3
Monó Non Péantan Banta Yoni Ano Ma Yisasini Aa Uvíden Puntáantein Baya Ino
(Matiu 3:1-12; Maki 1:2-8; Yoni 1:19-28)
1 Sisa Taiberiasi ano ma Romú barafá ma kiní ukhan tiyan míkan mifo sirantan dan manápá orun kádan (15) oranaí ma iyákan inká Pontiasi Pairoti ano Yudiá barafá kamaniní ukhein damú anan Eroti Antipasi ano Karirí barafá kamaniní ukhan ben afá Firipi ano Ituriá bá Tarakonitisí bara vái yafisiní in mi inká Risaniasi ano Abiriní barafá dafíkan 2 ma ukhein damú anan Aanasin nú Kaiafasin nú ano monó ánon banta kékái ánon bantá kaní ukhan maen Sekaraiyan anin Yoni ano vanta ída van kámá barafá bákan Tiyarafenui vaya ano véimpin eren mino. 3 *Apo 13:24Erivíkan béi Yodení non akhempá ma vain baru kayo fimpá oriven banasi siamemí, “Ará baédesin Tiyarafenu ano siretí ankani ume ampiantá dantiya vá non barano.” 4 Sakhanampa vanta Aisaiya ano máa sen bompon uvantaremí,
“Kámá bara fáké mana vanta ano oovaren máa sinten mino,
‘Bafani aa uvídeya
funtarano.
5 Masisí ma ukheimpin bara kaesin édavintiya
anuyon kayo úan avaí eya
aa ma koren ukhein maman puntareya
namu ma ukheimpin kama uresin ná
6 Tiyarafenu ano ma evaránen minó nanin banta ma aviran dorarí ma inain mai minó anon onanten mino.’ ” Ais 40:3-5
7 *Mat 12:34; 23:33Máa siyákan kokhon nanin banta ano Yoni vaintá monó non péantano van eríkan betí ankan máa sen tiamemí, “Eeeee, tiretí ankan namu osafáe akhafana ompo iye anó tiretin afova amikhayá Tiyarafenui aran naná ma siretin amaniná ereno van iyain nan karan orono van iya rafono. 8 *Yon 8:33, 39Tiretí ankan ma fura seya ará baédante vá beni aran ná iran nompo siretí ída vá ‘teti Abaraamun akhafana uno’ seno. Téi siretí ankan tiamé uno. Tiyarafenu ano kanaíen ma onámaná kayo sintin Abaraamun akhafanaí inten mifo 9 *Mat 7:19ída ma kamaen aran iran nain daa ana sikaren ira sarano van Tiyarafenu ano fefá tasume anafin kain ban mino.”
10 Máa síkan banasi ano Yonini vaya iniren máa sen béin inaemí, “Mai setí náisá onte rafuno.”
11 Máa síkan Yoni evaránen betí ankan tiamemí, “Kankanan au anamun ma yákanona ano ída ma yákan nain ná mana au anamun amesin ná dunan ma yákanona vá dere ano máan mana vá ono.”
12 *Ruk 7:29Takisi varan banta kéká ano yere non barano van erikharen betí máa sen inaemí, “Aru soe, setí intesá ótifante rafuno.”
13 Máa síkan Yoni evaránen betin tiamemí, “Tiretí ankan ma takisi variyákeya vá kamani ano ma sin nain mai máa ana vá bareya ída vá mairá manáa mo asotú ono.” 14 Máa síkan manáa aruvin banta kéká bá ano yere Yonin inaemí, “Tetí ankan náisá ótifante rafuno.”
Síkan Yoni vetin tiamemí, “Tiretí ankan ída vá banasi namu uante vetíi moní máká tire umoyan bareya ída vá betí ankan kampun kó tiantáde moní bare vá kamani ano ma miyan amin nain mai máa moní ana vá amusin iya varano.
15 Máa síkan banasi ano Yonin oniyáken betí ankan kokhon ineine uren be nan mai ma Tiyarafenu ano ma varará nanin banta evaránen aviranten mino ma sikharé ein mai vanta ino sen inen mino. 16 *Apo 13:25Máan ineine iyákan Yoni evaránen betí ankan máa sen tiamemí, “Téi non máa fói siretin péantiyá umpo sen toyampá ma eriyaini ákona ano senti ákona moéken esantakhá téi ída funtákeruna ída kanaí é matimé beni arantan anumun anan útufonté umpo véi Kantá Aunan má irafó bái siretin monó non péantanten mino. 17 Kákan poki ma ayampin pákakhein banta an daven béi ereno van iyain ma eriven maen bei uviti namun pintena aitan má asuí ma ukhein ma yo ínáan karúdaren uviti o éke e éke uren bei uviti namumpin kauren aítan má asuí ma ukhein má ída yusimin irafin taman kaurinten mino.” 18 Yoni ano kokhon baya kayofó banasi ará mantano van Tiyarafenui kama vaya siamiyaren mino.
Eroti Ano Ma Yonin Karavusifin Kaein Baya Ino
19 *Mat 14:3-4; Mak 6:17-18Eroti ma kamaniní ukhen maen be aváen aná Erodiasin ma yafein má ena kokhon aauí ma ukhá ein masan Yoni ano vanasifin páman uren asirákan iniren 20 Eroti moéken ena vá namu avúavasíen Yonin pákaan karavusifin kaen mino.
Yoni Ano Ma Yisasin Monó Non Péantein Baya Ino
(Matiu 3:13-17; Maki 1:9-11)
21 Kokhon nanin banta ma non bariyákan Yisasin má dere non mamaren amúkiyain má inaru ona yivíkan 22 *Yon 1:32Kantá Aunan mano kukhofá nun an daven ámaren Yisasin ánontá e yomaniyain má inaru fáké máa sen oovaren temí, “Éi sen tanin uron mono. Téi éin nan moéké tinunu ukhé éi nan timusin iyá uno.”
Yisasin Anafu Yan Ma Ayun Man En Erikheí Pákena Vaya Ino
(Matiu 1:1-17)
23 *Ruk 4:22; Yon 6:42Yisasi ma teti (30) oranaí ma uven bei monó doran araí íkan banasi ano ma inein mano véi nan Yosepin anin mino sen iniyákan
Yosepi mai véi Erin anin mino.
24 Eri maen Matatin anin bákan
Matati maen Rivain anin bákan
Rivai maen Merikin anin bákan
Meriki maen Yanain anin bákan
Yanai maen Yosepin anin mino.
25 Yosepi maen Matatiasin anin bákan
Matatiasi maen Amosin anin bákan
Amosi maen Naumin anin bákan
Naumi maen Esirin anin bákan
Esiri maen Nakhain anin mino.
26 Nakhai maen Matin anin bákan
Mati maen Matatiasin anin bákan
Matatiasi maen Semenin anin bákan
Semeni maen Yosekin anin bákan
Yoseki maen Yodan anin mino.
27 Yoda maen Yoananin anin bákan
Yoanani maen Resan anin bákan
Resa maen Serubaberin anin bákan
Serubaberi maen Siaritierin anin bákan
Siaritieri maen Nerin anin mino. 28 Neri maen Merikin anin bákan
Meriki maen Adin anin bákan
Adi maen Kosamun anin bákan
Kosamu maen Erimadamun anin bákan
Erimadamu maen Erin anin mino.
29 Eri maen Yosuan anin bákan
Yosua maen Eriesan anin bákan
Eriesa maen Yorimin anin bákan
Yorimi maen Matatin anin bákan
Matati maen Rivain anin bákan maen
30 Rivai maen Simionin anin bákan
Simioni maen Yudan anin bákan
Yuda maen Yosepin anin bákan
Yosepi maen Yonamin anin bákan
Yonami maen Eriakimin anin mino.
31 Eriakimi maen Mereanin anin bákan
Mereani maen Menan anin bákan
Mena maen Matatan anin bákan
Matata maen Netanin anin bákan
Netani maen Devitin anin mino.
32 *Rut 4:17-22Deviti maen Yesin anin bákan
Yesi maen Obetin anin bákan
Obeti maen Boasin anin bákan
Boasi maen Saromonin anin bákan
Saromoni maen Nasonin anin mino.
33 Nasoni maen Aminadapin anin bákan
Aminadapi maen Ramun anin bákan
Ramu maen Arinin anin bákan
Arini maen Esaronin anin bákan
Esaroni maen Peresin anin bákan
Peresi maen Yudan anin mino.
34 Yuda maen Yekopun anin bákan
Yekopu maen Aisakin anin bákan
Aisaki maen Abaraamun anin bákan
Abaraamu maen Teran anin bákan
Tera maen Nahon anin mino.
35 Nao maen Serukun anin bákan
Seruku maen Reun anin bákan
Reu maen Perekin anin bákan
Pereki maen Eberin anin bákan
Eberi maen Seranin anin mino.
36 *Esé 11:10-26Serani maen Kainanin anin bákan
Kainani maen Apaksatin anin bákan
Apaksati maen Siemin anin bákan
Siemi maen Noan anin bákan
Noa maen Ramekin anin mino.
37 Rameki maen Metuseran anin bákan
Metusera maen Inokin anin bákan
Inoki maen Yaretin anin bákan
Yareti maen Maararerin anin bákan
Maarareri maen Kenanin anin mino.
38 *Esé 4:25-26Kenani maen Enosin anin bákan
Enosi maen Setin anin bákan
Seti maen Adamun anin bákan
Adamu maen Tiyarafenu anin mino.