9
Jisösnöŋ azi sile likepŋi kömukömuŋi möhamgöyök.
Mak 2.1-12; Luk 5.17-26
1 Jisösnöŋ waŋge uruŋe öŋgöba kunbuk o aŋgö kutuba likepŋe aŋgota nanŋe taonöŋ kayök. 2 Nalö miaŋgöreŋ azi tosatŋan alaŋini sile likepŋi kömukömuŋi tumbulahöpnöŋ ahöyöhi, mi kululunöŋ ala aŋguba kaget. Mewö kaba Anutu möt narim waŋgigeri, Jisösnöŋ yeŋgö tandökŋini mi ehi dop köliga kawöl azigöra kewö jiyök, “Nahöni, nöŋön siŋgisöndoki mosötzal. Mönö köhöiba ewebibigabuk saitiŋgit malman.”
3 Mewö jiiga Köna keugö böhi tosatŋan kinda uruŋinan kewö mötmöriget, “Azi kiaŋön mönö Anutu ilita mepaqepaik akza.”
4 Mewö mötmörigetmö, Jisösnöŋ mötmötŋini mi möt kutuba kewö jiyök, “Iŋini mönö wuanöŋgöra keu bölöŋi uruŋinan mötmörize? 5 Nöŋön ‘Siŋgisöndoki mosötzal,’ jizali, keu miaŋön mönö awamŋanök jijiŋa. Kunŋan mewö jiiga tosatŋan keu miaŋgö ölŋi qahö ekŋe. Miaŋgöra mi keu awamŋaŋgö dop. Nöŋön keu kun kewö jimamgö mötzal, ‘Mönö wahöta anöŋ.’ Keu mi mönö lömbötŋambuk jijiŋa akza. Mewö jibiga ölŋi ahuma me qahöwi, miaŋön mönö aukŋe asuhui ekŋe.
6 “Mötket, gölmenöŋ siŋgisöndok mosötmosötkö kukösumŋi mi Suep gölmegö azi ölŋaŋgöreŋ ahözawi, iŋini miaŋgö könaŋaŋgöra jaŋjuŋ malbepuk. Miaŋgöra keu lömbötŋi mi azi kiaŋgöra jibi ölŋi eket.” Mewö jiba azi sile likepŋi kömukömuŋaŋgö jeŋe eka jiyök, “Gi mönö wahöta tumbulahöpki memba mirige anöŋ. Keu lömbötŋi mi ölŋambuk akŋa ewö, keu awamŋi mi mönö mewöyök denöwögöra omaŋi akawak?”
7 Mewö jiiga miaŋgöreŋök wahöta miriŋe anök. 8 Mewö asuhuiga ambazip kambu yeŋön mi eka welipköba Anutu möpöseim waŋgiget. Gölme azigöra kukösum mewöŋi waŋgiyöhaŋgöra Anutu möpöseiget. Mewö.
Jisösnöŋ Matyu (Liwai) oholök.
Mak 2.13-17; Luk 5.27-32
9 Jisösnöŋ miaŋgöreŋök anda takis ofis oŋgitmamgö aiga miaŋgöreŋ azi qetŋi Matyu tariga eka jii mörök, “Gi mönö nöŋgö andöne kanöŋ.” Mewö jii möta wahöta takis nup mosöta Jisösgö andöŋe anök.
10 *Luk 15.1-2Anda Matyugö mire anda nene nemba tatkeri, nalö miaŋgöreŋ takis meme azi tilipqilipŋinambuk aka siŋgisöndok azi gwötpukŋan kaba Jisös aka yaŋgö gwarekurupŋi yembuk tata nene mohotŋe neget. 11 Mewö negetka Farisi (Köna keugö kapaŋkölköl) yeŋön mi eka Jisösgö gwarekurupŋi kewö jim eŋgiget, “Aek! Eŋgö böhiŋinan mönö wuanöŋgöra takis meme tilipqilipŋinambuk aka siŋgisöndok ambazip yembuk tata nene neza? Mi qahö dop kölja.”
12 Mewö jim eŋgigetka Jisösnöŋ likepŋi kewö jii mötket, “Sile unditundit ambazipnöŋ doktagöra qahö ak eŋgimakzapmö, kawöl ambazipnöŋ mönö doktagöreŋ anakze. 13 *Mat 12.7; Hos 6.6Nöŋön siŋgisöndok ambazip eŋgoholmamgöra kaba maljalmö, ambazip nanŋinaŋgö mötketka solanŋi akzei, i qahö. Miaŋgöra keu kiaŋgö könaŋi mönö anda kusum aŋguba mötme, ‘Nöŋön jöwöwöl ohobingö qahöpmö, ak kömum aŋgubingö sihimŋi mötzal.’ ” Mewö.
Nene siŋgi malmalgö keuŋi
Mak 2.18-22; Luk 5.33-39
14 Nalö miaŋgöreŋ Jon O-melun azigö gwarekurupŋi yeŋön Jisösgöreŋ kaba kewö qesiget, “Neŋön aka Farisi (Köna keugö kapaŋkölköl) yeŋön Anutugöra nene siŋgi gwötpuk malahakzin. Nangi gwarekurupkan mönö wuanöŋgöra nene siŋgi qahö malje?”
15 Mewö qesigetka kewö meleŋnök, “Ölŋa, nini wani nalönöŋ nene siŋgi malakzin? Ambi meme nalöŋe azigö andöurupŋan könöpŋi algetka ambigö sepkitipurupŋan yuai mi tökömakze me qahö? Nöŋön nani gwarekurupni yeŋgö azi buŋaya aka yeŋgö sutŋine köisirik tatzal. Tatpiga yeŋön miaŋgöra aijölöŋ söŋgaiba tata siŋgi malbingö osimakze. Osimakzemö, Anutunöŋ noaŋgiri kömumbiga yeŋön mönö nalö miaŋgöreŋ ölöp siŋgi malakŋe.
16 (“Iŋini malmal walŋi aka sösöŋgai Buŋa dölökŋi mi mindirim etkibingö osime. Miaŋgö keu pasetŋi mi kewö jibi mötket:) Löŋgölöŋgöt walŋi jurariga kunöŋ opo dölökŋi qahö saŋgoŋsaŋgoŋi mitiba miaŋön opo su jöhanŋi qahö ala umgöreŋgömakza. Opo su jöhanŋi dölökŋi mewöŋan mönö waziba löŋgölöŋgöt walŋi öröiga kunbuk tiŋgiriga kinimŋan qariba böliqölibapuk.
17 “Mewöŋanök kunöŋ wain o dölökŋi mi jobö me toru walŋi lama sileŋan memeŋi miaŋgöreŋ qahö kusuiga gemakza. Mewö akawak ewö, wain o dölökŋan mönö qariba toru qesiŋniga jula mokoiga gölmenöŋ eta sohoiga toruŋan böliqölibepuk. Miaŋgöra wain o dölökŋi mi toru dölökŋeyök mokoin geiga dop kölma. Möwö ahinga mietkön ölöwakŋahot. (Mewöŋanök o ölöpŋi mi gina gisagisahöŋe qahö umakzin. Mewö ubinak ewö, miaŋön mönö jula kisipisirik eriga nemba kawöl neŋgöhöbapuk. Mewö akapuköra o ölöpŋi mi gina ölöpŋe umakzin. Iŋini mewöyök malmal walŋi aka Ölöwak Buŋa dölökŋi mi mindirim etkibingö osime.) Mewö.”
Jairusnöŋ böratŋaŋgöra Jisös köuluköyök.
Mak 5.21-43; Luk 8.40-56
18 Jisösnöŋ keu mi jii mötketka keu galöm kunŋan kaŋgota Jisösgö wösöŋe geba simin köla kewö köuluköm waŋgiyök, “Nöŋgö böratnan mönö dölki kömuzapmö, mönö kaba börögan sileŋe misirinöŋga guliba toroqeba malma.” 19 Köuluköm waŋgiiga wahöta gwarekurupŋi yembuk i wuataŋgöba anget.
Kawöl ambi kunöŋ Jisösgö malukuŋi misiriyök.
20 Angetka miaŋgöreŋ sutŋine ambi kun malök. Yaŋön (yara) yambu 12 miaŋgö dop köiŋnöŋ ehiga nalö dop kawöl yöhöiga malök. Ambi miaŋön Jisösgö andöŋe kaba malukuŋaŋgö kitip suŋi misiriyök. 21 Mi misiriba nanŋaŋgöra kewö jiyök, “Nöŋön i oseimamgö möt lömböriba malukuŋeyök borom kun misiribileŋak ewö, mönö ölöp ölöwakŋam.”
22 Mewö jiba misiriiga Jisösnöŋ miaŋgöreŋök liliŋgöba i eka kewö jii mörök, “Böratni, mötnaripkan mönö mem ölöwak gihiza. Mönö köhöiba ewebibigabuk saitiŋgit malman.” Mewö jii möta aua miaŋgöreŋök ölöwahök.
Jisösnöŋ Jairusgö böratŋi mem guliyök.
23 Toroqeba angetka Jisösnöŋ keu galömŋaŋgö mire öŋgöba ambazip jiŋgeŋ köla awölop ugeri aka ambazip kambu göju gilgeri, mi eŋgeka kewö jim kutum eŋgiyök, 24 “Mönö yaigep anget. Ambi moröŋan qahö kömuzapmö, gaunök ahöza.” Mewö jim kutum eŋgiiga mötketka gönahit ewö aiga gön köl waŋgiget.
25 Gön köl waŋgigetmö, ambazip kambu ketaŋi mi jiiga yaigep angetka ambi moröŋaŋgö ahöahö miri uruŋe öŋgöba böröŋe meiga wahörök. 26 Wahöriga miaŋgö buzup keuŋan sehiba mindimindiri sel mi körek dop köla anök. Mewö.
Jisösnöŋ jegömöl azi yahöt mem ölöwak etkiyök.
27 Jisösnöŋ miri gölme mi mosöta anmamgö ani jegömöl azi yahötŋan wuataŋgöba andöŋe kaba kewö qerohot, “Deiwidkö gwölönarökŋi, gi mönö ak kömum netkiman.”
28 Mewö qerohotka miri kungö uruŋe öŋgöiga jegömöl azi yetkön Jisösgöreŋ kayohotka kewö qesim etkiyök, “Jeŋiri mem tohomamgö kukösumŋi nöŋgöreŋ ahözawi, mi möt narizahot me qahö?” Qesim etkiiga kewö meleŋ waŋgiyohot, “Kembuniri, mi ölöp möt narizit.” 29 Mewö meleŋ waŋgiyohotka je dapötŋire misiriba jiyök, “Mötnaripŋiraŋgö dop mönö asuhuma.”
30 Mewö jiiga jeŋiran tohoyök. Mewö asuhuiga galöm meme keu köhöikŋi al etkiba kewö jiyök, “Mörohot, kiaŋgö buzupŋi mi kun kude jiyohot mötme.” 31 Mewö jiyökmö, yetkön mosöta anda miaŋgö buzupŋi jim sehiyohotka mindimindiri sel mi körek dop kölök. Mewö.
Jisösnöŋ mötök azi kungö keuŋi möhamgöyök.
32 Jeŋiri tohoi anohotka töŋöt azi keu jijiŋi qahö mi waŋgita Jisösgöreŋ kaget. 33 Kagetka Jisösnöŋ ömeŋi közöli mötök azinöŋ keu jiiga ambazip kambu yeŋön mi eka welipköba jiget, “Tandök kewöŋi mi Israel uruŋe mönöwök nalö kungen qahö ehin. Qahö. Dölki je murutŋa ekzin.”
34 *Mat 10.25; 12.24; Mak 3.22; Luk 11.15Mewö jigetmö, Farisi (Köna keugö kapaŋkölköl) yeŋön jiget, “Yaŋön mönö öme yeŋgö kembuŋinaŋgö ösumnöŋ ömewöröme eŋguataŋgömakza.” Mewö.
Jisösnöŋ könagesö yeŋgö wösöŋi mörök.
35 *Mat 4.23; Mak 1.39; Luk 4.44Jisösnöŋ anda miri aka taon dop liliköba ambazip köuluk miriŋine kusum eŋgiba bemtohoŋgö Ölöwak Buŋa jim asariba miaŋön uruŋini kuŋguba uzi kawöl aka jepajerepe könaŋi könaŋi mem ölöwak eŋgiba malök. 36 *Jaŋ 27.17; 1 Kiŋ 22.17; 2 Hist 18.16; Eze 34.5; Mak 6.34Mewö mala ambazip kambuŋi kambuŋi eŋgehiga lama galömŋini qahö tandök simbisembel aka iliŋgösöŋ qeŋgalaŋga malgetka yeŋgöra wösöŋi mörök.
37 *Luk 10.2Mewö eŋgeka gwarekurupŋi kewö jii mötket, “Anutugö nupnöŋ nene ölŋi gwötpuk öliba ahözapmö, mi tokobingö nup meme ambazipnöŋ mönö awamdökŋi malje. 38 Miaŋgöra nene öliöliŋaŋgö Kembuŋan nup meme ambazip melaim eŋgimapköra mönö köuluköba malme. Köuluköm waŋgigetka nup ambazip asuhuba ölŋi mi mem tokome.” Mewö.