18
Babilon amisa꞉no꞉ bidila꞉
1 A꞉ma꞉ fa꞉s amio꞉ ma꞉mul kalu nowo꞉ Hebene a꞉la꞉ta꞉ga꞉ tindabi ba꞉ba꞉. E halaido꞉wo꞉ alan di ko꞉lo꞉ ho꞉wo꞉ eya a꞉la꞉ta꞉ga꞉lo꞉ fa꞉la꞉dowab a꞉ma꞉yo꞉ henfelo꞉ we ho꞉lelia꞉ga꞉ difa꞉. 2 Ais 13.21, 34.11-14, Jer 50.39, Kala 14.8Eyo꞉ towo꞉ halale ho꞉le sa꞉lakiyo꞉ a꞉la꞉sio꞉,
“Babilon amisa꞉n alan a꞉no꞉ mada bidila꞉.
O꞉go꞉ amisa꞉n a꞉no꞉ hungo꞉ hen dowaki,
mama mogago꞉ ko꞉li ko꞉lilo꞉ a꞉ma꞉ dia꞉sa꞉ga꞉ sab.
A꞉la꞉ta꞉ga꞉ o꞉ba꞉ mogago꞉le ko꞉li ko꞉lilo꞉ a꞉no꞉lo꞉ a꞉na sab.
3 Babilon kaluka꞉isale man mogago꞉ ililo꞉ dimida꞉len a꞉no꞉,
henfelo꞉ kaluka꞉isale tambowa꞉yo꞉ sagala꞉liki, man a꞉no꞉ ko꞉lo꞉ kudu ha꞉na꞉len.
Henfelo꞉ amilo꞉ misa꞉ kalu dowo꞉ a꞉no꞉ tambowo꞉ ga we o꞉lia꞉ uwo꞉ dia꞉len.
A꞉la꞉ta꞉ga꞉ henfelo꞉ amilo꞉ kelego꞉ kililiakilo꞉ molelo꞉ dian kalu i a꞉ma꞉yo꞉, man mogago꞉ ko꞉li ko꞉lilo꞉ elo꞉ mo꞉sendelowakilo꞉ dimida꞉len a꞉namio꞉, moleyo꞉ modo꞉ ko꞉lo꞉ dia꞉len.” Ma꞉mul kalu eyo꞉ a꞉la꞉sio꞉.
4 Ais 48.20, Jer 50.8, 51.6,45, 2Kol 6.17A꞉la꞉ta꞉ga꞉ niyo꞉ Gode eyo꞉ Hebene halonamio꞉ to nowo꞉ sa꞉labi dabu.
“Kaluka꞉isale nilo꞉ gio꞉ amisa꞉n we ta꞉ta꞉ga꞉, handaloma!
Ililo꞉ mogago꞉ ko꞉li ko꞉lilo꞉ dimidan a꞉namio꞉ gio꞉lo꞉ diabena꞉ki mena.
Ililo꞉ falasilaki wa꞉ldo꞉ dimiab amio꞉ gio꞉lo꞉ diabena꞉ki mena.
5 Mo꞉mo꞉ 18.20-21, Jer 51.9Mo꞉wo꞉ ililo꞉ mogago꞉ dimido꞉ a꞉no꞉ dibida꞉i fa꞉la꞉nda꞉ga꞉, Hebeneyo꞉ golo꞉ ko꞉lo꞉lab.
Hala dimido꞉ ililo꞉ a꞉no꞉ Gode eyo꞉ tambo asulufo꞉lab.
6 Song 137.8, Jer 50.15,29, 2Tes 1.6Ilido꞉ nolbo꞉lo꞉ dimi o꞉leaumbo꞉, giliyo꞉lo꞉ imo꞉wo꞉lo꞉ ko꞉ngo꞉ dimia꞉bi.
Ililo꞉ dimido꞉ a꞉no꞉ wa꞉lo꞉ a꞉dimiakiyo꞉, ko꞉ngo꞉ nowo꞉ a꞉ba꞉la꞉sa꞉ga꞉ dimia꞉bi.
Ililo꞉ man mogago꞉ nolbo꞉lo꞉ dimida꞉len a꞉no꞉ aluna꞉ ho꞉n, go꞉fo꞉ amilo꞉ wasu o꞉leo꞉ngo꞉ ko꞉lo꞉, giliyo꞉ go꞉fo꞉ a꞉la꞉ nowo꞉ a꞉balita꞉ga꞉, imo꞉ maiya꞉ki a꞉ma꞉la꞉ dimia꞉bi.
7 Ais 47.7-9Ga a꞉ma꞉yo꞉ ene wiyo꞉ wabulu sa꞉laki, ene do꞉mo꞉wo꞉ sagale alifa꞉ ko꞉lo꞉, giliyo꞉ a꞉no꞉ aloba꞉da꞉sa꞉ga꞉yo꞉, emo꞉wo꞉ hida꞉yo꞉ o꞉lia꞉ nofolo o꞉lia꞉yo꞉ ko꞉ngo꞉ a꞉ma꞉la꞉ dimia꞉bi.
Enena꞉ma꞉la꞉yo꞉ o꞉lile a꞉la꞉asulaki, kailakiyo꞉ a꞉la꞉sio꞉,
‘Misa꞉ ga alano꞉ ne ko꞉lo꞉ ni bo꞉fo꞉liki so꞉l.
Ne ga sa꞉ba꞉lo꞉ o꞉ngo꞉ma ko꞉lo꞉, nofolan man a꞉no꞉ ne amio꞉ mada mo꞉doma꞉ib.’
8 Kala 17.16Ga a꞉ma꞉yo꞉ a꞉la꞉asulo꞉ ko꞉lo꞉, hida꞉yo꞉ alan ko꞉li ko꞉lilo꞉ we ho꞉len imilig no amio꞉ elo꞉wa fa꞉la꞉doma꞉ib.
Soma꞉no꞉ o꞉lia꞉ ya꞉lima꞉no꞉wo꞉lo꞉ a꞉la꞉ta꞉ga꞉ maiyo꞉ alano꞉lo꞉ elo꞉ amio꞉ fa꞉la꞉doma꞉ib.
Gode Alan galo꞉ mo꞉walilima꞉nigab a꞉no꞉ halaido꞉le a꞉lab ko꞉lo꞉, ga a꞉no꞉ deya꞉ tambo ma꞉ib.
9 Ese 26.17, 27.30-35“Henfelo꞉ amilo꞉ misa꞉ kalu iliyo꞉ ga we o꞉lia꞉ egele sagala꞉li silikiyo꞉, e o꞉lia꞉ uwo꞉ dia꞉len ko꞉lo꞉, iliyo꞉ e deya꞉ nakilo꞉ de ho꞉mo꞉n fa꞉la꞉dowab a꞉no꞉ ba꞉dakiyo꞉, ga a꞉no꞉ sowab a꞉laki, nofolakiyo꞉ ya꞉lima꞉ib. 10 Iliyo꞉ ga a꞉ma꞉lo꞉ nagalo꞉ diab a꞉no꞉ ba꞉da꞉sa꞉ga꞉ tagilakiyo꞉, iyo꞉ ko꞉na꞉ kagafo꞉liki, sa ya꞉lakiyo꞉ a꞉la꞉sa꞉ma꞉ib,
“ ‘Wai! Wai, amisa꞉n alan.
Ai Babilon, ge amisa꞉n halaido꞉ wilo꞉ elen ko꞉sega
o꞉go꞉ ge ofa꞉si imiliga bidila꞉.’ Iliyo꞉ a꞉la꞉sa꞉la꞉liki sa ya꞉lima꞉ib.
11 Ese 27.36“Henfelo꞉ amilo꞉ kelego꞉ kililiakilo꞉ molelo꞉ dian kalu i a꞉ma꞉yo꞉, amisa꞉n a꞉no꞉ kelego꞉ ko꞉li ko꞉lilo꞉ wa꞉kabiyo꞉ mo꞉kililia꞉nigabo꞉lo꞉b a꞉la꞉asulaki, sa ya꞉lima꞉ib. 12 Ese 27.12-13,22Amisa꞉n a꞉namilo꞉ ililo꞉ kelego꞉ kililia꞉leno꞉ we. Go꞉l, silba, u nafayo꞉, helebeso꞉g momado꞉ nafa ko꞉li ko꞉lilo꞉, nowo꞉ genelo꞉, nowo꞉ ho꞉mo꞉solo꞉, nowo꞉ taiyo꞉ abeyo꞉ a꞉no꞉, a꞉la꞉ta꞉ga꞉ i mundo꞉ nafayo꞉ o꞉lia꞉, kelego꞉ ko꞉li ko꞉lilo꞉ no alana꞉ bes a꞉namio꞉lo꞉ dimido꞉ o꞉lia꞉, i ko꞉li ko꞉lilo꞉lo꞉, go꞉fo꞉ ki ko꞉li ko꞉lilo꞉lo꞉, u nafa amilo꞉ kelego꞉ ko꞉li ko꞉lilo꞉ a꞉no꞉ dimida꞉sa꞉ga꞉ kililia꞉len. 13 A꞉la꞉ta꞉ga꞉ kelego꞉ nolo꞉lo꞉ kililia꞉leno꞉ we. Nudo꞉ nafa kelego꞉ o꞉lia꞉, mun nafalo꞉ dowan kelego꞉ o꞉lia꞉, wain ho꞉no꞉lo꞉, o꞉lif ho꞉no꞉lo꞉, wa ho꞉no꞉lo꞉, da꞉si witdo꞉lo꞉, kaowo꞉lo꞉, sibiyo꞉lo꞉, ho꞉so꞉lo꞉, ho꞉s i fofodo꞉lo꞉ dia꞉ha꞉nano꞉lo꞉, madali nanogdo꞉ dian kaluka꞉isaleyo꞉lo꞉, kelego꞉ a꞉no꞉ tambo amisa꞉n a꞉namio꞉ wa꞉kabiyo꞉ mo꞉kililia꞉ mela꞉no꞉.
14 “Kalu nolba꞉yo꞉ imo꞉wo꞉ a꞉la꞉sa꞉ma꞉ib, ‘Kelego꞉ gililo꞉ meselakilo꞉ dia꞉len a꞉no꞉ kelege dowo꞉ ko꞉lo꞉lab. Mole alan gilo꞉ delen o꞉lia꞉, nafa kelego꞉ delen a꞉no꞉lia꞉yo꞉ kelege dowo꞉ ko꞉lo꞉, wa꞉kabiyo꞉ mo꞉dia꞉ib.’ 15 Ese 27.31,36Babilon amisa꞉n a꞉namilo꞉ kelego꞉ kililiakilo꞉ mole alando꞉ dia꞉len kalu i a꞉ma꞉yo꞉, ga a꞉no꞉ nagalo꞉ diab a꞉no꞉ ba꞉da꞉ga꞉ tagilakiyo꞉, ko꞉na꞉ kagafo꞉liki, sa ya꞉lima꞉ib. 16 Kala 17.4A꞉na sa ya꞉fodakiyo꞉ a꞉la꞉sa꞉ma꞉ib,
“ ‘Wai! Wai, amisa꞉n alano꞉.
Gio꞉ momadakiyo꞉, helebeso꞉g nafale ho꞉mo꞉solo꞉ o꞉lia꞉ genelo꞉ o꞉lia꞉ sa꞉ga꞉la꞉len.
A꞉la꞉ta꞉ga꞉ go꞉l o꞉lia꞉ u nafale o꞉lia꞉ biki o꞉lia꞉ma꞉ momada꞉len.
17 Ais 23.14, Ese 27.27-29Ko꞉sega ofa꞉si imilig a꞉naka, mole alan wilo꞉ di a꞉no꞉ bidi alilaki, kelege dowo꞉.’
“A꞉la꞉ta꞉ga꞉ ho꞉n ko꞉sulo꞉ biso꞉ kaluwo꞉lo꞉, mageso꞉ kaluka꞉isale ko꞉su amilo꞉ ha꞉na꞉sen a꞉no꞉lo꞉, ho꞉n ko꞉su amilo꞉ nanogdo꞉ dia꞉sen kaluwo꞉lo꞉, so꞉lu ho꞉n amilo꞉ mole nanogdo꞉ dian a꞉no꞉lo꞉ tambo, ko꞉na꞉ kagafo꞉lena ba꞉ba꞉ib. 18 Ese 27.32I a꞉ma꞉yo꞉ ga a꞉no꞉ deya꞉ nakilo꞉ de ho꞉mo꞉n fa꞉la꞉dowab a꞉no꞉ ba꞉da꞉ga꞉yo꞉, a꞉la꞉sa꞉ma꞉ib ‘Amisa꞉n alan wema꞉yo꞉, amisa꞉n nolo꞉ e mada tinio꞉ ko꞉lo꞉ elen.’ 19 Iliyo꞉ mada nofolakiyo꞉, hena꞉mu ko꞉lo꞉ inin misa꞉ wa꞉la fugala꞉sa꞉ga꞉, ya꞉lakiyo꞉ a꞉la꞉sa꞉ma꞉ib,
“ ‘Wai! Wai, amisa꞉n alan.
Amisa꞉n wema꞉yo꞉ moleyo꞉ alan dowakiyo꞉, ho꞉n ko꞉su so꞉lu ho꞉n amilo꞉ sia꞉lowan o꞉lo꞉ biso꞉ i a꞉ma꞉yo꞉lo꞉ moleyo꞉ alan dima꞉ki ta꞉fo꞉.
Ofa꞉si imilig a꞉naka, amisa꞉n alan a꞉no꞉ bidi ane.
20 Lo 32.43, Ais 44.23, Jer 51.48Hebenelo꞉ sab gio꞉ mada sagalema.
Dinali sa꞉lan kaluwo꞉lo꞉, iliga꞉felo꞉ kaluwo꞉lo꞉, tilidabu kaluka꞉isale gio꞉lo꞉ mada sagalema.
Mo꞉wo꞉ Gode alan a꞉ma꞉yo꞉ ga a꞉no꞉ mo꞉walila꞉sa꞉ga꞉, ga a꞉ma꞉lo꞉ man gimo꞉lo꞉ dimida꞉len aumbo꞉ wa꞉de alifa꞉.’ ”
21 Jer 51.63-64, Ese 26.21A꞉la꞉ta꞉ga꞉ ma꞉mul kalu halaido꞉ noma꞉yo꞉ u gumisio꞉ alan badio꞉ a꞉no꞉ dia꞉sa꞉ga꞉, so꞉lu ho꞉na to꞉lolakiyo꞉ a꞉la꞉sio꞉,
“U ko꞉lo꞉ ho꞉n amilo꞉ sanditab o꞉leaumbo꞉, Babilon amisa꞉n alan a꞉no꞉ mada halaido꞉ bidila꞉ma꞉ib ko꞉lo꞉,
kaluka꞉isaleyo꞉ wa꞉kabiyo꞉ mo꞉ba꞉ba꞉ib.
22 Ais 24.8, Ese 26.13Babilon gilo꞉ gida sa꞉ndan o꞉lia꞉, gisalo꞉ mo꞉lan o꞉lia꞉, uluna folan o꞉lia꞉, olo bulu folan o꞉lia꞉yo꞉,
geya a꞉la꞉ta꞉ga꞉yo꞉ wa꞉kabiyo꞉ mo꞉fa꞉la꞉doma꞉ib.
Nanog dian kaluwo꞉ amisa꞉n gilo꞉ amio꞉ nanogo꞉ wa꞉kabiyo꞉ mo꞉dimidama꞉ib.
Ma꞉n beseab amilo꞉ go꞉ a꞉lan o꞉leaumbo꞉, ge amio꞉ mo꞉fa꞉la꞉dowa꞉mela꞉ib.
23 Jer 7.34, 16.9, 25.10Nafa gelo꞉ amilo꞉ do꞉itan a꞉no꞉ wa꞉kabiyo꞉ mo꞉do꞉ifa꞉ib.
Ga tili alitakilo꞉ sagalo꞉ to sa꞉lan a꞉no꞉ ge amio꞉ mo꞉fa꞉la꞉doma꞉ib.
Tamin amio꞉, go꞉no꞉n kelego꞉ kililiakilo꞉ molelo꞉ dian kalu iyo꞉ kalu alan wilo꞉ di dowa꞉sen.
A꞉la꞉ta꞉ga꞉ fofa gilo꞉ dimido꞉ a꞉ma꞉yo꞉, henfelo꞉ kaluka꞉isaleyo꞉ hala togbala tililia꞉gane.
24 Jer 51.49, Kala 17.6Giyo꞉ Godeya꞉ dinali sa꞉lan kalu o꞉lia꞉ e amilo꞉ tilidabu kaluka꞉isale o꞉lia꞉ henfelo꞉ kaluka꞉isale nolo꞉lo꞉ sana sowo꞉ ko꞉lo꞉,
Gode eyo꞉ ili ho꞉bo꞉wo꞉ gi amisa꞉n a꞉na tulo꞉ elena ba꞉ba꞉ ko꞉lo꞉ ge a꞉na wa꞉dema꞉ib.”
18:2: Ais 13.21, 34.11-14, Jer 50.39, Kala 14.8
18:4: Ais 48.20, Jer 50.8, 51.6,45, 2Kol 6.17
18:5: Mo꞉mo꞉ 18.20-21, Jer 51.9
18:6: Song 137.8, Jer 50.15,29, 2Tes 1.6
18:7: Ais 47.7-9
18:9: Ese 26.17, 27.30-35
18:11: Ese 27.36
18:12: Ese 27.12-13,22
18:15: Ese 27.31,36
18:17: Ais 23.14, Ese 27.27-29
18:18: Ese 27.32
18:20: Lo 32.43, Ais 44.23, Jer 51.48
18:21: Jer 51.63-64, Ese 26.21
18:22: Ais 24.8, Ese 26.13
18:23: Jer 7.34, 16.9, 25.10