13
Yeerusaree amaana maqa rapee ianinnanara qinau.
(Mat 24:1-2; Ruk 21:5-6)
Yisufa amaana maqakiqari rafudamaki fufanoo mina faiqi namukiqari moo fannoo Yisuna qimaminoo qinau. Oo ufasaa rakisirafa maa maqana qafaa, amiqira ooninnai auquqaa maqafa maridanoo. Yisufa irisee qimaminoo qinau. Innee maa firaa amiqira maaqana usakarana qafaidee, kasooqaqee aiqama rapeepaamma furufaramambuannoo sia moo ooni narí amuaaqa narí amuaaqa maqee marindee inoo mariannoo.
Yisuna ufa irimarusara nikooqaranara qinau.
(Mat 24:3-14; Ruk 21:7-19)
Yisufa Yeerusaree firaa amaana maqakiqari raudamaki Oorifa aaqana amaana maqa adeedi marufanoo miqoo ooru ooqu marinau. Ooqu marifufaqa mina faiqi namukiqari Peetooroofa faqa Yameesafa faqa Yoohaneefa faqa Andurufa faqa minamusa qumee kukeeqaku narí maruqoo aniree qimamiqau. 4-5 Oo Yisu anee amaana maqa rapee ianinnanara anee qiannana yairee fee amaana maqa rapeepaa iannoo fee nana ainaina kambiqafina qafee fee oo doo mina rapeeia aukuanafa adeedi ree maqi qianauree qufanoo Yisufa minara naamuaqira ufa oosana arasee qimanniminau. Innee aufarida mariaqa, sia moo fannoo inni nikaruqiani. Moomoosa aniree náriara unnaqimasee moo fannoo qinee asauku mundirausee qifanoo moo fannoo anireenoo qinee asauku mundirausee qimasee moomoosa misa nikaruqifaranoo. Innee rakira daambeenda adeedi iriqa nianai marinara ufa kai iriqa sia munari minari furufari iaqa. Miqira ainaina kuqaa kambiqaannoo, kambiqafinaqa sia taikara aukuana aiqaree maqi qiaqa. Moo maqannaasa nianaindari aniree moo maqannaasa faqa rakifaranoo, moo karaambaiqa fannoo adeediqari ani mara moo karaambaiqa aruannoo. Maqa kasirafa aiqamai mariannoo aandaroo faqa mariannoo. Mi ainainausa manda marira aurirana oorisaa kai mariannoo anaasee faiqi maqarara innaamunai aupuraandeemmiannoo.
Innee qini ufa irimariasa aufarida mariaqa, faiqí misa poorisa ufa qimannimifaqa inni ruumbeeqee kootaki quqeefaranoo. Misa inni mareeqee amaana maqaki quqasee saamusamu narifaranoo. Innee qini amiqira fasaasa ufa qimannimiaqeera qini ufasaara karaambaiqauqa faqa faiqí firaasa rakisirausa faqa nifusaa innee kikiqifaranoo. 10 Qini amiqira fasaasa ufa aiqama maqannaasaki naaree kooroo inoo marinanoo taikarafa inaaqianna kambiqaannoo. 11 Misa inni rumbasee mareeqee kootaki quqasainaqa innee sia naqi fee qianau naqi fee qianau naaree qiaqa. Koota kambiqafina Anutufa qimannimu ufana mina kai qimannimiaqa. Ani ookinaa ufa sia anindi mariannoo Anutuna naaquqara maraquna fannoo narí ufa inni niminaqa mina kai qifaranoo. 12 Faiqí misa nári nikaqaafasaauqa mareeqee kuqiranaki quqeefaranoo. Faiqí misa nári niku nisauku faqa mareeqee kuqiranaki quqeefaranoo faiqiuqaindi quandakiqa nári ninausa nikausa mareeqee kuqiranaki quqeefaranoo. 13 Aiqama maqannaasa inniara Yisunaindi fee qimasee fidiaqaa mannimaqeefaranoo. Innee minaki maridaqa fidaqa qini uaqee ida fifi inafa kuqira fee Yisufa qumira aukuanee paqurinafa asumu marirana maraannoo.
Yeerusaree maqusai narirafa kambiqaaninnanara qinau.
(Mat 24:15-28; Ruk 21:20-24)
14 Kasooqaqee innee naaquqara fidiaqaaimari mandainaina qafeefaranoo mifa sia mariaqaa iraqoo Yeerusaree amaana maqaki kikiqinoo marina qafeefaranoo. Innee maa ufana asaana rimariasa mi ufana oosana amiqimandee iriaqa. Mi naaquqara mandainainafa kikiqa mambinaqa innee Yudeeaa maqa maaqaki mariasa quqasee aaqana aaqana sandamafuaqa. 15 Mi kamuqoo faiqí moo fannoo maaqa kooqi oorisaa mariinafa mi ainainafa kambiqafinana sia aneenna ainaina maaqaki maraanee qia doo miqooqari afiaki sandaa. 16 Faiqí moo fannoo afuqaki mariinana sia maaqai aniree aneenna qamunna aakauqa maraannee qia doo miqooqari kai quqasee ququsa rakeemandee sandaa. 17 Mi manda aukuanna nimuaqu uqa faqaa aanaaseeuqa faqa faiqi aanaaqi faqaasa faqa mandaiki marifaranoo sandaranara anuqifaranoo. 18 Innee maaqi qimasee innaaru qiaqa Oo Anutu sia mi manda aukuannafa suara aukuana kambiqaani qiaqa sandaranara anuqi foora. 19 Mi manda aukuanafa anirainaqa aiqamausa aupuraranaki firaanaki marifaranoo. Ooqai indaaru Anutufa aiqama ainaina auqunakiqari kaqiqaa aupurarafa oosana oosana marinau, maqee faqa miqikai idanoo kaqiqaa aupurarafa maridanoo. Kasooqaqee firaafa uqanna kambiqaannoo. Mifa taikainna kari sia miqirafa kambiqaannoo. 20 Mi manda aupurara aukuanna Anutufa qusandaannoo, sia qusarainanoo aiqama kuqu taikee foora. Anutufa narí rusandeesamumasee maroosara iriseenoo mi aukuanna qusaramannisaannoo.
21 Mi manda aukuanna faiqí moo fannoo inniara mai qafaaqa, asauku mundirafa mai marinoo moo fannoo asauku mundirafa muanni marinoo qinnana sia mi fasiqana ufa iriaqa mina unnaqidanoo. 22 Unnaqimaria asauku mundirausa faqa unnaqi maria tamummaqara fasiqausa faqa miqira aukuana moomoo kambiqeefaranoo. Misa Anutuna rusandeesamumandee maraqoo fasiqa anaaseesa nikaru qiani qimaseenoo naaquqara ainaina faqa sia faiqí amanaikimari ainaina faqa auqusaifanoo kambiqaannoo. Mi ainainannai nikaruqiani qimasaifanoo sia amanaikiannoo. 23 Qinee inniqa qini faiqi namu mi ainainna sia kambiooqoo qimannimiqa minara aufarida kai mariaqa.
Yisufa narí innaarunaindari qumuaninnanara qimanniminau.
(Mat 24:29-31; Ruk 21:25-28)
24-25 Mi manda aupurara aukuannafa taikafinoo asukuna fannoo suani aruannoo aiqamai asukuna kai arufuannoo quqoona faqa sia kafaa kaaqa qaannoo fasauqa faqa inaarunaindari aiqama kapikeefaranoo. Innaarunai fasau faqa quqoona faqa nimari aanafa dapikammafuannoo. 26 Miqoo qinee faiqí nimaaku asuruki kooroo ianaura, qinee firaa afeeka namufaqa firaa areenarana namufaqa minaki kooroo ianaura. 27 Mikari qinee qeeqa qangiroouqa niqiqaanaqa misa aiqama maqa maaqa ati atinni oonuree aniree mandeeqa Anutuna rusandeesamumandee maroosa maramaree qinee marianannai nifiqee anifaranoo.
Narí qummuarinnanara saqari ammuni kikiqa usinau.
(Mat 24:32-35; Ruk 21:29-33)
28 Yisufa kaqi qimannimidanoo narí faiqi namu qimanniminoo qinau. Innee faafisa fooqaa ira saqari qafamasee mina oosanara iriaqa, mi saqarifa ammuni mambinaqa innee minara saika aukuanee qifaranoo. 29 Innee miqi kai masee mi oosana oosana ainainnara qunafa kambiqainaqa taikara aukuana adeedi afaisaammi maqi qiaqa. 30 Innee maana faqa irisee sia aunuaqa maa ainainnausara aiqama qunafa maa maqee maria fasiqa anaaseesa akaqausa kaqi maria kamuqoo kambiqaannoo. 31 Innaaruna faqa maqa faqa aiqama fatikamafi aqusaannoo qini dookinaa ufa fannoo kai naaru naaru sia taikaannoo, kaqi mariannoo.
Narí qummuaninnanara afu maqaida rakisianee qinau.
(Mat 24:36-44)
32 Mi taikara aukuannafa anianinnanara sia moo fannoo iridanoo mi faasaannara faqa suani yaqoo kamuqoo marinanoo fee kambiqaannoo fee, innaarunaindaraa qangiroouqa faqa qinee Anutuna amaaku faqa siamma iridaqa qini qikoofa narí kai mina iridanoo. Innee mi faasaannara sia irimariafanoo. 33 Innee minara aufaridaqa rakisidaqa qafaaqa. 34 Mi faasaanna faiqí moora foora ainaina faqaafara foora mariannoo. Mi fasiqafa narí ainainirana oosana oosana narí ainainira faiqiuqa aadu aadu nisaukuki quqaseenoo eendaki aufarira fasiqa qimaminoo anee aiqama ainainasaa amiqimasee rakisia qinee moosaa fidaqa qimasee finau. 35 Innee miqikai mandee amiqimandee aufarida mariaqa. Inni uriqararafa kaiqaa anianinnanara sia iri mariafanoo mifa eendaki aniannoo fee eenda amuqusai fee maqee kaari maqarana namufaqee aniraannoo fee suani maqee ururainanoo fee aniraannoo fee. 36 Mifa tautummamaqasee ainainimarinna kamuqoo faiqaqee innanaki qumurainana mandaikamminnaranoo. 37 Minara maqee qinee inni qimannimidaqa aiqamausa qimannimidaqa innee aiqamausara aufariaqee qidaqa qinee qumiranara rakisida mariaqa.