6
Lama moröŋan muŋgem supap mohot mohot munjuratza.
Mewö möta yuai kewö asuhui ehal: Lama moröŋan kimbi köpep supapŋambukö muŋgem supapŋi (sil) 7 mieŋgöreŋök mutukŋi munjurata kötulök. Kötuliga bem jembon 4 yeŋgöreŋök kunŋan keu kewö jiyök, “Mönö asuhuba kanöŋ!” Keuŋi mi wölpöndaŋ tandök ewö köhöikŋanök qeri möral. * Zek 1.8; 6.3, 6Mewö jiiga möta miaŋgöreŋök hos tuatŋi kun asuhuiga ehal. Hos miaŋgö qakŋe azi kun timbiŋambuk tari tosatŋan ila jalö waŋgigetka nöröpŋe kölök. Mi köla yarönöŋ luhut ala malöhaŋön mönö kunbuk hos qakŋe yarönöŋ luhut almamgöra anök. Mewö.
Lama moröŋan muŋgem supap (sil) yahötŋi munjurata kötuliga bem jembon yeŋgöreŋök yahötŋi yaŋön keu kewö jii möral, “Mönö asuhuba kanöŋ!” * Zek 1.8; 6.2Mewö jiiga miaŋgöreŋök hos kun sileŋi pisikŋi somabölambuk asuhuiga ehal. Azi kun hos miaŋgö qakŋe taröhi, Anutunöŋ mönö i yom karim gili luai qahöwakŋapkö kukösumŋi waŋgiyök. Mi waŋgiiga gölmenöŋ aum aŋgöhöba kömumegöra kuŋguiga ambazip uru mem wahöt eŋgimawaŋgö kukösumŋi miwikŋaiyök. Mi miwikŋaiiga bimgö sou keta bölökŋi waŋgigetka memba anök. Mewö.
* Zek 6.2, 6Lama moröŋan muŋgem supap (sil) karöbutŋi munjurata kötuliga bem jembon yeŋgöreŋök karöbutŋi yaŋön keu kewö jii möral, “Mönö asuhuba kanöŋ!” Mewö jiiga miaŋgöreŋök hos injaŋi kun asuhuiga ehal. Azi kun hos miaŋgö qakŋe taröhi, yaŋön inapkö lömbötŋi kewötpingö dop ipŋi (skeil) mi böröŋan memba tarök. Mewö tariga bem jembon 4 yeŋgö sutŋineyök kunöŋ keu jiiga kourukŋi tandök ewö kewö möral, “Silim mohotkö töwaŋi (Kina 5) miaŋön ölöp 1 kilogram wit flaua me 3 kilogram bali flaua mi bohonŋi meman. Töndup nenegö oil ip aka wain kösö nup mi mönö kude mem bölime.” Mewö.
Lama moröŋan muŋgem supap (sil) 4:ŋi munjurata kötuliga bem jembon 4:ŋan keu jiiga kourukŋi kewö möral, “Mönö asuhuba kanöŋ.” * Eze 14.21Mewö jiiga miaŋgöreŋök hos kun sileŋi gohotgohot aka kaukauŋambuha asuhuiga ehal. Hos miaŋgö qakŋe taröhaŋgö qetŋi mi kömupkö kondotkondot Toŋi. Yaŋgö kösutŋe kömupkö uŋem miri Toŋan mewöŋanök i wuataŋgöba kayök. Gölme mendeŋgetka bahöŋi 4 ahöiga mieŋgöreŋök kungö ambazipŋi mi galöm köl eŋgibitkö kukösumŋi mi Anutunöŋ etkiyök. Kukösum mi etkiiga ösumŋiran gölmegö ambazip bahöŋi mi kewö mem kömum eŋgiyohot: Tosatŋan sou ketaŋan (bainat) auba kömuget. Tosatŋan bödinöŋ kömuget. Kawöl kanjamŋambuknöŋ tosatŋi eŋgömeiga kömuget aka tosatŋi mi gölmegö sömbup kalŋi mieŋön eŋgöhögetka kömuget. Mewö.
Lama moröŋan muŋgem supap (sil) 5:ŋi munjurata kötuliga miaŋgöreŋök Anutugö ambazip tosatŋi eŋgugetka kömugeri, yeŋgö uŋaŋini eŋgehal. Yeŋön Anutugö Buŋa keuŋi aŋgö köla naŋgöba jim sehiba malgeraŋgöra eŋgugetka kömumba alta bapŋe ahöget. 10 Euyaŋgöreŋ ahöba köhöikŋanök kewö qetket, “O Kembu kukösum Toŋi, göŋön diŋdiŋi aka ölbölŋi akzan. Miaŋgöra mönö nalö dawik mambörin teköiga miaŋgöreŋ gölmegö ambazipŋi kewöt eŋgiba keuŋini jim teköman? Neŋön gi welen qem gihiinga neŋgugetka sepninaŋgö kitipŋi mi mönö wani nalönöŋ meleŋnöŋga qakŋine öŋgöma?”
11 Mewö jigetmö, maluku tuatŋi köröpŋi mi mohot mohot yeŋgöra köl eŋgiget geiga Anutugö jimkutukutu kewö eŋgigetka mötket, “Iŋini mönö toroqeba nalö töröptökŋi mamböta malme. Mötnarip alaurupŋinan toroqeba urugö nup memba malgetka iŋini ewö mewöŋanök eŋgugetka kömume. Yeŋön kömugetka jaŋgö alali, miaŋön dopŋe aiga nalö miaŋgöreŋök mönö eŋgugeri, yeŋgö keuŋini jim tekömam.” Mewö.
12  * Ind 11.13; 16.18; Ais 13.10; Joel 2.10, 31; 3.15; Mat 24.29; Mak 13.24-25; Luk 21.25Lama moröŋan muŋgem supap (sil) 6:ŋi munjurata kötulöhi, mi uba ehal. Mi munjurata kötulöhi, nalö miaŋgöreŋ kenöŋ tandökŋi sohosohoŋi gilök. Wehön jeŋan böuktutuk ala injaŋ köla wösöbirikö malukuŋi sanjöp ewö (meme jupŋan memeŋaŋgö tandök) aiga söŋauyök. Köiŋ jeŋan meleŋda lökŋanök pisihiba sep ewö ahök. 13  * Ais 34.4Mewö aiga seŋgelau suepnöŋ ahözei, mieŋön mönö gölmenöŋ etket. Newaŋ kötŋi gohoriba tatketka luhut köhöikŋan qeba utuköba mumburatiiga erakzei, mönö miaŋgö dop buratiba gölmenöŋ tata pilpil etket.
14  * Ind 16.20Mewö etketka suep ehakzini, miaŋön mönö ayapköyök. Kimbi köpep köpeigetka öröba anakzawaŋgö dop mönö wölakzak öröba anda ayapköyök. Mi ayapköiga kunduŋi pakpak aka köwetkö gölme jölanŋi jölanŋi mi mönö körek ahöahöŋineyök zilaŋ kök ala sömuniget.
15  * Ais 2.19, 21Mewö asuhuiga gölmegö kiŋ kembuŋi kembuŋi, azi jembonŋi jembonŋi aka suahö galömŋi galömŋi mieŋön mönö ölöŋ köla asambötket. Ambazip kindiŋbirik qetbuŋaŋinambuk, ambazip kukösumŋinambuk mi mönö körek kök ala asambötket. Nanŋini nupŋini memakzei aka toŋinaŋgö welenŋini öne qemakzei, mi mönö körek pakpak baŋet, köt kinimŋi aka kunduŋaŋgö sem siaŋi jaruba miaŋgöreŋ asambötketka eŋgehal. 16  * Hos 10.8; Luk 23.30Miaŋgöreŋ asamböta kunduŋi Toŋi aka sem sia Toŋi eŋgohola kewö uletket, “Iŋini mönö kunduŋi jim tekögetka buaköba kaba turum neŋgiget. Jakömbuak dumŋe tatzawaŋön jemesohol köl neŋgibapuköra aka Lama moröŋaŋgö irimsesewölŋan neŋgubapuköra mönö jim tekögetka közamböt neŋgiget.” Mewö uletket. 17  * Joel 2.11; Mal 3.2Yetkön irimsesewölŋiri aukŋe kondeljahori, miaŋgö nalöŋi ketaŋan mönö kam kuŋguba ahöza. Mi kunŋan kun mesohol köla kinmawaŋgö dop qahö. Mewö.

*6:2: Zek 1.8; 6.3, 6

*6:4: Zek 1.8; 6.2

*6:5: Zek 6.2, 6

*6:8: Eze 14.21

*6:12: Ind 11.13; 16.18; Ais 13.10; Joel 2.10, 31; 3.15; Mat 24.29; Mak 13.24-25; Luk 21.25

*6:13: Ais 34.4

*6:14: Ind 16.20

*6:15: Ais 2.19, 21

*6:16: Hos 10.8; Luk 23.30

*6:17: Joel 2.11; Mal 3.2