1 A꞉la꞉go꞉ko꞉lo꞉ niliyo꞉ waga sa꞉ma꞉no꞉wa꞉le? Godeya꞉ ha꞉fo꞉ disa꞉lan man a꞉no꞉ anama꞉kiyo꞉, niliyo꞉ mogago꞉wo꞉ dimidafo꞉ko꞉ ha꞉na꞉mela꞉no꞉wa꞉le? 2 A꞉la꞉bo꞉ niliyo꞉ mada mo꞉dimidama꞉niki! Man mogago꞉lo꞉ dimidama꞉no꞉lo꞉ doba꞉da꞉yo꞉, nio꞉ sowo꞉ ko꞉lo꞉lab. Nio꞉ wa꞉kabiyo꞉ man a꞉no꞉ mo꞉dimida꞉i ha꞉na꞉no꞉. 3 Gala 3.27Gio꞉ to we dinafa fanda asuluma. Nio꞉ Ya꞉su Kelisowa dowabikilo꞉ ho꞉na to꞉lolo꞉ a꞉ma꞉yo꞉, nio꞉ e o꞉lia꞉ sowo꞉ a꞉la꞉widaki go꞉. 4 Kolo 2.12Nio꞉ ho꞉na to꞉lolab amio꞉, Ya꞉su o꞉lia꞉ sowabiki, daido꞉wa difa꞉. A꞉na ilikiyo꞉, malilo꞉ halaido꞉lo꞉ a꞉lab Gode eyo꞉ Ya꞉su e dasi alitakilo꞉ mela꞉no꞉ dimi o꞉leaumbo꞉, eyo꞉ nio꞉lo꞉ mela꞉no꞉ ho꞉gi a꞉na dota꞉ga꞉, ha꞉na꞉melea꞉ki ta꞉fo꞉.

5 Nio꞉ ho꞉na to꞉lolab amio꞉, Ya꞉suwa dowaki e o꞉lia꞉ sowo꞉ ko꞉lo꞉, e a꞉ma꞉la꞉ dasili o꞉leaumbo꞉ nio꞉lo꞉ e o꞉lia꞉ a꞉ma꞉la꞉ dasi alifa꞉ib. 6 Gala 5.24Ya꞉su e i malana sana sowo꞉ amio꞉, nili do꞉mo꞉wa꞉lo꞉ man mogago꞉ kudu ha꞉nakilo꞉ dimidan a꞉no꞉ tambo e o꞉lia꞉ i malana alu alifa꞉. Tamin amio꞉ man mogago꞉wa꞉ halaido꞉ a꞉ma꞉yo꞉ nio꞉ bo꞉fo꞉len ko꞉lo꞉, halaido꞉ a꞉no꞉ o꞉ngo꞉malo꞉ngo꞉ ta꞉takiyo꞉, nio꞉ mogago꞉ a꞉ma꞉yo꞉ wa꞉kabiyo꞉ mo꞉bo꞉fo꞉melea꞉ki a꞉na dimido꞉. Nio꞉ to a꞉no꞉ asulo꞉. 7 Kaluka꞉isale abeyo꞉ sowo꞉le dowab a꞉no꞉ man mogago꞉ a꞉ma꞉ ha꞉g amio꞉ mo꞉mesea꞉ki sili alifa꞉ ko꞉lo꞉lab.

8 Nio꞉ Ya꞉su o꞉lia꞉ sowo꞉ ko꞉lo꞉, nio꞉ e o꞉lia꞉ mesa꞉no꞉ a꞉la꞉tili asulo꞉l. 9 Nio꞉ to a꞉no꞉ asulo꞉ ko꞉lo꞉lab. Mo꞉wo꞉ Keliso e sowa꞉sa꞉ga꞉ a꞉ma꞉la꞉ dasi alifa꞉ ko꞉lo꞉, e wa꞉kabiyo꞉ mo꞉soma꞉ib. Sowana꞉ halaido꞉ a꞉ma꞉yo꞉ e wa꞉kabiyo꞉ mada mo꞉bo꞉fo꞉mela꞉ib. 10 Ya꞉su e ko꞉lo꞉ sowo꞉ a꞉ma꞉yo꞉, mogago꞉wa꞉ halaido꞉ a꞉no꞉ tambo e bidila꞉ ko꞉m. Ko꞉sega mela꞉no꞉ elo꞉ dia꞉ga꞉lo꞉ sab a꞉ma꞉yo꞉, Godeyo꞉ ko꞉lo꞉ wabulu alitakigab. 11 2Kol 5.15,Gala 2.19O꞉leaumbo꞉, man mogago꞉lo꞉ dimidan doba꞉da꞉yo꞉, gio꞉ sowo꞉ o꞉ngo꞉ ko꞉lo꞉lab. Ko꞉sega Ya꞉su Keliso eya a꞉la꞉ta꞉ga꞉yo꞉, gio꞉ mela꞉no꞉wo꞉ dia꞉ga꞉ Godeya dofo꞉lab.

12 Mo꞉mo꞉ 4.7Do꞉mo꞉ gililo꞉wo꞉ man mogago꞉ a꞉ma꞉ bo꞉fo꞉melea꞉kiyo꞉ ta꞉ta꞉so꞉bo. Man ko꞉li ko꞉lilo꞉ mesela꞉sa꞉ga꞉lo꞉ dia꞉no꞉ asulan a꞉no꞉ kudu ha꞉na꞉so꞉bo. 13 Lom 12.1Gi amilo꞉ do꞉mo꞉ heb ko꞉li ko꞉lilo꞉ a꞉lab koma꞉yo꞉ Sa꞉da꞉na꞉ya꞉ ene nanog dimidama꞉kiyo꞉, fogo꞉ dimia꞉so꞉bo. Ko꞉sega gio꞉ sowo꞉ kalu ko꞉lo꞉ dasi alifa꞉ o꞉leo꞉ngo꞉ dowo꞉ ko꞉lo꞉, go꞉no꞉no꞉ Godemo꞉ dimia꞉lubi. Man digalo꞉ dimidama꞉kiyo꞉, do꞉mo꞉ heb ko꞉li ko꞉lilo꞉ gi amilo꞉ a꞉lab ko Godemo꞉ dimia꞉lubi. 14 1Yo꞉n 3.6Gio꞉ eleya꞉ ha꞉g amio꞉ mo꞉dofo꞉lab. Ko꞉sega gio꞉ Godeya꞉ ha꞉fo꞉ disa꞉lan man a꞉ma꞉ ha꞉ga dowab. A꞉la꞉go꞉ko꞉lo꞉ man mogago꞉wa꞉yo꞉ gio꞉ mada mo꞉bo꞉fo꞉mela꞉ib.

15 A꞉la꞉fo꞉ko꞉lo꞉ niliyo꞉ waga dimidama꞉no꞉wa꞉le? Nio꞉ eleya꞉ ha꞉g amio꞉ mo꞉dowaki, Godeya꞉ ha꞉fo꞉ disa꞉lan man a꞉ma꞉ ha꞉ga dowo꞉ ko꞉lo꞉, niliyo꞉ man mogago꞉wo꞉ dimida꞉ mela꞉no꞉wa꞉le? A꞉la꞉bo꞉ dimida꞉so꞉bo. 16 Yo꞉n 8.34,2Bid 2.19Gio꞉ kalu noma꞉ ha꞉ga dowaki e kudu ha꞉na꞉lalega, eyo꞉ gio꞉ halale bo꞉fo꞉mela꞉ib. Gio꞉ man mogago꞉wa꞉ nanog dian kalu dowalega, gio꞉ soma꞉no꞉lo꞉ doba꞉da꞉ ha꞉na꞉ib. Ko꞉sega gio꞉ Godeya꞉ ene mano꞉ ko꞉lo꞉ kudu ha꞉na꞉lalega, Gode eyo꞉ gio꞉ digalo꞉ kalu a꞉la꞉sa꞉ma꞉ib. Gio꞉ to a꞉no꞉ mo꞉asulaya꞉le? 17 Tamin amio꞉ gio꞉ man mogago꞉wa꞉ madali nanog dian kalu elen ko꞉sega, nililo꞉ to gimo꞉lo꞉ widab a꞉no꞉, gio꞉ tilida꞉da꞉sa꞉ga꞉ hendele kudu ane ko꞉lo꞉, niyo꞉ Godemo꞉wo꞉ mada o꞉m a꞉la꞉so꞉lo꞉l. 18 Gio꞉ man mogago꞉wa꞉ halaido꞉ ha꞉g a꞉namilo꞉ elen a꞉no꞉ gio꞉ ga꞉li mesea꞉ki sili alitakiyo꞉, man digalo꞉wa꞉ nanog dian kalu dowo꞉ ko꞉lo꞉lab.

19 To nilo꞉ so꞉lo꞉l a꞉no꞉ gio꞉ mo꞉dinafa fanda asulo꞉ ko꞉lo꞉, niyo꞉ henfelo꞉ kelego꞉ a꞉na da꞉fe so꞉lo꞉l. Tamin amio꞉ do꞉mo꞉ heb ko꞉li ko꞉lilo꞉ gi amilo꞉ a꞉lab koma꞉yo꞉ man mogago꞉wo꞉ dimidama꞉kiyo꞉, fogo꞉ dimifo꞉labiki, dimidafo꞉ko꞉ ya꞉len. A꞉la꞉do꞉ go꞉ o꞉leaumbo꞉, o꞉go꞉ do꞉mo꞉ heb ko꞉li ko꞉lilo꞉ gi amilo꞉ a꞉lab koma꞉yo꞉ man digalo꞉ dimidama꞉ki, Godeya꞉ ha꞉ga dowaki emo꞉ dimia꞉bi. A꞉la꞉dimidalikiyo꞉, ge malilo꞉ dowaki, Godeya꞉ eno꞉le doma꞉ib. 20 Man mogago꞉wa꞉ halaido꞉ a꞉ma꞉ gelo꞉ bo꞉fo꞉len amio꞉, man digalo꞉wa꞉ halaido꞉ a꞉no꞉ giyo꞉ mo꞉asula꞉sen. 21 O꞉g ho꞉len a꞉namilo꞉ man mogago꞉ gilo꞉ dimida꞉len a꞉ma꞉ fo hedo꞉wo꞉ o꞉ba꞉le? Man a꞉ma꞉yo꞉ gio꞉ soma꞉no꞉lo꞉ doba꞉da꞉ tililia꞉ ha꞉na꞉len. A꞉la꞉ta꞉ga꞉ tamin amilo꞉ gilo꞉ dimida꞉len a꞉ma꞉yo꞉, o꞉go꞉ ge sendelo alitab. 22 Man mogago꞉wa꞉ halaido꞉ a꞉namilo꞉ eleno꞉, gio꞉ ga꞉li sili alitaki, Godeya꞉ ha꞉ga dowakiyo꞉, ene nanog dian kalu fa꞉la꞉dowo꞉. A꞉na ilikiyo꞉, ge Godeya꞉ eno꞉le dowaki, malilo꞉le fa꞉la꞉dowa꞉i ha꞉na꞉la꞉ga꞉, ko꞉ngo꞉ mela꞉no꞉ dia꞉no꞉ ta꞉tab. 23 Lom 5.12,15Man mogago꞉ a꞉ma꞉ wa꞉lo꞉ soma꞉no꞉ ko꞉lo꞉ dia꞉ib. Ko꞉sega Godeya꞉lo꞉ boba kelego꞉ ko꞉lo꞉ madalilo꞉ dimia꞉sen a꞉no꞉ ko꞉ngo꞉ mela꞉no꞉wo꞉ o꞉m. Mela꞉no꞉ a꞉no꞉ nili Alan Ya꞉su Kelisowa a꞉la꞉ta꞉ga꞉ dia꞉sen.