3
Jon hu mon prouk uwr hiykwe Jisas so yerki se meio kow naruok
(Mat 3:1-12; Mak 1:2-8; Jon 1:19-28)
1 Okpey sohom ma lousne mokwe, Rom mo uwr hakamay Taiberias hiykwe yia iha seys sune sirom Sisar lwak. Enekwei sohokwe Judia mo ki hokwe Pailat hiy hiy-wayr. Gali-li mo ki hokwe Herot hiy hiy-wayr. Seyr hyo nay-ih Filip hiykwe kipay mokwe senkin hiy-wayr, Ituria o, Trakonitis o. Seyr Lisanias hiykwe kipay Abilene se hiy-wayr. 2 Seyr enekwei Anas, Kaiafas leys hoh pris makwey-uwr ma lwak hokwe, God hiykwe hyo ok mokwe Jon, Sekaraia so ney se lohruw-a kow, ki hrahra-aw mon. 3 Sa Jon hiykwe yier lowpwarowp yawp Jordan ohriar mon ma lwak serey senkin sehe ley mesor kow, “Hmo uron me kankoum nok, hu mon prouk. Sa God hiykwe hmo weynpaweyn piap-araw mokwe hiykwe liy lorionay ha.” *Ap 13:24
4 Mey somokwe liy-liy-aw eyn nuw-ousne, profet Aisaia so mamey hok ma mekow senkin. Profet sohokwe senkin mey,
“Kipay, uwrsa ma lwayr lopa mon kokwe, uwr prueyn so wouk-ok kokwe senkin lanio iwowr me ey, ‘Hakamay so yerki se meio kow koruay e, yerki luw-luw-aw hiy lanio ey me meio e.
5 Yerki lowpwarowp kei kawk kei kawk mokwe, kosi-pay kwa sasow soway ie, mnuw me hou say mama.
Yerki naway naway mokwe, luw-luw-aw kwa meio ihey kow. Yerki piap-araw mokwe yaprue kwa ma-meio ihey.
6 Uwrsa poya-poya ki ko homkwe God so ma-huonokyaw prosue mey ke lira ey.’ ” Ais 40:3-5
7 Uwrsa poya-poya homkwe hu mon prouk e ley, Jon so owh mon. Sa hiykwe hme senkin mekow, “Homkwe sok piap-araw so ney moma. Hom God so aw-mar ouon mon ma lwak omokwe, hme kokwe posokwaw mekow me hakan ne o? *Mat 12:34; 23:33 8 Homkwe hmo uron me ma kankoum sow se mesair kow e mon ankin, ayay yaprue homkwaw ka leip sawan kreik. Homkwe homkiaw-ayay senkin peie lohruw-a o, ‘Hromo aio hokwe Abraham, hromkwe ipey-ar sehe lwak.’ Ama, hakwe hme senkin kiy-mekow, senkin korey, payhokuaw mein ki-apau ko omokwe, God hiykwe Abraham so ney-nona-ar liy makiy-monhre kow. *Jon 8:33,39 9 Ku kamon kokwe now-meyk mon po lyay koruay. Sawk now kamon kamon ayay yaprue leip lopa mokwe, hmekwe lowk say ey, seyr ya mon linon say mu ey.” *Mat 7:19
10 Uwrsa lowpwarowp homkwe Jon so ok me lonuayk nok, senkin mesopok, “Hai, hromkwe sa penkin lon ey mo?”
11 Hiykwe sawk hmo ok mokwe senkin makiy-sahre mekow nonkway, “Uwr prueyn hiykwe saket, owh mon lie ey kokwe kreys non lwak ankin, kamon kokwe uwr prueyn se kwa way kow. Uwr ayay non seyn, liy-liy-aw eyn kwa lowndiy-a.”
12 Takis-lonok-uwr har, hom seyn, hu mon prouk e le. Hom seyn, hye ok kamon ke senkin mesopok, “Hiy-mon sorasor uwr ara, hromkwe penkin lon e mon o?” *Luk 7:29
13 Hiykwe sawk hmekwe senkin mekow, “Homkwe ihey mo mein-owon mokwe meir-ar meir-ar-aw kwa lonok, gavman hom hme ma meir kow, senkin. Homkwe har mokwe ohna non peie nak-onok o.”
14 Aw-uwr har seyn, hye senkin mesopok, “Hai, hrom seyn, penkin lon a?”
Hiykwe sawk hmo ok mokwe senkin lonuayk me, “Homkwe uwr har mo mein-owon me yokun peie nak-swakakar opri o. Hmo mein-owon me peie nak-mon noweyn oweyn opri o. Homkwe senkin kwa nan, mein-owon, hom ma meio nonok somokwe, hmekwe liy-ar.”
15 Uwrsa homkwe yor seme lira menkin, hmo uron mokwe sa seme nan ie ie. Sa homkiaw-ayay senkin mesopok, “Ama, uwr, God hiy ma me-iaup hokwe, Jon pak. Hiykwe Krais pak.” 16 Sa Jon hiykwe hmo ok mokwe senkin lonuayk me, “Hakwe hmekwe hu non prouk, sawk omok uwr prueyn hiy le ankin, hmekwe Niohney Pekney-weys o, ya o, sohom non prouk ey. Hyo krai hokwe hano krai so eir mon lwak. Hakwe yaprue-ar korey, hyo sune-ohi-mays ke kampueys kahror kow ey hokwe. *Ap 13:25 17 Hyo iha kokwe savol non nake, wit nam non seme louh kreik kokor say ey. Wit-ar mokwe hiykwe hyo wit-a arian mon nakey nak-yay sowkriy ey. Sawk nam mokwe ya mon louh eynow hain ey. Ya sokukwe seyn pros pey.”
18 Jon hiykwe God so ok ihey-ar mokwe senaw mesor kow wayr-wayr, uwrsa me kokwe. Hiykwe hme ok ipey-ar-ar yaprue senkin senkin me nuw-mesor kraipakrai kow.
Herot hiykwe Jon se kalabus-a mon nak-okin sakawk
(Mat 3:13-17; Mak 1:9-11)
19 Jon hiykwe Juda mo Gavman hakamay, Herot se me-hripahri. Payhokuaw, Herot hiykwe weynpaweyn piap-araw me mon nok, seyr hyo nay-ih Filip so sah Herodias ke yokun nak-kahya huon. *Mat 14:3-4; Mak 6:17-18; Jon 1:32 20 Seyr Herot hiykwe yor piap kamon ke manak-mon peykyay. Hiykwe Jon se nekie swakawk, kalabus-a mon kokwe.
Jon hiykwe Jisas se hu mon prouk
21 Paraw, Jon hiy uwrsa lowpwarowp me hu mon ma prouk hokwe, hiykwe Jisas se nak-prouk. Jisas hiy God se mesopok nonaw, nonkumey hiy kiy-nuw-on-kampi. 22 God so Niohney hiykwe hyo owh mon sehe laye. Niohney sohokwe ahney woukmow ke hieyn. Homkwe sa seme lira, Jisas so makwey eir mon liwak ke. Sawk ok kamon nonkumey ko hiykwe senkin me, “Hunkwe hano ney, hakwe hne uron-pi ko-ar nuw-wak. Hano uron hokwe hne kar nuw-ey popriy.”
Jisas so nopwey-ih om
(Mat 1:1-17)
23 Enekwei Jisas hiy hyo mey ke ma meio pie hokwe, hyo yia mokwe 30. Uwrsa poya-poya homkwe senkin nan, hiykwe Josep so ney. Luk 4:22; Jon 6:42
Josep hiykwe Heli so ney.
24 Seyr Heli hiykwe Matat so ney.
Seyr Matat hiykwe Livai so ney.
Seyr Livai hiykwe Melki so ney.
Seyr Melki hiykwe Janai so ney.
Seyr Janai hiykwe Josep so ney.
25 Seyr Josep hiykwe Matatias so ney.
Seyr Matatias hiykwe Amos so ney.
Seyr Amos hiykwe Nahum so ney.
Seyr Nahum hiykwe Esli so ney.
Seyr Esli hiykwe Nagai so ney.
26 Seyr Nagai hiykwe Mat so ney.
Seyr Mat hiykwe Matatias so ney.
Seyr Matatias hiykwe Semen so ney.
Seyr Semen hiykwe Josek so ney.
Seyr Josek hiykwe Joda so ney.
27 Seyr Joda hiykwe Joanan so ney.
Seyr Joanan hiykwe Resa so ney.
Seyr Resa hiykwe Serubabel so ney.
Seyr Serubabel hiykwe Sealtiel so ney.
Seyr Sealtiel hiykwe Neri so ney.
28 Seyr Neri hiykwe Melki so ney.
Seyr Melki hiykwe Adi so ney.
Seyr Adi hiykwe Kosam so ney.
Seyr Kosam hiykwe Elmadam so ney.
Seyr Elmadam hiykwe Er so ney.
29 Seyr Er hiykwe Josua so ney.
Seyr Josua hiykwe Elieser so ney.
Seyr Elieser hiykwe Jorim so ney.
Seyr Jorim hiykwe Matat so ney.
Seyr Matat hiykwe Livai so ney.
30 Seyr Livai hiykwe Simeon so ney.
Seyr Simeon hiykwe Juda so ney.
Seyr Juda hiykwe Josep so ney.
Seyr Josep hiykwe Jonam so ney.
Seyr Jonam hiykwe Eliakim so ney.
31 Seyr Eliakim hiykwe Melea so ney.
Seyr Melea hiykwe Mena so ney.
Seyr Mena hiykwe Matata so ney.
Seyr Matata hiykwe Natan so ney.
Seyr Natan hiykwe Devit so ney.
32 Seyr Devit hiykwe Jesi so ney.
Seyr Jesi hiykwe Obet so ney.
Seyr Obet hiykwe Boas so ney.
Seyr Boas hiykwe Salmon so ney.
Seyr Salmon hiykwe Nason so ney. Rut 4:17-22
33 Seyr Nason hiykwe Aminadap so ney.
Seyr Aminadap hiykwe Atmin so ney.
Seyr Atmin hiykwe Arni so ney.
Seyr Arni hiykwe Hesron so ney.
Seyr Hesron hiykwe Peres so ney.
Seyr Peres hiykwe Juda so ney.
34 Seyr Juda hiykwe Jekop so ney.
Seyr Jekop hiykwe Aisak so ney.
Seyr Aisak hiykwe Abraham so ney.
Seyr Abraham hiykwe Tera so ney.
Seyr Tera hiykwe Nahor so ney.
35 Seyr Nahor hiykwe Seruk so ney.
Seyr Seruk hiykwe Reu so ney.
Seyr Reu hiykwe Pelek so ney.
Seyr Pelek hiykwe Eber so ney.
Seyr Eber hiykwe Sela so ney.
36 Seyr Sela hiykwe Kainan so ney.
Seyr Kainan hiykwe Arpaksat so ney.
Seyr Arpaksat hiykwe Siem so ney.
Seyr Siem hiykwe Noa so ney.
Seyr Noa hiykwe Lamek so ney. Stt 11:10-26
37 Seyr Lamek hiykwe Metusela so ney.
Seyr Metusela hiykwe Enok so ney.
Seyr Enok hiykwe Jaret so ney.
Seyr Jaret hiykwe Mahalalel so ney.
Seyr Mahalalel hiykwe Kenan so ney.
38 Seyr Kenan hiykwe Enos so ney.
Seyr Enos hiykwe Set so ney.
Seyr Set hiykwe Adam so ney.
Seyr Adam hiykwe God so ney. Stt 4:25-26