1  * Eks 12.1-27Pasowa kendon * Kantri qetŋi Ijipt miaŋgöreŋ Kembugö garatanöŋ eŋgehoriba eŋgoŋgirök, kendon miaŋgö qetŋi Nei keunöŋ Pasowa. Eksodus 12.15 aka beret yistŋi qahö miaŋgö kendonŋi töriyohot. Wehön yahöt teköiga miaŋgöreŋ könahibitkö ahotka jike nup galöm aka Köna keugö böhi yeŋön tokoget. Tokoba denöwö möndöŋninga Jisös ölöŋ memba qeget kömumbawak, miaŋgö könaŋi jaruba kewötket. 2 Jaruba kewöta kewö jiget, “Ambazip irimŋini seholiiga karimŋi karimŋi asuhubepuköra mi sösöŋgai kendon nalöŋe akingö osibin.” Mewö jiget.

3  * Luk 7.37-38Jisösnöŋ Betani mirinöŋ mala Saimon kun uzikukuŋi mem solaniyöhi, yaŋgö mire öŋgöba tarök. Miaŋgöreŋ nene nemba tariga ambi kunŋan köt kirin kun memba yaŋgöreŋ kayök. Kirin mi nöluk tuat-tuat qetŋi alabastö miaŋön memeŋa. Mia o um-köhöwakŋambuk ölŋi qetŋi nad miaŋön kokolak qeba tarök. Yaŋön mi bohonŋi ketaŋan memba kaba nöluk jölŋi kutuba oŋi Jisösgö nöröpŋe mimbiliba miriyök. 4 Miriiga azi tatkeri, yeŋgöreŋök tosatŋan urubölö aka nanŋinök kewö eraum mötket, “Nad o mi mönö wuanöŋgöra mewö ayuhuzawi? 5 Nad o kelökŋambuk mi bohonŋi memegöra albawak ewö, ölöp silim 300:kö töwaŋi (Kina 1500,-) oŋgita yöhötibawak. Mi ambazip wanapŋi eŋgiiga dop kölbawak.” Mewö jiba ambi mi jim waŋgiget.

6 Jim waŋgigetka Jisösnöŋ kewö jii mötket, “Ambi ki kude jim waŋgime. Wuanöŋgöra uruŋi mem bölize? Yaŋön silik ölöpŋi ak soroköm niŋgiiga dop kölja. 7  * Dut 15.11Ambazip wanapŋi mi nalöŋi nalöŋi sutŋine malgetka ölöpŋi ak eŋgibingö möta mi ölöp nalö dop akŋemö, nöŋön eŋgö sutŋine nalö dop qahö malmam. 8 Yaŋön mi nanŋi akakmemeŋaŋgö dop ak niŋgiza. Nöŋön kömumbi löm köl niŋgimeaŋgöra ölöp qeljiŋe sileni kelöknöŋ nömiriza. 9 Nöŋön keu ölŋi kun kewö jibi mötket: Ölöwak Buŋa ki kantri igen waigen jim sehigetka anmawi, miaŋgöreŋ ambi kiaŋön yuai ak niŋgizawi, miaŋgö buŋaŋi mohok jiget sehiiga yaŋgöra mötmöriba malme.” Mewö.

10 Gwarekurupŋi 12 yeŋgöreŋök kun qetŋi Judas Iskariot yaŋön Jisös mamalolo mem waŋgimamgöra aka jike nup galöm yeŋgöreŋ anök. 11 Yeŋgöreŋ anda keuŋi jiiga mi möta uruŋinan ölöwahiga söŋgöröŋi moneŋ waŋgibingöra keu jöhöget. Keu jöhögetka Jisös nalö kungen mamalolo mem waŋgimamgö köna möt jaruba köiŋbiŋgöba malök. Mewö.

12 Beret yistŋi qahö miaŋgö kendon silim mutukŋe (Seqononöŋ) pasowa lama kun qeba ohozema. Miaŋgöra Jisösgö gwarekurupŋan jiget, “Böhi, nini miri denikeaŋgöreŋ anda pasowa lama mözözömgöm gihiba nembin? Sihimgi denöwö ahöza?”

13 Mewö jigetka gwarekyahötŋi yahöt kewö jiba melaim etkiyök, “Iŋiri Jerusalem sitinöŋ öŋgöyohotka azi kun o kumbut kunduta kaiga miwikŋaimahot. Miwikŋaiba i ölöp wuataŋgöba anmahot. 14 Anohotka mire öŋgöiga miaŋgö toŋi kewö jiyohot mötma, ‘Böhinöŋ kewö jiza: Ölöp miri uruŋi kun niŋginöŋga miaŋgöreŋ öŋgöba gwarekurupni yembuk pasowa lama nembin.’ 15 Mewö jiyohotka toŋan möta miri qakŋe eu öŋgöba uruŋi ketaŋi kun kondel etkima. Miaŋgöreŋ dum tatat yuai mözözömgöget ahöza. Mi kondel etkiiga miaŋgöreŋ lama qeba ohomahot.”

16 Mewö jiiga gwarekyahötŋan mosöta sitinöŋ öŋgöba Jisösnöŋ keu jiyöhi, miaŋgö dop miwikŋaiba kinda lama qeba ohom mözözömgöyohot.

17 Miri söŋauiga Jisösnöŋ gwarekurupŋi 12 yembuk miri miaŋgöreŋ kaŋgotket. 18  * Sum 41.9Kaŋgota öŋgöba dumnöŋ tata nene negetka Jisösnöŋ kewö jii mötket, “Nöŋön keu ölŋi kun kewö jibi mötket: Eŋgöreŋök kun nömbuk nene nemba tatzawaŋön mönö mamalolo mem niŋgima.”

19 Mewö jiiga uruŋinan wösöbirik aiga könahiba nanŋök nanŋök qesim waŋgiba jiget, “Nöŋgöra jibanbuk?”

20 Qesim waŋgigetka kewö jii mötket, “12 eŋgöreŋök kun nömbuk beret kuluŋnöŋ kunduŋgözawi, yaŋön. 21 Suep gölmegö azi ölŋan mönö yaŋgöra keu ohoget ahözawaŋgö dop gölme mosöta anma. Anmapmö, mamalolo mem waŋgimawi, yaŋgöra Yei wösöbirik! jizal. Anutunöŋ mönö likepŋi öŋgöŋgöŋi meleŋ waŋgima. Azi mi nam köröuruŋeyök qahö ahubawak, miaŋön mönö amqem waŋgibawak.” Mewö.

22 Nene nemba tata Jisösnöŋ beret memba kötuetköba mindipköba eŋgiba kewö jiyök, “Ki nani busuni. Ki memba neget.”

23 Mewö jiba wain qambi memba saiwap jiba eŋgiiga körekŋan qambi kiaŋgöreŋök neget. 24  * Eks 24.8; Jer 31.31-34Negetka kewö jii mötket, “Ki nani sepni. Ki Anutunöŋ ambazip yembuk jöhöjöhö areŋ aiga köhöimapköra sepni mokoget geiga ambazip gwötpuk amöt qem eŋgima. 25 Nöŋön keu ölŋi kun kewö jibi mötket: Nöŋön wain kösögö ölŋi kiaŋgöreŋ kunbuk toroqeba qahö nemam. Könaŋgep Anutugö bemtohoŋ uruŋe eu taringa közölömbuaŋ almawi, wehön miaŋgöreŋ mönö wain o qainŋi kun mia nemam.”

26 Mewö jiiga sösöŋgai liŋet köla mosöta anda Oil ip kunduŋe öŋgöget. Mewö.

27  * Zek 13.7Öŋgöba Jisösnöŋ kewö jii mötket, “Kezapqetok azi kunöŋ keu kun kewö ohoi ahöza,

29 Mewö jiiga Pitönöŋ kewö jii mörök, “Yeŋön körek uruŋini böliiga gömosöta buratime ewö, nöŋön mönö töndup mewö qahö akŋam.”

30 Jiiga Jisösnöŋ jii mörök, “Nöŋön keu ölŋi kun kewö jibi mötnöŋ: Kuruknöŋ indimŋi yahöt qahö qeriga göŋön merak suŋgem qaŋ köl niŋginöŋga indimŋi karöbut akŋa.”

31 Mewö jiyökmö, Pitönöŋ kapaŋ köla köhöiköhöi ahök, “Böhi! Mewö qahöpmö, ni nuŋgugetka göbuk mohotŋe kömumbirak, mi töndup nöŋön gi qahö qaŋ köl gihimam.” Gwarek tosatŋi pakpak mewöyök keu miyöhök jiget. Mewö.

32 Mewö eraum möta anda arö kun qetŋi Gezemane miaŋgöreŋ aŋgotket. Aŋgota gwarekurupŋi kewö jii mötket, “Nöŋön endu anda köuluköbiga iŋini ölöp nalö sutŋe ki tatme.” 33 Mewö jiba Pitö, Jeims aka Jon eŋguaŋgita anget. Angetka Jisösnöŋ könahiba köŋjiliŋ kanjamŋambuk möriga köna böröŋi qeköyök. 34 Mewö aka kewö jii mötket, “Nöŋgö urunan mönö kondum köla kotzawaŋgöra aka wösöbirik mötpiga kömukömuŋi ak niŋgiza. Iŋini ölöp kiaŋgöreŋ tata nömbuk guli malbin.”

35 Mewö jiba nanŋök boromkun toroqeba anda simin köla sipköba sihimbölö nalöŋi mi Iwiŋaŋgö jitŋaŋgö dop oŋgitmapköra köuluköyök. 36 Köuluköba jiyök, “Aba Iwini, gi yuai kun qahö mölölömbizan. Miaŋgöra sihimbölögö qambiŋi ki mönö noaŋgitman. Noaŋgitpanak, mi nöŋgö sihimgö dop qahöpmö, mönö nangi jitkahö dop asuhuma.”

37 Mewö jiba liliŋgöiga gwarekurupŋi karöbut yeŋön gaun ahöget eŋgeka Pitögö kewö jii mörök, “Saimon, gi gaun ahözan me? Gi aua mohot-töp guli malmamgö kude köhöizan me? 38 Uruninan guli malbingö sihimŋi mörakzinmö, sileninan lölöwöröŋi akza. Miaŋgöra esapesapnöŋ et eŋgubapuköra mönö köuluköba guliguli malme.”

39 Mewö jii möriga kunbuk eŋgömosöta anda keu miyöhök kunbuk jiba köuluköyök. 40 Köuluköba liliŋgöiga jeŋini böŋböŋ meyöhaŋgöra kunbuk gaunök ahöget eŋgehök. Gaunöhök wahöta keu meleŋbingö jaŋjuŋ aket.

41 Jisösnöŋ ani indimŋi karöbut aiga liliŋgöba kaba kewö jii mötket, “Iŋini toroqeba luhut memba gaunök ahöbingö mötze me? Mötket! Kunöŋ Suep gölmegö azi ölŋi mamalolo mem waŋgiiga bölöŋi meme yeŋgö böröŋine öŋgöma. Miaŋgö aua nalöŋan lök kam kuŋguza. Eŋgö gaun ahöahö nalöŋinan mönö teköza. 42 Mönö wahötketka anin. Mötket! Mamalolo mem niŋgimawi, yaŋön mönö dowe ki kaza.” Mewö.

43 Jisösnöŋ mewö jiba kiniga miaŋgöreŋök gwarekurupŋi 12 yeŋgöreŋök kun qetŋi Judas yaŋön kambu kun jitŋe mem eŋgiiga kaŋgotket. Jike nup galöm, Köna keugö böhi aka kantrigö jitŋememe yeŋön i melaim eŋgigetka bimgö sou ketaŋi aka liŋgipŋini memba kaget. 44 Mamalolo memamgö ahöhi, yaŋön mutuk yembuk aiwesök keu kewö jöhöba jii mötket, “Nöŋön azi numbuŋi yöhötim nemami, i eka ‘Mönö mi!’ jiba memba jöhöba törörök galöm köla anme.”

45 Mewö jiba kaba miaŋgöreŋök Jisösgöreŋ aŋgota “O Böhini!” jiba numbuŋi yöhötim neyök. 46 Yöhötim neiga eka Jisös qelanjiba memba jöhöget. 47 Jöhögetka kösutŋe kingeri, yeŋgöreŋök kunŋan bimgö sou ketaŋi öröba jike nup galöm bohonŋaŋgö welenqeqeŋi qeba kezapŋi köteköi erök. 48 Jisös jöhögetka keu kewö jii mötket, “Ni kegwek-kahasililiŋ azia qahöpmö, töndup nöŋgöra mewö möta bimgö sou ketaŋi aka liŋgip memba nömemba jöhöbingöra kaŋgotze. 49  * Luk 19.47; 21.37Nöŋön wehön dop jöwöwöl jikenöŋ embuk kinda Buŋa keu kusum eŋgiba malbiga qahö nömigetmö, yuai ki mönö Buŋa Kimbigö keuŋan ölŋambuk akŋapköra asuhuza. 50 Jisös jöhögetka gwarek yeŋön körek Jisös mosöta buratiba unjurata anget. Mewö.

51 Azi gwabö kunöŋ bindoŋi tuatŋanök köpeiba Jisösgö andöŋe wuataŋgöba anök. Opoŋi tosatŋi qahö löŋgöta aniga i esapköba meget. 52 Membingö osiba bindoŋi qekögetka aukŋamŋe unjurata anök. Mewö.

53 Jisös jöhöba waŋgita jike nup galöm bohonŋaŋgö mire anget. Angetka jike nup galöm pakpak, kantrigö jitŋememe aka Köna keugö böhi yeŋön miaŋgöreŋ anda tokoget. 54 Angetka Pitönöŋ sikepsikep eŋguataŋgöba jike nup galöm bohonŋaŋgö mire aŋgota jakömbuak mirigö kiripo uruŋe öŋgöyök. Öŋgöba welenqeqe azi yeŋgö sutŋine tata könöp kösutŋe jömörök. 55 Mewö tarökmö, jike nup galöm aka jike kaunsöl kambu yeŋön Jisösgö silenöŋ alal keu denöwö naŋgöinga qeget kömumapkö jim jarugetmö, könaŋi kun qahö miwikŋaiget. 56 Jaruba kinda gwötpukŋan keu muneŋi sileŋe ala naŋgöba jigetmö, keuŋinan könaŋi mohok qahö ahök.

57 Mewö aiga tosatŋan wahöta kinda keu muneŋi sileŋe ala naŋgöba kewö jiget, 58  * Jon 2.19“Yaŋön kewö jiiga mörin, ‘Nöŋön jöwöwöl jike börönöŋ memeŋi ki köndeŋbiga gölmenöŋ eriga wehön karöbutkö uruŋe jike qainŋi kun börönöŋ memeŋi qahö mi mem wahöta kuŋgumam.’ ” 59 Mewö jigetmö, töndup keuŋinan könaŋi mohok qahö ahök.

60 Mewö aiga jike nup galöm bohonŋan wahöta mesohol köl eŋgiba kinda Jisös qesim waŋgiba kewö jiyök, “Yeŋön göhö silege keu ala naŋgözei, miaŋgö likepŋi kun jiman me qahö?”

61 Qesim waŋgiiga yuai bölöŋi kun qahö ahökmö, töndup likepŋi kun qahö meleŋda keuŋi bök kinök. Keuŋi bök kiniga jike nup galöm bohonŋan kunbuk kewö qesim waŋgiyök, “Anutu möpöseim waŋgimakzini, gi yaŋgö Nahönŋi Kraist akzan me qahö?”

62  * Dan 7.13Qesim waŋgiiga “Oŋ!” jiba kewö jii mötket, “Suep gölmegö azi ölŋan mönö kukösum Toŋaŋgö böröŋi ölŋe tata suepkö kousu qakŋe eri ekŋe.”

63 Keu mi jiiga jike nup galöm bohonŋan malukuŋi munjurata kewö jiyök, “Yei, iwinaŋgö jitŋi! Tosatŋan keuŋi naŋgömegöra kunbuk qahö qesim eŋgibin. 64  * Lew 24.16Anutu mepaiközawi, mi mönö nanŋinak möt teköze. Miaŋgöra denöwö mötmörize?” Mewö qesim eŋgiiga yeŋön körek Jisös kömupkö buŋaya akŋapköra jim teköget.

65 Mewö jim teköba tosatŋan könahiba söutkölap miriba jemesoholŋi esuhuba böröŋinan misiba qeba kewö jiget mörök, “Daŋön guhuzawi, mi ölöp jinöŋ mörin.” Jikegö kiripo galöm (sikiriti) yeŋön mewöyök Jisös memba nuŋgulumŋe qekötahöget. Mewö.

66 Nalö miaŋgöreŋ Pitönöŋ kiripo uruŋe sombemnöŋ malök. Emu maliga jike nup galöm bohonŋaŋgö welenqeqe ambiŋi kunŋan miaŋgöreŋ kaŋgorök. 67 Kaŋgota Pitönöŋ könöp kösutŋe jömöri ehiba kewö jiyök, “Gi mewöyök Nazaret azi Jisös miambuk malnöŋ.”

68 Mewö jiyökmö, Pitönöŋ qaŋ köla kewö jiyök, “Keu jizani, mi qahö möta köndatzal.” Mewö jiba kiripo naŋguŋe geiga kinda kuruk qerök.

69 Naŋgunöŋ geiga welenqeqe ambi kunŋan i miaŋgöreŋ kunbuk eka azi kösutŋe kingeri, i könahiba kewö jii mötket, “Azi kiaŋön mönö yeŋgöreŋök kun akza.”

70 Mewö jii mötketmö, yaŋön kunbuk qaŋ kölök. Qaŋ köliga nalö borom kun teköiga azi kösutŋe kingeri, yeŋön kunbuk Pitögöra kewö jiget, “Göŋön Galili azia kun akzanaŋgöra mönö alakŋa, yeŋgöreŋöhök kun akzan.”

71 Mi möta könahiba nanŋi qesuahöm aŋguba jöjöpaŋ keunöŋ jim köhöiba jiyök, “Azi keuŋi jizei, mi qahö möt waŋgizal. Muneŋ jibileŋak ewö, Anutunöŋ mönö likepŋi meleŋ niŋgima.”

72 Mewö jiba kiniga miaŋgöreŋök kuruk qeri yahöt ahök. Kuruk qeriga Jisösgö keu kewŋö jii möröhi, Pitönöŋ mi mötmöriyök, “Göŋön indimŋi karöbut qaŋ köl niŋginöŋga kuruknöŋ qeri indimŋi yahöt akŋa.” Keu mi mötmöriba wösöŋi julmamgö aiga sahöt böliyök. Mewö.