4
Keinöŋ Abel qei kömuyök.
Azi Adamnöŋ anömŋambuk mala amiyohotka Iwnöŋ (Ewa) gölöm ala Kein (Kain) meyök. Memba Kein qetköra kewö jiyök: “Anutunöŋ bauköm niŋgiiga nahöni mezal.” Iwnöŋ könaŋgep Adamgö nahönŋi Abel, Keingö munŋi meyök. Abelnöŋ mala qariba lama galömŋina aiga Keinöŋ kölkömöt azia aka malök. Mewö malohotka nalö kunöŋ Keinöŋ nupkö nene tosatŋi memba kaba Kembugöra jöwöwöl ohom waŋgiyök. * Hib 11.4Abelnöŋ mewöyök lama kambuŋaŋgö mutuk asuasuhuŋi tosatŋi meköba eŋguba kitipŋi kelökŋinambuk memba kaba Kembugö jöwöwöl ohoyök. Ohoiga Kembunöŋ Abel nanŋi aka jöwöwölŋi etkeka möri ölöwahök. Ölöwahökmö, Kembunöŋ Kein aka yaŋgö jöwöwölŋi mi ek tököyök. Mewö aiga Keingö irimŋi seholiiga kömbuhiba jemesoholŋan bosoliyök. Bosoliiga Kembunöŋ Keingöra kewö jii mörök: “Irimgi mönö wuanöŋgöra seholiiga jemesoholgan bosoliza? Gi yuai ölöpŋi aknöŋga möt aŋgön köl gihibiga ölöp jemesoholgi öhal (hak) akŋan me qahö? Yuai ölöpŋi qahö aknöŋga siŋgisöndokö Toŋan mönö urugahö naŋguŋe kinda göhöra ak gihiba mönömakza. Mewö mönömakzapmö, göŋön mönö miaŋgö soŋgo ala galöm memba luhut alman.”
Kembunöŋ Keingöra mewö jii mörökmö, Keinöŋ töndup munŋi Abelgöra kewö jiyök: “Mönö nanirök nupnöŋ anbit. “Mewö jiiga nupnöŋ anda mala Keinöŋ luhuba munŋi Abel qelanjiba memba qeba qei kömuyök.* Mat 23.35; Luk 11.51; 1 Jon 3.12
Kömuiga Kembunöŋ Kein kewö qesim waŋgiyök: “Mungi Abel mi denike malja?” Qesim waŋgiiga kewö meleŋnök: “Ni qahö mötzal. Ni munangö jegalöma qahö akzal.”
10 Mewö meleŋniga Kembunöŋ jiyök: “Gi wani yuaia akzan? Mötnöŋ, mungahö sepŋan mönö gölmenöhök qeriga mötzal.* Hib 12.24 11 Gölme kiaŋgö numbuŋan aŋaŋiba mungahö sep börögeyök mezawi, nöŋön mönö kiaŋgöreŋök közöl gihibi anman. Jöramörahö mi mönö göhö qake albi öŋgöza. 12 Közöl gihibiga kölkömöt nup menöŋga gölmenöŋ möriamŋaŋgö ölŋi aŋgön köl gihiiga gölme dop mömölaköba kekelolo aka ölöŋ köla laŋ anda kaba malman.”
13 Mewö jiiga Keinöŋ Kembugöra kewö jiyök, “Keunaŋgö likepŋi meleŋnöŋga qakne öŋgözawi, miaŋön mönö ösumni oŋgiri lömböriiga bisimamgö osimam. 14 Mötnöŋ, gi merak ni nupqeqe gölmenöhök nuataŋgönöŋga jemesoholgeyök mömölaköba gölme dop kekelolo aka ölöŋ köla laŋ anda kaba malmam. Miaŋgöra kunŋan ni neka ölöp nuŋgui kömumbileŋbuk.”
15 Mewö jiyökmö, Kembunöŋ kewö jii mörök: “Mewö qahö. Kunŋan Kein qei kömuma ewö, miaŋgö likepŋi mönö yaŋgö qakŋe öŋgöiga ambemŋi 7 akŋa. “Mewö jiba kunŋan Kein miwikŋaiba i qei kömumbapuköra sileŋe aiwesök kulem kun alök. 16 Mi aliga Kembugö jemesoholŋi mosöta anda anda gölme qetŋi Laŋlaŋ lilikqilik (Nod) miaŋgöreŋ aŋgota malök. Gölme mi Edenök wehön kotkotŋe göröken ahöza. Mewö.
Keingö gwölönarökurupŋi
17 Keinöŋ anömŋambuk mala amiyohotka gölöm ala Henok meyök. Keinöŋ taon kun memba nahönŋaŋgö qetŋi Henok qet waŋgiyök. 18 Henokö nahönŋi qetŋi Irad. Iradkö nahönŋi Mehujael. Mehujaelgö nahönŋi Metusael. Metusaelgö nahönŋi Lamek. Mewö asuhuget. 19 Lameknöŋ ambi yahöt etkömeyök: Kun qetŋi Ada, kun qetŋi Zila. 20 Adanöŋ gölöm ala Jabal meyök. Yaŋön ambazip opo seri koumŋine ahöba mala bau bulmakau galöm köl eŋgiba maljei, yeŋgö bömönŋini ahök. 21 Jabalgö munŋaŋgö qetŋi mi Jubal. Yaŋön ambazip gita kulele qeba awölop uba maljei, yeŋgö bömönŋini ahök. 22 Zilanöŋ mewöyök nahönŋi qetŋi Tubal-Kein meyök. Yaŋön qariba börögö tulsŋi aka bimqeqegö yuaiŋi könaŋi könaŋi mi bras aka ainöŋ ohoi kolkolgöi qekötahöba mezapma. Tubal-Keingö nenŋi qetŋi Nama.
23 Lameknöŋ nalö kunöŋ anömyahötŋi mi kewö jii mörohot,
“Ada aka Zila anömyahötni, iŋiri mönö kezap ala keuni ki mötmahot: Kunŋan nuŋgum kuziriga uzinaŋgö kitipŋaŋgöra mönö azi kun qebi kömuma. Kunŋan nuŋgum miziriga gurusep (gulibambam) löpötnaŋgö kitipŋaŋgöra mönö azi gwabö kun qebi kömuma.
24  * Mat 18.22Kunŋan Kein qeiga likepŋi yaŋgö qakŋe öŋgöiga ambemŋi 7 akŋapmö,
kunŋan Lamek ni nuŋguiga miaŋgö likepŋi mönö yaŋgö qakŋe öŋgöiga ambemŋi 77 akŋa. “Mewö.
Set aka Enos
25 Azi mutukŋi Adam yaŋön kunbuk anömŋambuk mala amiyohotka nahönŋiri kun memba kewö jiyök: “Keinöŋ Abel qei kömuyöhaŋgöra Anutunöŋ Abelgö salupŋe nahöni kun niŋgiza. “Miaŋgöra qetŋi Set (Niŋgiza) qerök. 26 Setkö nahönŋi mewöyök asuhuiga qetŋi Enos qerök. Mewö.
Nalö miaŋgöreŋ ambazip yeŋön könahiba Kembugö qetŋi köuluköba malget. Mewö.

*4:4: Hib 11.4

*4:8: Mat 23.35; Luk 11.51; 1 Jon 3.12

*4:10: Hib 12.24

*4:24: Mat 18.22