1 Niyo꞉ tilidabu kaluka꞉isale misilo꞉ mo꞉ba꞉dab a꞉no꞉ ko꞉lo꞉ asuwa꞉fa꞉no꞉ a꞉lakiyo꞉, hogo꞉ nanog dia꞉lo꞉l a꞉la꞉bo꞉ gio꞉ asuluma꞉ki asulab. Kaluka꞉isale nelo꞉ mo꞉bo꞉do꞉l a꞉no꞉ gio꞉lo꞉, tilidabu kaluka꞉isale Laodisia hen amilo꞉ sab a꞉no꞉lo꞉, a꞉la꞉ta꞉ga꞉ tilidabu kaluka꞉isale ne misilo꞉ mo꞉ba꞉ba꞉ a꞉no꞉lo꞉, niyo꞉ a꞉la꞉ka asuwa꞉ta꞉sen. 2 Nanog nilo꞉ dimido꞉l wema꞉yo꞉, tilidabu gililo꞉wo꞉ halaido꞉ doma꞉ki go꞉. A꞉la꞉ta꞉ga꞉ gio꞉ tambo gegelebo꞉ ha꞉fo꞉wo꞉ disa꞉laki, ua gasa doma꞉ki go꞉. A꞉la꞉gabikiyo꞉ gio꞉ asulo꞉ nafayo꞉ dia꞉sa꞉ga꞉, Godeya꞉ to wo꞉no꞉lelo꞉ delen a꞉ma꞉ ha꞉go꞉ dinafa fanda asululialikiyo꞉, gili tilidabuwo꞉ halaido꞉ doma꞉ki asulo꞉l. To wo꞉no꞉lelo꞉ delen a꞉ma꞉ ha꞉go꞉, Ya꞉su Keliso we. 3 1Kol 1.24,30Asulo꞉ nafale o꞉lia꞉ asuluma꞉no꞉ nafa o꞉lia꞉yo꞉ tambo Keliso amio꞉, wa꞉lifo꞉ ko꞉lo꞉ a꞉lab. 4 Lom 16.18Kalu noma꞉yo꞉ to nafa ko꞉li nowo꞉ gio꞉ dikili sa꞉lab amio꞉ tili da꞉dabena꞉ki, niyo꞉ to we gimo꞉wo꞉ a꞉na so꞉lo꞉l 5 1Kol 5.3Mo꞉wo꞉ ne gi o꞉lia꞉yo꞉ mo꞉dofo꞉lo꞉l ko꞉sega, asulo꞉ nilo꞉wo꞉ gi o꞉lia꞉ ua iliki, gio꞉ Keliso amilo꞉ tilida꞉dakilo꞉ halale kagayab a꞉no꞉lia꞉, gegelelo꞉ ege dowab a꞉no꞉lia꞉yo꞉, ne asulaki sagala꞉liki so꞉l.

6 Giliyo꞉ Ya꞉su Kelisowo꞉ gili Alande doma꞉kilo꞉ ta꞉fo꞉ o꞉leaumbo꞉, gio꞉ ho꞉leno꞉ tambo e o꞉lia꞉ iliki ha꞉na꞉lubi. 7 A꞉fe 3.17Gio꞉ i tef ko꞉lo꞉ hen amilo꞉ tiha꞉nan o꞉leaumbo꞉, E amio꞉ a꞉la꞉kudaki bowo꞉ tina꞉bi. A꞉la꞉ta꞉ga꞉ a ko꞉lo꞉ aiko꞉ halaido꞉ wa꞉l amilo꞉ dian o꞉leaumbo꞉ gili tilidabuwo꞉ e wa꞉la dia꞉bi. A꞉la꞉galikiyo꞉, nililo꞉ gimo꞉lo꞉ wido꞉ o꞉leaumbo꞉ gili tilidabuwo꞉ halale anayakiyo꞉, sagalo꞉ towo꞉ gi amio꞉ wa꞉litakiyo꞉ ala handaloma꞉ib.

8 Gio꞉ dinafa dowa꞉bi. Kalu nolba꞉yo꞉ dikili sa꞉lakiyo꞉, madali to ko꞉li ko꞉lilo꞉ a꞉no꞉ gimo꞉wo꞉ walama꞉ib. To a꞉no꞉ ema꞉muwa꞉ asulo꞉wa a꞉la꞉ta꞉ga꞉ fa꞉la꞉dowakiyo꞉, henfelo꞉ wema꞉ man delen a꞉no꞉ ko꞉lo꞉ kudu ha꞉nakigab. Ililo꞉ to widab a꞉ma꞉yo꞉ gio꞉ dibolo amilo꞉ to꞉lolo꞉wo꞉ auma꞉ib ko꞉lo꞉, gio꞉ to a꞉no꞉ kudu ha꞉nabena꞉ki dinafa dowa꞉bi. To a꞉no꞉ Keliso eya a꞉la꞉ta꞉ga꞉yo꞉ mo꞉fa꞉la꞉dowab. 9 Yo꞉n 1.14,16Keliso e kalu dofo꞉labi, kelego꞉wo꞉ tambo Gode amilo꞉ wa꞉lifo꞉lab a꞉no꞉, e amio꞉lo꞉ wa꞉lifo꞉ ko꞉lo꞉ a꞉lab. 10 A꞉fe 1.21-22Gio꞉ Ya꞉su eya kudufo꞉labikiyo꞉, eyo꞉ gi amio꞉ tambo ilili alifa꞉. Keliso e, mama ko꞉li ko꞉lilo꞉ halaido꞉lo꞉ a꞉lab a꞉ma꞉ misa꞉yo꞉ E ko꞉lo꞉lab. 11 Lom 2.29Gio꞉ eya kudabiki, eyo꞉ gili do꞉go꞉fo꞉ a꞉na hege gede alifa꞉. Elo꞉ dimido꞉ a꞉no꞉ kaluwa꞉lo꞉ do꞉go꞉f hege gedean o꞉mba. Keliso eyo꞉ do꞉mo꞉wa꞉lo꞉ asulakilo꞉ mogago꞉ dimida꞉len man a꞉no꞉, gio꞉ ga꞉li mesea꞉ki sili alifa꞉. Kelisowa꞉lo꞉ do꞉go꞉fo꞉ hege gedean man hendeleyo꞉ o꞉m. 12 Lom 6.4Gio꞉ ho꞉n amilo꞉ to꞉lolab a꞉namio꞉, Ya꞉su o꞉lia꞉ hen daido꞉wa difa꞉. A꞉la꞉ta꞉ga꞉ Ya꞉sulo꞉ dasi alifa꞉ Gode a꞉ma꞉ ene halaido꞉ a꞉namio꞉, gio꞉ tilidabu ko꞉lo꞉, gio꞉lo꞉ e o꞉lia꞉ a꞉ma꞉la꞉ dasi alifa꞉ ko꞉lo꞉lab. 13 A꞉fe 2.1,4-5Tamin amio꞉ gili do꞉mo꞉wa꞉lo꞉ asulakilo꞉ mogago꞉ dimida꞉len man a꞉no꞉ semo꞉ dila꞉ amio꞉, gio꞉ man mogago꞉ dimida꞉liki sowo꞉ o꞉ngo꞉ elen. Ko꞉sega o꞉g a꞉namio꞉ Gode eyo꞉ nili mogago꞉ dimida꞉len a꞉no꞉ tambo hala꞉sa꞉ga꞉ ga꞉lila꞉ ko꞉lo꞉, nio꞉ Keliso o꞉lia꞉ a꞉ma꞉la꞉ dasi alitakiyo꞉, mela꞉no꞉ ta꞉fo꞉. 14 A꞉fe 2.14-16,1Bid 2.24Ele difa꞉ a꞉ma꞉yo꞉ nio꞉ mo꞉walila꞉sa꞉ga꞉, nililo꞉ mogago꞉ dimida꞉len a꞉no꞉ kalaba dia꞉taki, nio꞉ mewa꞉l ha꞉g a꞉na elen. Ko꞉sega Gode eyo꞉ mewa꞉l a꞉no꞉ i malana alu alitaki tambo dila꞉. 15 I malan a꞉na ilikiyo꞉, Gode eyo꞉ mama ko꞉li ko꞉lilo꞉ a꞉lab a꞉ma꞉ ene halaido꞉ a꞉no꞉ o꞉ngo꞉malo꞉ngo꞉ ta꞉fo꞉ ko꞉lo꞉, iyo꞉ tambo tiniakiyo꞉, kaluka꞉isaleya꞉ siwa꞉l amio꞉ sendeloma꞉ki ta꞉fo꞉.

16 Lom 14.1-13A꞉la꞉fo꞉ko꞉lo꞉ ma꞉n ma꞉no꞉ doba꞉da꞉yo꞉lo꞉, ho꞉n ma꞉no꞉ doba꞉da꞉yo꞉lo꞉, ho꞉len alan amilo꞉ gulugululan a꞉namida꞉yo꞉lo꞉, ele ho꞉gi amilo꞉ gulugululan a꞉no꞉lo꞉, a꞉la꞉ta꞉ga꞉ Ha꞉fo꞉lo꞉ Dowan ho꞉len a꞉no꞉lo꞉, kalu nolba꞉lo꞉ ele dia꞉tab a꞉namio꞉, iliyo꞉ gio꞉ mo꞉alobanama꞉ki dowa꞉bi. 17 Hibu 8.5Ele a꞉ma꞉yo꞉ kelego꞉ tif amilo꞉ fa꞉la꞉doma꞉nigab a꞉no꞉ ko꞉lo꞉ mama dowan o꞉ngo꞉ dedaki dimido꞉. Ko꞉sega hendele a꞉no꞉ Ya꞉su Keliso e ko꞉lo꞉ a꞉lab. 18 Kalu nolba꞉yo꞉ gilo꞉wa fa꞉la꞉dowakiyo꞉ a꞉la꞉sa꞉ma꞉ib, “Gio꞉ go꞉no꞉n a꞉ma꞉la꞉yo꞉ ha꞉ga dowaki, ma꞉mula꞉ kalumo꞉ gulugululaki wabuluma” a꞉la꞉sa꞉ma꞉ib. Iliyo꞉ a꞉la꞉sa꞉ma꞉ib, “Niyo꞉ Godeya a꞉la꞉ta꞉ga꞉yo꞉ ho꞉le ba꞉ba꞉ ko꞉lo꞉ to nilo꞉ wido꞉l we mada dinafa da꞉da꞉bi,” a꞉la꞉sa꞉ma꞉ib. Ko꞉sega giliyo꞉ kalu o꞉ngo꞉ma꞉yo꞉ gio꞉ wa꞉la꞉ sanama꞉kiyo꞉ ta꞉ta꞉so꞉bo. Kalu i o꞉ngo꞉wo꞉ inido꞉ asulo꞉wa ilikiyo꞉, enena꞉ma꞉la꞉yo꞉ madali kailakigab. 19 A꞉fe 2.21,4.16Kalu i a꞉no꞉ misa꞉ a꞉namio꞉ mo꞉kudo꞉ ko꞉lo꞉ a꞉lab. Nili misa꞉yo꞉ Ya꞉su Keliso E. Nili do꞉mo꞉ amio꞉ moma o꞉lia꞉ kagoman o꞉lia꞉yo꞉ tambo kudu alifelo꞉ ko꞉lo꞉, nili misa꞉ a꞉na a꞉la꞉ta꞉ga꞉yo꞉ Gode eyo꞉ nili do꞉mo꞉ we halaido꞉wo꞉ dimiab amio꞉ tambo anama꞉ki ta꞉ta꞉sen.

20 Gala 4.3,9,1Tim 4.3Gio꞉ Keliso o꞉lia꞉ sowabikiyo꞉, eyo꞉ henfelo꞉ man wema꞉yo꞉ gio꞉ mo꞉bo꞉fo꞉melea꞉ki sili alifa꞉. A꞉la꞉fo꞉ko꞉lo꞉ gio꞉ henfelo꞉ man wema꞉ ha꞉g amio꞉ o꞉a꞉lab o꞉ngo꞉ dowakilo꞉ kudu ha꞉nab ko mo꞉wo꞉ ha꞉? 21 Henfelo꞉ wema꞉ eleyo꞉ we. Kelego꞉ we gola꞉so꞉bo! A꞉no꞉ na꞉so꞉bo! Kelego꞉ nowo꞉ ta꞉lia꞉so꞉bo! 22 Madi 15.9Ele a꞉ma꞉yo꞉ henfelo꞉ kelego꞉ bo꞉elo꞉ mogaila꞉ma꞉no꞉ a꞉namida꞉ sa꞉laki difa꞉. Ele o꞉leo꞉ngo꞉wo꞉ kaluwa a꞉la꞉ta꞉ga꞉ fa꞉la꞉dowo꞉. 23 Ele o꞉leo꞉ngo꞉wo꞉ kaluka꞉isaleya꞉yo꞉ “We nafa, hendele asuwa꞉fa꞉nigabo꞉lo꞉b” a꞉la꞉asulo꞉. Kaluka꞉isale elelo꞉ kudu ha꞉nab i a꞉ma꞉yo꞉, eleyo꞉ tambo mada dinafa kudu ha꞉na꞉niki a꞉la꞉sa꞉la꞉sen. Inina꞉ma꞉la꞉yo꞉ madali wa꞉la꞉ sa꞉ndaki, eleyo꞉ a꞉na difa꞉. A꞉la꞉ta꞉ga꞉ ini do꞉mo꞉wo꞉ halaido꞉ bo꞉fo꞉melea꞉kiyo꞉, eleyo꞉ ko꞉li ko꞉lilo꞉ dila꞉. Ko꞉sega ele a꞉ma꞉yo꞉ nili mogago꞉ dimidama꞉no꞉ asula꞉sen a꞉no꞉ mada mo꞉ka꞉la꞉lab.