3
Jisasomp kárákárerao Mosesomp kárákáre kwe-pwarnámp kar
1 Kristen ankwapyae fákáre, Kwaro yámar mek yakria yumwan kor wumwiri námpon. Aenámpara, yumo fwapnae karia Jisasén nɨnɨk kour kip. Mao te aposel, Pris Tokwae Karara, nomo man méria maomp e érik sér i konámpon. ✡Hi 4:14 2 Kwaro man mámá tére sánkeanánko, Kwaromp karwaok kar námp te, wokwaek Mosesén kar sánkánko, mao koumteouráp arop ou mek Kwaromp nap niampi yakria, téremp niamp wuri popwar námpon. 3 Aeno nomo te wae mér námpon: Nap tinámp aropamp e te tokwae karria, napamp eran kámákár akwap námpon. Taknámp Kwaro Jisasén sánknámp e tokwae te Mosesomp e tokwaeran kámákár akwap námpon. 4 Ponankor ankákárank nap te waeman aropao tére napon. Aeno Kwaro námoku maok ankank ponankor yoroimpon. 5 Moses te Kwaromp tére arop niamp, mao ankár Kwaromp karwaokria Kwaromp nap mek térempon. Aeria Kwaromp arop fákáreran Kwaro wakmwaek sénaenámp karan farákápámpon. ✡Nam 12:7 6 Aeno Krais te Kwaromp Tárápara, Kwaromp karwaok yae-párák kare téreria Kwaromp koumteouráp arop maomp nap mek yakáp napan taokeyak námpon. Táte nomo kápae kare por man kárákáre fek méria warákárria Kwar Tokwaeran yépékrá yakáp námp te, nomo kuri Kwaromp nap niampi yakáp námpon. ✡Hi 3:14; 10:23
‘Anepér sámp mono’rá sénámp kar
7 Nomo te Kwaromp koumteouráp arop fi yakáp námpara, arop Kwaromp Buk fek Yiki Kor Spiritao nɨnɨk sánk nánko, kumwinámp kar man nomo fwapia wa mwaro:
“Yumo oukoumwan Kwaromp Kar wa nap kwamp te,
8 yumo te wokwaek yakápap
Israel arop fárákapaoiapnámp araknámp
yiráp nɨnɨk fákapea kárákáre kwapono.
Kwaro sérrá,
‘Am fárákap te arop yak moap apárok yakápria
onan mokopon nke mwarria onomp kar ták-sɨriapon. ✡Kis 17:7; Nam 20:2-5
9 Am apár mek yiráp appeyaenápo kor 40 yopwar fek
ono kápae kare ankank téreriaka
am fárákapan yaewouranko nkeapao maok,
Kwaro nomwan yopor te mokopean nke mwar ritea
sokororá paokopiapon.
10 Aeapantá maok,
ono ankár am koumteouráp aropan te
yopor yonkwae pwarámpa waeria maok, sérrá,
‘Ankár ono sénampaok pwarará
onomp nɨnɨkaok paokop mo napantá,
11 Ono yopor yonkwae pwarámpa waeria maok,
am fárákapan arakrá sénampon:
Kare kar narekampráp yumo te
onomp anepér mwanap némpouk te tukup mo karenono!’ ” ✡Nam 14:21-23
Nomo kor Israel fákáreaoi napnámp taknámp kar ták-sɨr mwareano
12 Kémpiyae tárápu, yumo te fwapia mér kip: Takria yumo ou mekamp ankárankao maomp nɨnɨk mek kwatae nɨnɨk yak nánko sámpria, yiki yak konámp Kwarén younkwe sɨrarea Kwarén mérnámp nɨnɨk pwar naeane. 13 ‘Oukoumwan’ yak nánko, nomo kor ‘Oukoumwan’rá sér i konámp kumur méntép yumo ankár nonopok yaewourria kárákáre nénk kipo. Takria, yumo ou mekamp ankwap ankárankampan kwatae nɨnɨkao man poupwekáp nánko, maomp nɨnɨk kárákáre nánko, Kwarén mér mo naeane. 14 Nomo wokwaek kar méri námp te ankár oukoumwan kor am mér te kárákáre fek sámpea yakáprá tukupea sumpwinámp ke fek mwanámpon. Nomo takria te, nomo ankár Jisasomp koumteouráp arop kare yakáp námpon. ✡Hi 3:6
15 Ono manénkɨr sérinamp kar táman warko Kwaromp Buk fek arakrá sénámpon:
“Yumo oukoumwan Kwaromp kar wa nap kwamp te,
yumo te wokwaek yakápap
Israel arop fárákapaoiapnámp araknámp
yiráp nɨnɨk fákapea kárákáre kwapono.” ✡Sng 95:7-8
16 Wokwaek kar te apae arop firao Kwaromp kar wa napao, am kar ták-sɨrariapon? Am te Moseso Isip mekampan éréképea akwapámp arop ponankor támao takiapon. 17 Kwaro 40 yopwar fek yopor yonkwae pwarámprá akwapámp te wanimpon? Am yopor yonkwae pwarámpámp te kwatae nɨnɨk fek yakápap koumteouráp aropan nánko, am fárákapao faokorapo, maomp yákáre te kwar mwar mek tankápámp te, Kwaro am fárákapan saráp yopor yonkwae pwarámpámpon. 18 Kwar te wan ‘Onomp anepér mwanap némpouk tukup mwanap pourou mono’ ria fou e séri námpon? Am Kwaromp kar ták-pwarnap koumteouráp arop fi támanimpon. ✡Nam 14:1-3,26-33 19 Aenámp te nomo wae mérono: Am fárákap te Kwarén mér mo kare napara, am fi kor fek táman Kwaromp anepér mwanap némpouk te ankár kare kar yink mo karenono.