62
Gode Ea Gaga:su Amoga Ga:nasili Aligisu
1 Na da Gode Ea na gaga:ma:ne gebewane ouesala.
Na da Ea fawane hamoma:ne ouesala.
2 Ea fawane da na gaga:sa.
E da na Gaga:sudafa.
Amaiba:le na da enoga hamedafa hasali dagoi ba:mu.
3 Nama ha lai huluane, dilia!
Na gasa da gagoi gadelale sa:i, amo defele gala.
Amaiba:le, habowali seda dilia da nama doagala:ma:bela:?
4 Dilia da udigili fawane amo nama,
na nodosu sogea amogainini gudu sa:ima:ne hamosa
amola dilia da ogogole nodosu hamosa.
Dilia da nama nodoma:ne sia: sia:sa,
be dilia dogo ganodini da nama gagabusa.
5 Na da Godema fawane fa:no bobogesa.
Na dafawane hamoma:beyale dawa:su da Ema fawane gala.
6 Gode Hisu fawane da na Gaga:sudafa gala.
Amaiba:le na da enoga hamedafa hasali dagoi ba:mu.
7 Gode Hi fawane da hamonanebeba:le, na da gaga:i dagoi,
amola eno dunu da nama nodone dawa:sa.
E da na Gaga:su gasa bagadedafa gala. E da na ougihalesisu gala.
8 Na dunu! Eso huluane Godema dafawaneyale dawa:ma!
Dilia bidi hamosu huluane Ema adoma!
Bai E da ninia wamoaligisu sogebi gala.
9 Osobo bagade dunu huluane da mifo afae fulabolesibi agoai gala.
Dunu bagade amola fonobahadi huluane,
da defele hamedei amola wadela:i gala.
Ilia da dioi defesu da:iya ligisili ba:sea, dioi defesu da heda:i hamedafa ba:sa,
ilia da mifo fulaboi afae ea hagi defele hagi gala.
10 Dilia dafawaneyale dawa:su amoga gasa fili,
eno dunu banenesimusa: mae dawa:ma.
Liligi wamolale bagade gagumusa: mae dawa:ma.
Amola dilia liligi gagui da bagade heda:sea,
amoma bagade mae fa:no bobogema.
11-12 *Yoube 34:11; Yelemaia 17:10; Ma:diu 16:27; Louma 2:6; Wamolegei Sia: Olelesu 2:23Na da Gode Ea agoane sia:be enoenoia nabi.
“Gasa bagade hou da Na: fawane,
amola mae fisili asigidafa hou da Na: fawane.”
Hina Gode! Di Disu fawane, dunu ilia hou hamobe defele, ilima bidi iaha!