1 O urumeleŋ alaurupnini, nini eŋgöreŋ kaba nup meini, miaŋön mönö qahö pömsöm qeyökmö, ölŋi ölöp asuhuyök. Nanŋinak mi mewöyök ölöp mötze. 2 *Apo 16.19-24; 17.1-9, 14; Apo 17.5Qahö pömsöm qeyökmö, mutuk Filipai sitinöŋ nup meinga öröm ureim ak neŋgigetka sihimbölö mörini, mi mötze. Sihimbölö mi mötagun eŋgöreŋ kainga tosatŋan tuarenjoŋ köhöikŋi ak neŋgigetmö, mi töndup Anutunöŋ awösamkakak neŋgii kinda Ölöwak Buŋaŋi jim asarim eŋgiba malin.

3 Neŋgö könanini kewö: Urukuŋgukuŋgu keunini mi isimkakalek qakŋe qahö jimakzin. Naninak jaŋjuŋ ahinga uruninan tölöhobawak, mewö mi qahö jimakzin. 4 Mewö qahöpmö, Anutunöŋ Ölöwak Buŋa jim sehibingöra neŋgeka urunini kewöri dop köliga möt narim neŋgiba Buŋaŋi neŋgiyöhi, miaŋgö dop mönö keuŋi memba jim asarimakzin. Anutunöŋ urunini esapköba kewörakza. Miaŋgöra neŋön yuai pakpak Anutugö jeŋe dop kölbingöra ahakzin. Mi ambazip sihimŋini wuataŋgöbingöra aka qahö. 5 Neŋön nalö kungen ambazip kelewele keu kelök ak eŋgibingöra qahö anda kaini, mi mötze. Nini nepaqepalok dogonini esuhuba moneŋ yuai neŋgimegö möndömöndö keu siŋginŋi qahö jiin. Anutunöŋ könaŋamnini mi ölöp jim naŋgöma. 6 Eŋön me ambazip tosatŋan qetbuŋa neŋgimegöra qahö kapaŋ köla malin.

7 Kraistkö aposolurupŋi akzinaŋgöra ölöp uruŋini kewö kuŋgubinak, “Iŋini mönö naŋgöm neŋgigetka sutŋine urugö nup membin.” Mewö jiinga dop kölbawakmö, neŋön eŋgö sutŋine mököqököli aka malin. Nahönbörat namŋinan juzu eŋgiba köyan köl eŋgimakzawi, miaŋgö dop mönö nanini memba et al aŋguba ösöŋ ak eŋgiba malin. 8 Neŋön iwinam ewö mökökölim ak eŋgiba malinaŋgöra Anutugöreŋ Ölöwak Buŋa eŋgiin aka toroqeba nanine malmalnini mewöyök köleŋ eŋgibingö jöjöröba malin. Iŋini ölŋa wölböt nahönböraturupnini aket.

9 O urumeleŋ alaurupnini, neŋön eŋgöra aka nup memba silenini qeba malini, mönö mi mötmörime. Naŋgöm neŋgimegö lömbötŋan eŋgöreŋök kungö qakŋe öŋgöbapuköra suŋgem asak nanine böröninan nup memba Anutugö Ölöwak Buŋaŋi jim asarim eŋgiba malin. Mi mönö ölum eŋgubapuk.

10 Jisös möt narizei, neŋön eŋgö keuŋini pakpak diŋdiŋanök kewöta sarakŋi köpösihitkö keunini qahö malin. Iŋini mi eka möta naŋgöba jim naŋgömeaŋgö dop akze. Anutunöŋ mewöyök mi jim naŋgöba dangunu ewö kinja. 11 Iwinöŋ nanŋi nahönböraturupŋi ösöŋ ak eŋgimakzawi, miaŋgö dop neŋön iŋini mohot mohot ak eŋgiba malin. Mi mewöŋanök ölöp mötze. 12 Neŋön urugö naŋgönaŋgö keu jiba urukölalep ak eŋgiba malin. Anutunöŋ iŋini nanŋe bemtohoŋnöŋ aŋgota asakmararaŋe asarimegöra eŋgoholök. Miaŋgöra neŋön uruŋini kuŋguba keu kewö jim tuariba malin, “Ahakmemeŋini mönö Anutugö jeŋe dop kölmawaŋgö dop sarak sorokŋi aka memba malme.”

13 Miaŋgöra neŋön mewöyök sundan Anutu kewögöra möpöseimakzin: Anutugö Buŋa keu eŋgiini, mi gölme ambazipkö keu ewö qahö buŋa qem aŋgugetmö, ölŋa Anutugö keu jitkö dowa möta mi aŋgön kölget. Mi möt narigetka miaŋön mönö kölöŋaim eŋgiiga letorakze. 14 Juda ambazip Judia prowinsnöŋ uruŋini meleŋgetka Juda tosatŋan aŋgösirip ak eŋgigetka sihimbölö mötket. Yeŋön mi möta töndup Kraist Jisösbuk qekötahöba kinda Anutugö urumeleŋ könagesöŋi aket. Urumeleŋ alaurupnini, eŋgö sutŋine mönö mewöŋanök asuhuyök: Nanŋini Grik ambazipnöŋ Juda yeŋgö tandök ewö ak eŋgigetka iŋini sihimbölö öröröŋ möta Anutugö könagesöŋi aket.

15 *Apo 9.23, 29; 13.45, 50; 14.2, 5, 19; 17.5, 13; 18.12Juda yeŋön kezapqetok ambazip eŋguget kömugetka Kembu Jisös mewöyök qegetka kömui nini sesewerowero ak neŋgiba malget. Yeŋön Anutugö jeŋe qahö dop köla ambazip pakpak kerök ak neŋgimakze. 16 Neŋön kian kantri eŋön uruŋini meleŋda letotmegöra Buŋa jibinbukö aŋgön köl neŋgimakze. Mewö siŋgisöndok sundan aka qerakögetka qakŋine öŋgömakza. Siŋgisöndokŋini qerakögetka dopŋi Anutugö jeŋe kokolak qeiga irimsesewölŋi toroqeba aŋgön kölmamgö osiba nalö kewöŋe kondeli qakŋine lök öŋgöza. Mewö.

17 O urumeleŋ alaurupnini, neŋön nalö kewöŋe nalö töröpŋi deŋda maljin. Sileninan deŋda maljinmö, uruninan jöhöba mohotŋe maljin. Miaŋgöra eŋgö jesöŋgöröŋini ekingöra mönö kapaŋ köla awöweŋgöba maljin. 18 Miaŋgöra eŋgöreŋ kabingö möta malin. Pol nöŋön sömaŋ mohot-töp qahöpmö, indimŋi yahöt kamamgö esapköyalmö, Satanöŋ jöhöm neŋgiiga osiin. 19 Iŋini nanine ila jalö soroknini ewö kinje. Kembunini Jisösnöŋ liliŋgöba kaiga yaŋgö jemesoholŋe aŋgota kinbini, miaŋgöreŋ eŋgeka “Urugö nup önewat qahö memba malin,” mewö jibingö mötzin. Neŋön keu mi iŋini aka tosatŋi yeŋgöra aka awamŋanök jibingö jörömqöröm akzin. Miaŋgöra eŋgöra önöŋi qahö söŋgaiba silenini memba öŋgömakzin. 20 Neŋön eŋgöra aka qetbuŋa miwikŋaininga sösöŋgai ak neŋgimakze. Mewö.