1 *Jon 1.12Mötket! Suep Iwininan neŋgöra “Nani nahönböraturupni,” mewö neŋgohola miaŋön urukalemŋi ketaŋi kondel neŋgimakza. Nini ölŋa Anutugö nahönböraturupŋi akzin. Mi akzinaŋgöra gölme ambazipnöŋ könaŋamnini qahö möt kutuba malje. Anutugö könaŋi qahö möt kutuzeaŋgöra nanine könaŋamninaŋgöra mewöyök tötöpinpin malje. 2 O wölböt alaurupni, nalö kewöŋe nini Anutugö nahönböraturupŋi aka maljin. Mewö mala könaŋgep denöwö aka malbini, mi aukŋe qahö asuhuyök. Mohok kun mötzini, mi kewö: Yaŋön kunbuk aukŋe asuhuiga kaisoŋgolomŋi ölŋi jeninan ekini, nalö miaŋgöreŋ mönö letota i ewö akin. 3 Denike yeŋön Kraistköra jörömqöröm mewöŋi ak waŋgizei, yaŋön mönö i köl könjörat mem eŋgiiga yaŋgö tandök ewö sarakŋi aka malme.

4 Denike yeŋön siŋgisöndok akzei, yeŋön mönö köna keu qeba walöŋmakze. Siŋgisöndok mi iwilele ahakmemeya. 5 *Jon 1.29Kraist nanŋak siŋgisöndokŋi kun qahö yaŋön nanine siŋgisöndoknini köl könjöratmamgöra eta asuhuyöhi, mi ölöp mötze. 6 Denike yeŋön Kraistpuk böŋ qeba kinjei, yeŋön siŋgisöndok qahö aka malje. Kunŋan siŋgisöndok toroqeba ahakzawi, yaŋön Jisös qahö eka könaŋi qahö möt kutuba malja. Mewö.

7 O (kokourupni) gömökurupni! Kunŋan jaŋjuŋ mem eŋgibapuköra mönö galömŋini mem aŋguba malme. Kraistnöŋ solanŋi akzawi, yaŋgö dop ahakmeme solanŋi törörök wuataŋ-gömakzawaŋön mönö solanŋi akza. 8 Bölöŋaŋgö Toŋan köna-könahiŋeyök siŋgisöndok aka kota malja. Miaŋgö dop denike yeŋön siŋgisöndok ahakzei, yeŋön mönö Bölöŋi Toŋaŋgö buŋaya akze. Anutugö Nahönŋan mönö yaŋgö nupŋi yaiŋ memamgöra eta asuhuyök.

9 Denike yeŋön Anutugöreŋök asuhugeri, yeŋgöreŋök kunŋan malmal qainŋi kun uruŋe ahözawaŋgöra mönö siŋgisöndok qahö toroqeba ahakza. Ahuahu dölökŋi ahuba maljawaŋgöra aka siŋgisöndok toroqeba akŋamgö osimakza. 10 Denike yeŋön Anutugö nahönböratŋi aka denike yeŋön Bölöŋi Toŋaŋgö nahönböratŋi akzei, mi kewö kewöta möt asaribin: Kunŋan ahakmeme solanŋi qahö wuataŋgömakzawi, yaŋön mönö Anutugö buŋaŋi qahö akza. Mewöŋanök kunŋan alaurupŋi qahö jöpaköm eŋgimakzawi, yaŋön Anutugö buŋaya qahö akza. Miaŋgö aiwesökŋi mewö.

11 *Jon 13.34Buŋa keugö kötŋi könakönahiŋeyök möta kota maljini, miaŋgö jöjöpaŋ keuŋi kewö: Nini mönö urunöŋ jöpaköm aŋguba malbin. 12 *Jen 4.8Kein (Kain) yaŋön Bölöŋi Toŋaŋgö buŋaya mala munŋi qei kömuyök. Nini mönö i ewö aka malbinbuk. Yaŋön kewögöra munŋi qeyök: Nanŋi ahakmemeŋan bölöŋi ahökmö, munŋaŋ-göreŋan solanŋi ahök. Mönö miaŋgöra qeyök.

13 O urumeleŋ alaurupni, gölme ambazipnöŋ kazik ak eŋgime ewö, miaŋgöra mönö kude welipköme. 14 *Jon 5.24Nini urumeleŋ alaurupnini jöpaköm eŋgimakzinaŋgöra aka keu ki möt asarizin: Nini kömup köhöikŋaŋgö jaböŋi walöŋda malmal köhöikŋe aŋgota maljin. Kunŋan urukalem qahö ahakzawi, yaŋön mönö toroqeba kömup köhöikŋaŋgö uruŋe kinma. 15 Ambazip alaurupŋini kazik ak eŋgimakzei, körek yeŋön mönö köhömuŋi eŋgueŋgu ambaziwa akze. Malmal köhöikŋi mi eŋgueŋgu ambazip mewöŋi kungö uruŋe qahö ahöza, mi ölöp möt yaköze.

16 Jisös Kraistnöŋ malmalŋi neŋgöra aka köleŋda mosöta jöpaköm aŋguaŋgugö könaŋi mewö kondel neŋgiiga eka möt kutuzin. Neŋön mönö mewöŋanök malmalnini urumeleŋ alaurup yeŋgöra aka köleŋda mosöringa dop kölma. 17 Kunŋan gölmegö öröyuaiŋi dopŋe memba maliga alaŋan yuaigöra osiba mözöqözöröŋ aiga ekzapmö, töndup ekbonep aka uruŋi jöhöza ewö, Anutugö urukalemŋan mönö yaŋgö uruŋe denöwö kinbawak? 18 O (koko) gömokurupni, jöpaköm aŋguaŋgu mi numbu jitninan keu töhönök timbiliba jimakinbukmö, mi mönö ahakmemeninan keu ölŋi wuataŋgöba aka malbin.

19 Nini keu ölŋaŋgö buŋaya akzin me qahö? Akzin ewö, mönö ölöp urunini bönjöŋ köliga Anutugö jemesoholŋe awösamkakak kinbin. Keu mi nanini kewöt aŋguba kewö möt kutubin: 20 Uruninan yuai bölöŋaŋgöra aka jim neŋgiza ewö, nini keu ki ölöp möt yaközin: Anutunöŋ kewötkewöt Tonini aka keunini diŋdiŋanök kewötma. Anutugö mötmötŋan mönö nanine mötmötnini oŋgita öŋgöŋgöŋi aiga keu pakpak ölöp möt teköza. Miaŋgöra ölöp urunini bönjöŋ köliga malbin.

21 O wölböt alaurupni, uruninan qahö jim neŋgiza ewö, nini mönö Anutugö jemesoholŋe awösamkakak aka tamehök kinbin. 22 Nini Anutugö jöjöpaŋ keuŋi tem köla ahakmemenini dop köl waŋgimakzawaŋgö dop aka memba malakzin. Miaŋgöra yuai kungöra köuluköba qesim waŋgibini, mönö mia neŋgii buŋa qem aŋgubin.

23 *Jon 13.34; 15.12, 17Anutugöreŋ jöjöpaŋ keu yahöt mi kewö: Nini mönö Nahönŋi Jisös Kraistkö qetŋi memba möt nariba urunini meleŋbin aka jöjöpaŋ keu jim kutum neŋgiyöhaŋgö dop jöpaköm aŋguba malbin. Mewö qahö aka malbinak, mi Anutugö jeŋe qahö dop kölbawak. 24 Denike yeŋön Anutugö jöjöpaŋ keuŋi tem kölakzei, yeŋön mönö Anutubuk qekötahöba malgetka Anutunöŋ yembuk lapingöba kinja. Yaŋön nembuk lapingöba kinjawi, mi Uŋaŋi Töröŋi neŋgiiga urunine saŋep ala maljawaŋgöra möt kutuzin. Mewö.