Wokmobe em
Kaim Fitew Dim Dase
em Weng te.
1
Sunbin-Got e mewso kaneloke eisneng be Yesus Kulais elo kalelewei, esik akalem dabalakamin finik mak dabalalei, e teleko, em weng afak kekabi kunum Sion nelo bokonemomele: “Nem kalekembi eisneng kale mali Kulais em aluwbamin kunum waneng ilo bokoyema!”, nangeko, kaneloke eisneng kale kalenemse te.* Fitew Dase 22:6 Kalenemei, nesik Sunbin-Got em weng so, Yesus Kulais em kukunemei, ne atemsi eisneng beso, alik alik angom be yulo kilele bokoyemeko, kaim dim dali te.
Kame fefe ding mewso kele angomi, nimin kunum waneng ite mak Sunbin-Got akalem bontem dim bakamin kunum mak nem bosi weng kale kuluko, mali kawtiw ilo bakayembiw tewe, i kalfongeko, kakatemoliwka! Kebiliwi, mali kunum waneng biim weng kilisomi, gelewbiliw kunum waneng bikati kalfong keko, kakatemoliwka!* Fitew Dase 22:7,10
Sion e Fut kale Boko, Ben kel Abiw Dim biim Sios ilo Dabalayemse em Weng te.
4-5 Sion ne fut kale boko, ben kel sios kunum waneng aneng fian Esia biliw yulo dabalayemi te.
Suaem bise so, kame be so, sow ete em boke so Sunbin-Got akal, ben kel finik Sunbin-Got em teinkemin abin ayem dim mobiliw ikal, Yesus Kulais akal, alik alik bi yulo ibolow folok so, menew ibolow so duyemboliwka! Feinka! Yesus Kulais be Sunbin-Got em weng kilele kiliko, nulo kukuyemsomi, emisik keko, fomkamin dim dawkalfolse kunum kebomi, kawin dim kaleem aneng aneng angom beem kamok fian kebe te. E nulo ibolow mutuk fian duyemsomi, akalem kaim so num sili sili kukuw beem yan weneko,* Aneng Kolew 3:14-15; Sim Fut 89:27; Kolosi 1:18; Fitew Dase 3:1; 4:5 nulo akalem gawman dim bin kunum waneng keyemeko, nulo kunum waneng ayem keyemsomi, “Nakalem Aatim Sunbin-Got em wiin fian daolewbin kunum waneng kebina!”, yangakabe te. Kitil so auk so, mesesem mesesem angom alik alik be diwkuw diwkuw akalem dulum elote kuw alakabe te! Feinka!* 1 Fita 2:9; Fitew Dase 5:10; 20:6
Yu atebamoliwka! Em yukam tem toloke ding dim e, alik alik i elo kiin so atemokoliw te.
Elo kanat salewsiliw kawtiw ikati elo atemokoliw te.
Kawtiw kawin fe abiil fe biliw angom bi alik alik elo atemeko, ikalem teing gin-gin feiweko, amneng falulokoliw te.
Be fein kaneloke te. Feinka.* Daniel 7:13; Sekalaya 12:10; Matyu 24:30; Sion 19:34-37; 1 Tesalonaika 4:17
Suaem bise so, kame be so, sow ete em boke so Sunbin-Got kitil so auk so beem sen kayak e bokolomele: “Ne sua kel akal alenali te. Bi fefe akal boki te.”* 1:8 Gilik im weng sin e kale kel “Sunbin-Got ne Alfa so Omega so nete kuw te.” angakabe te. Nimtew angom? Gilik im weng sin e Alfa e emisik weng kelei, Omega e fefe weng ete kale., angbe te.* Fitew Dase 21:6; 22:13
Sion e Kulais elo Atemse em Sang te.
Sion nakal yomdiw Yesus Kulais elo “Fein!”, dangii, eso nuso alik nu makuw bongguko, fewtokoko, beem dulum elote betbet kulusomi, em dokoyemoke ding fenbuluw kunum waneng nute te. Feinka! Ne mali kawtiw ilo Sunbin-Got em weng so, Yesus em sang so bakayembisi te. Bakayembi beem mongom ete, i nelo okgung Fatmos kel sok am tem da konemiwi, ne kale kel bi te. 10 Ka kel bilii, Kamok Fian em Ben ding 1:10 Suda kawtiw i Talfut Kelewse fut beem sang geleweko, ben kel ben kel ding teing bokoko, beem fefe ding Sabat finengdakamin ding dangakabiliw te. Kate, nukalem “Sande” angakabuluw Ben ding bakati ikalem ben kel ding ben kel ding beem emisik ding kekabe te. kele ding ete, Sunbin-Finik em kitil e nem ibolow tem telei, nem ibik dim elote fongket weng mak emdiw keko, kitil kuw gaaneko, bokonemomele: 11 “Alik alik kom atebelew eisneng be ku fongate akate fut boko, aneng abiw mutuk fian ben kel biliw sios kunum waneng biilo dabalayemolewka! Abiw mutuk fian biim wiin e kanekote:
Mak e Efesus e,
mak e Semena e,
mak e Fegamum e,
mak e Tayataila e,
mak e Sadis e,
mak e Filadelfia e,
fefe e Alaodisia ete te.”,
nangse te. 12 Nangesomelei, ne nangse weng beem dulum elote famdes angeko, atemom ete: Ben kel ilam ailbin gol sen so kaisiliw mak ibik belei, ne atemsi te. 13 Atemeko, beem mutuk dim kel mak kunum mak Kawtiw Aul emdiw belei, ne atemsi te. Em ilim minggibe be tiakim kuw minggiko, gol tanggal mak em gin-gin dim falal kelewko, minggibelei, ne atemsi te.* Daniel 7:13; 10:5 14 Atemsomelii, em kak so, kak kon so, makuw neme kalim kais nam so yukam kais nam so atew keko, em kiin e ais dong atew kesomi,* Esekiel 43:2; Daniel 7:9; 10:6; Fitew Dase 2:18; 14:2; 19:12 15 em yan tom e ais abuliw balas anggolko, mian fong emdiw filik falak bamneng so kebelei, em weng e kiman gilin atew kesomi, 16 em yuk teing kel e ben kel fial aluwbomelei, em bontem dim e biol atul nam fitelu matem telesomelei, em kiinguen e ataan atul mamin nam emdiw ailsomi, belei, ne atemsi te.* Kibulu 4:12; Fitew Dase 2:12; 19:15
17 Kanele eisneng be atemomelii, ne kiin felfel keko, akalem yan mit fom mitsi te. Mitselii, e akalem yuk teing deeko, nem dim dukuko, bokonemomele: “Ku kanelom fingenokolew te! Ne sua sua akal, sow em fefe akal,* Aisaya 44:6; 48:12; Fitew Dase 2:8; 22:13 18 diwkuw diwkuw finik so alakabi kunum nete te. Ne fein kuansi kate kame, ku nelo netemewete: Ne iti kuaninba keko, finik so sunsun kuw boki te. Ne kuankemin em abisom em buskamin so, kuansiliw kawtiw im alakabiliw dim em abisom buskamin so, aluwkabi kunum nete kuw te. 19 Keko kasike, ku fongate akate atemsomi, suaem kese eisneng so, kame kanebe eisneng so, sow em keloke eisneng so, alik alik makuw fut tem bololewka! 20 Ku kilila! Ben kel fial aluwbi be so, ben kel ilam ailbin gol sen so, ibolow win sang alew biim kiskiw em mongom e kanekote:
Ben kel fial be ben kel sios kunum waneng biim kalan kunum 1:20 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. biim kiskiw ite te.
Ben kel ilam ailbin gol sen be ben kel sios kunum waneng im kiskiw ite te.

*1:1: Fitew Dase 22:6

*1:3: Fitew Dase 22:7,10

*1:4-5: Aneng Kolew 3:14-15; Sim Fut 89:27; Kolosi 1:18; Fitew Dase 3:1; 4:5

*1:6: 1 Fita 2:9; Fitew Dase 5:10; 20:6

*1:7: Daniel 7:13; Sekalaya 12:10; Matyu 24:30; Sion 19:34-37; 1 Tesalonaika 4:17

*1:8: 1:8 Gilik im weng sin e kale kel “Sunbin-Got ne Alfa so Omega so nete kuw te.” angakabe te. Nimtew angom? Gilik im weng sin e Alfa e emisik weng kelei, Omega e fefe weng ete kale.

*1:8: Fitew Dase 21:6; 22:13

1:10: 1:10 Suda kawtiw i Talfut Kelewse fut beem sang geleweko, ben kel ben kel ding teing bokoko, beem fefe ding Sabat finengdakamin ding dangakabiliw te. Kate, nukalem “Sande” angakabuluw Ben ding bakati ikalem ben kel ding ben kel ding beem emisik ding kekabe te.

*1:13: Daniel 7:13; 10:5

*1:14: Esekiel 43:2; Daniel 7:9; 10:6; Fitew Dase 2:18; 14:2; 19:12

*1:16: Kibulu 4:12; Fitew Dase 2:12; 19:15

*1:17: Aisaya 44:6; 48:12; Fitew Dase 2:8; 22:13

1:20: 1:20 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.