1 Amo esoga uda fesuale da dunu afadafa gagulaligili, ema amane sia:mu, “Ninisu da ninia ha:i manu amola ninia abula lamu. Be ninia da gawa hame fiba:le, gogosiasa:besa:le, di ninia gawa esaloma.”

2 Amo esoga, Hina Gode Ea Amoda da ida:iwane amola hadigiwane ba:mu. Amola Isala:ili dunu hame bogole esalea da soge ea ha:i manu gami amo hahawane bagade ba:mu. 3 Dunu huluane amo Gode da mae bogoma:ne ilegei, Yelusaleme amo ganodini esala, ilia da hadigiwane hamoi dagoi ba:mu. 4 Hina Gode da Ea gasa amoga Isala:ili dunu fi ilima fofada:nanu, ilia wadela:i hou dodofemu amola Yelusaleme fi ilia gogosia:i fadegale, maga:me huluane amo moilai bai bagade ganodini asi, amo huluane dodofemu. 5 *Gadili Asi 13:21; 24:16Amasea, Hina Gode da Saione Goumi amola dunu da amogawi gilisi, amo dedeboma:ne esomogoa mu mobi hahamomu amola gasia lalu mobi amola lalu sawa: hadigi bagade ba:mu. Gode Ea Hadigi da moilai bai bagadega dedebosu gaga:su liligi agoane ba:mu. 6 Hina Gode Ea hadigi da esosea gia:i amoga ougi noga:iwane hahamomu. Moilai bai bagade da gaga:i dagoi ba:mu, amola gibu amola isu amoga gagili sali dagoi ba:mu.