JON
God so ok-ihey Jon hiy ma mey hok non
Meyamey uwr hokwe: Aposel Jon.
Yier hiy ma lwayr meyamey hokwe: Hiykwe yier Efesus mon meyamey.
Enekwei hiy ma meyamey hokwe: Hiykwe enekwei Yia 90-96 so ompok sok meyamey, Jisas hiy ma lokrue so meyki.
Ok mamey mon ma lwak mokwe senkin: Mamey Jon kokwe Jon hiykwe yia kraiar hom ley lowpway non meyamey, enekwei Jisas hiy ma lokrue o, nonkumey mon ma ma-loksian nok o, sohiy so meyki meyamey kok. Hiykwe sehe meyamey, sa uwrsa hom lira mesor ankin, homkwe aka nan-kiykiy-ay, Jisas se. Suw Jisas so uru non kokwe homkwe su liy lwayr (20:31). Jon hiykwe peyr Jisas hiy Aio God se nion ma non-wayr se mesor pie, senkin mesair kow e, Jisas hiykwe uwr seirpey-aw korey, sawk hiykwe God so Ney. Mey kraiar o, Jisas so hiymon sorasor kraiar o, mamey Matyu, Mak, Luk mon ma lwak lopa mokwe Jon hiykwe po meyamey.
Jon so uron ko hokwe senkin: Jon hiykwe Jisas hiy penkin uwr lwak e, sehe ma mesair kow popriy hokwe, hiykwe ok kamon, Jisas hiy God so Ney-ar ma lwak se ipey-ar me-kraipakrai. Jon hiykwe Jisas se kokwe owhnan-ok kraiar senkin non me me-meir. Jisas hiykwe ki ohiy so ey, seyr okar-ok, seyr uron-pi ko-ar, seyr sipsip kow-a uwr yaprue-ar, seyr yerki, lyawriy ey, seyr ma-loksian ey hiy non, seyr hu lwayr peyow peyow ey, seyr ihey mo naw-ar, seyr kraiar.
1
Ok, uwrsa me su mon wayr peyow peyow ey hok non
1 Paraw paraw-ar kokwe ki ehe mon-hre pa kokwe, peyr ok hokwaw lwak wayr. Ok kokwe God se nion non-wak, seyr ok sokukwe God hiykiaw. *Jon 17:5; 1 Jn 1:1-2; MHO 19:13 2 Seyr paraw paraw-ar kokwe ok kokwe God se nion non-wak.
3 Seyr ok sohok non-aw kokwe God hiykwe omeme lowpwarowp me monhre ousne sa-ousne. Hiy lopa hokwe, omeme enkin ma lwak mokwe lousne pa po lwak. *1 Ko 8:6; Kol 1:16-17; Hi 1:2 4 Seyr ok serey mon kokwe su lwayr ey non. Seyr su lwayr ey sohokwe uwrsa lowpwarowp mo ey-yar. *Jon 5:26 5 Ey-yar sohokwe eym-nawp mon lyar kow, seyr eym-nawp hiykwe ey-yar sehe mon pros pa. *Jon 3:19
6 Sohiy so meyki hokwe sawk uwr prueyn hiy lousne, uwr sohiy so uru hokwe Jon. Uwr sohokwe God hiykiaw me-ha. *Mat 3:1; Luk 1:13-17,76 7 Hiykwe sehe le, God so ok ke me-kumay kow e, God so ok, ey-yar se ma me sehe. Sa uwrsa lowpwarowp homkwe hyo ok ke lonuayk nanpanan kiykiy-ay e hokuaw. 8 Hiykiaw kokwe ey-yar sohiy korey. Hiykwe sehe le, ey-yar sohiy so ok ke me-kumay kow e. 9 Sohokwe ey-yar-ar. Ey-yar sohokwe ki mon sehe le, uwrsa senkin senkin lowpwarowp me lyar kow ey. *Jon 8:12
10 Hiykwe ki mon kokwe paraw-ar nuw-wak. Sa ki hokwe hiykiaw mon-hre. Sawk uwrsa ki ko homkwe hye kokwe lira nonkway pa. 11 Hiykwe hyo kipay arian mon le, sawk hyo uwrsa arian homkwe hye huonok huon pa. 12 Sawk uwrsa hye posokwaw ka-me-huonok e, seyr hye posokwaw nanpanan kiykiy-ay e, hme kokwe hiykwe po leykweyn kow, hom God so ney-ar lwak e. 13 Uwrsa, God so ney-ar ma lwak somokwe, homkwe aio-ipey mo nioh non lousne pa, seyr hromo iwar mo kyai non lousne pa. Sa hme kokwe God hiykiaw hyo yerki arian non nuw-mon ousne. *Jon 2:11; 3:3-6; Fl 2:7; 1 Pi 1:23
14 Ok kokwe uwr po lohre, sa hiykwe le nok, hromo ompok mon non-wayr. Hromkwe hyo panpaniowni se papo lira. Panpaniowni sohokwe God so ney prueyn-awaw so. Hiykwe orih God so owh ko se ma le hiy non. Hiykwe maym kow yor o, ok-ar yor o, woki nuw-wak prusow.
15 Jon hiykwe mo hye-aw lokre me-kumay, senkin, “Ama, uwr hokwe mo sohiy-kwaw-ar, paraw ha hme senkin ma mesor kow, ‘Hiykwe omok hano meyki le ey, sawk hiykwe hano eir-ar nuw-wak. Payhokuaw, hane liwak lopa ma lwak hokwe, uwr sohokwe paraw nuw-wayr peyow peyow.’ ” 16 Seyr maym-kow-yor uwr sohiy so mon ma lwak mokwe, woki nuw-wak prupru sow. Hiykwe hromo lowpwarowp me kokwe maym sehe kow wayr-wayr. 17 Payhokuaw, sow mokwe Moses so mon lousne, sawk maym-kow-yor o, ok-ar yor o, sohohkwe Jisas Krais so mon lousne. *Kis 34:28; Ro 6:14 18 Uwr prueyn hiykwe God se lira pa, korey law-ar. Sawk hyo ney prueyn-aw-aw, God se hieyn liyliy-aw ma lwak, seyr Aio so uron-kowp-ar mon ma lwak, hiy maka-me-sair, uwrsa me kokwe, God hokwe penkin so. *Kis 33:20; Jon 6:46; 1 Ti 6:16
Jon hu mon prouk uwr so ok
(Mat 3:1-12; Mak 1:7-8; Luk 3:15-17)
19 Ok, Jon hiy Jisas se ma lohruw koruay hokwe mo senkin lwak. Enekwei sohokwe sawk Juda mo uwr ipey-ar Jerusalem mon ma lwak homkwe sawk pris har o, Livai har o, hme me-sasay ha, Jon se senkin mesopok e, hiykwe penkin uwr so. 20 Wo, sa Jon hiykwe sa hme ouon-aw lwak pa, hiykwe hme senkin kiynuw-mesor kumay kow, “Ama, hakwe Krais korey.”
21 Homkwe sawk senkin sehe kiy-nuw-mesopok, “Hai, hunkwe sawk posokwaw so? Hmey, hunkwe Elaija pak?”
Hiy sa hme senkin ma-mekow, “Ohow, hakwe Elaija korey.”
Hom ma-mesopok, senkin, “Hmey, hunkwe profet, hrom ma naruok wayr-wayr hiy non pak?”
Hiy sa hme senkin ma-mekow, “Ohow, hakwe seyr profet sohiy korey.” *Lo 18:15,18; Mat 11:14
22 Hom ma-me, “Sa hunkwe hreme kwa kiy-mekow, hunkwe posokwaw so? Hromkwe hno ok arian ke lonuayk nok, sawk uwr hreme ma me-ha me ma-ley sor kow ey. Hunkwe hne nian kokwe penkin me a?”
23 Jon hiykwe sa uwr sohom mo ok mokwe profet Aisaia so ok non senkin ma-sahre me, “Hakwe uwr prueyn so wouk-ok, ki hrahra-aw mon senkin ma lanio iwowr me ne hiy non, ‘Hakamay so yerki se luwluw-aw kwa meio kow.’ ” Ais 40:3
24 Uwr, ok ma nakey kow somokwe, Farisi hom ma me-ha hom non, 25 sa homkwe Jon se senkin mesopok, “Hunkwe Krais korey, seyr hunkwe Elaija korey, seyr hunkwe profet korey. Hai, hunkwe sawk uwrsa me hu mon panoke prouk o?”
26 Jon hiy hme senkin ma-sahre onuayk me, “Hakwe hme kokwe hu mon-aw prouk, sawk hmo ompok mon kokwe uwr prueyn, hom ma nonkway lopa hiy lorok. 27 Hiykwe hano meyki le. Hakwe yaprue-ar korey, hyo sune-ohi-mays ke kampueys kahror kow ey hokwe.” *Jon 1:15
28 Mey weynpaweyn senkin somokwe Jon hiykwe om Betani, yawp Jordan so menki mon ma lwak non lousne. Kipay sohokwe Jon hiykwe uwrsa me kokwe serey prouk.
Jisas hiykwe God so Sipsip-ney ihey-ar
29 Sawk enekwei leikmon hokwe Jisas hiykwe Jon so owh mon le. Wo, Jon hiykwe Jisas hiy le se lira menkin, hiykwe sa senkin me, “Ama, kwa lira, God so Sipsip-ney ihey-ar hokwe, ehie ma le he. Hiykwe sehe le, uwrsa lowpwarowp ki ko mo yor piap-araw me mon-say kow ey. *Ais 53:6-7; 1 Pi 1:18-19 30 Ama, paraw hakwe mo senkin me, ‘Omok kokwe uwr prueyn hano meyki le ey, sawk hiykwe hano eir-ar nuw-wak. Payhokuaw, paraw hane liwak pa hokwe, uwr sohokwe hiykwe mo senkinaw nuw-wayr peyow peyow.’ Ok sokukwe hakwe mo uwr sehe me. *Jon 1:15 31 Hakwe hye korey nonkway pa, hiykwe penkin uwr pak e. Sawk ha uwrsa me hu mon ma prouk so meyk-ar hokwe senkin, Krais hiy Israel mo inour mon kumay-ar lousne e.”
32 Seyr Jon hiykwe uwrsa me kokwe senkin mesor kumay kow, “Hakwe papo lira, niohney hiykwe nonkumey se po lokriy hain. Hiykwe ahney woukmow ke hieyn lay-sian ne nok, sa hyo owh-eir mon maka-sian yay iwak. *Mat 3:16 33 Seyr hakwe nonkway pa, hiy uwr penkin pak e. Sawk God hiy hane hyo uwrsa me hu mon prouk e peyrmawk ma me-ha hiykwe hane senkin mekow, ‘Hunkwe ya lira a, Niohney Pekney-weys hiykwe laye nok, uwr prueyn so eir mon maka-sian yay iwak ok. Hunkwe kwa nonkway, uwr hokwe mo sohiykwaw-aw, Niohney Pekney-weys non prouk ey hokwe.’ 34 Ama, hakwe mo po lira, seyr hakwe ok po mesor kumay kow, uwr ohokwe mo God so Ney-ar.” *Mat 3:17
Uwr pruompri-ar Jisas so ki-wayh ma lwak pie hom non
35 Enekwei leikmon hokwe Jon hiykwe seyr serey-aw manon-orok, hyo ki-wayh prueysyar se nion. 36 Enekwei, Jisas hiy hme ka-lour swaneyk ne menkin, Jon hiykwe sawk senkin sehe kiy-ira mekow, “Hohkwe hye kwa lira, uwr sohokwe God so Sipsip-ney ihey-ar.” *Jon 1:29
37 Wo, Jon so ki-wayh prueysyar hohkwe, ok, Jon hiy ma lohruw-a seme lonuayk menkin, hohkwe sawk Jisas so meyki mon sehe pyay ha. 38 Jisas hiy sa sehe kiy-swahre ira huon, hoh hyo meyki ma pyay ha sehe. Hiykwe sawk hehe senkin mesopok, “Hohkwe payay se lanio pawk o?” Hohkwe sawk hye senkin ma-mesopok, “Rabai, hunkwe a perey lwayr o?” (Uru “rabai” sohiy so meyk-ar hokwe senkin: “tisa”.)
39 Sawk Jisas hiykwe hehe kokwe senkin makiy-mekow,
“Hohkwe kwa non-e ira e.” Hohkwe sa hye nion sehe non-ey nok, hiy ma lwayr se lira. Wo, eypok sohokwe hohkwe sa Jisas se nion-aw non-wak, payhokuaw enekwei hokwe 4 klok eyrowpwar ohriar.
40 Uwr prueysyar so prueyn ok Jon so ok ma lonuayk hokwe, Andru. Hiykwe Jisas se nion non-pyay ha. Andru hiykwe Saimon Pita so oryay-ih. *Mat 4:18-20 41 Peypey pa, peyr Andru hiykwe hyo nay-ih Saimon Pita se lirway nok, hye senkin mekow, “Hromkwe Mesaia se papo lirway.” (Ok Mesaia so meyk-ar kokwe senkin, “Krais”.) 42 Andru hiykwe Saimon Pita se huonok nok, Jisas so mon hiy-ey.
Jisas hiykwe hye lira nok, senkin kiy-me, “Hunkwe Saimon, Jon so ney. Sawk hno uru hokwe senkin mowie ey, Sifas.” Uru sohokwe senkin kankoum ohruw-a: Pita. Sawk uru sohiy so meyk kokwe senkin “mein-pow”. *Mat 16:18
Jisas hiykwe Filip, Nataniel, leys se me-huonok
43 Enekwei leikmon hokwe Jisas hiykwe Galili mon ley e nan. Hiykwe Filip se lirway nok, hye senkin kiy-mekow, “Hunkwe hano meyki kwa pyay ha.”
44 Filip hiykwe om Betsaida ko. Om sohokwe seyr Andru, Pita leys so om-ar hiy non. 45 Filip hiy Nataniel se lirway huonok nok, hye senkin kiy-mekow, “Hromkwe uwr prueyn se papo lirway, uwr sohokwe paraw Moses hiy hyo ok ke sow mo mamey mon ma mey hiy non. Seyr profet hom liy-liy-aw ma mey hom non. Hiykwe Jisas, om Nasaret ko, seyr hiykwe Josep so ney.” *Lo 18:18; Ais 7:14; 9:6; Ese 34:23
46 Nataniel hiykwe sa Filip se senkin mesopok, “Mey yaprue-ar kokwe taun Nasaret mon liy lousne o?”
Sa Filip hiykwe Nataniel se senkin mekow, “Ara, oue, kwa le ira.”
47 Enekwei Jisas hiy Nataniel se lira huon menkin, sawk hye senkin me-kumay kow, “Okar-ar, kwa lira, uwr ma le ohokwe, Israel uwr-ar. Okrei weynpaweyn mokwe hyo mon lwak pey-araw-ar.”
48 Wo, Nataniel hiykwe sawk Jisas se senkin ma-sahre mesopok, “Ara, hunkwe hane kokwe penkin nonkway so?”
Sawk Jisas hiykwe hye senkin ma-sahre mekow, “Ara, peyr Filip hiy hne me-huonok lopa ma lwak hokwe, hakwe hne kokwe now-fik ouon mon wakiawkeyn se lira.”
49 Sawk Nataniel hiykwe Jisas se senkin lonuayk me, “Hiymon sorasor uwr ara, hunkwe God so ney-ar. Seyr hunkwe Israel mo king.” *Mat 14:33; 16:16; Mak 3:11
50 Jisas hiy sawk senkin ma-sahre mekow, “Hwon hane sehe nan kiykiy-ay pak, payhokuaw, ha hne senkin ma me sohiy, hne kokwe hakwe now-fik ouon mon wakiawkeyn se lira. Mey ipey-ar, mey ohok ko eir mon ma meio ousne ey mokwe, hunkwe ya lira a.” 51 Hiy sa hye senkin mekow, “Hakwe hme okar-ar ke kiy-mekow, homkwe nonkumey hiy kampi se ya lira a. Homkwe senkin lira ey, God so ensel homkwe lie kumey, lie kumey ley ey, Uwrsa mo Ney so eir mon kokwe.” *Stt 28:12