5
Sipisipi Arará Bá Bompon Dóki Vái Vaya Ino.
* Ais 29:11; Isi 2:9-10Máan tiyáká onékun mai ma kin karáká kumanteini ayan kuron pákena yámampin mana vompon dóki fákakhan mai vompontá maen tefá tefá akhentá bompon uvantan dan manápá ifo afápá kan un kádan pintan dampan ákona uran baren mino. Máan tukhá onékun mana ákona enisori ano oovararen máa semí, “Iye anó kanaíen ma vompontá ma yamparen ákona uran bain do kavótiren kavasinten nafino.” Máa sen mifo inaru fáke safi vara ráke safi inká bara aú pinte safi ída mana ano mai vompon kaváden dankafin nainíen mino. Ída mana ano mai vompon kanaíen kaváden dankafin nainí ukheimpin téi váduriyá ifí dé uno. * Esé 49:9; Ais 11:1, 10; Rev 22:16Ifí diyarunafin mai-tuenti-fo (24) ánon enisori kayo finté mana ano máa semí, “Ída ifí diyáke onano. Yutan anan pinte vanta Devitin akhá ano ma raionií uven ma aruvin uviní uren ma Devitini kin kará barein banta anon kanaíen mai ma yan manápá ifo afápá kan un kádan anamuntá ma fúkin damparan bain kasaen kavótiren dankafinten mino.”
* Sek 4:10; Yon 1:36; Rev 13:8Máa sirá téi onékun Sipisipi Arará ma aruan púkaré ein mano aúbaná mantakhan mai ma safúnaren daná kayo ma kamí kamí bain má ánon enisori kéká bá ano véin maman aúban den manten eúkukhan mino. Béin ánompin kaoi viri an dakhein dan manápá ifo afápá kan un kádan bákan inká dan manápá ifo afápá kan un kádan auu vákan ma ukhein mai Tiyarafenu ano ma yan manápá ifo afápá kan un kádan Aunan ma siantan ma varará orera iyain mino. Mai Sipisipi Arará ano oriven mai ma kin karáká kumantein bantai ayan kurompáke yáman pintena mai vompon o varen mino. * Íbo 141:2; Rev 8:3-4Mai vompon dóki mamaran maen mai ma kamí kamí tafúnaren daná kayo ma kaya iyain má tuenti-fo (24) ánon enisori kéká bá ano mai Sipisipi Arará arantampin mátimen mino. Mátimen mana mana ano kíta fákarú en inká kori fóké uvantein dókifin ma aunka fauran bain dere fákakhan mino. Mai Tiyarafenui vanasi ano ma amúkiyain dóki kayo ino.
* Íbo 33:3; 40:3; 96:1; 98:1Mai kéká ano auyen í máa sen den mino.
“Éi anan kanaíeya mai vompon mádeya
mairá ma yampakhein púkin do khavótire mai vompon kavasin nono.
Mai fara vara seyo, éin aruan púdayai ei narefókéi vanasi miyaní uan Tiyarafenun ame ono.
Minó anan pinte vá ara ara vaya ma siyain má inká banasi ma minó barafá bain kayo vá ino.
10  * Eks 19:6; Ais 61:6; Rev 1:6; 20:6Máan ture éi anon mai nanin banta maman Tiyarafenui monó doran bantaí uren nan mi Tiyarafenu vá barará nanin banta vá aúban báken beni yorarí iyan
inká barará nanin bantará dafisinten mino.”
Arará Sipisipi Aví Ma Yaní Ein Baya Ino
11  * Dan 7:10; Ibu 12:22Máan turé evaráne mo oniyáké inékun ída yankaforen enisori kayo ano veni kin kará mamáden iyen eúkuven í diyákan kamí kamí tafúnaren daná ma kaya iyain má ánon enisori kayo vá ban mino. 12 Avádóden máa sen í den mino.
“Mai ma aruan púkaré ein Sipisipi Arará kantasí ukhen mino.
Tiyarafenu ano véin nan mi kanaíen kantasí ukhein ákona vá kokhon ona vá
inká afova vá ákona vá
inká kákan bí bá kakhan má avu vá baranten ne sikhen mino!”
13 Máa siyá inékun inaru fáke safi vara ráke safi vara aú pinte safi inká un nompin nafi ma vain tafúna kayo ano yere máa sen í den mino.
“Avu vá kákan bí bá kakhan má ákona vá
kin karáká ma kumantein nina vá
inká sipisipi arará ina vá para van oriyan bano.”
14 Máa sen í diyain má mai ma kamí kamí tafúnaren daná kayo ano fura ino síkan inká tuenti-fo (24) ánon enisori kayo ano aron durafúden Tiyarafenu vá sipisipi arará bá aví daníen mino.

*5:1: Ais 29:11; Isi 2:9-10

*5:5: Esé 49:9; Ais 11:1, 10; Rev 22:16

*5:6: Sek 4:10; Yon 1:36; Rev 13:8

*5:8: Íbo 141:2; Rev 8:3-4

*5:9: Íbo 33:3; 40:3; 96:1; 98:1

*5:10: Eks 19:6; Ais 61:6; Rev 1:6; 20:6

*5:11: Dan 7:10; Ibu 12:22