1 Ibinigi da Pilatus ini da garam singaari iyu Yisu ifan da idzibi.

2 Garam singaari iyu bruꞌ maradantang da ifir imimuan gin isu dampun gudzun da yatsuf iruꞌ Yisu gudzun. Da yari ngarukui biꞌ bini bida king gan*ngarukui biꞌ bini bida king gan — Ngarukui igi anungꞌ biꞌ u, da bitsintaꞌ pepol (Nan Inglis “purple”), da nam ntsuman gan tsiraꞌ bingan. King ruas angu inang da yatsuf. iyab i Arangan. 3 Da rib igi iba munti Arangan maran da iyasi Arangan ini binaꞌ, “O Yuda King gan! Aga tsarif agu.” Da imus ipuak Arangan.Mt 27:27-31; Mk 15:16-20; Lk 23:11

4 Pilatus itip iwaꞌ ba da ini da garam Yuda ini binaꞌ, “Agam watsangan! Dzi tip iyu garam ani iwaꞌ ba da agam, i agam sruꞌa gin bida dzi watsanga asub i garam ani mangan u.” 5 Gubuꞌ Yisu waꞌa ba ntingan da dampun gudzun maradantang riman da ngarukui biꞌ atsufan, da Pilatus ini binaꞌ, “Agam watsangan! Garam agam nidan ugu arani!”

6 Gubuꞌ garam pumuꞌa Anutu wain gudzun rusan da garam singaari ruas mpada tayangꞌ Ungar Mararam tsanganda Arangan, da inuꞌ nifun tsiraꞌ bingan ini binaꞌ, “Wais arangan nayab gai mpara i ruan! Wadintip arangan nayab gai mpara i ruan!” Mt 27:22; Mk 15:12-13; Lk 23:20-23

Da bitsintaꞌ Pilatus ini rib igi nifunggan mungaꞌ ibiani, “Agam runggam wayu arangan da wadintip wayab gai mpara i ruan! Dzi anungꞌ iwaꞌ da asub mangan garam ani gan nangan u.”

7 Da garam Yuda gudzun rusan ini nan mungaꞌ ibiani, “Aga nan gangꞌ faidagin mangan rumingꞌ da ini arangan mampan, i arangan ifaringꞌ runggan isu Anutu Narunggan.”

8 Gubuꞌ Pilatus ringanta i nan igi da irat tsiraꞌ bingan angu gin, 9 da itip yatangꞌ ifa ungar wasaꞌ da igut i Yisu ini binaꞌ, “U ba imingꞌ anungꞌ?” Da bitsintaꞌ Yisu wani nan mungaꞌ u.Mt 27:13-14; Mk 15:4-5 10 Pilatus ini da Arangan ibiani, “U bugin nida dzi nan gangꞌ mungaꞌ, a? U mami sruꞌa i dzi nampanggangꞌ nida nifungꞌ i tanginda agu waꞌan ma isa agu funub yaba gai mpara i ruan?”

11 Yisu ini arangan nifunggan mungaꞌ ibiani, “Bida Anutu damami rima nampang igi da agu, da u anungꞌ isangꞌ i nanga nam mangan i dzi u. Ibinigi da manga aru rima dzi ba u banginggam igi nanggan maisan nangan tsiraꞌ bingan iyus agu gam.”

12 Pilatus iringant i nan igi da isau sanab i rima Yisu sib i tanginda Arangan fadan, da bitsintaꞌ garam Yuda gudzun rusan runuꞌ ini binaꞌ, “Bida u tanginda arangan fadan da agu anungꞌ Kaisar rinunggan u! Manga nanga i nida runggan suda king, da irim ipiap i Kaisar.”

13 Gubuꞌ Pilatus ringanta i nan igi da arangan iyu Yisu iwaꞌ ba da impa iruꞌ bintip raruda garam gin imingꞌ mumai faringꞌa nida Tauf Fafusan Tsiraꞌ Yunga Gin; mingꞌa nifu nan Hibru da ifaringꞌ ini Gabata. 14 Gubuꞌ arigi gubuꞌ tipa nam gadan maran fura gubuꞌ mararam tsiraꞌ Angira Atupa Sib. Da gubuꞌ maran ibi gubuꞌ wasaꞌ, da Pilatus inuꞌ ini da garam Yuda ibiani, “Agam wararab gam king gam ani.”

15 Da bitsintaꞌ ribarangan itip inuꞌ ini binaꞌ, “Wais arangan! Wais arangan funub! Wadintip arangan nayab gai mpara i ruan!”Mt 27:23; Mk 15:14; Lk 23:22-23

Pilatus igut i ribarangan ini binaꞌ, “Agam ini dzi dintipa agam king gam yaba gai mpara i ruan, a?”

Da garam pumuꞌa Anutu wain gudzun rusan ini arangan nifunggan mungaꞌ ibiani, “Kaisar angu isu aga king gangꞌ!” 16 Ibinigi da Pilatus itangin Yisu ifan da garam singaari i isa arangan funub yaba gai mpara i ruan.Mt 27:26; Mk 15:15; Lk 23:24-25

Ibinigi da garam singaari iyu Yisu ifan. 17 Da Arangan runggan ibuaringꞌ gai mpara i ruan gan da itangin gamp tsiraꞌ igi rai da ifa mumai faringꞌa nida Gudzu Urun. Da mingꞌa nifu nan Hibru da ifaringꞌ ini Golgota.Mt 27:33; Mk 15:22; Lk 23:33 18 Mingꞌa nigi da idintip Yisu iyab gai mpara i ruan impruꞌ da garam iruꞌrun. Mangan imingꞌ Arangan bangin bini da mangan imingꞌ Arangan bangi yas, da Yisu imingꞌ wasaꞌ.Mt 27:38; Mk 15:27; Lk 23:33

19 Pilatus ini da garam ikakar nan mangan ibiani, YISU, GARAM NASARET, GARAM YUDA KING GAN,Mt 27:37; Mk 15:26; Lk 23:38 da yis iyab Yisu gai mpara i ruan gan. 20 Da garam Yuda ampi bingan ifaringꞌ nan kakaran igi, i wain, mumai Yisu tupriꞌa gin igi imingꞌ uts da gamp tsiraꞌ, da ikakar nan igi i nifu nan Hibru da Latin†Latin — Nan Latin igi garam Rom nifu nan gan. da Grik. 21 Ibinigi da garam Yuda garaman pumuꞌa Anutu wain gudzun rusan ini da Pilatus ibiani, “U anungꞌ kakara, ‘Garam Yuda King gan’ u; imaꞌ, wakakar nabi garam igi ini runggan garam Yuda King gan.”

22 Pilatus ini ribarangan nifunggan mungaꞌ ini binaꞌ, “Nam idzuwai dzi kakaran, da dzi kakar.”

23 Gubuꞌ garam singaari dintipa Yisu yaba gai mpara i ruan sib, da iyu Arangan nanggan atsufan da ifab isu iruꞌ da iruꞌ isangꞌ ribarangan. Da iyu i gan ngarukui gan impruꞌ, da bitsintaꞌ itsangan ibi intang ngarukui igi santan isu bitsintaꞌ angu imingꞌ wagungꞌ ibawaꞌ warangꞌ. 24 Ibinigi da ini da ruan, “Agi anungꞌ garidan u. Agi nantungꞌ rarub i tsanganda manga sangꞌ i udan.”Yon 1:7; Mt 27:35; Mk 15:24; Lk 1:8-9; 23:34; Ap 1:26 Nigi waꞌ i nanga nan kakaran bida ani suda nidzun, “Rib igi ifab dzi nanggangꞌ atsufan isangꞌ runggan da yantungꞌ rarub i dzi ngarukui gangꞌ.” Ibinigi da garam singaari inang nam bida nigi.

25 Yisu rinanggan da rinanggan rainggan da Klopas fininggan Maria da Maria sagat Magadala imunti uts angu da gai mpara i ruan Yisu tupriꞌa gin.Mt 27:55-56; Mk 15:40-41; Lk 23:49 26 Gubuꞌ Yisu raraba rinanggan ruta Arangan garaman atsungꞌa gin aru maran arida gin ugu mpruꞌa ruan muntida nigi, da ini da rinanggan, “Rinangꞌ, nigi da agu narunggam.” 27 Da itip ini da garaman atsungꞌa gin igi, “Nigi da agu rinanggam.” Da gubuꞌ arigi fadan da gan garaman arigi iyu Arangan rinanggan ifa gan ungaran i mpada tayangꞌ gin.

28 Raiyi da Yisu isruꞌ gin i gan guman nangan santan iba ntsup sib, da ini, “Dzi wangꞌ itsaraꞌ,” i nanga Anutu nan gan kakaran suda nidzun.Mnt 22:15; 69:21 29 Gubuꞌ arigi da gur mangan imingꞌ igi da wain gurun ngkiangan imingꞌ gin, da rib igi iyu gai bangin mangan ripida bruꞌ gin da itugu iruꞌ wain gurun igi da yintsi iyab Yisu nifun.Mt 27:48-49; Mk 15:36; Lk 23:36 30 Da gubuꞌ Yisu numa sib da ini, “Intsup sib wa.” Da irim antungꞌ iruꞌ da itangin ganunggan ifan.Mt 27:50; Mk 15:37; Lk 23:46

31 Gubuꞌ arigi da gubuꞌ tipa ruan i nam gadan i gubuꞌ Sabat, da rib Yuda garam gudzunggan ibugin i garam dintipa yaba gai mpara i ruan rungꞌ tupriꞌan da gubuꞌ Sabat,Lo 21:22-23 i gubuꞌ Sabat arigi gubuꞌ mararam tsiraꞌ. Ibinigi da ribarangan igut i Pilatus i nida nifun da garam singaari isa garam ruguda ruan gai mpara i ruan igi fagan dzudziꞌ i mampa sung da uda fadan. 32 Ibinigi da garam singaari ifan da yis garam iruꞌ dintipa mpruꞌan da Yisu ugu fagan dzudziꞌ. 33 Da gubuꞌ ribarangan badan da Yisu, da itsangan ibi Arangan imamp sib, da anungꞌ yis Arangan fagan udziꞌ u. 34 Da bitsintaꞌ garam singaari igi mangan intang Yisu saran i singan da sung angu gan biꞌ gan da mpui gan itsururuꞌ. 35 Garam muntidan da tsanganda nam santan waꞌan igi ifis i nan igi wasi, da gan nan gan fisa gin igi nan nidzun bingan. Arangan isruꞌ gin i arangan ini nan nidzun da ini wasi da agam, i agam muarutsa bida nigi. 36 Nam igi iwaꞌ i nanga nan kakaran suda nidzun bida ani, “Rib igi wasangꞌ i isa arangan urun mangan udziꞌ u,” 37 da nan kakaran mangan ini ibiani, “Rib igi bungꞌ ararab garam aru ribarangan ntangan.”Tsk 12:10; NDW 1:7

38 Raiyi da garam mangan binganggan Yosef, mpada mingꞌa gamp Arimatia ifa gut i Pilatus i uda Yisu rini uriatsan fadan. Arangan garam mangan atsungꞌa Yisu, da bitsintaꞌ irat i garam Yuda garam gudzunggan da idzigin runggan angu. Pilatus ini nifun, da arangan ifayu Yisu rini uriatsan ifan.Mt 27:57-58; Mk 15:43-45; Lk 23:50-52 39 Da Nikodimus, garam aru badan da Yisu da idziang mangan ugu, iba impruꞌ da Yosef. Arangan iyu nam rini gaunt ngarubini funub tipa i gai iruꞌrun iba, gan barabin gan isangꞌ ibi 30 kilogram. 40 Tuas arangan iyu Yisu rini uriatsan da irim nam rini gaunt ngarubini igi gin da ipatiꞌ i bruꞌ ibi garam Yuda gan sanaban atsungꞌa gin i rima garam mampan. 41 Mingꞌa uts da gai mpara i ruan Yisu tupriꞌa gin igi, da gum mangan imingꞌ. Da mingꞌa gum igi da tauf bampun faꞌ mangan imingꞌ, da warim garam mampan manga gin u.Mt 27:59-60; Mk 15:46; Lk 23:53 42 Wain ibi garam Yuda gubuꞌ gan tipa ruanMk 15:42; Lk 23:54 i gubuꞌ Sabat igi, da tuas arangan ifa rim Yisu i tauf bampun arigi, i imingꞌ uts angu.