KOROSI
Khe Por Korosiŋ Ndi Khergi Gap
Khe fharav ganɨnga buni khare.
Korosi, ana Esia ŋgu bakɨme fhain ki ŋgu bakɨ mbe ma. Ana Efesus ŋgu bakɨme hara ki. Por nduara Korosi ŋgu bakɨmen sios khavgi fhuvara. Ana khaŋ muuŋgi, ana Efesusan kav, gumgi mbari ga sarigim, mbe Fhe Bakɨmen ŋaara mbuav, ana buni vhuuiŋ ndiav mba fhaiŋ ga ruigi. Mbe rua vov vhɨra Korosin vegi.
Por kama mueŋ mbararagim, gumgi mbari, mbe Korosin guigira Zisas khothɨgi gumgi gu mbigi, mbe mbe ndɨkndɨgi ŋgim, mbe guigira Zisas khothɨgi ndɨkndɨgi pham vui. Ana maaŋ muuŋgiap, mbararagiap, kha gava khergiap, mbe guigira Zisas khothɨgi ndɨkndɨgi havharɨ zav mba gavar mbe ndi mbarigi. Ana mba gava khergiap, mbe ndi mbav, khaŋ mbe nzuai, Krais, ana za kha bigi gari guman pan ma. Krais nduara taagip nza ndigirga. Nza harigi tuavi zɨn ŋgɨrga nta nzan kurarga tuktɨgi fhuvara. Mba tuavi, nza nta zɨn ŋgɨrga, nza Krais thav, samra ŋgɨgɨrga. Fhe Bakɨme Kraisan panan, ana za kha bigi ga muuŋgi. Kraisan panan Fhe Bakɨme taagip za kha bigi ndir zav mbui. Krais nzan vhen kim, nza tɨvir ŋkaa zɨn vui. Nza Krais tɨvira zɨn vui.
Por kha gava khergiap, guma phuni ga nɨɨŋgim, mani ana ndigap, Korosin vugi. Tikikus gum Onesimus, mani mba gava ndigap vugi. Kha guma Onesimus, Por Firemon ndi gava kherav, ana ana nzuav buni vhɨrver Firemon ga suaŋgi.
Krais, ana za kha bigir pan ma. Fhe Bakɨme kɨrɨ tɨvi gum anan tɨvi guigira ana ki.
1
1-2 Ef 1.1Ro 1.7Gu Por, gu Krais Zisas farasarigi ŋaara guma. Ana vuzvugar, Fhe Bakɨme anan ŋaarar muun zav nan farasarigi. Na phorgap guigira Zisas khothɨgi guma Timoti, ŋka kha gava khergiap, nde Fhe Bakɨmen gumgi gu mbigi, nde Korosi ŋgu bakɨmen kav, nza phorgap guigira Krais khothɨgap ana zɨn vui. Ŋka kha gavar nde ndi mbai. Nza Ndia Fhe Bakɨme fura nden korar muuŋv, ndava mɨɨtɨgar nden nɨɨŋrim, nde kɨri.
Mbe Korosiŋ, mbe guigira Zisas khothɨgi.
3 Ef 1.15-16; Fi 1.3; Fm 1.5; Hi 6.10Nza nde nzuav Fhe Bakɨme phorga nzuav, nza zazera nde ndɨkndɨgap, anan ndikndigap ana phorga nzuai. Ana nza bakɨme Zisas Kraisan Ndia ma. 4-6 2 T 4.8; 1 Pi 1.4Mk 4.8; 16.15; Zo 15.16; Ef 3.2; 1 Pi 5.12Nza khaŋ muuŋgiap, nden kameŋ mbararagi. Nde Zisas Kraisan buna vhuueŋ nden hɨgim, nde ne mbararagiap, nde Fhe Bakɨme nden mbuigi bigir vhuuiŋ, nta Hevenan ki, nde ne khothɨgap, nde nta ndirgen rarga ki. Nde maaŋ muuŋgiap, nde guigira Krais Zisas khothɨgap, nde wari wo ndavir za mba Fhe Bakɨmen gumgi gu mbigi ga ndɨɨv, wari ki. Mbe za kha nuianan mba buna vhuueŋ bun nzuaim, gumgi gu mbigi vhɨrve mba buna vhuueŋ khothɨgap, ne zɨn vov, mben tɨvi nzerigi. Mba khesharigi tɨvara nden rɨgar hɨgi. Nde fharigi raara, nde Zisas Kraisan buna vhuueŋ mbararagiap, nde guigira Fhe Bakɨme fhura nde kora muuŋgi kora muumbara kaŋgi. 7 Kor 4.12; Fm 1.23Epafras mba buna vhuuen nde khɨvim, nde ne kaŋgi. Epafras, ana Kraisan ŋaara guman vhuuŋ ma. Ana nza phorga ŋgari guma ma, nza maaŋ muuŋgiap, guigira ana vuzvugi. Ana nzan kurkurav, Kraisan ŋaara vhuuŋra mbui. 8 Ana nde Fhe Bakɨmen gumgi gu mbigi, nde guigira wari won ndavi ndi mbe ndɨɨi tɨv, ana ne bun nza suaŋgi. Mba tɨv, Fhe Bakɨmen Ŋina Ŋaar nduara mba tɨvar nde nɨɨŋgi.
Por havharar Korosin nɨɨn zav Fhe Bakɨme phorga nzuai.
9 Zo 15.16; Ro 12.2; 1 Ko 1.5; Ef 1.8-9; 1.15-17; 2.10; 4.1; 5.10; 5.17; Fi 1.9; 1.27; 1 Te 4.1; Hi 13.21Nza fharigi raar, nza nde mbui tɨva vhuun kameŋ mbararagiap, nza zazera nden kurkura zav Fhe Bakɨme phorga nzuai. Ana nden kurkurarim, nde tuituigip ana vuzvuk kaŋgirga. Fhe Bakɨmen Ŋina Ŋaar ndɨkndɨgi vhuuiŋ kaŋgirga, ndɨkndɨgi gum ndɨkndɨgi vhuuin za nden nɨɨŋrim, nta guigira nden kɨrga. 10 Maaŋ muuŋgirga, nde guigira Guma Bakɨmen gumgi gu mbigi rui tɨvar muunga, ana guigira nde mbui tɨvi, ana za nta vuzvugirga. Nde mbarkɨrga ŋaarir vhuuiŋ, nde ntan muunga. Nde maaŋ muuŋv, tuituigip Fhe Bakɨme kaŋgip, mba ndɨkndɨk khaŋ tɨgɨp havhargip, ŋgɨv, kɨvgirga. 11-12 Ef 1.11; 1.18-19; 3.16; 4.2Nza Fhe Bakɨme phorga nzuav, nza kha suambara mbui, ana won ŋkasŋkar vhuuŋ bakɨmen, ana za mbar kɨrga ŋkasŋkagir nden nɨɨnga, nde thɨgɨ havhargip, simtɨgi ndiv, mbarav kɨv, mba simtɨgi ganɨrim, nta ŋgɨv vhɨzɨrga. Nde ndikndigɨp, Dara phorgɨ suaŋv, anan ndikndigɨrga. Ana nden kurkurigim, nde tɨvir vhuuiŋra zɨn vui. Nde maaŋ mbuim, ana nden mbuigi bigir vhuuiŋ, nde nta ndirga. Nde Fhe Bakɨmen gumgi gu mbigi phorgɨp mba bigi ndirga. Nde mba gumgi gu mbigi phorgɨp Fhe Bakɨmen, vhava ŋaarar kɨrga. 13 Ru 22.53; Ef 2.2; 1 Te 2.12; 2 Pi 1.11Nza fhum gɨngɨna ŋkasŋkar vhen kim, ana gɨngɨna ŋkasŋka vhen taagia nza ndigap, nza ndim, won Kama zɨn fagi. Mba Kam, ana guigira won ndavar ana nɨɨŋgi. 14 Ef 1.6-7Fhe Bakɨmen Kam, ana taagia nza ndigap, nza muuŋgi tɨvi mbatɨgi, ana nta vhɨzgi.
Por Krais mbui tɨvi ga nzuav, won ŋaara nzuai.
15 Zo 1.18; 2 Ko 4.4; Hi 1.3Nza guma the Fhe Bakɨme gangirga tuktɨgi fhuvara. Fhe Bakɨmen Kam, ana ara fara muuŋgi. Ana Fhe Bakɨmen Kama bar ma. Ana za kha Fhe Bakɨme muuŋgi bigi gari guman pan ma. 16 Zo 1.3; 1.10; Ro 8.38; 11.36; Hi 1.2; 2.10; 1 Pi 3.22Mba Kaman farver panan, Fhe Bakɨme kha Hevenan ki bigi ga mbuav, kha nuianan ki bigi ga muuŋgi. Ana nza kha gari bigi ga mbuav, nza gari fhuv bigi ga muuŋgi. Nza gari fhuv bigi khare. Ana han enseri havhari, ŋiniŋgi havhari, tori gu mbarɨvi, ana za mba bigi ga muuŋgi. Mba bigi za anan Kaman farver panan hɨgi, ana wo nzuav mba bigi ga muuŋgi. 17 Zo 1.1-3; 8.58; 17.5; 1 Ko 8.6Mba bigi, nta zumgum hɨgi, Krais fhum ki. Ana mba bigi ga mbuim, anan ŋkasŋkar nta nzerara wari wo ki ŋanin kav, nta wari tɨgap ŋgari. 18 FG 26.23; 1 Ko 15.20; 15.23; Ef 1.10; 1.22-23; VB 1.5Ana siosan pan ma, sios ana kharɨk ma. Ana nduara zazera kɨrɨ tɨva vhuun sios ga ndɨɨi nɨɨŋge ma. Ana za kha vhɨzgi gumgi gu mbigi kharav, rimgiap, fharav khavgi guma ma. Maaŋ muuŋgiap, ana nduara za kha bigi gari guman pan ma. 19 Zo 1.16; 3.34; Kor 2.9Fhe Bakɨme khueŋ vuzvugi, ana kɨrɨ tɨv gum anan tɨvi, nta za anan Kaman kɨrga. Maaŋ muuŋgiap, Fhe Bakɨme guigira ana phorga ki. 20 Ro 5.1; 2 Ko 5.18; Ef 1.7; 1.10; 2.13; 2.16; 1 Zo 2.2Fhe Bakɨme za kha nuianan ki bigi gum Hevenan ki bigir muuŋgirim, nta za ana phorgɨp ndava bavira kɨrgeŋ vuzvugi. Ana maaŋ muuŋgiap fhura Krais garim, ana khanarareŋ ga ntorgap rimgi. Ana khanarareŋ ga ntorgim, ana vɨzɨn siasuagim, Fhe Bakɨme nza panan ana kegi tɨvi, ana nta mbevigim, nza ana phorgap ndava bavira ki.
21 Ro 5.10; Ef 2.12; 4.18; Ta 1.15-16Nde fhum Fhe Bakɨme thav samra ki. Nde panan ana kegap, maaŋ muuŋgiap, nde ndɨkndɨgi mbatɨgi ga mbuav, tɨvi mbatɨgir ana mbui. 22 Ef 2.14-16; 5.27; 1 Te 4.7; Ta 2.14Krais khanarareŋ ga ntorgap rimgi. Ana mba tɨva muuŋgim, Fhe Bakɨme nde phorgap ndava bavira ki. Ana maaŋ muuŋgiap, ana nde ndigap, won han zi. Nde ana nɨman ŋgaravra kɨv, ana nɨman simtɨk thueŋ kɨrga fhu. 23 Mk 16.15; Ef 3.17; 1 T 3.16; Hi 3.14Nde guigira Zisas khothɨgi tɨva suirav, guigira havhargip thɨgɨri. Nde muuŋv kɨrim, bigɨn thueŋ nde ŋgɨrgɨrim, nde mba mbararagi buna vhuueŋ, nde nen rarga ki, nde ne tharga. Gu Por, gu mba buna vhuueŋ bun nzuai ŋaara guma kav, nza mba buna vhuueŋ bun za kha nuianan ki gumgi gu mbigi ga suaŋgi.
Por Korosin kurkurigi.
24 Ro 5.3; 2 Ko 1.5-6; Ef 1.23; 3.13; Fi 3.10; 2 T 1.8Gu ntigem, nden kurkurav zaa ndi ne nzuav ndikndigi. Krais won siosan kurkurav ndigi zaagi vhɨzgi fhuvara. Sios, ana Krais kharɨk ma. Ntigem, Kraisan sios mba zaagi ndirga. Gu Kraisan sios fɨga mueŋ ma. Gu ana siosan kurkurav won fhavara mba zaagi mbari ndi. 25 Ef 3.2; 3.7-8Fhe Bakɨme nduara nan farasarigim, gu siosan ŋaara guma kav, gu nden kurkurigi. Gu guigira za Fhe Bakɨme buna vhuueŋ bun suanga ŋaar ki. 26 Ro 16.25-26; 1 Ko 2.7; Ef 3.3-5; 3.9-10; 2 T 1.10Fhum tugivigen mba buneŋ zorga kim, mba gumgi gu mbigi mba buneŋ kaŋgi fhu. Ntigem, mba buneŋ ne guigira Zisas khothɨgi gumgi gu mbigi nɨman kɨrar hɨgi. 27 Ro 9.23; 2 Ko 2.14; Ef 1.18; 3.8; 1 T 1.1Fhe Bakɨme wo vuzvugara, ana mba zorga ki buneŋ, ana nen nza guigira Zisas khothɨgi, ana nen nza khɨvigi. Ana maaŋ muuŋgim, nza kaŋgi mba buneŋ, ne guigira buna vhuueŋ ma, ne za kha nuianan ki gumgi gu mbigir kurkurarga. Mba zorga ki buneŋ khaŋ muuŋgi, Krais nde phorga ki. Ana nde ndigirim, nde ŋgɨp, ana phorgɨ kɨv, ana bigir vhuuiŋ nde Hevenan nta ndirga, nde nen rarga ki. 28 Ef 4.13; 5.27Maaŋ muuŋgiap, nza Kraisan buna vhuueŋ bun za kha gumgi ga nzuai. Nza ndɨkndɨgi vhuuiŋ zɨn vuav, nza mba bunen mbe nzuav mbe khɨvav, kama havharara mbe nzuai. Ne khaŋ muuŋgi, nza khueŋ vuzvugi, mbe guigira khaŋ tɨgɨp havhargip guigira Zisas khothɨgi gumgi gu mbigi kɨrga, nza mben kov, Fhe Bakɨme han ŋgɨrga. 29 FG 20.20; 20.27; Ef 3.7; 3.20; Fi 4.13Maaŋ muuŋgiap, Krais na ndɨɨi ŋkasŋka bakɨme, gu ŋaara mbatɨga mbuav, mba ŋaara mbui.

1:1-2 Ef 1.1

1:1-2 Ro 1.7

1:3 Ef 1.15-16; Fi 1.3; Fm 1.5; Hi 6.10

1:4-6 2 T 4.8; 1 Pi 1.4

1:4-6 Mk 4.8; 16.15; Zo 15.16; Ef 3.2; 1 Pi 5.12

1:7 Kor 4.12; Fm 1.23

1:9 Zo 15.16; Ro 12.2; 1 Ko 1.5; Ef 1.8-9; 1.15-17; 2.10; 4.1; 5.10; 5.17; Fi 1.9; 1.27; 1 Te 4.1; Hi 13.21

1:11-12 Ef 1.11; 1.18-19; 3.16; 4.2

1:13 Ru 22.53; Ef 2.2; 1 Te 2.12; 2 Pi 1.11

1:14 Ef 1.6-7

1:15 Zo 1.18; 2 Ko 4.4; Hi 1.3

1:16 Zo 1.3; 1.10; Ro 8.38; 11.36; Hi 1.2; 2.10; 1 Pi 3.22

1:17 Zo 1.1-3; 8.58; 17.5; 1 Ko 8.6

1:18 FG 26.23; 1 Ko 15.20; 15.23; Ef 1.10; 1.22-23; VB 1.5

1:19 Zo 1.16; 3.34; Kor 2.9

1:20 Ro 5.1; 2 Ko 5.18; Ef 1.7; 1.10; 2.13; 2.16; 1 Zo 2.2

1:21 Ro 5.10; Ef 2.12; 4.18; Ta 1.15-16

1:22 Ef 2.14-16; 5.27; 1 Te 4.7; Ta 2.14

1:23 Mk 16.15; Ef 3.17; 1 T 3.16; Hi 3.14

1:24 Ro 5.3; 2 Ko 1.5-6; Ef 1.23; 3.13; Fi 3.10; 2 T 1.8

1:25 Ef 3.2; 3.7-8

1:26 Ro 16.25-26; 1 Ko 2.7; Ef 3.3-5; 3.9-10; 2 T 1.10

1:27 Ro 9.23; 2 Ko 2.14; Ef 1.18; 3.8; 1 T 1.1

1:28 Ef 4.13; 5.27

1:29 FG 20.20; 20.27; Ef 3.7; 3.20; Fi 4.13

© 2001 PBT