Aa fig are aa taka, in faat anĩ yõya nigin dan bagai.

Aa gaula sumeĩ biya are aa taka nẽ sumin aarau ado warumutei anidi bunem dinodig. Tempel bun, tamo kayau Negur bun kosẽ douf sain bun, aa gaula sumeĩ biya anĩ tõ difedig, are sumeĩ meli bagai youf nigin.

Aa hisop are aa taka, pris idi naan be naud bun nu difeis fen, safina bun be tamo kayau bun wiri difedig, are idi suma anĩ bunem Negur nẽ lo fiya bun fateul wõ youf nigin age difedig.

Aa Oliv are aa taka, anĩ faat adodig. Juda idi aa oliv faat nem moul dinodig. Moul anĩ saaf yabiya nigin, bouwa bun wã fiya di, sumeĩ biyauf nigin ado ereb tunĩ musei nigineg anĩ kabĩ difenẽdig. Juda idi neid ibodõya bun, oliv are safina odug bagai. Aa Oliv nẽ Arei are arei taka Jerusalem non ibodok, an aa oliv ifaredidig.

Rom tamo kayau neid tobonunã bun, tamo taka ereb sane bagai age fen ouf, are eig fiya, taka yukesiya be, taka fefu fiye ken, bẽ yaleya anĩ, idi ĩ kafĩ fiya bun aa tetek ilun dũ di, laa fouf nigin age difedig.

Idi aa masak uru aninem aa tetek dinodig, age difel fen, idi tutim tamo aa tetek bun dũdig, oo, malum ĩ difõdig. Age de fen, idi aa tetek dales diteg ifare di, tamo an ditornẽ di, ĩ an kuuri yef ile laa fedig. Tamo taka ĩ aa tetek bun eig de duk, ĩ darau odug bagai yalef ile fen, dum ĩ laa fedig. Are anĩg taka, mama yaleya nigin odug bagai.

Aa wain faat are faat taka. Anĩ bunem wain dinodig. Juda idi nedi kabier aa wain musei ditenẽdig, age de fen, idi aa wain faat musei youf nigin aa wain el de lo difedig.

Abel are, ĩ Kain tura naal.

Abraham ĩ, Israel tamo kayau neid temeid matu. Kulu bagai, Negur ĩ Abraham irokenen, are ĩ teneub mata taka ĩ an ibodõf nigin ifenẽf yen. Age fe di, teneub anĩ dogo neid bagai youf. Abraham yogon fõ gariya itor ken, ile teneub anĩ imirẽf nigin Negur ĩ irokenen. Abraham dõf age fen. Ĩ yar musei, gerõ bagai iyok ile, ile teneub anĩ fotou fen. Teneub are gama Israel dedig anĩ.

Are Abraham bun, Negur in uyulil bar itenẽya anĩ inon. Negur ĩ Abraham irokenen, ĩ ado in ibor tar anĩ, Negur nẽ tamo kayau bagai wowã youf, aib idi Negur dõ difouf are, Negur idi kulatun fediyouf yen.

Abraham aiwa, Sara dedig anĩ yalen. Idi kesu taka yaleya san, ile ile, idi uruwom tubau bagain. Anĩ nigin, Negur memelik ino di, Sara kesu gõ fen. Idi kesu yana dũ Isak den.

Isak ĩ biya fen, ĩ kayau Rebeka dedig anĩ yalen. Rebeka kesu uru gõ fen, are idi aina ado, idi yeneid are Esau, Jakop ado. Jakop ĩ yana takag Israel, ĩ bunem Juda idi, Israel tamo kayau yeya yana anĩ dalen.

Kesu monog uru anidi taka, Jakop ĩ kayau uru tura ado anĩ gei fen, idi yeneid Lea, Rahel ado, babaneg kayau uru yalen. Ĩ kesu monog tuwelf gogũ fen, idi anĩ Israel ibor tuwelf neid tubuid tar. Idi yeneid Jon nẽ kurõ fesiya od 7:4-8 (Revelesen 7:4-8) nẽ itotoya bun gĩ fen.

Kesus monog eneidi, kesu musei adodof ile, Israel tamo kayau fulus bagai felen. Anĩ nigin, idi adok Abraham nẽ ibor tar.

Negur uyulil tamo inon, are Adam. Negur ĩ Adam kare fiyen, are teneub nem.

Adam ĩ, aiwa Eva adom, uyulil Negur nẽ ĩtãfiya difodul ken, mosor dinon. Sain anĩ bunem ilen, tamo mosor bun dilelen.

1 Korin 15:45 bun, Jesus kristus ĩ, idikeleya nẽ Adam yef, ere nigin, ĩ tamo kayau, nedi mosor bun tamal kel gei fedin. Adam im mosor inon, anim tamo kayau tunĩ ganan mosor bun dilelen. Jesus Kristus, tamo kayau dogo neid mosor bun tamal kel gei feid fen, idi ibodõya mata anĩ ifenẽdin.

Sain taka bun, kayau taka, moul sumeĩ meli bagai anĩ, Jesus ye kulo fouf nigin irou isin. Moul enei, gulub taka, are meein gariya fire taka nem dinon anĩ namen ibodon. Meein age fiya anĩ alabasta dedig.

Juda idi, Negur bun sesewi fediya anĩ age difedig. Idi, sesewi fiya nigin, yaro, are sipsip, meme be, bulmakau age fediya anĩ didenkesidig. Alta are, modoũ an sesewi difedig. Meein nem anĩ dinodig.

Jesus uyulil in dõ fiya tar tuwelf igirnẽdin, are idi yogon aposel wowã douf nigin (Matyu 10:1-4; Mak 3:13-19; Luk 6:12-16).

Tamo enidi ĩ geid dibod ken, ifelnẽdin. Jesus laaf fen, kel fã yen sain bun, idi ĩ meledim dilen. Ĩ, tamo kayau bun, ereb idi dilen ado biya od wogõ difediyouf nigin idi susur fedin. Idi, tamo kayau Jesus nigin momoi den anidi neid uyu irouya wowã den.

Aposel nẽ buk bun, Pol, Banabas ado, tamo tunĩg, are idig aposel dedig. Idig tamo Jesus Kristus nẽ kabĩ yaleya nigin igirnẽdin. Inglis nem, tamo enidi are ‘apostles’ dedig. Od enei nẽ gariya are, tamo idi susur fedif anidi.

Areopagus are, arei mudu taka nẽ yana Atens taun ibodon. Taun tamo kayau yeneid adodo arei mudu anĩ bun guru difedig. Anĩ nigin, tamo kayau anidi neid guru fiya anĩg Areopagus dedig.

Aron ĩ, Jakop nẽ gere tar tuwelf atun taka Lewi nẽ ibor bun tamal anĩ taka. Tamo anĩ, ĩ pris kabĩ yalouf nigin uyulil igirnen, are Negur ĩ iron, Aron nẽ ibor tar anidi, Israel tamo kayau are Juda anidi atun, pris dibodõf, yen.

Aron ĩ, are Moses tura biya. Idi uruwom uyu kũ de fen, Israel tamo kayau Isip neid ferfer difaren sain bun, kabĩ dalen. Idi israel tamo kayau kafĩ fiya bun tamal dalelnẽdiyouf nigin uyu diroun.

Sain taka bun, Israel tamo kayau tunĩ, Moses ado Aron kiwai difenẽdi di, Negur ĩ, idi anĩ uyu irouya tamo bagai igirnẽdin anĩ yaor fe ifelnẽdin. Negur, idi Israel ibor tuwelf uyu irouya morou morou neid manig dale, Negur nẽ Salafat bun gõ difouf nigin irokenẽdin. Negur ĩ iron, tamo ĩ uyu irouya ibodõf nigin igirnen, are yogon manig ifaraũf, yen. Naa taka di, Aron nẽ manig bonu fel, ifirau kel fen, faat yun. Negur iron, sain anĩ bunem ilauf ganan, Aron nẽ manig enei are Negur nẽ Salafat bun bar itenẽya nẽ bogis namen uris gen ibodõf, yen.

Asaia ĩ Negur nẽ propet odug taka. Kulu bagai Jesus Kristus tenebur isiya sã mog, Asaia ereb musei ĩ bun wowã youf anĩ nigin wogõ yen.

Atemis are kayau waitou taka yana, anĩ Asia teneub bun, tamo kayau musei, ĩ yana dalesedig.

Awa Uur Fateul are Negur nẽ Uur. Awa Uur Fateul, Negur, Jesus Kristus, idi are tekelei (Matyu 28:19). Negur nẽ Awa Uur, tamo kayau Jesus Kristus nigin momoi def anidi bun ibodõdig. Ĩ kabĩ yaledig are eig fiya:

Baali are faat taka age fiya. Are wit gen. Tamo kayau in faat anidi nem, bret dinodig, anĩ ere, baali bunem bret dinof, are to biya, are wit bunem bret dinof bagai gen sã.

Babilon are, taun odug bagai taka anĩ yana. Kulu bagai, tamo kayau teneub anĩ bun temeleid, Israel tamo kayau geid kusĩ de fen, idim wal difedin. Idi, Israel tamo kayau musei ferfer gen, nedi teneub bun guri difeid diroulen, age dife di, Israel tamo kayau idi, sewenti yar an difaren (Matyu 1:11, 12, 17; Aposel 7:43).

Jon nẽ kurõ fesiya od buk bun (Revelesen 14:8, 17:5, sapta 18) taun taka Babilon def anĩ nigin irok. Are fau Rom taun nẽ be uris nigin anĩ irok. 1 Pita 5:13 nẽ itotoya bun, Babilon are fau de be Rom taun nigin irok.

Bal are idegẽya waitou taka. Kulu bagai, Israel tamo kayau, Israel teneub bun dile dibodõya sã mog, tamo kayau teneub anĩ bun difaredig, Bal waitou anĩ yana dalesedig. Sain tunĩ, Israel tamo kayaug, Negur yana yaleseya ditor ken, Bal waitou yana dalesedig. Anĩ nigin, Negur fatuk bagai idi nigin name isedig.

Balam are Negur nẽ profet taka. Sain taka bun, teneub taka Moab dedig anĩ bun, an Israel tamo kayau neid kiwai tar difaren. Nedi king are Balak dedig. Balak ĩ, Balam Israel tamo kayau isisnẽdiyouf nigin wau iron, age fe di, ĩ idi kusĩ bun wal fediyouf nigin. Uruwa bun, Balam ĩ itoron, anĩ ere, ĩ Balak nẽ modoũ bun ileya nigin gariya inon. Ĩ fau naab luwe ile mog, engel naabura ĩ ilauf nẽ bun katĩ fel ifaren. Donki Balam teten ibod ken, ilen anĩ, engel ile fen, norũ fel ileya nigin itoron, malakaĩ, Balam ĩ wagĩ fiyeneg ileya san. Are donki Balam iroken ken, ĩ ou fiyen.

Balam ĩ, Israel tamo kayau to isisnẽdin, ere nigin, ĩ keleĩ, Negur el fiya idi ifenẽdin. Balam nigin, Nu Testamen nẽ itotoya bun irok, are ĩ moni nigin wau laa fen, ere nigin, Balak ĩ Negur nẽ tamo kayau neid kiwai fiyeneg, Balam ĩ Balak isennẽf nigin yo yen (Namba sapta 22-24).

Bar itenẽya are tamo kayau uruwo atun dinodig. Sain tamo taka ĩ bar itenẽya inou fenẽ, ĩ tamo taka nigin, ereb taka agef kenẽf anĩ, age afouf bagai fiyek, are abag solo fef, are tamo taka ĩ nigin, ereb taka age fenẽf anĩ, age afouf bagai yedig. Negur ĩ yogo, yogon tamo kayau geid bar itenẽya anĩ ino fen, yogon tamo kayau ĩ dõ difiyẽf are, ĩ dogo neid Temeid ado Odug ibodõf nigin, age afouf yen.

Negur bar itenẽya uruwo anĩ inon. Bar itenẽya uyulil bun, Negur ĩ Moses ado bar itenẽya inon, agef fen, Negur iron, are idi aib aib yogon lo dirouwauf are, ĩ yogon tamo kayau bagai gen gei fediyouf. Anĩ ere, takam in lo dõ feleya bagai kisin san, anĩ nigin, takam, Negur mala bun bar itenẽya uyulil bun, madur bagai wõya kisi feleya san. Bar itenẽya mata bun, Negur iron, tamo taka Jesus Kristus nigin momoi youf are, ĩ Negur mala bun madur bagai wõ ye di, ĩ kel yaleyẽf, are ĩ in lo ifodulẽya be mosor to inon gen Negurem ileyẽf.

Bogis anĩ, aa nem dino fen, bouwa ganan gol nem degẽ difelen. Namen meein odudug uruwo, are teten Negur ĩtãfiya ten itotodin anĩ dibodon (Hibru 9:4, 5). Israel tamo kayau gerere tuan luwe diyok dile fen, bogis are de ado faali de dilen, age de fen, Negur nẽ Salafat bun dinodig. Bogis ado safina namen ifaredin, are fateul bagai, ere nigin, are bar itenẽya Negur ĩ Israel tamo kayau geid inon anĩ nẽ uris.

Barak are, Israel tamo kayau neid uyu iroukenẽdiya odug taka. Ĩ kusĩ bun idi uyu iroukeneĩd dile fen, nedi kiwai tar wal difedin (Jas sapta 4, 5).

Bea are gaar taka odug bagai, anĩ teneub tunĩ bun dubur difaredig.

Belsebul are uur neid yana taka anĩ, ibor tunĩ Israel tamo kayau non difaref anidim yana dalesedig. Gariya bun bagai, ĩ Bal-sebub deden. Ĩ anĩg, Satan dedig, yogo anĩ kaa sesen neid mudur.

Benjamin ĩ are Jakop nẽ kesu monog tuwelf anidi taka, ĩ Juda neid tubuid tar tuwelf ibor anĩ taka.

Dawid ĩ are Israel tamo kayau neid king odug bagai. Ĩ in tama Jesi dedig anĩ ne naal ibuye. Kulu ĩ fau king wõya sã mog, ĩ ne tama nẽ sipsip anĩ lo lo fedin. Sain ĩ fau kesu oosi mog, guru fiya taka bun, ĩ tamo odug bagai taka Goliat ado kusĩ de fen, yukesin.

Dawid ĩ, Negur nigin fatuk bagai wau laa fedig. Ĩ, Negur yana yaleseya nigin seg musei itotodin, anĩ Sam dedig.

Are Dawid nẽ ibor bun anĩ Jesus ĩ wõ yen (Rom 1:3; Revelesen 22:16). Kulu bagai, Kristus nigin anĩ iron, kel yaleya tamo anĩ Negur sur fouf, are King Dawid nẽ ibor bun tamal taka.

Inglis od bun, dõ fiya tar are ‘disciple.’ Jesus nẽ dõ fiya tar ganan, are tamo kayau Jesus nigin momoi def, in od karĩ de fen, dõ difedig anidi.

Aposel nẽ buk bun, od tunĩ Jesus nẽ dõ fiya tar nigineg agef faded fef, are ‘tamo kayau Jesus nigin momoi def anidi’ oo ‘tureid tar’ dedig.

Sain tunĩ, Matyu, Mak, Luk ado Jon nẽ buk bun, dõ fiya tar tuwelf anidi nigin irok. Dõ fiya tar tuwelf anidi, ĩ weim dibodõf nigin, fire bagai igirnẽdin. Jesus ĩ, idig ne soosi tamo wowã douf nigin sur fedin, are Matyu 10:1-4 bun irok kilei.

Eliya ĩ Negur nẽ profet odug taka. Ĩ nigin, nenerĩ Jems 5:17 bun anĩ itoton.

Engel are, Negur nẽ soosi tamo tar, saa ilun Negur wagen difaredig. Soosi tamo enidi, are tamo bagai sã, are idi uur. Idi malam ilediya kisi feleya sã, dogom yaorediyouf dogol.

Negur ĩ, yogon engel yogon kabĩ dalekenẽf nigin sur fedidig. Dogo neid kabĩ are, Negur nẽ tamo kayau lo fediya nigin (Aposel 12:6-11, 27:23; Hibru 1:14). Sain taka taka, Negur, tamo taka bun od mata wogõ youf nigin yogon engel susur fedidig.

Engel mudur ĩ Maikel dedig (Jud 9). Engel yana ado taka, are Gabriel (Luk 1:19, 26).

Epikurus nẽ dõ fiya tar ado, tamo kayau foi fiya anĩ ‘Stoik Tamo’ dedig anidi, idi keleĩ adodo anĩ, momoi ado keleĩ yaleya nigin fatuk bagai kisi difedig. Idi eneidi katõ fiya nigin, sain musei daledig.

Isak kesu uruwo gõ fedin, are idi aina ado. Idi Esau ado Jakop dedig. Esau ĩ kesu matu, anĩ ere, sain taka bun, Esau ĩ naũ fe fen, ĩ saaf bunem yogon kesu matu nẽ akor anĩ Jakop bun solo fen. Esau ĩ, are Jakop anĩ, yogon kesu matu nẽ el fiya anĩ yalouf nigin, saaf tar yabiya bunem solof ifenẽf nigin yo yen.

Eva ĩ Adam aiwa. Negur teneub kare fen sain anĩ bun, ĩ uyulil Adam ino fen, ĩ Adam ne siri tuwa taka anĩ yale fen, anĩ nem Eva ineyen. Kũ fenẽya bunem, Eva gogour nẽ sigor dõ fen, are Satanem Eva idegnẽ di, kayau ĩ aa faat anĩ Negur to dãf nigin idi irokenẽdin anĩ yon. Kayau ĩ aa faat tunĩg, Adam ifenẽ di, ĩ aa faat anĩ yon. Idi uyulil Negur nẽ ĩtãfiya anĩ wal difen, sain anĩ bunem ilen, tamo kayau mosor dinodif disin. Adam Eva ado idi kesu towo, are idi Kain, Abel ado, Set.

Tamo faat korõ felediya, idi kabĩ tamo odudug, king nẽ aruna daledig. Teneub uyu takã tunĩ neid tobonunã bun, idi tamo anidi faat korõ difel kenẽdidig.

Farao ĩ Isip tamo kayau neid king odug nẽ yana. Nedi king odug ganan Farao dedig.

Farisia are, Juda tamo kayau idi atun, mala odug bagai taka. Farisia idi musei lo ifelnẽya kabĩ daledig. Idi, Negur nẽ lo Moses ifenen anĩ keleĩ bagai, age de fen, idi tobonunã musei ado nun idi tobol difedin anĩg difelnẽdidig. Idi tamo kayau tunĩ ganan wal fediya gen momoi de fen, dogo yeneid dalesedig. Idi sain musei mala yaleya tamo, idi namedin kisi sane ado fen, mayarẽ biya gen tamomoi dedig. Farisia idi, Jesus kiwai difen ken, ĩ dukesiyouf nigin kisi difen.

Gidion ĩ Israel tamo kayau nẽ uyu irouya odug taka. Ĩ momoiya odug ado fen, Negur ulum iroukenẽf nigin ĩ bun kosẽ yen. Ĩ tamo musei sã kusĩ bun irou leid fen, idi Negur nẽ isennẽya bunem nedi kiwai tar wal difedin.

Grik anĩ kantri taka. Grik nẽ taun mudur are Atens, are Korin tauneg, teneub anĩ bun ibodok.

Grik tamo kayau idi keleĩ odug bagai adodo, anĩ nigin, tenebur tamo kayau nedi kisi biya nigin anini difiyẽdidig. Tamo kayau musei Grik od anĩ wogõ dedig. Jesus Kristus teneub enei bun ibod mog, tamo kayau keleĩ adodo ganan Grik od anĩ wogõ dedig. Nu Testamen anĩ Grik od nem uyulil ditoton.

Hagar ĩ Abraham aiwa Sara nẽ fõ nẽ kabĩ kayau taka anĩ. Sain anĩ bun, Sara kesu taka fau gõ fiya sã mog, ĩ Hagar Abraham ado denẽf nigin irokenen, age fe di, Abraham bunem Ismael dedig anĩ wõ yen. Ismael ĩ anĩ, Negur ĩ, Abraham ifenẽf nigin promis od to ifenen. Anĩ nigin, Ismael ne ibor tar, Negur ĩ ereb Abraham nẽ ibor tar ifenẽdiyouf nigin promis od ifenen anĩ to dalen. Dum, Sara yogo Isak gõ fen, kesu anĩ, Negurem Abraham Sara ado ifenẽdiyouf nigin promis od anĩ irokenẽdin.

Sara Isak gõ fel fen, ĩ Hagar monẽ fiye ken, kesu ado irudi di, diyawon. Hagar ile arei mudu Sinai dedig non ibodon. Arei mudu anĩ bun an, yar musei ilele di, dum Negur Moses iroken ken, ĩ yogon ĩtãfiya ifenen. Anĩ nigin, Galesia 4 bun irok, are Hagar ĩ ferfer kayau taka, ĩ idi tamo kayau Negur nẽ ĩtãfiya nẽ ferfer dibodok anidi neid malakanon yef. Idi ferfer, ere nigin, idi momoi def are, tamo taka Negur nẽ ĩtãfiya ganan dõ fef anĩ, ĩ Negur mala bun madur bagai wõ ye di, Negurem yalouf def. Idi Negur nẽ od eig fiya anĩ to momoi def, are ganan Jesus Kristus nigin momoi def anidi Negur mala bun madur bagai wõ def anĩ.

Inglis od nem ‘Gentile’ are tamo kayau ganan idi Juda sã anidi. Grik od bun anĩ nẽ gariya are teneub ganan bun tamo kayau difaref anidi, anĩ are, Juda sã anĩ. Juda idi amam amam yeya bagai dedig, ere nigin, Negurem idi yogon tamo kayau igirnẽdin nigin, age fe di, idi teneub tunĩ ganan nẽ tamo kayau lalai difedidig.

Sain Juda idi Negur yana dalesau fenẽ, idi ‘Halleluya’ de kakaĩ dedig. Od anĩ nẽ gariya are “Negur yana taleseg.”

Hermes are, waitou taka yana anĩ Grik idi yana dalesedig. Grik tamo kayau dirõdig, ĩ waitou tunĩ ganan neid soosi tamo.

Nu Testamen bun, are tamo aiwa adodo fire fire anĩ Herod dedig:

‘Hibru’ nẽ gariya are ‘Juda’ de tekelei. Tamo kayau idi Hibru difiyẽdif are idi Abraham nẽ ibor. Yana anĩ nedi tubuid tar taka bunem isin, ĩ anĩ Eber dedig. Od Juda idi dirõdig anĩg, Hibru dedig.

Od Hosiana, are aanya anĩ tamo kayau, tamo be kayau be taka suma bun yana odug difenẽf nigin kakaĩ yei yeya anĩ agei difedig. Anĩ nẽ gariya, are “Negur sã ĩ isennẽf!” be, “Negur yana taleseg.”

Isak ĩ Abraham Sara ado neid kesu. In yana nẽ gariya are kasã. Abraham bun ulouf.

Jesus ĩ ‘tenebur enei nẽ Isennẽya Tamo’ dedig, ere nigin, ĩ tamo kayau idi dalouf nẽ kafĩ fiya bun tamal diyawauf nigin naab anĩ kã fen. Jesus laaf fen, tamo kayau ganan nigin ye fen kafĩ fiya anĩ yalen, anĩ nigin, Negur idi ĩ nigin momoi def anidi ganan neid mosor nigin weder tu keledidig. Negur Jesus nigin ye fen, idi madur bagai gen iledidig.

Isip are teneub taka Israel non ibodok anĩ. Israel tamo kayau 400 yar Isip oun ferfer difaren (Aposel 7:34-38).

Israel yana anĩ, are Negurem Jakop ifenen, ĩ Isak in aiwa Rebeka ado neid kesu uru atun taka anĩ.

Israel nẽ ibor are yeneid tunĩ wogõya fire fire bunem dirõdig. Idi anĩ, ‘Israel nẽ tamo kayau’ dedig, dum idi ‘Juda’ dedig, age de feneg, idig ‘Hibru’ dedig. Juda bun ulouf.

Teneub Israel tamo kayau dibodok nẽ an, anĩg Israel dedig. Uruwa bun, teneub are Kanan dedig. Gamag teneub anĩ Palestin dedig.

Jakop de tamo tekelei Israel anĩ. Ĩ ne kesu monog tuwelf anidi adon, idi anĩ Israel nẽ ibor tuwelf nẽ tubuid tar. Abraham bun ulouf.

Jepta ĩ kusĩ tamo odug taka. Sain taka bun, ĩ Israel tamo kayau neid uyu irouya tamo ibodon.

Jeremaia ĩ Negur nẽ propet taka. Ĩ, Kristus kel yaleya tamo Negurem sur fe di, isi youf nigin promis od iron anĩ isiyouf sain bun, ereb musei wõ youf anĩ nigin profet od wogõ yen.

Jesi ĩ King Dawid ne tama, anĩ Jesus Kristus nẽ tubu. Kulu bagai, propet Asaia, Jesi ado Dawid nẽ ibor bun tamal Kristius wõ youf anĩ nigin itoton.

Jesus yana anĩ nẽ gariya, are “Kel yaleya tamo,” oo “Neda Negur anĩ neda Kel Yaleya Tamo”. Yeneid tunĩ Jesus nigin wogõ dedig are: Jesus Kristus, Negur Naal, Tamo Naal, Dawid Naal.

Jona ĩ Negur nẽ propet taka. Sain taka bun, Negur in biya od wogõ youf nigin, taun taka Niniwe dedig bun an ĩ sur fiyen. Anĩ are, Jona modoũ taka bun ileya nigin ye fen, waag taka bun sõ yen. Sain ĩ waag bun ibod mog, Negur yau uyẽ ado odug bagai sur fen. Tamo kayau waag anĩ bun difaren idi, Jona bunem yau uyẽ ado odug bagai wõ yen anĩ kelein. Anĩ nigin, idi ĩ maaĩwõ diran. Gau odug takam ĩ yakalaisile di, ĩ gau te namen naa towo ibodon, age fe di, gau ĩ, Jona teneub bun ilu iran. Anĩ bure fele di, Jona Negur nẽ od dõf fen, Negur nẽ biya od wogõ youf nigin Niniwe taun ilen.

Nu Testamen bun, tamo yeneid Josef dedig tunĩ difaref.

Moses laa fe di, Josua im anĩ Israel tamo kayau neid uyu irouya wõ yen. Ĩ Kanan teneub bun idi guri feid iroulen, teneub are, Negur idi ifenẽdiyouf nigin promis od iron anĩ. Age de fen, idi tamo kayau an difaren anĩ kusĩ bun wawal difedin. Josua ĩ teneub anĩ foif fen, Israel nẽ ibor tar mugu mugu bun teneub morou morou anĩ ifenẽdin, anĩ are, Lewi ne ibor idi pris kabĩ dalouf nigin igirnẽdin anidi dogol teneub taka morowouf nigin ifenẽdiya sã. Josua ĩ uyu irouya odug wõ ye fen, tamo kayau waud tekelei ado Negur dõ difouf nigin totol od irokenẽdin. Ĩ iron, “Neu tamo kayau ado aya nigineg, amã Negur dõ mafouf,” yen.

Juda ĩ Jakop ne gere tar tuwelf anidi taka. Ĩ Juda ibor dedig anĩ nẽ tubuid. Teneub in tubuid tar difaren are Judia dedig, teneub anĩ bun, taun Jerusalem dedig anĩ ibodok. Jesus Kristus ĩ Juda nẽ ibor bun tamal wõ yen.

Tamo kayau idi Juda dedig, are Abraham nẽ ibor tar. Abraham bun ulouf.

Gariya bun, Juda yana nẽ gariya are, “tamo kayau idi Juda nẽ teneub bun difaref anidi,” are tamo kayau Juda nẽ ibor bun temeleid. Juda ibor anĩ Israel neid ibor tuwelf anidi taka. Anĩ are, dum Israel tamo kayau ganan nigin yana ‘Juda’ anĩ dirõdig. Israel bun ulouf.

Jon nẽ biya od bun, Jon yana Juda anĩ wogõ yedig, are Juda neid uyu irouya tar nigin ye fen age fedig.

Kaa sesen anidi, are Satan nẽ dõ fiya tar. Idi uur anidi anĩ, tamo morõ difenẽdi di, tamo kayau idi Negur nẽ od wal dife fen, Satan dõ difouf nigin age difedig. Sain tunĩ, idi tamo dirounẽdig, are tamo ĩ Satan nẽ kabĩ ado ereb sane bun ilauf bun, age difedig.

Kain ĩ, Adam Eva ado neid kesu matu. Ĩ yogon tura naal are ĩ Abel dedig anĩ nigin fatuk bagai kiyeĩ inon, ere nigin, Negur ĩ, Abel nẽ sipsip sesewi fiya anĩ de yen, anĩ ere, Kain nẽ saaf kabier tamal sesewi fiya are itoron. Anĩ nigin, ĩ Abel yukesin. Enei nigin, Negur ĩ iron, Kain ĩ fau de teneub ganan bun iyokesi di, tamo kayau ganan ĩ dudum difiyẽf.

Kamel are gaar odug taka anĩ, tamo kayau teten dibod ken, diyõdig. Ĩ morõ odudugeg faali fedig. Sain tunĩ kamel nẽ siwi anim kolos didi ado dinodig.

Kanan are teneub yana, anĩ Negur ĩ, Israel tamo kayau nedi teneub ouf, anĩ ifenẽdiyouf nigin promis od irokenẽdin. Gamag, teneub anĩ, are Israel dedig. Sain tunĩg, are Palestin dedig.

Koban dedig, tobonunã anĩ nẽ gariya taka to kelein, anĩ ere, ereb nigin irok anĩ, Mak nẽ itotoya 7:11-12 bun ibodok dogol.

Kora ĩ, Moses ado Aron kiwai ifeneĩd fen, kusĩ uyu iroun. Anĩ nigin, Negur fatuk bagai name fen, teneub anĩ bagã ye di, Kora ado idi ganan ĩ dõ difen anidi itob le nẽdin.

Kristen nẽ gariya, are tamo taka ĩ Jesus Kristus dõ fef anĩ.

Inglis od bun, Kristus anĩg Mesia dedig. Od Kristus, are Grik od nem, od Mesia, are Juda neid od nem. Od gariya are tamo ĩ mudur bun moul fi difelef anĩ. Ere nigin, enei are, kulu bagai, sain Negur Juda neid king taka age fiya igirnek, idi ĩ moul mudur bun fi difeledig, uris taka gen, ĩ king wõ youf nigin. Negur yogon tamo kayau kel gei fediyouf nigin, isennẽya taka sur fouf nigin age afouf yen, agef fen, tamo anĩ irou isiyouf. Tamo enei, are Kristus dedig, ere nigin, tamo anĩ, Negur igirne ken bagai sur fen.

Lewi ĩ Jakop ne gere tar tuwelf anidi taka, Jakop ne gere tar tuwelf anidi Israel ibor tuwelf nẽ tubuid tar. Lewi ne ibor tar, temple bun Negur nẽ kabĩ dalouf nigin igirnẽdin. Lewi ne ibor tar bun, pris anidi igirnẽdin, are Lewi ne ibor bun, Aron nẽ ibor bun temeleid pris anidi igirnẽdidig. Aron bun ulouf.

Jesus ne dõ fiya tar taka ĩg Lewi dedig. Ĩ yana taka are Matyu (Matyu 9:9-13; Mak 2:14; Luk 5:27-29).

Negur nẽ lo are, Buk Baibel bun buk faif uyulil ditoton bun yenek. Lo eneidi, Negur in tamo kayau nigin ye fen, anĩ Moses bun yaor fen.

Lo ifelnẽdiya tamo idi, lo Negur ĩ Juda idi nigin Moses ifenen anĩ tamo kayau difelnẽdidig. Idi Moses nẽ buk faif bun od ditotodin anidi bagai difelnẽdidig. Lo, Moses bun ulouf.

Lot ĩ Haran ne naal, Haran ĩ Abraham ne tura naal. Abraham bun ulouf. Sain Abraham teneub mata Negurem afonõf yen anĩ imirẽf nigin ilen, Lot ĩ ado dilen. Idi teneub anĩ bun dile fen, sain taka bun, Lot Sodom taun ibodõf nigin ilen. Taun anĩ nẽ tamo kayau ereb ereb sesen musei age difedig. Anĩ nigin, Negur ĩ Sodom taun daũ fouf nigin iron. Negur ĩ Lot taun anĩ bun tamal iyawouf nigin weder irowauf nigin in engel sur fen. Lot in ibor tar geid taun anĩ ditoron, idi ditor dilele di, Negur taun anĩ yã nem daũ felen. Idi taun ditor dilel mã, idi dumedin to lo difouf nigin, engel Lot irokenen, anĩ ere, Lot aiwa falei yel, dumen lo fen, kaisã bagai, kayau ĩ sol nem tamo nẽ malakanon inoya anĩ gen falei felen.

Maaĩ Giria are Israel ado Isip atun yenek. Moses bun ulouf.

Kulu bagai, Israel tamo kayau Isip bun tamal diyalelen sain anĩ bun, idi gerere tuan yar foti diyokesin. Sain anĩ bun, Negur idi saaf ifenẽdin. Saaf enei mana dedig. Naa mugu mugu bun, saaf enei saa ilunem tenebur kuku redig, anĩ ere, Sabat naa bun sã. Age fe di, tamo kayau dile saaf enei kuru difedig. Saaf enei Eksodas 16:13-36 bun es fe faded fef.

Masted are aa taka, in faat anidi nanaal bagai. Anĩ ere, ĩ odugouf are, aa odug gen, odug bagai wõ yedig.

Ada Melkisedek nigin tutuk bagai keleĩ sã, anĩ ere, Hibru sapta 5-7 nẽ itotoya bun ereb yef anĩ dogol keleĩ. Jenesis 14:17-20 nẽ itotoya bun, sain taka bun, kiwai tamo idi disi fen, Abraham ne tura nẽ naal Lot, in ibor tar geid, nedi safina ganan ado dirouneĩd fen, lei difedin. Anĩ nigin, Abraham ile fen, kiwai tamo kusĩ bun wal feid fen, Lot ado yogon safina ganan kel gei fedin. Sain Abraham kel isi mog, Melkisedek ĩ naabur fotou fiyen. Melkisedek ĩ, bret ado wain, Abraham ifen ken, Negur ĩ bun biya age fef anĩ de age fe tobol fouf nigin kosẽ ye, el fiya ifenen. Abraham ĩ, safina ganan kusĩ bunem gei fedin anĩ nẽ ten tekelei Melkisedek ifenen, age fiya gen, dum, Israel tamo kayau nedi safina ganan bun ten tekelei anĩ pris idi age de difenẽdidig. Anĩ nigin, Buk Hibru bun, Melkisedek ĩg pris taka yef. Dum, Negur, Israel tamo kayau neid pris anidi Lewi nẽ ibor bun tamal digirnẽdiyouf yen. Anĩ ere, sain Melkisedek ĩ, Abraham fotou fiyen, Lewi ĩ Abraham nẽ ibor, fau wõya sã mog. Anĩ nigin, Buk Hibru nẽ itotoya bun, sain Abraham in safina ganan bun, ten tekelei anĩ Melkisedek ifenen, are Lewi ne ibor bun temeleid pris ganan dogo neid ten tekelei anĩg Melkisedek difenen gen ileyauf yen, ere nigin, dum idi Abraham bunem wõ douf.

Moses ĩ, Israel tamo kayau neid uyu irouya odug. Israel tamo kayau Isip nẽ ferfer difaren sain anĩ bun, Negur ĩ, Israel tamo kayau uyu iroukenẽdi di, idi Isip bun tamal diya fen, teneub Negurem idi ifenẽdin anĩ bun ke douf nigin, Moses igirnen. Negur naab fire bagai bun, Moses fotou fiyen. Moses, aa taka yã uu ye mog anĩ ilen, anĩ ere, uu ya san. Ĩ modoũ anĩ bun Negur ibodok ya anĩ kelein. Age fe di, Negur ĩ wogõ fiye ken, ĩ yogon tamo kayau uyu iroukenẽdi di, nedi teneub bun ke de dilauf nigin Moses igirnen anĩ ĩ irokenen.

Negur ĩ, Moses bunem ereb biya bagai musei age fedin. Sain taka bun, Isip tamo, Israel tamo kayau dirudidi di, idi maaĩ taka, Maaĩ Giriya dedig bun disin sain bun, Negur naan wĩ yef anĩ dẽ yalouf nigin age fe di, naan anĩ garaĩ taka gen ifare di, tamo kayau teneub gere keleya bun diyok dilen. Idi dibal dilele di, Isip tamog dibalauf nigin age difen, anĩ ere, naan baban wĩ ye fen, idi kerub fedin, age fe di, idi dimutatakesin.

Negur ĩ, yogon lo, Israel tamo kayau nigin ye fen, Moses ifenen. Sain idi gerere tuan diyõ mog, naa taka bun, Moses arei Sinai dedig anĩ bun ibod ken, Negur bun kosẽ youf nigin an iselen. Negur yogo Moses bun yaor fe fen, in ĩtãfiya anidi ĩ irokenen. Negur ĩtãfiya ten odug bagai anidig, meein uruwo bun itotodin, meein eneidi anĩ, Negur nẽ salafat namen modoũ fateul anĩ bun dinodin. Moses ĩ Sinai arei bunem isi bure fel fen, ĩ ĩtãfiya ganan itotodin. Ĩtãfiya eneidi are Buk Baibel bun buk faif uyulil ditoton anidi, are ‘Moses ne buk’ dedig anĩ bun dibodok; eneidi are Jenesis, Eksodas, Levitikas, Namba ado, Diuteronomi. Lo buneg ulouf.

Tamo taka Negur nẽ ĩtãfiya anĩ taka be ifodulouf, are anĩ mosor. Are tamo nẽ lo fiya bun, safina naal be odugeg, anĩ Negur mala bun fau de mosor.

Moul aa bun tamal sumeĩ biya, Mer, are safina taka, anĩ moni odug bagaim naa sur difedig, ĩ sumeĩg meli bagai. Ĩ aa taka nẽ gaula anĩ dale fen, anĩ dinodig. Juda idi anĩ nem marasin dinodig, marasin are tamo darau odug bagai to yalouf nigin, ĩ yenẽya nigin age fedig. Idi laa tamo nẽ bouwa buru mũ difouf nigin dodok difouf nigineg marasin anĩ kabĩ difenẽdig.

Juda neid tobonunã bun, idi kesu monog ganan gogũ difef, are naa eit ilele di, idi bouwa gudũ fiya anĩ age difedig. Are Negurem enei idi age difouf nigin Abraham irokenen. Jenesis 17:9-14 bun ulouf.

Mulũ ileya are, tamo ĩ Juda tamo yeya anĩ nẽ uris. Juda tamo kayau nigin ‘idi mulũ ileya bun temeleid’ dedig.

Sain tamo kayau biya od uyulil wogõ den, Juda tunĩ an, idi eig den, tamo taka ĩ Juda sã anĩ, ĩ kristen taka wõ youf nigin oro fouf are, ĩ uyulil mulũ ilauf. Enei anĩ ĩ Juda tamo yeya anĩ nẽ uris, age fe di, dum ĩ kristen taka wõ youf. Pol anĩ to yo yen. Ĩ Galesia sios tamo kayau bun, pas anĩ nigin itotodin, ado modoũ musei tunĩ buneg. Ĩ iron, tamo taka ĩ isennẽya yaleya nigin oro fouf are, ĩ safina tekelei dogol de age fouf, are ĩ Jesus Kristus bun momoi youf dogol.

Buk Baibel nẽ itotoya bun, are Jon ĩ tamo kayau musei Jordan naanũ naan igunẽdin. Ĩ idi irokenẽdin, are idi nedi mosor bun tamal de waud falei ye fen, naan digũwauf, anĩ bunem, are idi waud falei yen anĩ, ganan keleĩ youf.

Tamo kayau idi Jesus Kristus nigin momoi def anidi atun, naan igũya are, aib taka ĩ kristen taka wõ yef anĩ tamo kayau ifelnẽdif nẽ uris.

Naan igũya nẽ gariya are:

Sain taka bun, kayau taka, Jesus ye bun wã fouf nigin moul irou isin. Moul enei nad bunem dinon, nad are aa spikenard dedig anĩ nẽ sumin.

Naman ĩ kusĩ tamo neid mudur taka nẽ yana, ĩ Siria kantri bun tamal. Ĩ Juda tamo sã. Ĩ kusĩ tamo odug bagai, anĩ ere, ĩ lepra guruma ado. Sain taka bun, ĩ profet Elisa bun ile fen, ĩ lepra guruma bun tamal el fiyẽf nigin to fiyen. Elisa ĩ Jordan naanũ ile fen, ĩ yogo sain seven naan igũwauf anĩ irokenen. Naman dõf age fen, age fe di, ĩ bouwa el fe biya len.

Jon 1:29, 36 bun, Jon naan igunẽdiya tamo, Jesus nigin, “Negur nẽ sipsip naal” yedig. Juda neid tobonunã bun, idi sipsip naal taka, Negur nedi mosor weder tu kalauf nigin, sesewi fiya nigin tõ dife isaikeledig. Sipsip naal nẽ naud anim, Negur nẽ lo fiya bun, idi fateul inenẽdig. Jesus ĩ Negur nẽ sipsip naal dedig, ere nigin, ada sã neda mosor nigin weder tu keleya anĩ talouf nigin, ĩ yogon mata sesewi fiya taka gen anĩ ifenen.

Negur nẽ Tempel anĩ Jerusalem, Israel nẽ taun odug an ibodon. Modoũ enei are Juda idi an dile, sifa naa odug sigigi dife fen, sesewi fediya ado ofa anidi Negur bun dinodig.

Tamo kayau Juda sã anidi tempel nẽ mayaĩ mayarẽ dogol diledig. Tempel namen bagai an, idi Negur nẽ safina fateul anidi dinodig. Yar ganan bun sain tekelei dogol, pris mudurem dogol modoũ anĩ bun iledig. Gabar odug taka modoũ fateul bagai anĩ nẽ bobog ileya bun dinolelen. Gabar enei anĩ, Jesus laa fen sain bun, muduronem serek fe isil ye bunen (Matyu 27:51; Mak 15:38; Luk 23:45). Enei are, sain anĩ bunem, tamo kayau ganan Kristus nigin momoi douf are, Negur idi ĩ wagen ileya nigin naab anĩ kã fen anĩ ifelnadaf.

Niniwe are taun yana, anĩ bun Negur profet Jona in biya od wogõ youf nigin sur fen. Buk Jona bun ulouf. Negur in od are eig fiya, idi ereb sesen anidi age difedig nigin, ĩ idi daũ fediyouf. Sain idi od enei karĩ den, idi maruid isi fen, waud falei yen. Anĩ nigin, Negur idi neid mosor nigin weder tu kel fen, idi to daũ fedin.

Noa ĩ kulu bagai ibodon. Tamo nẽ ibor Adam bunem garia inon, ĩ are namba nain ibor. Sain Noa tenebur ibodon, tenebur tamo kayau ganan ereb ereb sesen musei age difedig. Anĩ nigin, Negur ĩ, kuwei odug taka sur fe di, tenebur tamo kayau ganan ado ereb ereb ganan tenebur difaref anĩ daũ fediyouf nigin iron. Anĩ ere, Noa ĩ tamo biya, ĩ Negur nẽ od dõ fedig. Anĩ nigin, Negur Noa waag odug taka inouf nigin irokenen, Negur ĩ irokenen kilei bagai, waag age inouf nigin irokenen. Negur Noa in aiwa ado gere tar towo, nedi aiweid tar weim waag namen dilauf nigin irokenen, idi weim, gar, ninã fire fire bun monog tekelei ado gober tekelei, anĩ ere, gar, ninã tunĩ bun monog sewen ado gober sewen weim waag namen dilauf nigin irokenen. Noa ĩ, Negur od iron anĩ nigin momoi ye fen, ĩ Negur od ĩ irokenen kilei bagai age fen. Noa in tamo kayau geid waag namen dilele di, Negur uyẽ odug sur fen, age fe di, kuwei odug ilen. Arei mudu gananeg naan kerũ feledin. Tenebur tamo kayau tunĩ ganan dimutatakesin, anĩ ere, Noa ado in ibor tar are kel gei fedin.

Ogõ musei ilele di, naan isilelen, age fe di, teneub baban sagau kelen. Anĩ nigin, Noa in tamo kayau geid waag bun tamal kututũ desin. Age dife fen, Noa Negur bun sesewi fe fen, ĩ yana yalesen, ere nigin, Negur idi isennẽdin nigin. Negur baban kuwei taka age fiya, ĩ age fe di, to wõ youf nigin promis od iron. Ĩ walol are yogon promis od nẽ uris ye fen, promise od eig fiya wogõ yen, are sain enei bunem ilauf ganan bun, an naa, bõ, uyẽ saniya, gaa saniya, ifaya nẽ sain ado kusu fiya nẽ sain anidi ibodõf yen.

Paradis nẽ gariya are ‘kabĩ meli bagai.’ Modoũ meli bagai Iden, are gariya bun Negur Adam ado Eva an inenẽdin anĩ nigin Paradis dedig. Anĩ ere, Nu Testamen bun, Paradis nẽ gariya, are saa tano nẽ gariya de tekelei, are modoũ meli bagai an tamo kayau Jesus Kristus nigin momoi den anidi, dum idi gare douf bun, dilauf.

Pris idi Israel tamo kayau nigin de fen, Negur bun sesewi fiya difenẽdiyouf nigin Negurem igirnẽdin anidi. Jesus nẽ sain bun, idi Jerusalem Tempel bun sesewi fiya difenẽdidig. Pris idi Aron nẽ ibor bun digirnẽdidig (Aron bun ulouf), are Lewi nẽ ibor tar atun Aron nẽ ibor bun temeleid. (Lewi bun ulouf).

Pris mudur ĩ, pris idi atun odug bagai. Pris mudur ĩ, yar tekelei nẽ dogol ibodõf nigin digirnẽdidig, age de fen, anĩ baban pris taka digirnẽdig. Pris mudur im dogol Tempel nẽ modoũ fateul bagai namen iledig, are yogon mosor ado tamo kayau neid mosor yaleleya nigin Negur bun sesewi fiya ifenẽf nigin age fedig.

Pris atun pris odug dedig anidig dibodon. Pris odug idi are, pris mudur, pris ganan kulu pris mudur dibodon anidi ado, tamo yeneid adodo pris nẽ ibor bun temeleid anidi.

Profet are tamo taka ĩ, od Negur ĩ bun yaor fe irokenen anĩ wogõ yedig. Ĩ Negur nigin ye fen, od tamo kayau bun wogõ yedig.

Uruwa bun, Negur profet musei sur fedidin, are Samuel, Asaia ado Jeremaia age fediya. Idi bunem, Negur dum bun ereb wõ youf anĩ nigineg yaor fen. Yar musei Jesus Kristus fau wõya sã mog, idi in isiya nigin, ereb ereb musei ĩ age fediyouf nigin ado, ereb ĩ bun wõ youf anĩ nigin diron. Idi, Jesus Kristus tenebur tamo kayau es fediyouf nigin, fau baban kel isiya sã mog, ereb ereb musei teneub enei nẽ idikeleya naa bun wowã youf nigineg diron.

Rabi are yana Juda idi tise odug bagai be idi atun uyu irouya anĩ bun difenẽdig. Tamo aib ĩ kisi biya ado fen, yana adouf are, ĩ Rabi difiyẽdig. Rabi yana taka are Raboni, anĩ nẽ gariya Rabi de tekelei.

Kulu bagai, sain Israel tamo kayau, teneub Negur idi afenẽdiyouf yen anĩ bun dilauf nigin age difen, idi, tamo kayau teneub anĩ bun difaren anidi dile fen, naig de idi wal difediyouf nigin kisi dalouf nigin kofo tamo sur difedin. Rahab naabur kayau taka bouwa na sur fedig, ĩ teneub anĩ bun ibodõdig. Sain Israel kofo tamo an disin, kayau ĩ, idi isenneĩd fen, idi inokolnẽdin, ere nigin, kayau ĩ, Israel tamo kayau teneub de anĩ dalouf anĩ Negur nẽ oroya ye fen, momoi yen. Anĩ nigin, sain Israel tamo kayau teneub anĩ nẽ tamo kayau wal difedin, idi Rahab to dukesin, anĩ ere, idi, taun anĩ bun tamo kayau tunĩ ganan didenkesin. Kayau Matyu 1:5 bun irok anĩ, kayau de tekelei be, are ĩ de Jesus nẽ tubuid tar taka.

Rahel ĩ, Jakop ne kayau tar anidi taka, ĩ nigin Jakop wau fatuk bagai laa fedig. Rahel ĩ Josef ado Benjamin ado sineid, are Juda tamo kayau neid sineid tar ganan anĩ im ifaref.

Abraham ne naal Isak ne kayau anĩ Rebeka. Ĩ, Esau ado Jakop, idi urom aina anidi neid sineid. Esau uyulil wõ yen, anĩ ere, Jakop im anĩ Negurem ĩ uyulil wõ youf nigin igirnen, age fe di, ĩ bunem Juda idi ibor wowã den. Esau ado Jakop bun ulouf.

Rom are kantri Itali dedig anĩ nẽ taun odug. Jesus tenebur ibodon sain anĩ bun, Rom nẽ tamo kayau teneub tunĩ musei kusĩ bunem lei difen. Idi Israel anĩg wawal difeid fen, Israel tamo kayau anĩ ulum dirounẽdin. Anĩ nigin, Israel tamo kayau, Rom idi to oroid fen, nedi teneub bun idi dalelnẽdiyouf nigin waud yenen. Rom nẽ king, are Sisa dedig ĩ, sain anĩ bun, teneub ganan atun king odug bagai ibodon.

Sabat naa are naa odug bagai. Jenesis nẽ Buk bun ditoton are eig yef, Negur naa sigis anidi bun teneub kare fen, agef fen, naa sewen bun ĩ si inon, ere nigin, in kabĩ are bure felen. Negur iron, tamo kayau de naa sigis anidi bun dogol kabĩ dalouf, age de fen, naa sewen bun idi de si dino fen, Negur yana dalesauf.

Juda idi Sabat naa nigin lo musei adon. Idi dirõdig, tamo kayau de naa anĩ bun ereb kabĩ taka to dalouf, age de fen, tamo kayau lo anĩ difodulouf are, idi fatuk bagai namedidig. Age fiya nigin, sain Jesus Sabat naa bun tamo taka dagi ado el fiyen ado, sain Jesus nẽ dõ fiya tar Sabat naa bun kurukeis dãf nigin nonũ difedin, idi anĩ nigin waud sanen. Idi diron, are idi kabĩ dalef den.

Sadusia are Juda idi atun yeneid adodo neid mala taka. Idi kisi difedig, are tamo kayau, lo Negur Moses ifenen anĩ ado Juda neid tobonunã tunĩ ganan, tutuk bagai dõ difouf dedig. Idi Juda tamo neid mala taka Farisia gen (Farisia bun ulouf). Anĩ ere, idi sain musei Farisia tamo geid luwa diroudig, ere nigin, Farisia idi momoi def are, tamo taka ĩ laaf fen, baban mata kel fã youf def, anĩ ere, Sadusia enei to momoi dedig.

Saion are arei mudu taka anĩ bun Jerusalem taun anĩ dinon anĩ nẽ yana. Tempel anĩ arei mudu anĩ bun ifaren, are modoũ anĩ, taun ganan nẽ fateul bagai. Sain tunĩ, Saion yana are Jerusalem ganan nigin anĩ dirõdig. Sain tunĩ, Saion yana Jerusalem ilun ibodok anĩ nigin dirõdig, are saa tano yogo anĩ. Are modoũ anĩ, Negur ibodok nẽ an anĩ nẽ uris. (Hibru 12:22, Revelesen 14:1)

Kulu bagai, Israel tamo kayau gerere tuan diyon sain anĩ bun, Negur Moses salafat fire bagai taka inouf nigin irokenen. Ĩ salafat anĩ, gabar biya ado gaar gabar bunem naig fiya inouf nigin ĩ de tutuk bagai ĩ irokenen. Are an idi bar itenẽya nẽ bokis, meein uruwo Negur anidi bun ĩtãfiya ten itotodin ado, Negur nẽ safina tunĩ salafat anĩ namen dibodok.

Juda idi salafat enei bun Negur yana dalesedig, age dife fen, idi Negur bun an sesewi fediya difenẽdidig, are age ifaref ile Solomon Tempel inon sain anĩ bunen.

Salfa are safina bailuya taka anĩ, yã bale ado el fe uu ye fen, sumeĩ totol ado. Anĩ bunem, gan nẽ pauda dinodig.

Buk Psalm are Negur bun yana yaleseya seg nẽ buk. Dawid tamo kayau tunĩ geid seg eneidi ditoton, are idi naig de fen, Negur nigin waud laaf fen, ĩ bun yana dalesef anĩ dirõf nign.

Samaria are teneub akor taka nẽ yana. Samaria tamo kayau idi Juda tamo kayau bagai sã, ere nigin, kulu bagai, idi kayau Juda sã anidi lei difedin. Anĩ nigin, Juda bagai anidim idi lai difedidig.

Kulu bagai, Samson ĩ Juda neid uyu iroudiya taka ibodon. Negurem ĩ bouwa buru nẽ totol odug anĩ ifenen.

Samuel ĩ profet odug taka. Im anĩ, Dawid Israel neid king ibodõf nigin moul mudur bun fi felen. Ĩ anĩ tamo kayau neid uyu irouya odug taka.

Sara ĩ Abraham ne kayau. Kayau ĩ yar musei dalin, anĩ ere, sain ĩ tubau bagai mog, ĩ Isak gõ fen. Abraham bun ulouf.

Satan ĩ kaa sesen neid uyu irouya. Ĩ Negur nẽ kiwai, ĩ tamo kayau idegnẽdi di, idi sane age difouf nigin age fedig. Ĩ tamo kayau Jesus Kristus nigin momoi def anidi, idi kulu ereb sane age difen anĩ nigin toku wedereid fokõ fenẽdi di, idi nedi mosor nigin Negur weder to tu kelen gen kisi difouf nigineg age fedig. Satan ĩ anig ‘Devil’ oo ‘tenebur enei nẽ king’ dedig.

Sifa naa are naa tunĩ odudug anĩ bun, Juda idi yar ganan bun sigigi difedig. Sifa naa enidi bun, idi Negur nẽ biya fiya ado kulu Negur idi nigin ereb age fedin anĩ nigin kisi difedig. Sifa naa nẽ yana tunĩ are eig fiya:

Sifa naa enei bun, Juda idi, kulu bagai, tamo taka Judas Makabius dedig ĩ, Negur nẽ Tempel haiden idi amuyẽ dinon anĩ amuyẽ sã ino fen, tamo kayau an Negur yana dalesauf nigin Tempel dodok fen anĩ karĩ deledig. Ĩ enei age fen, ere nigin, urug tamo idi ado kiwai tamo anidim, Tempel bun dile fen, amuyẽ dinodin.

Juda idi sifa naa enei nigineg age de dirõdig, ‘Lalan nẽ Sifa Naa’. Age fiya nigin, sain anĩ bun, Jesus iron, “Aya teneub enei nẽ Lalan.” (Jon 9:5)

Pasa nẽ sifa naa dedig are Juda idi nigin, sifa naa odug bagai. ‘Pasa’ yana nẽ garia, are wawal fiya. Sifa naa enei bun, Juda idi, kulu bagai, Isip nẽ kafĩ fiya teneub bun tamal, naig de diyalelen anĩ karĩ deledig. Sain anĩ bun, Negur, Isip neid fõ mugu mugu bun kesu monog matu idenkesidiyouf nigin in engel sur fen. Anĩ are, ĩ Juda neid fõ mugu mugu bun idi sipsip naal taka dukeis fen, sipsip naal nẽ naud anĩ sukar nẽ tor bun ororo difediyouf nigin irokenẽdin. Age dife di, sain engel naud anĩ ile fen, ĩ fõ anĩ wal fen, agef fen, an kesu taka to yukesin.

Anĩ nigin, Pasa nẽ sifa naa bun, Juda idi, fõ mugu mugu bun, sipsip naal taka dukeis fen, weim sipsip naal dõ don.

Bret yis sã nẽ sifa naa are, Pasa nẽ sifa naa de anĩ bun, Juda idi sigigi difedig. Sain Juda idi Isip teneub bun tamal diya dilelen, idi tari fiya nigin sain taka sak ile, idi bret fau to gẽ ye mog anĩ yã bun dinodig. Anĩ nigin, sifa naa enei bun, Juda idi, bret yis sã anĩ dõ don.

Sifa naa enei bun, Juda idi kulĩ dedig, ere nigin, saaf kusu fiya anĩ mogo kisi felen. Idi salafat dinoid fen, uub tekelei sifa naa nigin an difaredig, age fe di, idi naab anĩ bun, nedi tubuid tar Negur idi teneub afenẽdiyouf yen anĩ fau yaleya sã mog, idi gerere tuan 40 yar diyo ken, salafat bun dibodon anĩ karĩ deledig.

Pentikos nẽ sifa naa anĩg are Juda idi nigin sifa naa odug bagai. ‘Pentikos’ yana nẽ garia are fifti. Juda idi, Pasa naa wõ ye naa fifti ilele di, sifa naa enei sigigi difedig.

Pentikos nẽ sifa naa bun, Juda idi wit kususu fiya nigin sigigi difedig. Juda idi, kulu bagai, Negur Sinai arei bun Juda idi nigin Lo anĩ Moses ifenen nigineg karĩ deledig. Gama, Pentikos are Kristen tamo kayau, naa enei bun Awa Uur Fateul uyulil tamo kayau Jesus Kristus bun momoi den anidi bun isin anĩ nigin karĩ deledig. (Aposel 2:1-4)

Sinai are arei mudu taka nẽ yana, an Moses ibodon sain, Negur in ĩtãfiya ĩ ifenen. Moses bun ulouf.

Sinamon, are aa taka nem dinodig. Ĩ sumeĩ meli bagai fen, ĩ na yaleya nigin moni odug bagai. Tamo kayau moul sumeĩ meli bagai youf nigin, anĩ moul ado falei difedig, moul anĩ, tamo kayau mudureid bun fi difelediyouf nigin age difedig, are sain tunĩ tamo laa fen anĩ bouwa buneg inoya nigin age difedig.

Baibel nẽ sain bun, Juda idi sipsip kulatun fiya nẽ suma age difedig are eig fiya:

Sisa ĩ, are Rom tamo kayau neid king nẽ yana. Rom tamo kayau teneub ganan kusĩ bunem wawal difeid fen, uyu diroun. Sisa ĩ, idi ganan anĩ nẽ odug. Rom tamo kayau neid king ilun difaref ganan anĩ, are Sisa dedig.

Sodom are taun taka Lot ibo ibodon anĩ nẽ yana (Lot bun ulouf). Taun taka Gomora dedig anĩ Sodom taun non ifaren. Sodom ado Gomora taun neid tamo kayau idi ereb sesen musei age difen. Anĩ nigin, Negur, taun anidi, yã nem daũ feledin.

Solomon ĩ Dawid ne naal. Ĩ Israel tamo kayau neid king odug taka.

Sain taka bun, Negur imĩya bun, Solomon bun isi fen, ere safina ege luwa anĩ ĩ ifenẽf anĩ orof anĩ to fiyen. Solomon ĩ, in tamo kayau sã el fe ulum iroukenẽdiyouf nigin Negur kisi biya ĩ ifenẽf nigin ĩ irokenen. Negur kisi biya odug Solomon ifenen, ĩ king ganan anidi bun kisi biya bagai anĩ wõ yen. Negur Solomon safina odug musei bagaig anĩ ifenen, momoi, ĩ safina musei anĩ kisi feleya bagai.

Solomon im anĩ uyulil Negur nẽ Tempel inon. Tempel anim Negur nẽ salafat uruwa bun Juda idi Negur yana dalesedig anĩ nẽ modoũ yalen. Tempel anĩ gai meli bagai.

Sus are waitou odug Grik idi yana dalesedig anĩ nẽ yana. Sain tunĩ, tamo kayau ĩ anĩ Jupita dedig. In soosi tamo are Hermes dedig.

Kulu bagai, kel yaleya tamo anĩ Negurem yogon tamo kayau nedi mosor bun tamal kel gei fediyouf nigin sur fouf yen anĩ, profet taka Daniel dedig anĩ kel yaleya tamo anĩ nẽ yana agef irõdig. Anĩ nẽ gariya are Kristus de tekelei (Kristus bun ulouf). Jesus yogo nigin yana eneĩ agef irõdig. Sain Jesus yogo nigin aya Tamo Naal yef, are ĩ anĩ tamo taka Negurem sur fiyen ado, ĩ anĩ Negur bun tamal megeir yalen anĩ yef. Ĩ tamo bagai, are ĩ anĩg Negur.

Wau faleiya nẽ gariya bagai are:

Yis are safina bret inoya nigin kabĩ difenẽdig. Safina anim, bret gẽ youf nigin age fedig. Yis naalem dogol bret odug biya musei inoya nigin kabĩ difenẽdig.