2
Sunbin-Got em Angin Kebiliw em Sang te.
1 Nakunum kumel kunum waneng yutaka! Kasike kame, yu alik alik
mali ilo wa keyemomin ibolow kukuw e,
dasuw bokolew bokolew kukuw e,
fimdi famde kukuw e,
weng anyam kemin kukuw e,
on kelomi, ibolow mesem kelew kelew kemin kukuw e,
ibik weng bokolew bokolew kukuw e,
kukuw alik alik be kuluko, ibik elo kolew kemoliwka!*Efesus 4:22; Sekow 1:21 2 Yu aul beliw im auk kumel im non wanomin ibolow donong danong kekabiliw atew kesomi, Sunbin-Got em yom finik elo kitil duyemkabe abiil tikin em weng ken ati beem wanin tew atew donong donong kebomi, fasuko, kitil keko, fian bamda makso makso kebomi, finik so sunsun bin em deiw kel kilele kakamoliwka! 3 Nimtew angom? Yu Sunbin-Got em kukuw ken ati be kilele kiskiseko, fein atemsiliw kasike.*Sim Fut 34:8
4 Kaneko kasike, yu Kulais em mit elo telemoliwka! E finik so am kun kitil nam ilkul atew*2:4 Sim Fut 118:22 Fakam weng kale Gilik im weng sin so, Kibulu em weng sin so, kawtiw i tum kuluko, am gebiliw em sang bokoko, fut tem bosiliw kale. kate, kal so kun so am gemin kawtiw i “Em aluwbamin banim! Sako!”, angomi, elo kulu fomdosiliw te. Kate, Sunbin-Got e am kun be sua sua kel akate galmoko, “Be atite kitil nam am kun te!”, dangse te. 5 Dangse kasike, e yukati finik so am kun atew keyemeko, fein ibolow kunum waneng yulo akalem am ayem beem am kun galmoko, koyemeko, akalem am ayem gekabe te. Kate, yu kilele ibolow fukunina! Am ayem be kawtiw i teing so gelinba kekabiliw te. Feinka! E yulo akalem wiin so amkoko, akalem kunum ayem keyemse kasike, yukalem ken kiol kuw kukuw be Yesus Kulais em kanese beem mongom ete Sunbin-Got em kiin dim e aik ayem dim em kamge eisneng emdiw kekabe te.*Efesus 2:21-22; Fitew Dase 1:6 6 Yesus Kulais em kanese beem dulum elote Sunbin-Got em fut ayem tem e fakam weng kale bokolomele:
“Ne tum mak nakalem wiin so amkoko, Saion†2:6 Selusalem abiw mutuk fian em wiin mak e ‘Saion’ te. abiw mutuk fian ka kel mo kolewsomelii,
beem wiin so aluwbamin e tum kitil nam, atite emdiw keloki te.
Kelii, nimin kunum waneng ite mak finik so tum beem mit mewso uneko, elo “Fein!”, dangiw tewe,
i ikalem “Fein!”, dangbiliw ibolow beem dulum elote ibolow daking anginba kelokoliw te.”,
angse kale.*Aisaya 28:16; Efesus 2:20 7 Kasike, Kulais elo “Fein!”, dangbiliw kunum waneng yom kiin dim e tum be ken ati keko, wiin so aluwbamin ken so tum ete te. Kate, mali “Fein!”, danginba kebiliw kawtiw im kiin dim e,
“Tum be ‘Em aluwbamin banim! Sako!’, angeko, elo sak kulu fomdo kolewsiliw te.
Kate, Sunbin-Got e tum be kuluko, ‘Emisik aluwbamin fian mak kelewbi te!’, angse kasike.”,
angesomelei,*Sim Fut 118:22 8 iti bokolomele:
“Tum be im unomin deiw be deiwkim dim kulfili belei,
i elo kilele ateminba keleweko, unbomi, beem dim kel yan go keleweko, mit kuminkabiliw te.”,
angse kale. Feinka! I Sunbin-Got em weng elo sakalaw keko, weng bo bo kelewkabiliw kasike, i tum beem dim e yan go keleweko, fom mitsiliw te. Sunbin-Got akalem ibolow fukunin gelewkabe kasike, kaneko eisneng kawtiw biim dulum kaneyemkabe te.*Aisaya 8:14-15
9 Kate, yukalem dulum elote yu weng kale kilele kililina! Yukalem mililiw mutuk kel kakameliw ding dim bakate, yulo gaayemeko, ailbin dim kakameliw kunum waneng keyemse Sunbin-Got be yulo
akalem wiin so amkoko, koyemse kunum waneng keyemsomi,
wiin so kamokim kunum ayem keyemsomi,
akalem bat kang kunum waneng keyemsomi,
yulo akalem angin kunum waneng keyemse
kasike kame, “Yu uneko, nem auk so kitil so eisneng kaleyemsi be mali kawtiw ilo ikati makso boko yak boko yak de unemoliwka!”, yangakabe te.*Sawa Weng 7:6; 14:2; Aisaya 9:2; Kalan Kunum 26:18; Efesus 5:8; Taitus 2:14
10 Sua e, yu sak wiin banim kawtiw keko, alenaliw te. Kate kame, Sunbin-Got e yulo akalem wiin so amko koyemse kunum waneng keyemse te.
Sua e, Sunbin-Got e yulo kinkin ibolow kukuw kukuyeminba kese kate kame, e yulo kinkin keyemeko, ibolow folok keyemse te.*Osea 2:23
11 Nakunum kumel kunum waneng yu nem kitil weng kale kiliko, gelewomoliwka! Kawin dim kaleem kakabiliw ding kabalak e, yu kakin kokow kawtiw kebiliw kasike, yu kanelom yukalem kal dim em “Kanelina! Kanelina!”, yangakabe ibolow fukunin be gelewemokoliw te! Yu kilele ibolow fukunina! Yom kaneko ibolow fukunin wa be yom ken ibolow fukunin beelo alomin ibolow kesomi, eso gankabe kasike.*Galesia 5:17,24 12 Yu kawin dim kaleem kasel biim kiin dim e kilele wangweng keko, kutesomi, kakamoliwka! Yu im yulo weng miyembiliw be yan weng mak keyeminba kesomi, kilele kiol kuw kekakamiw tewe, ikati yom kaneliw kukuw be atemeko, Kulais em kawtiw ilo geeyemoke ding kabalak e, i Sunbin-Got em wiin fian daolew kemokoliw te.*Matyu 5:16
Kak Yetebin Kawtiw im Afak Kakamin em Weng te.
13 Yu Kamok Fian em ibolow fukunin kuw gelewbiliw kasike, kawin dim kaleem kamok kebiliw kawtiw alik alik im afak kuw keko, boliwka! Kawin dim kaleem mesesem eisneng alik alik beelo atebe emisik kamok fian so,*Taitus 3:1 14 akalem aneng aneng angom beem am dim “Ilo yetemina!”, yangse kamok iso, alik alik kamok biim weng afak keko, kakamoliwka! Nimtew angom? E aneng aneng yetebiliw kawtiw biilo aluwbamin fian mak duyemse kasike, i kukuw wa kebiliw kawtiw ilo yan wa dukayemsomi, kawtiw ken kukuw kebiliw kawtiw biim wiin e daoyemkabiliw kasike. 15 Nimtew angom? Yu Sunbin-Got em ibolow fukunin gelewbomi, ken kukuw kuw keko, kilel kamok im afak kakabiliw kunum waneng keliw tewe, mali teifuluko, ibolow kou angebiliw kawtiw i yom kanebiliw kukuw be atemeko, weng gel mak nam bokoyemiw kasike.*1 Fita 3:16 16 Nakunum kumel kunum waneng yutaka! Kulais em kanese beem mongom ete yu sawa weng beem afak binba kunum waneng kebiliw kate, yu kanelom beem dulum elote dasuw weng bokoko, “Nu kame ki keko, nukalem ibolow kuw geleweko, wa kukuw akal kemuma!”, angbokoliw te! Babo! Kate yu Sunbin-Got em weng afak kuw kakamoliwka! 17 Kakabomeliwi, yu alik alik kawtiw ilo wangweng keyemboliwka! Yu fein ibolow so kawkunum kumel kunum waneng ilo ibolow mutuk fian dukayembomi, Sunbin-Got em awan finganbomi, kawin dim kaleem emisik kamok fian bakati wangweng kelewboliwka!*Ulom 12:10
Yemtolo Unakabe Kunum Kulais em Sang te.
18 Mali kawtiw im weng afak biliw sak kunum waneng yutaka! Yukalem ken falit yetebiliw kak kunum ikal, bingbung kekabiliw kak kunum ikal, kak yetebiliw kawtiw alik alik makuw im afak keko, ilo wangweng keyemboliwka!*Efesus 6:5 19 Nimtew angom? Yu Sunbin-Got em ibolow fukunin beem dulum elote “Nu im afak kebomi, kakamuma!”, angsomi, mali kawtiw im yulo sak betbet dukayembiliw ilum be sak daokemiw tewe, Sunbin-Got e yom kanebiliw kukuw be atemeko, kalfong keyemkabe kasike. 20 Kate, i yulo yukalem wa kukuw kebiliw beem dulum elote geeyemeko, betbet yan wa mak dukayembiw tewe, kaneko be yukalem sen beem yan kasike, beem dulum elote yu yan ken mak nam kuliw te. Kate, yu ken kukuw kuw kesomi, Sunbin-Got em kiin dim e sen so banim kesomi, mali im yulo betbet duyembiliw betbet be sak daoliw tewe, Sunbin-Got e yulo yetemeko, yom wiin daoyemko, “Ken kawtiw yute te!”, yangoke te.*1 Fita 3:14,17 21 Feinka! Sak betbet kuluko, daolewomin beem mongom ete Sunbin-Got e yulo akalem wiin so amkoko, koyemse te. Yu ibolow fukunina! Kulais e nukalem yemtolo unemakabe kunum kekabe te. Kasike kame, akalem num dulum elote sak betbet kuluse emdiw yukati mali ilo dokoyemomin beem mongom ete sak betbet kuluko, em emisik unse em deiw bakate yukati gelewko, kakamoliwka!*Matyu 16:24; Sion 13:15 22 Yu em kanese kukuw be diw atemoliwka!
Kulais ete kuw fimdi famde weng mak kebomi,
sili sili kukuw gel mak kelinba kese te.*Aisaya 53:9
23 Feinka! I elo weng milewsiliw kate, e ilo weng yan weng mak bokoyeminba kese te. Kesomelei, i elo betbet dulewsiliw kate, e ilo “Yom kaneliw beem betbet yan akati kulina!”, yanginba kese te. Kesomelei, e bokolomele: “Nakalem ete kawtiw biilo diwyemeko, kilele geeyemkabe Sunbin-Got akalem teing dim elo dali te!”, yangse te.*Aisaya 53:7; 1 Fita 3:9 24 Kulais e nukalem sili sili kukuw beem ilum e akalem kal dim kel daoko, ais dim kuanomelei, nulo sok so emdiw net koyemse sili sili alik alik be silel kelewse kasike kame, nu ki keko, kiol kuw kukuw em deiw elo kakabuluw bakate. Feinka! Aliwi, em betbet kuluse beem mongom ete e yulo kilelyemeko, ken keyemse bakate.*Aisaya 53:5-6; Ulom 6:11
25 Nakunum kumel kunum waneng yutaka! Sua kel akate, yu sak teifuluko, kakamelaliw siwsiw imdiw ke alenaliw kate kame, yu famdes teleko, yukalem ibolow elo kilele yetemeko, siwsiw yetebin kunum emdiw yulo kutebe kunum beem mit mewso talsiliw te.*Esekiel 34:5-6; Matyu 9:36; Sion 10:14; Kibulu 13:20-21
*2:3: Sim Fut 34:8
*2:4: 2:4 Sim Fut 118:22 Fakam weng kale Gilik im weng sin so, Kibulu em weng sin so, kawtiw i tum kuluko, am gebiliw em sang bokoko, fut tem bosiliw kale.
*2:5: Efesus 2:21-22; Fitew Dase 1:6
†2:6: 2:6 Selusalem abiw mutuk fian em wiin mak e ‘Saion’ te.
*2:6: Aisaya 28:16; Efesus 2:20
*2:7: Sim Fut 118:22
*2:8: Aisaya 8:14-15
*2:9: Sawa Weng 7:6; 14:2; Aisaya 9:2; Kalan Kunum 26:18; Efesus 5:8; Taitus 2:14
*2:10: Osea 2:23
*2:21: Matyu 16:24; Sion 13:15
*2:22: Aisaya 53:9
*2:23: Aisaya 53:7; 1 Fita 3:9
*2:24: Aisaya 53:5-6; Ulom 6:11
*2:25: Esekiel 34:5-6; Matyu 9:36; Sion 10:14; Kibulu 13:20-21