3
Sadis Abiw Mutuk Fian Ilo Fut Dabalayemse em Weng te.
1 Sadis abiw mutuk fian em sios kunum waneng biim kalan kunum*3:1 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Ben kel fial so, Sunbin-Got em ben kel finik iso, aluwkabe kunum ne weng kale bokokemomeli:
‘Ne kom kekabelew kukuw be kilele kal kebi te. Mali kunum waneng im kiin dim e ku finik so kunum emdiw kebelew kate, nem kiin dim e ku fom kuanin tew kebelew te.*Fitew Dase 1:4,16 2 Kasike, ku fongate akati baba teinolewka! Nimtew angom? Kukalem ken kukuw mali atuk mak kuaninba be be, daking kuanomin kis kebe kasike. Feinka! Ne kom kukuw diweko, katemi te. Ku nem Sunbin-Got em kiin dim e sen so kunum kebomi, kom kukuw atin kuw ken kelinba kebelewi, katebi te.
3 Kom suaem Weng Kal Ken Ati bakakembiliwi, kilikemelew weng beelo iti ibolow fukuneko, geleweko, iti ibolow famdes angolewka! Ku fongate akate baba teininba kelew tewe, ne kom akokow keko, belew ding bakate, yakut kunum em wokmo telin atew ke teleko, finik akekemii, ku yol angokolew te.*Matyu 24:43-44; 1 Tesalonaika 5:2; Fitew Dase 2:5; 16:15
4 Kate, kom belew abiw mutuk Sadis beem mali kunum waneng mak nem kiin dim e sen so banim keko, ikalem ilim ninik so kelinba kebiliw te. Kebomeliwi, i nem kiin dim e ki keko, wangweng kebiliw kasike, ilim kais nam minggisomi, neso makuw kakamokoluw te.*Yut 23
5 Kaneko kasike, nimin kunum waneng ite mak kitil keko, kawin dim kaleem wa kukuw de mit daliw tewe, i ilim kais nam kuluko, minggisomeliwi, ne im wiin e sunsun finik so kulomin em fut tem kel be nam yewel koyemi te. Keyemsomi, yukalem wiin e Aatim so, akalem yemdakamin finik iso, alik alik biim kiin dim e fitew kaim dim dayemoki te.*Aneng Kolew 32:32-33; Matyu 10:32; Iluk 10:2; 12:8 6 Kentem ken so kunum waneng yu Sunbin-Finik em sios kunum waneng ilo bokoyemkabe weng be kilele kililoliwka!’,
dangeko, fut tem bololewka!”, nangse te.
Filadelfia Abiw Mutuk Fian Ilo Fut Dabalayemse em Weng te.
7 Filadelfia abiw mutuk fian em sios kunum waneng biim kalan kunum†3:7 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Nete kiol kuw tokotoko kemin so, fein dem so, alik beem mongom kayak kunum nete te. Ne emisik kamok Debit em am buskamin be aluwbi kunum nete te. Abisom mak aili tewe, mak kawtiw mak ki keko, nam iti busuliw te. Beemdiw, abisom mak busuli tewe, mak kawtiw mak ki keko, nam iti net ailiw te. Kaneko kunum nete weng kale bokokemomeli:*Aisaya 22:22
8 ‘Ne kom kekabelew kukuw ken be kilele kal kebi te. Kukalem mit mewso busubi abisom be, mak kawtiw mak ki keko, iti nam ailiw te. Feinka! Kukalem fein ibolow e tiak ba kate, ku nem weng kilele aluweko, nem wiin mali im kiin dim e wokiw dalinba kebelewi, ne kal keko, katebi te.*1 Kolin 16:9
9 Ku kilele kililolewka! Mali Seten-Ataanim em wensankabiliw am dim kolew teleko, dasuw weng bokokemomeliw: ‘Nu Suda kawtiw nute te!’, kangbiliw kawtiw biilo ne mit da koyemii, i kom kun afak katin bukbuk angeko, kom afak bokoliw te. Bomeliwi, i kilele kal keliliwete: ‘Ne kulo ibolow mutuk fian dukembi kai.’, angeko, kal kebokoliw te.*Aisaya 45:14; 49:23; 60:14; Fitew Dase 2:9 10 Feinka! Ku nem weng kilele aluwbomelewi, kitil keko, kal anggil ilum daokeko, nem dokokemomin ding fenbelew kasike, nakati kulo nem teing tem dako, kokembomelii, kiskis ilum mak aneng aneng angom biliw kawtiw alik alik im dim talakabe be kom dim nam tele te.*Iluk 21:19; 2 Timoti 2:12 11 Nakunum kutaka! Sukum ding keko, ne fongate akate kom fukun toloki kasike, kom fein ibolow be kitil kuw keko, aluwbolewka! Mesik mali kawtiw i kom abin kuluko, kom wiin fian so dukemomin yan be isik kulokoliw kasike.
12 Kaneko kasike, nimin kunum waneng ite mak kitil keko, kawin dim kaleem wa kukuw de mit daliw tewe, ne ilo nem Sunbin-Got em am yol em kaiw kun keyembilii, i nam iti kut elo unemiw te. Kebiliwi, ne nakalem Sunbin-Got em wiin e, nakalem wiin akal, kikis Selusalem abiw mutuk fian abiil tikin elote toloke abiw mutuk fian beem wiin e, alemsal wiin be yom dim kel fut boloki te.*Aisaya 62:2; 65:15; Fitew Dase 14:1; 21:2
13 Kaneko kasike, kentem ken so kunum waneng yu Sunbin-Finik em sios kunum waneng ilo bokoyemkabe weng beelo kilele kililoliwka!’,
dangeko, fut tem bololewka!”, nangse te.
Alaodisia Abiw Mutuk Fian Ilo Fut Dabalayemse em Weng te.
14 Alaodisia abiw mutuk fian em sios kunum waneng biim kalan kunum‡3:14 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Nete kuw fein weng em mongom kayak te. Nete kuw Sunbin-Got em eisneng alik alik kiin so atemeko, fein weng kuw bakabi kunum nete te. Nete kuw Sunbin-Got em kilkese alik alik beem mongom kayak nete te. Ne kulo bokokemomeli:
15 ‘Ne kom beit keko, atuk atuk kekabelew kukuw be kilele kal kebi te. Ku wa kukuw kuw kesomi, atin kuw gilil nam kelinba kebelew te. Beemdiw, ku ken kuw kukuw geleweko, mamin nam kuw kelinba kebelew te. Ibo! ‘Ne atin kuw gilil nam kebo!’, angbelew beni, ‘Ne atin kuw mamin nam kebo!’, angbolewka!*Ulom 12:11 16 Kate, ku atuk mak mamin ke atuk mak gilil ke kebelew kasike, ne memen keko, kulo kasuk filat dakakemomin kebi te.
17 Nimtew angom? Ku bokolomelew: ‘Ne emso wiin so kunum keko, mesesem eisneng mak sukum kelinba kebi te!’, angbelew kate, kukalem kal elo kilele kal ke ateminba kebelew kasike. Feinka! Ku mali im kiin dim e inkal kebomelewi, ku baluw soson kunum kebomi, kiin sukul nam kebomi, kal musun kuw kebelew kunum kute te.*Iluk 12:21; 1 Kolin 4:8 18 Kebelew kasike kame, ne kulo ibolow fukunin ken mak dukemsomi, bokokemomeli: ‘Ku gol ais fuliwi, kikis kelewsi gol bete weneko, fein emso wiin so kunum kebolewka! Keko beli, nem ilim kais nam kikis bete weneko, kom inkal kal be kasiko, bolewka! Keko beli, nem kiin sukul kilelko, ken kemin eisneng bete weneko, kiin dim dukulewi, kom kiin ken gol bolewka!*Aisaya 55:1; Fitew Dase 4:4 19 Ku kilele ibolow fukunemolewka! Nimin kunum waneng ite mak ne ilo ibolow mutuk fian duyemi tewe, ne im kukuw gelewbiliw be diw yetemsomi, ilo kiol kuw keyemkabi te. Keyemkabi kasike, kukalem ete ibolow famdeko, ‘Kiol kuw kukuw gelewo yo!’, angbolewka!*1 Kolin 11:32; Kibulu 12:6; Fitew Dase 2:5 20 Ku kilila! Ne kom abisom dim moko, gogo angeko, kulo gaakembi te. Nimin kunum waneng ite mak nem weng kiliko, ikalem am abisom busuliw tewe, ne fein im am matem teleko, neso iso nu ibolow makmak kebomi, wanin wanbokoluw te.*Sion 14:23
21 Sua kel akate, ne kawin dim kaleem wa kukuw de mit dasomelii, nakalem Aatim akalem teinkemin abin ayem dim kel eso teinsi te. Beemdiw kame, nimin kunum waneng ite mak kitil keko, kawin dim kaleem wa kukuw de mit daliw tewe, iso neso makuw nakalem teinkemin abin ayem dim kel teineko, bokoluw te. 22 Kaneko kasike, kentem ken so kunum waneng yu Sunbin-Finik em sios kunum waneng ilo bokoyemkabe weng beelo kilele kililoliwka!’,
dangeko, fut bololewka!”, nangse te.
Abiil Tikin kel Sunbin-Got em Wiin Fian Daolewkabiliw em Sang te.
*3:1: 3:1 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
*3:3: Matyu 24:43-44; 1 Tesalonaika 5:2; Fitew Dase 2:5; 16:15
*3:4: Yut 23
*3:5: Aneng Kolew 32:32-33; Matyu 10:32; Iluk 10:2; 12:8
†3:7: 3:7 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
*3:7: Aisaya 22:22
*3:9: Aisaya 45:14; 49:23; 60:14; Fitew Dase 2:9
*3:10: Iluk 21:19; 2 Timoti 2:12
*3:12: Aisaya 62:2; 65:15; Fitew Dase 14:1; 21:2
‡3:14: 3:14 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
*3:17: Iluk 12:21; 1 Kolin 4:8
*3:18: Aisaya 55:1; Fitew Dase 4:4
*3:19: 1 Kolin 11:32; Kibulu 12:6; Fitew Dase 2:5