8
Namu ngateva pristi tale ouna inangari niaippooa ngaitauaa
1 Liuena voto ami aauliaa isaa avalua toko, va ia o pristi eteva namuu ia etokatoka, me ghe toka siola tale pai muenna ativilau ta God epona liu. 2 Me euungu tale voto ateva manga ia, lo ateva ale kandisi manga ia koronna ia Vau ngepona ghe atinginaie saela, karika va taumattu.
3 Ila akapa namuu tale pristi etoa la suisuitoongainila tani taula voto ta God me tani ghelei aiaavusuvusuena. Liuna avalua o me ghe masinala va lo ateva tee oia ie tee ghe tau sae teva voto tani tau lao ta God. 4 Arova ia tale kosa ateva oia, karika aue ghe pristi, poli taumattu ang ghe tokala laghe tautau sae voto ta God, nongina inangari nipaopao ghe auliaala. 5 Kol 2:17; Hib 9:23; Eks 25:40.Laghe uungu tale voto ateva manga ia taataraane me tootoona llo voto epona liu. Liuna avalua o me God ghe auliaala kiena Moses nau ang ghe anna tani ghelei ale manga ateva kandisi ia, ghe uela etana va, “Utani tara amasina va ughelei isaa akapa voto nongina taataraa lo ateva ughe taraiela tale motouru.” 6 Hib 7:22.Ta poli niuungu Iesu ghe ghaala elaulau uneira pristi etoa, me inangari niaippooa ngaitaua ngateva Iesu ghe gheleiela elaulau pokane ateva, poli etokatoka tale masi inangari nialokoi.
7 Poli arova karika righi sesa tale aitiutiu eteva inangari niaippooa ngaitauaa, karika righi uunguaane aiaaghaluene ateva tani koliaa aitiutiu eteva. 8 Jer 31:31-34.Poli God ghe tarala kaluira sesa voto taumattu ngatoa me ghe uela va,
“Vau ngepona ghe auliaala va: Nau too emaemae
aue aghelei ouna ateva inangari niaippooa ngaitauaa
tee taumattu nge Israeli etoa me aJiuda ngatoa.
9 Karika aue enongina lo ateva inangari niaippooa ngaitauaa
aghe gheleiela ta tuvuira atoa
nau aghe kunela nimaira
me aghe katulaa vellala tani kasu vuli eIjip,
poli karika laghe aaimuli emasina tee kalughu inangari niaippooa ngaitauaa,
aghe liula vilighi etaira,
Vau ngepona ghe aulia ngaotula.
10 Vau ngepona ghe mene aulia ngaotula va, vara isaa o nau elange, inangari niaippooa ngaitaua ngateva aue agheleia ta taumattu nge Israeli etoa,
ia avalua toko va:
Aue aghatoka kalughu inangari nipaopao tale nannaaira
me aue apitia tale urunguitaniira
me aghi aue kapuira Goto ieghi,
me ila aue la kapughu taumattu.
11 Karika teva taumattu aue emene apasunga ta lo ateva etokatoka akalakalangina teeia
o ta teva tuena o nengane tani ue va, ‘Ukila Vau ngepona ateva.’
Poli ila akapa aue la kilaieghi,
lo atoa matuutuliena ila me lo atoa karika matuutuliena ila.
12 Ta aue akkaluaa sesa gheeleiaaira,
me karika aue atoka nannaa kaluira ssavoto.”
13 Nau ghe aauliaa ia oia inangari niaippooa ngaitaua ngateva va ouna ia, ghe gheleila aitiutiu eteva ghe vullaiela poli ang ghe pokala me aue ekapa.