1 Jisösnöŋ kunbuk köuluk mire öŋgöiga miaŋgöreŋ azi böröŋi sosoholiŋi kun tarök. 2 Miaŋgöreŋ azi böröŋi sosoholiŋi kun tarök. Ambazipnöŋ Jisös keu jakeŋe al waŋgibingöra “Azi mi Sabat kendonöŋ möhamgöma me qahö?” jiba Jisös je galöm memba tatket. 3 Megetka Jisösnöŋ azi böröŋi sosoholiŋi mi kewö jii mörök, “Mönö wahöta jenine kinöŋ.” 4 Mewö jiba kewö jii mötket, “Köna keu wuataŋgöba Sabat kendonöŋ yuai ölöpŋi me bölöŋi akin? Ölöp kungö bohonŋi jöhöbin me mosöringa kömuma? Wanat kun meinga dop kölma?” Mewö jii möta göröŋ alget.

5 Keuŋini göröŋ tatketka liliŋgöm purik eŋgehi uruŋinan köhöikŋi gwözöŋnöhaŋgöra wösöbirik aka kukjejenöŋ eŋgehök. Mewö eŋgeka azi miaŋgö jiyök, “Gi mönö börögi qötöteinöŋ.” Mewö jiiga böröŋi qötöteiba kunbuk ölöwahök. 6 Ölöwahiga Farisi (Köna keugö kapaŋkölköl) yeŋön yaigep anda miaŋgöreŋök premiö Herodkö pati alaurup yembuk totoko ala “Jisös denöwö qein kömuma?” jiba keu nup meget. Mewö.

7 Mewö megetka Jisösnöŋ gwarekurupŋi eŋguaŋgita o aŋgö jitŋe anget. Angetka Not prowins qetŋi Galili miaŋgöreŋök ambazip kambulelembe yeŋön könaŋe wuataŋgöba anget. Judia prowins miaŋgöreŋök mewöyök yaŋgöreŋ kaget. 8 Siti bohonŋi qetŋi Jerusalem, Saut prowins qetŋi Aidumia aka Jordan o likepŋeyök Wehön Kotkotŋe yeŋön aka Wehön Gegeŋe görökenök taon qetŋiri Taiö aka Saidon liliköba maljei, yeŋön mohok kambulelembenöŋ öröba kaget. Jisösnöŋ aŋgöletot ketaŋi ketaŋi memba malöhi, miaŋgö buzupŋi möta mindiqindiriba kaŋgotket. 9 *Mak 4.1; Luk 5.1-3Mewö kaŋgota utal waŋgibepuköra Jisösnöŋ gwarekurupŋi kewö jii mötket, “Ölököm niŋgibepuköra iŋini mönö waŋge kun miwikŋaiba nöŋgöra dowe alget tarök.” 10 Mewö jii möta ambazip sehisehiŋi mem ölöwak eŋgiba malök. Miaŋgöra qemjem-mamjeŋ aka sile lölömböröŋinambuk pakpak yeŋön sileŋe misiribingöra liliköba gwötpuk aum metala utal waŋgiget. 11 Ömeŋi ömeŋi yeŋön Jisös eka jemesoholŋe gölmenöŋ geba kewö qetket, “Gi Anutugö Nahönŋi akzan!”

12 Mewö qetketka Jisösnöŋ qetal eŋgiba könöŋamŋan aukŋe asuhubapuköra soŋgo köhöikŋi al eŋgiyök. Mewö.

13 Könaŋgep Jisösnöŋ kunduŋe öŋgöba miaŋgöreŋ nanŋi sihimŋaŋgö dop azi eŋgoholiga yaŋgöreŋ kaget. 14 Kagetka azi 12 mi yambuk malmegöra al eŋgiba Buŋa keuŋi jim sehimegöra melaim eŋgiyök. 15 Melaim eŋgiba ömewöröme közöl eŋgimegö kukösumŋi eŋgiyök.

16 Mewö aka azi 12 ki kewö al eŋgiyök: Pitö, Jisösnöŋ qet mi Saimon waŋgiyök. 17 Jeims aka munŋi Jon, iwiŋiri qetŋi Zebedi. Jisösnöŋ yetkö qetŋiri kun Boanerges qerök. Mi nanine keunöŋ Pöndandaŋgö Nahönyahötŋi. 18 Andru, Filip, Bartolomyu, Matyu, Tomas, Jeims Alfiusgö nahönŋi, Tadius, Saimon Zelot-politik azia*Nasönöl pati zelot yeŋön Rom gawman tuarenjoŋ aka nanŋine kinkin membingöra tuaköpek memba malget. 19 aka Judas Iskariot. Kariot azi miaŋön könaŋgen Jisös mamalolo mem waŋgiyök. Mewö.

20 Jisösnöŋ mi al eŋgiba kunduŋeyök eta nanŋi miriŋe kayök. Mire kaiga ambazip kambu ketaŋi kunbuk kaŋgota tokogetka mönö miaŋgöra tosolomŋi yembuk nene nembingö osiget. 21 Osigetka sepkitipurupŋan mi möta “Uruŋi lök sohoza!” jiget. Jiba geba waŋgitpingöra anget.

22 *Mat 9.34; 10.25Angetka Köna keugö böhi Jerusalemök kageri, yeŋön jiget, “Satangö Katakömulatnöŋ mönö uruŋe geiga malja. Yaŋön öme yeŋgö kembuŋinaŋgö ösumnöŋ ömewöröme eŋguataŋgömakza.”

23 Mewö jigeraŋgöra Jisösnöŋ eŋgoholi kagetka dopkeunöŋ kewö jii mötket, “Satanöŋ mönö denöwö alaŋi Satan kun wuataŋgöbawak? 24 Kantri kungö galömurupŋinan sutŋine aŋgururuk aka julme ewö yeŋön mönö galömkölköl nupŋini memba kinbingö osime. 25 Mewöyök miri kungö könagesö yeŋön sutŋine aŋgururuk aka julme ewö, mönö galömkölköl nupŋini memba kinbingö osime. 26 Mewöyök Satangö könagesö yeŋön sutŋine aŋgururuk aka tuarenjoŋ ak aŋgubeak ewö, galömkölkölŋinaŋgö ösumŋan eriga bemtohoŋinan mönö qahöwakŋamgö akza.

27 Kunŋan azi köhöikŋaŋgö köna böröŋi mutuk qahö jöhöma ewö, yaŋön mönö miriŋe öŋgöba qezaŋda sukinapŋi memamgö osima. Mutuk i jöhöi tarigun mönö ölöp miriŋeyök öröyuaiŋi pakpak waŋgita memba anma. (Miaŋgö dop nöŋön mewöyök Satan jöhöba andöŋe ömeŋi eŋguataŋgömakzal.”) Mewö.

28 Nöŋön keu ölŋi kun kewö jibi mötme, “Ambazip ketaŋi moröŋi siŋgisöndok ahakzei, mi Anutunöŋ mosörakza. Lömbötŋambuk me awamŋi mepaqepaik akeak mönö mi Anutunöŋ saŋgoŋ eŋgima. 29 *Luk 12.10Saŋgoŋ eŋgimapmö, Kunŋan Uŋa Töröŋi ilita mepaikömawi, miaŋgö siŋgisöndokŋi Anutunöŋ mönö nalö kunöŋ qahö mosötma. Saumbaŋ! Siŋgisöndok miaŋön mönö qakŋe öŋgöiga nalö teteköŋi qahö Anutugö jeŋe keuŋambuk malma.” Mewö jiyök. 30 “Ömenöŋ uruŋe geyöhawa malja,” Jigeraŋgöra aka mewö kusum eŋgiyök. Mewö.

31 Mewö eraum mötketka nam-munŋan kaba yaigep kinda yeŋgöreŋ etmapkö keu alget yaŋgöreŋ anök. 32 Aniga ambazip kambu yeŋön liliköm waŋgiba tata kewö jiget mörök, “Mötnöŋ! Göhö nam-mungan mönö yaigep kinda göhöra qesize.”

33 Jigetka meleŋda kewö jii mötket, “Nöŋgö namni mi daŋön aka munurupni daŋön?” 34 Jisösnöŋ mewö jiba ambazip liliköm waŋgiba tatkeri, i uba eŋgeka kewö jiyök, “Eket nöŋgö namni aka munurupni mönö ki. 35 Anutugöreŋ jitsihitŋi tem kölahakzei, mieŋön mönö nöŋgö namni aka nen-munurupni akze.” Mewö.