2:5Tomogodi 'adi babala kainumu, fafedi butu'aidi bwaikaotogidi 'wa da vo osi waka fwayafwaya fuedi i da luluyo'edi vetalaga faifaina. 10 We'e giudi 'adi 'isa'isa bani'odi bwa'o'o'o giudi, ma yadi toketokena weta'i 5 nagedie veviga bwaikaotogina tomotoga i veleveledi. 11 Ovu Dududubalina 'ana to'isave'avina kumanina wata limwananidi yadi kini. 'Ana wagava Abadoni me Diu bonadiega, we'e me Kuliki bonadiega Afoloni, 'ana saivila To'ivesako. 12 De'e vitanina i 'a'ava, vita 'ailuga wata sai'afoga i na souyedi.
Evulega 'ana ve-6 i yuvei
13 Sou 30:1-3Anelose 'ana ve-6 yana evulega i yuveiga, bona a nogai i mai 'eba velomu kamwanega.†'Ana mogitana, bona a nogai i mai 'eba velomu alana 4 'waidiega. Alana i tubwadi 'eba velomu fogena 4 'waidie. 'Eba velomunina golida 'wainega i 'idewai Yaubada 'waineye i tovotovoi.
14 Bonananina a nogaiga, i vonavona anelose 'ana ve-6 'waineye i vo, Anelosenidi 4, basenadi i yogonidi i yatodi ufa bwaikina 'ana wagava Iufiletisi 'waineye, 'u na yavudi i na nagoi.” 15 Anelosenidi 4 i yavudiga basenadi i 'idewadi i yatodi bega 'awasasanina, 'aiatanina, weta'inina wata malamalanina i venua'ivineniga 'waineye i na souyedi tomotoga fuedi i na luvewafadi. Tomia fwayafwaya 'adi 'aila'a vi'ai 'aitonu. 'Ailuga 'atumaidi we'e vi'ai 'aitamogana i na luvewafadi. 16 Anelosenidi 4 tovetalaga fueotogidi i 'edakumesedi, 'adi 'aila'a i lu'ivoneyeni 'waikuye, matatabudi 200 milioni (200,000,000).
17-18 Wata 'aku ve 'wainega a 'iseni tovetalaganidi osi kwavudie i laka i nunagoi. Nuafoudie 'adi talauma kainumu, 'ifwaidi yamoyamoidi 'wa da vo 'ai-'ala'alata, 'ifwaidi 'ala'alawidi 'wa da vo malaveta, 'ifwaidi 'ovu'ovudi 'wa da vo manufagila. Osi 'unu'unudi 'wa da vo laioni 'unu'unudi, we'e 'awadiega 'ai meana, lufwa wata manufagila 'ala'alaina i sousouyedi, 'waidiega tomotoga vi'ai 'aitamogana i luvewafadi, vi'ai 'ailuga 'atumaidi. 19 Osinidi yadi 'eba vetoketoke 'awadie, wata giudie fai giudiega 'wa da vo 'o'olo, 'unu'unudi 'wainega veviga bwaikina tomotoga i veleveledi.
20 Sam 115:4-7,135:15-17; Dan 5:23Vitanidi i 'a'ava, tomotoga ma yawaidi i miamianiga bola i vevedumwe'ai'ai, kebu i da nuaviladi yadi sakona 'waidiega bega i da 'odu'odu Yaubada 'waineye. Siwe i kwayega i 'odu'odu yaiaina wata kumaea 'waidie, kumanidiavo i dabidi golida, siliba, kofa, kileu wata welavi 'waidiega. Naninidi tomotogaotoga 'adi 'idewadewa kebu 'adi fata i na 'isa, i na nogaya wata i na feto siwe 'waidie i 'odu'odu. 21 Wata kebu nuanuadi i na nuaviladi bega i na 'ailove luvewafa, ve'avula-'avo'avovo, vainago, wata 'adi 'afo'a i na bailedi.
9:2: Nag 19:28
9:3: Sou 10:12-15
*9:3: 'Ana mogitana vona Ibeliu 'waineye, bwa'o'o'o, siwe yadi 'awalaweye bwa'o'o'o tomotoga yadi 'eba wafa, we'e 'ida 'waideye bwa'o'o'o sai'afo mweadi.
9:4: Isi 9:4
9:6: Iob 3:21; Iel 8:3
9:7: Ioe 2:4
9:8: Ioe 1:6
9:9: Ioe 2:5
9:13: Sou 30:1-3
†9:13: 'Ana mogitana, bona a nogai i mai 'eba velomu alana 4 'waidiega. Alana i tubwadi 'eba velomu fogena 4 'waidie.
9:20: Sam 115:4-7,135:15-17; Dan 5:23