2
Ya꞉su i malan amilo꞉ alu a꞉no꞉ ko꞉lo꞉ fanda wido꞉
1 Ni nao nado i, ne gilo꞉wa ya꞉sa꞉ga꞉yo꞉, Godeya꞉ to hendele a꞉no꞉ ko꞉lo꞉ kalaba widakiyo꞉, niyo꞉ asulo꞉lo꞉ di kaluwa꞉lo꞉ widan aumbo꞉ mo꞉wido꞉. 2 Mo꞉wo꞉ ne gi o꞉lia꞉ ilikiyo꞉, niyo꞉ kelego꞉ nolo꞉ tambo ga꞉lilaki, Ya꞉su Keliso a꞉no꞉leko꞉ asula꞉mela꞉no꞉ dowab. Ya꞉su e ko꞉lo꞉ i malan amilo꞉ sowo꞉ a꞉no꞉, ne mada asula꞉mela꞉no꞉ dowab. 3 Ilig 18.9,2Kol 10.1A꞉la꞉ta꞉ga꞉ ne gilo꞉ amilo꞉ mio꞉ ho꞉len a꞉namio꞉, halaido꞉lo꞉ma dowaki, kiyo꞉ bibisoda꞉sa꞉ga꞉ tagio꞉ alan dowo꞉. 4 1Tes 1.5To nilo꞉ sa꞉la꞉len o꞉lia꞉ to nafa wida꞉len o꞉lia꞉, asulo꞉lo꞉ di kaluwa꞉lo꞉ widan aumbo꞉ mo꞉wida꞉len. Niyo꞉ to widakiyo꞉, Mamaya꞉ ene halaido꞉wo꞉ ko꞉lo꞉ gimo꞉wo꞉ fanda wida꞉len. 5 Nilo꞉ a꞉la꞉do꞉ wida꞉len a꞉no꞉ mo꞉wo꞉ we. Gili tilidabuwo꞉ henfelo꞉ kaluwa꞉lo꞉ asulo꞉ widab a꞉na tili asulabena꞉ki go꞉. Ko꞉sega gio꞉ Godeya꞉ ene halaido꞉ imilise a꞉na tilidabuma꞉ki asulab.
Asulo꞉ nafayo꞉ Mamaya꞉ dimian
6 Hendele, tilidabu kaluka꞉isale halaido꞉lo꞉ dowab o꞉mo꞉wo꞉, niliyo꞉ to halaido꞉wo꞉ wida꞉sen. Ko꞉sega to halaido꞉ a꞉no꞉, henfelo꞉ kaluwa꞉ asulo꞉wa a꞉la꞉ta꞉ga꞉yo꞉ mo꞉di. Henfelo꞉ wema꞉ misa꞉ kalu a꞉na a꞉la꞉ta꞉ga꞉yo꞉lo꞉ mo꞉di. Kalu i a꞉ma꞉ halaido꞉wo꞉ o꞉ngo꞉malo꞉ngo꞉ doma꞉ ha꞉na꞉lab. 7 Nililo꞉ to halaido꞉ wida꞉sen a꞉no꞉ Godeya a꞉la꞉ta꞉ga꞉ di. Godeya꞉lo꞉ asulo꞉ nafa dimidaefa꞉ to a꞉no꞉, tamin amio꞉ wo꞉no꞉le delen ko꞉lo꞉, kaluka꞉isaleyo꞉ mo꞉asulo꞉. Nio꞉lo꞉ Godeya꞉ ene malilo꞉ nafa a꞉no꞉ dia꞉ga꞉ mesea꞉ki a꞉la꞉likiyo꞉, henfelo꞉ we semo꞉ dimido꞉ iliki, a꞉na dinali saefa꞉. Ko꞉sega o꞉go꞉ niliyo꞉ asuluma꞉no꞉ to nafa a꞉no꞉ kalaba fanda wido꞉l. 8 Godeya꞉ asulo꞉ to nafa a꞉no꞉ henfelo꞉ amilo꞉ misa꞉ kalu i a꞉no꞉ tambowo꞉ mo꞉fanda ba꞉ba꞉. Iyo꞉ to nafa a꞉no꞉ asulo꞉ kibo꞉bowo꞉, nili wabulun Ya꞉su e, i malan amio꞉ mo꞉sana somabe. 9 Ais 64.4To a꞉no꞉ ko꞉lo꞉ sa꞉lakiyo꞉, Godeya꞉ ene bugo꞉ amio꞉ towo꞉ a꞉la꞉sa꞉sa꞉lo꞉,
“Godelo꞉ mada alan asulab kaluka꞉isale o꞉mo꞉lo꞉, Gode elo꞉ kelego꞉ nafa dimidama꞉no꞉ a꞉la꞉likilo꞉ dimidaefa꞉ a꞉no꞉,
kalu imilig noma꞉yo꞉ siya꞉yo꞉ mo꞉ba꞉ba꞉ a꞉la꞉ta꞉ga꞉ ka꞉la꞉na꞉yo꞉lo꞉ mo꞉dabu.
Kelego꞉ a꞉no꞉ kaluwa꞉ asulo꞉ amio꞉lo꞉ mada mo꞉asulufo꞉len.”
10 Tamin amio꞉ Godeya꞉lo꞉ dimidaefa꞉ a꞉no꞉ wo꞉no꞉le delen ko꞉sega, o꞉go꞉ Mama eya a꞉la꞉ta꞉ga꞉yo꞉ Gode eyo꞉ nimo꞉wo꞉ kalaba walalifa꞉ ko꞉lo꞉lab. Mama Malilo꞉ eyo꞉ kelego꞉ tambo dinafa fanda asululiaki, Godeya꞉ ene asulo꞉ usamilo꞉ wo꞉no꞉lelo꞉ da꞉lab a꞉no꞉lo꞉ e fanda asulo꞉ ko꞉lo꞉lab. 11 Kaluwa꞉ asulo꞉ usamilo꞉ da꞉lab a꞉no꞉ kalu noma꞉yo꞉ mo꞉asulo꞉ ko꞉sega, kalu a꞉ma꞉ ene mamaya꞉ asulufo꞉lab. A꞉la꞉do꞉ gan aumbo꞉ kalu imilig noma꞉yo꞉ Godeya꞉ asulo꞉wo꞉ mada mo꞉asuluma꞉ib. Godeya꞉ ene Mama a꞉ma꞉ ene asulufo꞉lab. 12 Niliyo꞉ henfelo꞉ wema꞉ mama ko꞉lo꞉ dima. Ko꞉sega niliyo꞉ Godeya꞉lo꞉ boba nimo꞉lo꞉ madalilo꞉ dimi a꞉no꞉ dinafa fanda asuluma꞉kiyo꞉, Mama Godelo꞉wa a꞉la꞉ta꞉ga꞉lo꞉ mio꞉ a꞉no꞉ ko꞉lo꞉ di. 13 Niliyo꞉ boba dimi a꞉no꞉ ko꞉lo꞉ sa꞉lakiyo꞉, henfelo꞉ kalu wema꞉ asulo꞉ a꞉na dia꞉sa꞉ga꞉yo꞉ mo꞉sa꞉la꞉sen. Ko꞉sega Mama Malilo꞉ a꞉ma꞉yo꞉ nimo꞉wo꞉ widabiki, niliyo꞉ to hendele Mamaya꞉lo꞉ a꞉no꞉ ko꞉lo꞉ wida꞉sen. 14 Kaluka꞉isale abeyo꞉ Godeya꞉ ene Mamayo꞉ e amio꞉ mo꞉dowo꞉lalega, Godeya꞉ ene Mamaya꞉ asulo꞉ nafa ko꞉lo꞉ yab a꞉no꞉ mada mo꞉dia꞉ib. Iliyo꞉ asulo꞉ nafa a꞉no꞉ madali to walab a꞉la꞉asulab. To a꞉no꞉ Mama enenko꞉ fanda widab ko꞉lo꞉, iliyo꞉ mada mo꞉asuluma꞉ib. 15 Kaluka꞉isale abeyo꞉ Godeya꞉ ene Mamayo꞉ e amio꞉ dofo꞉lab a꞉ma꞉yo꞉, kelego꞉ tambo o꞉li alobana asuluma꞉ib. Ko꞉sega ililo꞉ asulo꞉ a꞉no꞉ kaluka꞉isale nol, Godeya꞉ Mamalo꞉ma dowab a꞉ma꞉yo꞉ mada mo꞉alobana ba꞉ba꞉ib. 16 Ais 40.13Godeya꞉ ene bugo꞉ amio꞉ towo꞉ a꞉la꞉sa꞉sa꞉lo꞉,
“Kalu imilig noma꞉yo꞉ Kalu Alana꞉ asulo꞉wo꞉ mada mo꞉fanda asuluma꞉ib.
Kalu noma꞉yo꞉ Kalu Alanbo꞉wo꞉ mada mo꞉wala sa꞉ma꞉ib.”
Ko꞉sega Ya꞉su Kelisowa꞉ asulo꞉ a꞉no꞉ ni amio꞉ dowab.