4
Ha꞉salo꞉ doma꞉no꞉ ho꞉len nowo꞉ a꞉lab
1 Gode eyo꞉ nio꞉ ha꞉salo꞉ doma꞉no꞉ a꞉namio꞉ tina꞉ib a꞉la꞉bo꞉ saefa꞉ ko꞉lo꞉, dinali sio꞉ a꞉no꞉ o꞉go꞉ o꞉lab. A꞉la꞉fo꞉ko꞉lo꞉ kaluka꞉isale gi usamio꞉ nolo꞉ ha꞉salo꞉ doma꞉no꞉ a꞉namio꞉ mo꞉tinando꞉ a꞉la꞉bo꞉, nio꞉ tagila꞉li mesa꞉niki. 2 Gode elo꞉ Isolael kaluka꞉isalemo꞉lo꞉ to saefa꞉ o꞉leaumbo꞉, Godeya꞉ to nafayo꞉ nimo꞉wo꞉lo꞉ wido꞉. Ko꞉sega iyo꞉ to a꞉no꞉ da꞉daki hendeleyo꞉ mo꞉tilidabu ko꞉lo꞉, to a꞉ma꞉yo꞉ iyo꞉ mo꞉asufa꞉.
3 Song 95.11,Hibu 3.11Kaluka꞉isale nio꞉ e amilo꞉ tilidabu a꞉no꞉, Godeya꞉ ene ha꞉salo꞉ doma꞉no꞉ a꞉na ti ha꞉na꞉lo꞉l. Ko꞉sega Gode eyo꞉ mo꞉tilidabu kaluka꞉isale a꞉no꞉ ko꞉lo꞉ sa꞉laki sio꞉,
“Ne gadia꞉sa꞉ga꞉ imo꞉wo꞉ towo꞉ saetakiyo꞉ a꞉la꞉sio꞉,
‘Ha꞉fo꞉lo꞉ mesa꞉no꞉ hen nilo꞉ dimidaefa꞉ a꞉namio꞉, iyo꞉ mada mo꞉tima꞉ib.’ ”
Ko꞉sega Gode eyo꞉ taminde amio꞉ henfelo꞉ we dimida꞉sa꞉ga꞉ ta꞉takiyo꞉, eneno꞉ ha꞉fo꞉ dowo꞉. 4 Mo꞉mo꞉ 2.2Godeya꞉ ene bugo꞉ amio꞉ ho꞉len dom a꞉no꞉ ko꞉lo꞉ sa꞉lakiyo꞉ a꞉la꞉sio꞉, “Gode e, ene nanogo꞉ dia꞉i ya꞉la꞉ga꞉ eletakiyo꞉, ha꞉salo꞉ doma꞉no꞉ ho꞉len dom a꞉namio꞉ e ha꞉fo꞉wo꞉ a꞉na dowo꞉.” 5 Song 95.11A꞉la꞉ta꞉ga꞉ to heb nililo꞉ o꞉ma agelo꞉ a꞉namio꞉ a꞉la꞉sio꞉,
“Ha꞉salo꞉ mesa꞉no꞉ hen nilo꞉ dimidaefa꞉ a꞉namio꞉, iyo꞉ mada mo꞉tima꞉ib.”
6 Godeya꞉ to nafalo꞉ tamin amilo꞉ di kaluka꞉isale i a꞉no꞉ gola dowaki mo꞉kudu ane ko꞉lo꞉, iyo꞉ ha꞉salo꞉ doma꞉no꞉ hen a꞉namio꞉ mo꞉tiane. Ko꞉sega kaluka꞉isaleyo꞉ ha꞉salo꞉ doma꞉no꞉ hen a꞉na ti hamana꞉kiyo꞉, fogo꞉ o꞉dimifo꞉lab. 7 Song 95.7-8,Lo 31.7 A꞉la꞉fo꞉ko꞉lo꞉ donayo꞉ modo꞉wo꞉ ta꞉takiyo꞉, Gode eyo꞉ ha꞉salo꞉ doma꞉no꞉ a꞉namilo꞉ tina꞉no꞉wo꞉ ho꞉leno꞉ nowo꞉ a꞉da꞉fe alifa꞉. Ho꞉len a꞉ma꞉ wiyo꞉ “O꞉g we.” Gode eyo꞉ to a꞉no꞉ Da꞉ibida꞉ mego꞉fa a꞉la꞉ta꞉ga꞉ sio꞉ ko꞉lo꞉ sa꞉sa꞉lo꞉,
“O꞉go꞉ gio꞉ ene towo꞉ da꞉dakiyo꞉,
gili asulo꞉ nodoma꞉no꞉wo꞉ halaido꞉ dowakiyo꞉, gola ba꞉da꞉so꞉bo!”
8 Jos 22.4Yosua eyo꞉ Isolael kaluka꞉isaleyo꞉ Ka꞉ina꞉n hen a꞉namilo꞉ tililia꞉ga꞉ tiane a꞉namio꞉, ha꞉salo꞉ doma꞉no꞉leyo꞉ ko꞉lo꞉ dimi kibo꞉bowo꞉, Gode eyo꞉ ha꞉salo꞉ doma꞉no꞉ ho꞉len nowo꞉ wa꞉kabiyo꞉ mo꞉dinali sa꞉mabe. 9 A꞉la꞉go꞉ko꞉lo꞉ nili ha꞉fo꞉lo꞉ doma꞉no꞉ ho꞉len nowo꞉ o꞉a꞉lab. Gode elo꞉ ho꞉len dom amilo꞉ ha꞉fo꞉lo꞉ dowo꞉ o꞉leauma꞉nigab. 10 Hibu 4.4Gode e nanogo꞉ dia꞉la꞉ga꞉lo꞉ ha꞉fo꞉ dowo꞉ o꞉leaumbo꞉, kaluka꞉isale abeyo꞉ Godeya꞉ ha꞉salo꞉ doma꞉no꞉ a꞉na ti ha꞉nalikiyo꞉, iyo꞉lo꞉ ini nanogo꞉ edakiyo꞉ ha꞉fo꞉ doma꞉ib. 11 A꞉la꞉fo꞉ko꞉lo꞉ Godeya꞉ ha꞉salo꞉ doma꞉no꞉ hen a꞉na tina꞉nikiyo꞉, mada halalelia꞉ga꞉ ti ha꞉na꞉niki. Mo꞉wo꞉ gio꞉ Isolael kaluka꞉isale ililo꞉ a꞉la꞉iyakilo꞉ mo꞉kudu ane o꞉leau kudu ha꞉na꞉lalega, gio꞉lo꞉ sulufo꞉ tina꞉ib.
12 A꞉fe 6.17,Kala 1.16, 19.13-15Godeya꞉ towo꞉ mela꞉no꞉ a꞉lab ko꞉lo꞉, nanogo꞉ halaido꞉ dimida꞉lab. To a꞉no꞉ helebesi a꞉la꞉ mio꞉ o꞉ngo꞉ dowo꞉ ko꞉lo꞉, helebesi mio꞉ a꞉no꞉ towa꞉yo꞉ tinio꞉. Helebesi a꞉ma꞉lo꞉ ki kagoman o꞉lia꞉ kima o꞉lia꞉lo꞉ alobanale o꞉leaumbo꞉, Godeya꞉ to a꞉ma꞉yo꞉ nili mama o꞉lia꞉ asulo꞉ o꞉lia꞉ma꞉ usa olalikiyo꞉ gedea꞉i tina꞉ga꞉ alobanala꞉sen. A꞉la꞉ta꞉ga꞉ nili asulo꞉ us amilo꞉ wo꞉no꞉le delen a꞉no꞉ aloba꞉da꞉sa꞉ga꞉ kalaba dia꞉ta꞉sen. 13 Kelego꞉ Gode elo꞉ dimido꞉ a꞉no꞉ ene siwa꞉l amio꞉ imilig nowo꞉ wo꞉no꞉lebo꞉ mo꞉doma꞉ib. Kelego꞉wo꞉ tambo Godeya꞉ siwa꞉l amio꞉ kalaba fagelia꞉ga꞉ dia꞉fo꞉lab. Nililo꞉ dimida꞉len a꞉no꞉ tambo emo꞉ sa꞉ma꞉no꞉ ko꞉lo꞉ eyo꞉ nio꞉ mo꞉walilima꞉ib.
Ya꞉su e nili bobalo꞉ so꞉mea꞉sen misa꞉ kalu alano꞉ e
14 Hibu 3.1,10.23Nili bobalo꞉ so꞉mea꞉sen misa꞉ kalu alandeyo꞉ a꞉lab. Godeya꞉ ene so꞉wa Ya꞉su, Hebenelo꞉ tinini ha꞉na꞉sa꞉ga꞉lo꞉ sabo꞉ e ko꞉lo꞉lab. A꞉la꞉fo꞉ko꞉lo꞉ to nililo꞉ tilidabu a꞉no꞉ halale ta꞉li siliki kagafo꞉ mela꞉niki. 15 Da꞉feyo꞉ ko꞉li ko꞉lilo꞉ o꞉gdo꞉ nilo꞉ amilo꞉ fa꞉la꞉dowab a꞉no꞉, elo꞉ amio꞉ tamina fa꞉la꞉dowo꞉. Ko꞉sega eyo꞉ mogago꞉ imilig nowo꞉ aundo꞉ mo꞉dimido꞉. Nio꞉ o꞉leo꞉ngo꞉ma, ko꞉sega nio꞉ halaido꞉lo꞉ma dowaki, hala ha꞉na꞉lab a꞉namio꞉, nili bobalo꞉ so꞉mea꞉sen misa꞉ kalu eyo꞉ nio꞉ asulufo꞉liki nofola꞉lab. 16 Hibu 10.19A꞉la꞉fo꞉ko꞉lo꞉ nio꞉ Godeyo꞉ mo꞉tagilaki, elo꞉wa ha꞉na꞉niki. Nio꞉ elo꞉wa fa꞉la꞉dowalikiyo꞉, eyo꞉ nio꞉ nofolakiyo꞉, ha꞉fo꞉ disa꞉ma꞉ib. A꞉la꞉ta꞉ga꞉ nio꞉ hida꞉yo꞉ diab amio꞉, eyo꞉ o꞉li asuwa꞉fa꞉ib ko꞉lo꞉, tagila꞉likiyo꞉ ha꞉na꞉so꞉bo.