5
Iesu i Faliu nenge Kaltu na Biingen Mangeh
Fale aunbiing namih, Iesu ka tatkau una Ierusalem isi nenge Ngasa ken fan Iudaia. Awii na Ierusalem, fatat isi matanfel ae ri foteng u ini Matanfel ken foron Sipsip, imel e nenge kalpong ae na orek Ibru ri foteng u ini Betesda* Fale tom tasum ri tara le asan kalpong ae, e Betsaida ma awii kawil u, ilim e palpalbuang. 3-4 Ma na falifu ae, ifuun e fanu ri borong aiwa ini marmarsan sasem, fal ri kut, fal ri peo ke fal baban fo ri i met. Fale tom tasum na Buk na Gogoh ri wol le fale orek biitom na rina igii, i aragii: Fale biing nenge angelo ke Kumguui i pu la, ke ka ikis dan ke dan ka burburak. Se i pu famu una dan ae i burburak, in liu na sasem kia.
Nenge kaltu aiwa, i peo na ituul e sangful ini wal e bet.
Aunbiing Iesu ka par u i borong kiniis, ka usum ta le ka kiis ta arae na dolon aunbiing ke ka diik u aragii, “Arafah, o ier isi on liu?”
Peo ae ka kiliis u aragii, “Ier, biil tikas una lupes fapu iau una kalpong aunbiing dan i burburak. Ia riris la bii le ian puh, ke fale fanu keskes ri ka famu paket.”
Iesu ka tara sing i aragii, “Aptih! Kep mii salam ma ok la.” Fanpil, kaltu ae ka liu, ka kep mii sala ke ka la.
Tier igii i tapiek na nenge Biingen Mangeh, 10  Nehemia 13:19; Jeremia 17:21pesu, foron famfamu ken fan Iudaia ri ka tara sing kaltu ae Iesu i faliu ta u aragii, “Biingen Mangeh igii! Nagogon i ti kale u le, gong o kep mii salam igii.”
11 Isau le ka kiliis ri aragii, “Kaltu ae i faliu ta iau i fas iau le, ‘Kep mii salam ma ok la.’ ”
12 Ke ri ka diik u aragii, “Se na kaltu i fas o isi on kep mii salam ma ok la?”
13 Isau le kaltu ae, biil i usum le se i faliu ta u, wara le Iesu ka liur ta na fatpoton gur na fanu aiwa.
14 Namih, Iesu ka tafe u na Felun Tunmapek ke ka tara sing i aragii, “Par u, o ka rokap fis mang. Susuaf mang na tel sinang laulau, tarama ti tier ae laulau kanaka ka tapiek lo wo.” 15 Kaltu ae ka la ke ka fas foron famfamu ken fan Iudaia le, kaltu ae i faliu ta u, e Iesu sau.
Kalalik i Tel sani sau ae Tama i Tel u
16 Pesu, foron famfamu ken fan Iudaia ri ka tipes ememse Iesu, wara le i tel foron tier igii na Biingen Mangeh. 17 Iesu ka kiliis ri aragii, “Tata i fofoim la tom papang igii ke ia sabin, ia fofoim la tom.” 18 Pesu, ri ka lala rakrakai mang tom le rin siimete Iesu, biil e wara sau le i lek nagogon na Biingen Mangeh, biil. I use u sabin le God i e Tama tutus ma aunbiing i use u arae, i tel u ka fafasi ini God.
19 Iesu ka tara sing ri aragii, “Tekentu kanaka ia fas gam, Kalalik biil ifasi in tel ti tier ini wolwol kia tom, biil. I tel tier sau ae i par Tama i tel u la, wara le sani Tama i tel u, ke Kalalik sabin i tel u la. 20 Wara le Tama i ier kanaka isi ke Kalalik ma i finngas u ini foron tier tikii i tel u la. In finngas u ini foron tier laumet na fal igii isi gamek lala bitit. 21 Arae sau Tama i fapti foron minet la ma ka ta liu sing ri, ke Kalalik sabin in ta liu sing fanse i ier le in ta u usuf ri. 22 Ma Tama biil sabin i nagogon fanu la, biil. I unune ufu foron foim tikii una nagogon fanu usuf ke Kalalik, 23 isi fanu tikii rik bulat lo ke Kalalik, arae sau ri bulat lo Tama. Se biil i bulat lo ke Kalalik, biil i bulat lo Tama ae i wuun ta u.
24 “Tekentu kanaka ia fas gam, se i ongen orek kiak ma ka unune lo ier ae i wuun ta iau, i fot u e liu fitliu ma biil in fiu na nagogon, biil. Ka oflek ta koseng minet una liu. 25 Tekentu kanaka ia fas gam, nenge aunbiing in tapiek ma igii mang ka tapiek tah, aunbiing foron minet rin ongen kinen Kalalik ke God ma fanse ri ongen u, rin liu. 26 Tama i e waran liu. Ke arae sabin lo ke Kalalik, Tama ka ta u usuf i, isi i sabin ik waran liu. 27 Ma ka ta ta u e rakrakai una nagogon usuf i, wara le i Kalalik ken Kaltu.
28 “Gong gam bitit na orek igii, wara le nenge aunbiing in tapiek, ae foron minet tikii rin ongen kine 29  Daniel 12:2ke rik suuh. Fanse ae ri tel ta rokap na sinang, rin apti isi kep liu ma fanse ae ri tel ta sinang laulau, rin apti isi fiu na nagogon. 30 Biil ifasi ian tel ti tier namin wolwol kiak tom, biil. Ia tel nagogon sau namin sani ia ongen u. Ma nagogon kiak i tortores, wara le biil ia mi na wolwol kiak tom, biil. Ia mi sau namin wolwol ke ier ae i wuun ta iau.
Orek an Fafamalal ulo Iesu
31 “Male ia tom, ia famalal fafis iau, ke fafamalal kiak biil in tatawin. 32 Isau le, nenge kaltu keskes tom i fafamalal ulo iau ma ia usum le fafamalal kia ulo iau i tatawin.
33  Jon 1:19-27; 3:27-30“Gam wuun ta fale fanu usuf Jon ma ka famalal ta u e tekentu lo iau. 34 Biil ia to dar ti fafamalal ken fanu, biil. Ia use u arae isi gamek kep liu. 35 Jon i arae lam ae i karef ma ka ta ta malal ma gam ka gesges ta isi laes na malal lo na fatuklin aunbiing.
36 “Isau le, imel e fafamalal ulo iau ae i tatawin kanaka na fafamalal ae Jon i use ta u. Fafamalal ae, i e foim tom ae Tata i wuun ta iau isi ian farop u ma igii ia teltel u la. Foim ae i famalal u le Tata tom i wuun ta iau. 37  Metiu 3:17; Mak 1:11; Luk 3:22Ma Tata ae i wuun ta iau, ka fafamalal ta ulo iau. Biil tom gam ongen ta kine ke biil tom gam par u le i par arafah. 38 Ke orek kia biil i kiis na balmi, wara le biil gam unune lo ier ae i wuun ta u. 39 Gam tangtang fakasi foron sun orek la na Buk na Gogoh, wara gam wol le foron orek ae in ta liu fitliu sing gam. Foron orek ae ri famalal iau, 40 isau le biil gam ier isi la unaisang, isi gamek kep liu.
41 “Biil ia dar ti ususefages sing fanu, 42 wara ia usum lo gam. Ia usum le biil gam ier isi God na balmi. 43 Ia la ta uga ini asa Tata ke biil gam somangat pes iau. Isau, male tikas in la ini asa tom ke gamek somangat pes u. 44 Arafa gamen unune arae lo iau, male gam ier isi kep ususefages sing gam tom ma biil gam totof isi kep ususefages sing itikii sau e God?
45 “Isau le, gong gam wol le ian ususe ami sing Tata. Ier ae in ususe ami, e Moses, ae gam luun unune kimi lo le in lupes gam. 46 Male gam unune ta lo Moses, ke gamen unune sabin lo iau, wara le i siit ta orek an famalal ulo iau. 47 Male biil gam unune na sani i siit ta u, ke arafa gamek unune arae na sani ia use u?”

*5:2: Fale tom tasum ri tara le asan kalpong ae, e Betsaida

5:3-4: Fale tom tasum na Buk na Gogoh ri wol le fale orek biitom na rina igii, i aragii: Fale biing nenge angelo ke Kumguui i pu la, ke ka ikis dan ke dan ka burburak. Se i pu famu una dan ae i burburak, in liu na sasem kia.

5:10: Nehemia 13:19; Jeremia 17:21

5:29: Daniel 12:2

5:33: Jon 1:19-27; 3:27-30

5:37: Metiu 3:17; Mak 1:11; Luk 3:22